Read KO E TOH TAPU KATOA TONGA KO MALAKAI 2 Bible Online

KO MALAKAI 2 - KO E TOH TAPU KATOA TONGA bible

KO MALAKAI 2

¹PEA ko eni, ko e tu‘utu‘uni ni ‘oku kau kiate kimoutolu, ‘a e kau taula‘eiki.

²Kapau ‘e ‘ikai te mou fakaongo, pea kapau ‘e ‘ikai te mou ‘ai ki homou loto, ke fakalāngilangi‘i hoku hingoa — ko Sihova Sāpaoti eni — te u tuku atu kiate kimoutolu ‘a e mala, pea te u fakamala‘ia ho‘omou ngaahi tāpuaki; ‘io, kuo ‘osi ‘eku fakamala‘ia ia, koe‘uhi ‘oku ‘ikai te mou momo‘i ‘ai ki homou loto.

³Ko au eni te u tukitala‘i ‘a e pulopula, koe‘uhi ko kimoutolu, pea te u pani kinoha‘a homou mata, ‘a e kinoha‘a ‘o ho‘omou ngaahi kātoanga; pe ‘e ‘ave kimoutolu ki he potu ‘oku ‘i ai ia.

⁴Pea te mou toki ‘ilo kuo u tuku atu ‘a e tu‘utu‘uni ko eni kiate kimoutolu, koe‘uhi ke hoko[2] ia ko ‘eku kovinānite mo Līvai — ko Sihova Sāpaoti ia.

⁵Ko ‘eku kovinānite na‘e fai mo ia ko e koto mo‘ui mo e melino; pea na‘a ku ‘ange kinaua kiate ia ke ō mo e ‘apasia, pea na‘a ne ‘apasia kiate au, ‘o ne ongo‘i mamafa hoku hingoa.

⁶Ko e lao mo‘onia na‘e ‘i hono ngutu, pea na‘e ‘ikai ‘ilo ha kovi ‘i hono loungutu: na‘a ne takaua mo au ‘i he melino mo e anga totonu, pea ne fakatafoki ‘a e tokolahi mei he kovi.

⁷He ko e taau ‘o e ngutu ‘o e taula‘eiki ke tauhi ‘a e ‘ilo, pea ke ‘eke ‘e he kakai ‘a e lao mei hono fofonga: he ko e faifekau ia ‘a Sihova Sāpaoti.

⁸Ka ko kimoutolu kuo mou hiki mei he hala: kuo mou fakahumu ha tokolahi ‘aki ‘a e lao; kuo mou fakaka‘anga ‘a e kovinānite ‘o Līvai — ko e folofola ia ‘a Sihova Sāpaoti.

⁹Ko ia ko au foki ‘oku ou ngaohi kimoutolu ko e fa‘ahinga ‘oku ta‘etoka‘i, mo mā‘ulalo ‘i he kakai kotoa, ko e tuha ‘o e ‘ikai te mou tauhi hoku ngaahi ‘alunga, ka mou hūmataniu ‘i he lao.

¹⁰‘Ikai ‘oku taha pē ‘a e tamai ‘atautolu? ‘ikai ko e taha‘i ‘Otua na‘e ngaohi kitautolu? Ko e hā ‘oku tau kākaa‘i ai takitaha hono tokoua, he ngaohi ko e me‘a noa ‘a e kovinānite ‘a hotau tupu‘anga?

¹¹Kuo fai kākā ‘a Siuta, pea ‘oku ai ‘a e me‘a fakalielia ‘oku fai ‘i ‘Isileli, pea ‘i Selusalema; he kuo maumau‘i ‘e Siuta ‘a e tāpuhā ‘o Sihova, ‘a e me‘a ‘oku ‘ofa ki ai ‘e he‘ene ‘Afio, pea kuo ne mali mo ha ‘ōfefine ‘o ha ‘otua muli.

¹²‘E tu‘usi ‘e Sihova ‘a e tangata ‘oku fai pehē, ‘A e o‘i mo e tali,[3] mei he ngaahi tēniti ‘o Sēkope, mo ia foki ‘oku ‘atu ha feilaulau kia Sihova Sāpaoti.[4]

¹³Mo e toe me‘a ko eni kuo mou fai: ho‘omou pani ‘a e ‘ōlita ‘o Sihova ‘aki ‘a e lo‘imata, ‘aki ‘a e tangi mo e māpuhoi, ‘a ē ā ‘oku ‘ikai te ne kei hāngai fofonga ai ki he feilaulau, pe tali fie tali mei homou nima. Ka ‘oku mou pehē,

¹⁴Koe‘uhi ko e hā? Koe‘uhi ko e fakamo‘oni ‘a Sihova ‘i he vaha‘a ‘o‘ou mo e uaifi ‘o ho‘o talavou, ‘a ia kuo ke fai kākā ki ai; ka ko ho kaume‘a ia, pea ko e uaifi na‘a ke fuakava ki ai.

¹⁵Pea ‘ikai na‘a ne ngaohi ha toko taha tofu pē? Ka na‘e toe ‘i he‘ene ‘Afio ‘a e laumālie.[5] Pea ko e hā na‘e toko taha ai pē? Ko ‘ene feinga ke ai ha hako faka-‘Otua.[6] Ko ia, mou lama homou laumālie, ke ‘oua na‘a ai ha kākā ‘e fai ki he uaifi ‘o ho‘o talavou.

¹⁶He ‘oku fehi‘a ‘a ‘ene ‘Afio ki he vete — ko e folofola ia ‘a Sihova ko e ‘Otua ‘o ‘Isileli. Seuke, ‘oku ne pani ‘aki hono kofu ‘a e fakamālohi — ko e folofola ia ‘a Sihova Sāpaoti — ko ia mou lama homou laumālie, ‘o ‘oua ‘e fai kākā.

¹⁷Kuo mou fakakina ‘a Sihova ‘aki ho‘omou lau. Ka ‘oku mou pehē, Kuo mau fakakina ia ‘i he hā? ‘I ho‘omou pehē, “‘Ilonga ha taha ‘oku faikovi, ‘oku hōifua ai ‘a e finangalo ‘o Sihova; ‘io, ko kinautolu ia ‘ene manako;” mo e lau ko eni, “Ko e fē tū ‘a e ‘Otua ‘o e fakamaau?”