Read KO E TOH TAPU KATOA TONGA KO SĀKALAIA 14 Bible Online

KO SĀKALAIA 14 - KO E TOH TAPU KATOA TONGA bible

KO SĀKALAIA 14

¹VAKAI, ‘oku hoko mai ha ‘aho ma‘a Sihova, ‘a ia ‘e tufa ai ho‘o vete ‘i ho loto kolo. He te u tānaki ‘a e ngaahi pule‘anga kotoa ki Selusalema ke tau;

²pea ‘e hamu ‘a e kolo, pea ‘e vete ‘a e ngaahi fale, pea tohotoho‘i ‘a e kau fefine, pea ko e vaeua ‘o e kolo ‘e ‘alu pōpula. Ka ko hono toe ‘o e kakai ‘e ‘ikai tu‘usi mei he kolo.

³Toki hā‘ele atu ‘a Sihova, ‘o tau mo e ngaahi pule‘anga ko ia, ‘o hangē ko e taimi ‘o ‘ene tau ‘i he ‘aho ‘o e fepaki ofi.

⁴Pea ko hono to‘ukupu kelekelea ‘e tu‘u ‘i he ‘aho ko ia ‘i Mo‘unga ‘Ōlive, ‘a ia ‘oku ‘i he hāngai ki Selusalema ‘i hahake, pea ‘e fahi ua ‘a Mo‘unga ‘Ōlive ‘i loto ki hahake mo hihifo, ko e tele‘a lahi ‘aupito; pea ‘e ngatolo ‘a e vaeua ‘o e mo‘unga ki he tokelau mo e vaeua ki he tonga.

⁵Pea te mou hola ki he tele‘a ‘o hoku ongo mo‘unga na;[34] he ‘e a‘u ‘a e tele‘a ‘o e ongo mo‘unga ki ‘Ēsili; ‘io, te mou hola hangē na‘a mou hola telia ‘a e mofuike ‘i he taimi ‘o ‘Ūsaia ko e Tu‘i Siuta. Pea ‘e hā‘ele mai ‘a Sihova ko hoku ‘Otua, ‘oku ha‘ofia ‘a e ‘Afiona ‘e he kau tapu kotoa.

⁶Pea ‘i he hoko ‘a e ‘aho ko ia, ‘e ‘ikai maama ia; ‘e fakapoipoila ‘a e ngaahi me‘a huhulu.[35]

⁷Pea ko e ‘aho ko ia ‘e taha ‘ona, ko e ‘aho ‘iloa kia Sihova: ‘e ‘ikai ‘aho, pea ‘e ‘ikai pō; ka ‘i he faifai pea hoko ‘a e taimi efiafi, ‘e toki maama.

⁸Pea ‘e hoko ‘i he ‘aho ko ia, ‘e ‘alu atu ha vai mo‘ui mei Selusalema; ko e vaeua ‘e tafe ki he tahi hahake, pea ko e vaeua ki he tahi hihifo: ‘e fai ai pē ‘i he sama mo e uinitā.

⁹Pea ‘e hoko ‘a Sihova ko e Tu‘i ‘o Māmani kātoa: ‘i he ‘aho ko ia ‘e ‘i ai ha taha‘i Sihova pē, pea ko hono huafa ko e taha‘i Huafa.

¹⁰‘E liliu ‘a e fonua kotoa ke hangē ko ‘Alapā, mei Kepa ki Kīmoni, ‘a ia ‘oku tu‘u ki he potu tonga ‘o Selusalema; kae fakamā‘olunga ‘a e kolo, ‘o tu‘u ai pē ‘i hono potu, he fai mei he Matanikolo ‘o Penisimani ‘o a‘u ki he feitu‘u ‘o e Motu‘a Matanikolo, pea ki he Matanikolo ‘o e Tuliki; mei he Taua foki ‘o Hananeli ki he ngaahi tata‘o‘anga kālepi ‘o e tu‘i.

¹¹Pea ‘e fai ai ha nofo, pea ‘e ‘ikai kei ‘i ai ‘a e fakamala‘ia: pea ko e nofo ‘a Selusalema ko e nofo falala.

¹²Pea ko eni ‘a e mala, ‘a ia ‘e taa‘i ‘aki ‘e Sihova ‘a e ngaahi kakai kehekehe kuo fai tau mo Selusalema: ‘e popo honau kakano lolotonga ‘oku nau kei tu‘u ‘aki honau va‘e, pea ‘e ‘auha honau ngaahi fo‘i mata ‘i honau ‘ana, pea ‘e ‘aunga honau ‘elelo ‘i honau ngutu.

¹³Pea ka hoko ‘a e ‘aho ko ia, ‘e ai ha fu‘u faka‘ohovale ‘a Sihova kiate kinautolu; pea ‘e puke ‘e ē ‘a e nima ‘o ē, pea ‘e hiki tā ‘a e nima ‘o ē ki he nima ‘o ē.

¹⁴Pea ko Siuta foki ‘e kau ‘i he tau ‘i Selusalema; pea ‘e tānekinga ‘a e koloa ‘o e ngaahi pule‘anga kotoa pē takatakai, ‘a e koula mo e siliva mo e kofu, ‘o lahi ‘aupito.

¹⁵Pea ‘e tatau mo ia ‘a e mala ‘e hoko ki he hoosi, ki he miuli, ki he kāmeli, pea ki ke ‘asi; ‘io, ki he fanga manu kotoa pē ‘e nofo ‘i he ngaahi ‘apitanga ko ia; ‘e tatau mo e mala ko ē.

¹⁶Pea ‘e hoko ‘o pehē, ‘ilonga ha toe ‘i he ngaahi pule‘anga na‘e ha‘u ke tau‘i ‘a Selusalema, te nau ‘alu hake ‘i he ta‘u kotoa pē ke hū kia Kingi Sihova Sāpaoti, pea ke fai ‘a e kātoanga fale lou‘akau.

¹⁷Pea ka ai ha ni‘ihi tokua ‘i he ngaahi fāmili ‘o māmani ‘oku ‘ikai fie ‘alu hake ki Selusalema ke hū kia Kingi Sihova Sāpaoti, pea ‘e ‘ikai tō ha ‘uha kiate kinautolu.

¹⁸Pea kapau ‘e ‘ikai ‘alu hake ‘a e fāmili ‘o ‘Isipite, ‘o ‘ikai te nau omi, pea ‘e ‘ikai hoko ‘a e ‘uha kiate kinautolu; ‘e hoko ‘a e mala, ‘a ia ‘e taa‘i ‘aki ‘e Sihova ‘a e ngaahi pule‘anga ‘oku ‘ikai ke ‘alu hake ke fai ‘a e kātoanga fale lou‘akau.

¹⁹Ko e me‘a ko ia ‘e hoko ko e hia ‘a ‘Isipite mo e hia[36] ‘a e ngaahi pule‘anga kehekehe ko e ‘ikai te nau ‘alu hake ke fai ‘a e kātoanga fale lou‘akau.

²⁰‘I he taimi ko ia ‘e tu‘u ‘i he ngaahi fafangu ‘o e fanga hoosi, ‘o pehē, Tāpuhā kia Sihova; pea ko e ngaahi kulo ‘i he fale ‘o Sihova ‘e tatau mo e ngaahi pēsoni afuhi ‘i he mata ‘ōlita.

²¹‘Io, ‘e hoko ‘a e kulo kotoa ‘i Selusalema mo Siuta ko e koto tāpuhā kia Sihova Sāpaoti: pea ‘e omi ‘a e kakai kotoa ‘oku fai feilaulau, ‘o to‘o ha taha ke fai ‘enau haka; pea ‘e ‘ikai kei ai ha Kēnani ‘i he fale ‘o Sihova Sāpaoti, ‘oka hoko ‘a e taimi ko ia.