Read KO E TOH TAPU KATOA TONGA KO SĀKALAIA 6 Bible Online

KO SĀKALAIA 6 - KO E TOH TAPU KATOA TONGA bible

KO SĀKALAIA 6

¹PEA U toe hanga hake, ‘o fakasio, pea tā ko e faa‘i sāliote ena ‘oku hū ki tu‘a mei he vaha‘a ‘o e ongo mo‘unga; pea ko e ongo mo‘unga ko ia ko e ongo mo‘unga palasa.

²Ko e ‘uluaki sāliote na‘e hoosi kulokula; pea ko hono ua ‘o e sāliote na‘e hoosi ‘uli‘uli;

³pea ko hono tolu ‘o e sāliote na‘e hoosi hinehina; pea ko hono fā ‘o e sāliote ko e hoosi pulepule, ko e fa‘ahinga kaukaua.

⁴Pea u hanga ‘o fakatau folofola ki he ‘āngelo na‘e lea ‘iate au, ‘Ēī, ko e hā ena?

⁵Pea tali ‘a e ‘āngelo, ‘o ne folofola mai, Ko e faa‘i matangi[13] eni ‘o e langi, ‘oku ‘alu atu mei he‘enau fakafe‘ao ki he ‘Eiki ‘o māmani kātoa.

⁶Ko e sāliote ‘oku ‘i ai ‘a e hoosi ‘uli‘uli ‘oku hū kitu‘a ia ki he fonua tokelau; pea ko e hinehina ‘oku hū ki tu‘a, ‘o muimui ki ai; pea ko e pulepule ‘oku hū ki tu‘a ki he fonua saute.

⁷Pea ‘i he hū ki tu‘a ‘a e fa‘ahinga kaukaua, na‘a nau kole ke nau ‘alu ‘o ‘a‘ahi holo ‘i māmani; pea ne folofola ange, ‘Alu, ‘o ‘a‘ahi holo ‘i māmani. Ko ia na‘a nau fe‘alu‘aki ‘i māmani.

⁸Pea ne kalanga kiate au, ‘o ne fakamatala mai, ‘o pehē, Sio, ko kinautolu ‘oku hū ki tu‘a ki he fonua tokelau kuo nau fakanonga hoku laumālie ‘i he fonua tokelau.

⁹Pea na‘e hoko ‘a e folofola ‘a Sihova kiate au, ‘o pehē,

¹⁰Ke ke ma‘u ha ni‘ihi ‘o e ha‘a fakahee‘i meia Heletai, meia Topaia, pea meia ‘Ītaia; pea ke ‘alu koe ‘i he ‘aho ko ia, ‘o hū ki he fale ‘o Siosaia foha ‘o Sefanaia, ‘a ia kuo nau a‘u ki ai mei Pāpilone.

¹¹Pea ke to‘o ha siliva mo ha koula, ‘o ke ngaohi kalauni ‘aki, ‘o ke ‘ai ki he ‘ulu ‘o Siosiua foha ‘o Siosateki, ko e taula‘eiki lahi.

¹²Pea ke lea kiate ia, ‘o pehē, Ko e folofola eni ‘a Sihova Sāpaoti, Ko ena ‘a e toko taha ‘oku ui ko Huli; pea te ne huli hake mei hono kelekele, pea te ne langa ‘a e temipale ‘o Sihova.

¹³‘Io, ko ia ia te ne langa ‘a e temipale ‘o Sihova, pea ko ia ia te ne fua ‘a e lāngilangi, pea te ne nofo mo pule ‘i hono taloni; ‘io, te ne hoko ko e taula‘eiki nofo taloni; pea te na fa‘ufa‘ufono ke ai ‘a e melino.

¹⁴Pea ko e ngaahi kalauni ‘e tuku mo‘o Hēlemi,[14] pea mo‘o Topaia, pea mo‘o ‘Ītaia, pea mo‘o Heni[15] foha ‘o Sefahia, ke fai‘aki ha fakamanatu ‘i he temipale ‘o Sihova.

¹⁵Pea ko si‘i kakai mama‘o te nau omi ‘o langa ‘i he temipale ‘o Sihova, pea te mou ‘ilo ko Sihova Sāpaoti ia ne fekau au kiate kimoutolu. Pea ‘e hoko ia, kapau te mou fakaongo mo‘oni ki he le‘o ‘o Sihova ko homou ‘Otua.