Read KO E TOH TAPU KATOA TONGA Mātiú 1 Bible Online

Mātiú 1 - KO E TOH TAPU KATOA TONGA bible

Mātiú 1

¹KO E tohi hohoko ‘eni ‘o Sīsū Kalaisi, ‘a ia ko e Hako ‘o Tēvita mo e Hako ‘o ‘Epalahame.

²Ko e hako ‘o ‘Epalahame ‘a ‘Aisake; pea ko e hako ‘o ‘Aisake ‘a Sēkope; pea ko e hako ‘o Sēkope ‘a Siuta mo hono fototehina;

³pea ko e hako ‘o Siuta ‘a kelesi mo Sala, ‘a ia ko ‘ena fa‘ē ‘a Tema; pea ko e hako ‘o Fēlesi ‘a ‘Esilome; pea ko e hako ‘o ‘Esilome‘a ‘Ālame;

⁴pea ko e hako ‘o ‘Ālame ‘a ‘Aminatape; pea ko e hako ‘o ‘Aminatape ‘a Na‘asoni; pea ko e hako ‘o Na‘asoni ‘a Salemone;

⁵pea ko e hako ‘o Salemone ‘a Poasi, ‘a ia ko ‘ene fa‘ē ‘a Lēhapi; pea ko e hako ‘o Poasi ‘a ‘Ōpeti, ‘a ia ko ‘ene fa‘ē ‘a Lute; pea ko e hako ‘o ‘Ōpeti ‘a Sese;

⁶pea ko e hako ‘o Sese ‘a Tēvita ko e Tu‘i. Ko e hako ‘o Tēvita ‘a Solomone, ‘a ia ko ‘ene fa‘ē ‘a e fefine na‘e nonofo mo ‘Ūlaia;

⁷pea ko e hako ‘o Solomone ‘a Lehopoame; pea ko e hako ‘o Lehopoame ‘a ‘Apaia; pea ko e hako ‘o ‘Apaia ‘a ‘Asa;

⁸pea ko e hako ‘o ‘Asa ‘a Sihosafate; pea ko e hako ‘o Sihosafate ‘a Siolame pea ko e hako ‘o Siolame ‘a ‘Ūsaia,

⁹pea ko e hako ‘o ‘Ūsaia ‘a Siotame; pea ko e hako ‘o Siotame ‘a ‘Āhasi; pea ko e hako ‘o ‘Āhasi ‘a Hesekaia;

¹⁰pea ko e hako ‘o Hesekaia ‘a Manase; pea ko e hako ‘o Manase ‘a ‘Āmone; pea ko e hako ‘o ‘Āmone ‘a Siosaia;

¹¹pea ko e hako ‘o Siosaia ‘a Sekonaia mo hono kāinga — ko e kuonga ia ‘o e Fetuku ki Pāpilone.

¹²Pea hili ‘a e Fetuku ki Pāpilone pea ai ‘a e hako ‘o Sekonaia, ko Saletili; pea ko e hako ‘o Saletili ‘a Seluipepeli;

¹³pea ko e hako ‘o Seluipepeli ‘a ‘Apaiuta; pea ko e hako ‘o ‘Apaiuta ‘a ‘Īlaiakimi; pea ko e hako ‘o ‘Īlaiakimi ‘a ‘Esoa;

¹⁴pea ko e hako ‘Esoa ‘a Sētoki; pea ko e hako ‘o Sētoki ‘a ‘Ākemi; pea ko e hako ‘o ‘Ākemi ‘a ‘Elaiuti;

¹⁵pea ko e hako ‘o ‘Elaiuti ‘a ‘Eliesa; pea ko e hako ‘o ‘Eliesa ‘a Mātani; pea ko e hako ‘o Mātani ‘a Sēkope;

¹⁶pea ko e hako ‘o Sēkope ‘a Siosifa, ‘a ia ko e husepāniti ‘o Mele ko e fa‘ē ‘a Sīsū ‘a ia ‘oku ui ko Kalaisi.

¹⁷Ko ia ko e lau ‘o e ngaahi to‘utangata meia ‘Epalahame kia Tēvita ko e to‘utangata ‘e hongofulu mā fā; pea meia Tēvita ki he Fetuku ki Pāpilone ko e to‘utangata ‘e hongofulu mā fā; pea mei he Fetuku ki Pāpilone ‘o a‘u kia Kalaisi ko e to‘utangata ‘e hongofulu mā fā.

¹⁸Ko e anga ‘eni ‘o e tupu ‘a Sīsū Kalaisi. Kuo polo‘i ‘ene fa‘ē ko Mele kia Siosifa, ka ‘i he te‘eki ke na nonofo, na‘e hā kuo feitama ia ki he Laumālie Mā‘oni‘oni.

¹⁹Pea ko Siosifa ko hono hoa, neongo ko e tangata tauhi tu‘utu‘uni, ka na‘e ‘ikai te ne loto ke faka‘ilo ia, ka na‘a ne pehē ke tukuange fakafufū pē.

²⁰Pea lolotonga ‘ene fifili ki he ngaahi me‘a ni, ‘iloange na‘e hā kiate ia ha ‘āngelo ‘a e ‘Eiki ‘i he misi, ‘o ne pehē, ‘E Siosifa, hako ‘o Tēvita, ‘oua na‘a ke teteki ke ‘omi ‘a Mele ko ho uaifi; he ko ia kuo ne tu‘itu‘ia ai ‘oku mei he Laumālie Mā‘oni‘oni.

²¹Pea te ne ‘alo‘i ha tama, pea te ke fakahingoa ko Sīsū; he ko ia ia te ne fakamo‘ui hono kakai mei he‘enau ngaahi angahala.

²²Pea na‘e fai ‘eni kotoa pē, koe‘uhi ke fakamo‘oni ki he me‘a ne folofola‘aki ‘e he ‘Eiki ‘i he palōfita, ‘o pehē,

²³Vakai, ‘e feitama ‘a e tāupo‘ou, pea te ne ‘alo‘i ha tama, pea te nau fakahingoa ia ko ‘Imānuela, ‘a ia ko hono ‘uhinga, ‘oku ‘iate kitautolu ‘a e ‘Otua.

²⁴Pea kuo ofo ‘a Siosifa mei he‘ene mohe, na‘a ne fai ‘o hangē ko e fekau ‘a e ‘āngelo ‘a e ‘Eiki kiate ia, ‘o ne ‘omi ‘a hono uaifi:

²⁵pea na‘e ‘ikai te na fe‘iloaki kae‘oua ke ne ‘alo‘i ‘a e tama; pea na‘a ne fakahingoa ia ko Sīsū.