Read KO E TOH TAPU KATOA TONGA KO SĀKALAIA 9 Bible Online

KO SĀKALAIA 9 - KO E TOH TAPU KATOA TONGA bible

KO SĀKALAIA 9

¹KO E folofola ‘a Sihova, ko e kavenga mei he Ta‘ehāmai ki he fonua ‘o Hatelaki, pea ko hono tō‘anga ‘a Tāmasikusi: (he ‘oku fofonga ‘a Sihova ki ha‘a tangata[22] fakataha mo e matakali kehekehe ‘o ‘Isileli):

²ko Hēmati foki ‘e feholoi mo ia; ‘a Taia mo Saitoni neongo[23]

³ko e poto lahi, Seuke, he na‘e langa ‘e Taia hano talitau‘anga, ‘o ne fokotu‘u siliva hangē ko e efu, mo e koula mo‘onia hangē ko e pela ‘o e hala.

⁴Vakai, ‘e puke ia ‘e ‘Ātonai, pea te ne taa‘i hono mālohinga ‘i tahi; pea ko e kolo ‘e keina ‘e he afi.

⁵‘E sio ki ai ‘a ‘Asikeloni, ‘o ne manavahē; mo Kesa foki, ‘o ne mamahi ‘aupito; ‘a ‘Ekiloni foki, he kuo ne mā ‘i hono faka‘amanakinoa‘i: pea ‘e mole ‘a e tu‘i mei Kesa, pea ko ‘Asikeloni, ‘e ‘ikai nofo‘ia.

⁶Pea ‘e nofo‘ia ‘a ‘Asitoti ‘e he tupukovi, pea te u tu‘usi ‘a e fielahi ‘a e kau Filisitia.

⁷Pea te u ‘ave ‘ene ngaahi me‘a toto mei hono ngutu, mo ‘ene ngaahi me‘a fakalielia mei hono vaha‘a nifo, pea ko ia foki te ne nofo ko e toenga ma‘a hotau ‘Otua: ‘io, te ne hoko hangē ha hingoa ‘eiki ‘i Siuta, pea tatau ‘a ‘Ekiloni mo ha‘a Siepusi.[24]

⁸Pea te u hunuki hoku tēniti koe‘uhi ko hoku fale, telia ‘a e hōsitē, telia ‘a ia ‘oku laka atu mo foki: pea ‘e ‘ikai toe laka atu ke fai kiate kinautolu ha taha fakaehaua: he ko e taimi ni kuo u sio ‘aki hoku mata.

⁹Tome‘e ke lahi, ta‘ahine Saione; Hiki mavava, ta‘ahine Selusalema: Ko ena ho tu‘i ‘oku me‘a mai kiate koe; Ko e faitotonu ia mo fai fakamo‘ui foki: Ko e ‘Eiki fa‘a kātaki, pea ‘oku ne heka ki ha ‘asi, ‘Io, ki ha ki‘i manu ko e tama ‘a ha ‘asi fefine.

¹⁰Pea te u tu‘usi ‘a e sāliote mei ‘Ifalemi, mo e hoosi mei Selusalema, pea ‘e motuhi ‘a e kaufana tau; pea te ne tala melino ki he ngaahi pule anga, pea ko ‘ene pule ‘e fai mei tahi ki tahi, pea mei he Vaitafe ki he ngata‘anga ‘o māmani.

¹¹Ko koe foki, ko e me‘a ‘i ho‘o toto fuakava‘ia kuo u tuku atu ho‘o kau pōpula mei he lepa ta‘ehano vai.

¹²Mou foki ki he talitau‘anga, ‘a e kau ha‘i ‘e he ‘amanaki: Na‘a mo e ‘aho ni ‘oku ou tala atu Te u fakafoki kiate koe ‘a e lōua.

¹³He kuo u teke ‘a Siuta ma‘aku kaufana, Mo ‘Ifalemi ma‘aku ngahau: Pea te u ue‘i hake ho ngaahi foha, si‘i Saione, Ke fai mo ho ngaahi foha, ‘e Kalisi: Pea te u ngaohi koe hangē ko e heletā ‘a ha helo.

¹⁴Pea ‘e hā ‘a Sihova ‘i ‘olunga ‘iate kinautolu, Pea ‘e ‘alu atu ‘ene ngahau ‘o hangē ko e ‘uhila: Pea ‘e ifi talupite ‘e ‘Ātonai Sihova, Pea te ne hā‘ele atu mo e ngaahi ‘ahiohio ‘o e Tonga.

¹⁵Ko Sihova Sāpaoti te ne fakamalumalu kinautolu mei ‘olunga; Pea te nau keina atu, Pea te nau malaki ‘a e ngaahi maka ‘o e makatā, Pea te nau inu, ‘O longoa‘a hangē ha inu uaine. Pea te nau fonu hangē ko e ngaahi pēsoni afuhi, Hangē ko e ngaahi nifo ‘o e ‘ōlita.[25]

¹⁶Pea ‘e fakamo‘ui kinautolu ‘i he ‘aho ko ia ‘e Sihova ko honau ‘Otua, ‘Oku hangē ha tākanga hono kakai: He ko e ngaahi makakoloa ‘o e kalauni kinautolu, ‘Oku tapa mei ‘olunga ‘i hono kelekele.

¹⁷‘Oi seukeseuke ‘ene tu‘umālie! Pea seukeseuke ‘ene faka‘ofo‘ofa! ‘Oku fakakaukaua ‘a e kau talavou ‘e he uite Mo e kau finemui ‘e he uaine.