Read KO E TOH TAPU KATOA TONGA KO SĀKALAIA 2 Bible Online

KO SĀKALAIA 2 - KO E TOH TAPU KATOA TONGA bible

KO SĀKALAIA 2

¹PEA U hanga hake, ‘o fakasio, pea tā ko e toko taha ena ‘oku ne to‘o ha afo fua.

²Pea u pehē ange, Ko ho‘o ‘alu ki fē? Pea ne tali mai, Ke fua ‘a Selusalema, ke vakai pe ko e hā hono māukupu, pea mo e ha hono lōloa.

³Pea ‘iloange ko e ‘āngelo na‘e lea ‘iate au na‘a ne ‘alu atu, pea hū ki tu‘a ha ‘āngelo ‘e taha ke fakafetaulaki kiate ia.

⁴Pea lea ‘e ia ki ai, Lele, lea ki he talavou ko ena, ‘o pehē, ‘E nofo‘ia ‘a Selusalema ‘o hangē ko e kolo ta‘e‘aa‘i, ko e me‘a ‘i he lahi ‘o e tangata mo e manu ‘oku ‘i ai.

⁵Pea ko au — ko Sihova eni mei he Ta‘ehāmai — te u hoko ko hono ‘ā afi takatakai, pea te u ‘i loto kolo ko hono kolōlia.

⁶Tala atu, tala atu, mou hola mei he fonua tokelau — ko Sihova ia mei he Ta‘ehāmai — he kuo u fakamovete kimoutolu ‘o hangē ko e matangi ‘e fā ‘o e langi — ko Sihova ia mei he Ta‘ehāmai.

⁷Tala atu, ke ke fakaofi koe, si‘i Saione, ‘a koe ‘oku nonofo mo e ta‘ahine ko Pāpilone.

⁸He ko e folofola eni ‘a Sihova Sāpaoti,[2] Kuo ne fekau au ki he ngaahi pule‘anga na‘e vete kimoutolu, ke mamahi‘i ‘a e kolōlia; he ko ia ‘oku ne ala kiate kimoutolu ‘oku ne ala ki he tama‘imata ‘o ‘ene ‘Afio.

⁹He ko au eni ‘oku ou tātākalo hoku nima kiate kinautolu, pea te nau hoko ko e me‘a ke vete ‘e kinautolu na‘e ngāue kiate kinautolu: pea te mou ‘ilo kuo fekau au ‘e Sihova Sāpaoti.

¹⁰Hiki mavava, mo fakafiefia, si‘i ta‘ahine ko Saione: he ko au eni ‘oku ‘alu atu, pea te u nofo ‘i ho lotolotonga — ko Sihova ia mei he Ta‘ehāmai.

¹¹Pea ‘e lahi ‘a e ngaahi pule‘anga te nau luva kinautolu kia Sihova ‘i he ‘aho ko ia, pea te nau hoko ko hoku kakai: pea te u nofo ‘i ho lotolotonga, pea te ke ‘ilo ko Sihova Sāpaoti ne fekau mai au kiate koe.

¹²Pea ‘e tofi‘a ‘aki ‘e Sihova ‘a Siuta mōno ‘inasi ‘i he kelekele tapu, pea te ne toe fili ‘a Selusalema.

¹³Sī! ke fakalongo ‘a e kakano kotoa ‘i he ‘ao ‘o Sihova: he kuo ne ofo hake mei hono ‘afio‘anga tāpuhā.