Read KO E TOH TAPU KATOA TONGA KO SĀKALAIA 3 Bible Online

KO SĀKALAIA 3 - KO E TOH TAPU KATOA TONGA bible

KO SĀKALAIA 3

¹PEA ne tuku ke u sio kia Siosiua ko e taula‘eiki lahi ‘oku ne tu‘u ‘i he ‘ao ‘o e ‘āngelo ‘a Sihova, pea ‘oku tu‘u ‘a Sētane[3] ‘i hono to‘omata‘u ke hopo mo ia.

²Pea folofola ‘a Sihova[4] kia Sētane, Sētane, ke ‘itengia koe ‘e Sihova; ‘io, ke ‘itengia koe ‘e Sihova, ‘a ia ‘oku toka ‘ene fili ki Selusalema: ‘ikai ko e potupotu‘i afi eni kuo hamusi mei he afi?

³Pea ko Siosiua kuo kofu ‘i he ngaahi kofu ‘ulifōfō, he‘ene tu‘u ‘i he ‘ao ‘o e ‘āngelo.

⁴Pea hanga ‘e ia, ‘o folofola kiate kinautolu na‘e fakafe‘ao, ‘o pehē, Hu‘i meiate ia ‘a e ngaahi kofu ‘uli. Pea ne folofola ki he toko taha ko ē; Vakai, kuo u ‘ave ho‘o kovi meiate koe, pea te u fakakofu ‘aki koe ‘a e ngaahi kofu kātoanga.

⁵Pea u pehē,[5] Ke nau ‘ai mu‘a ha ao[6] ma‘a ki hono ‘ulu. Ko ia, na‘a nau ‘ai ha ao ma‘a ki hono ‘ulu, mo nau ‘ai hono ngaahi kofu; ‘oku kei tu‘u pē ‘a e ‘āngelo ‘a Sihova.

⁶Pea na‘e fakapapau ‘a e ‘āngelo ‘a Sihova kia Siosiua, ‘o pehē:

⁷Ko e folofola eni ‘a Sihova Sāpaoti, Kapau te ke fou ‘i hoku ngaahi ‘alunga, pea kapau te ke tauhi hoku fatongia, pea te ke toki fai fakamaau ‘i hoku fale ‘a koe foki, pea te ke tauhi foki hoku ngaahi loto‘ā, pea te u ‘atu kiate koe ha apaapangofua‘anga fakataha mo e kau fakafe‘ao ni.

⁸Fanongo mu‘a, Siosiua, taula‘eiki lahi, ‘a koe mo ho kau fakafe‘ao; tala atu, ko e tu‘unga tangata taipe ‘a e fa‘ahinga na; he ko au eni ‘oku ou fakapū atu ‘eku tamaio‘eiki ko Huli.

⁹Tala atu, ko e maka ena kuo tuku ‘i he ‘ao ‘o Siosiua; ‘oku ai ha fitu‘i fo‘i fofonga ki ha taha‘i maka;[7] ko au eni ‘oku ou tongi hono tongi — ko Sihova Sāpaoti ia mei he Ta‘ehāmai — pea te u ‘ave ‘a e kovi ‘o e fonua ko ia ‘i ha ‘aho pē taha.

¹⁰‘I he ‘aho ko ia — ko Sihova Sāpaoti ia mei he Ta‘ehāmai — ‘e tala kātoanga takitaha ki hono kaungā‘api, ke fai ki hono lolo vaine mo hono lolo fiki.