Read KO E TOH TAPU KATOA TONGA Mātiú 11 Bible Online

Mātiú 11 - KO E TOH TAPU KATOA TONGA bible

Mātiú 11

¹PEA kuo faka‘osi ‘e Sīsū ‘ene fai tu‘utu‘uni ki he kau Hongofulumāua ‘o ‘ene ako, na‘a ne hiki mei he potu ko ia ke faiako mo malanga ‘i honau ngaahi kolo.

²Pea fanongo ‘e Sione ‘i he pilīsone ki he ngaahi ngāue ‘a e Mīsaia, ‘o ne fekau atu ‘i he‘ene kau ako ke fehu‘i kiate ia,

³‘o pehē, Ko koe ia na‘e pehē ke ha‘u, pe te tau ‘amanaki ki ha taha kehe?

⁴Pea tali ‘e Sīsū ‘o ne pehē kiate kinaua, Mo ō ‘o fakahā kia Sione ‘a e ngaahi me‘a ‘oku mo fanongo mo mamata ki ai:

⁵‘oku ‘ā ‘a e kui, pea ‘eve‘eva ‘a e heke, ‘oku fakama‘a[9] ‘a e kilia, pea ongo ‘a e tuli, pea fokotu‘u ‘a e mate, pea malanga‘aki ‘a e ongoongo lelei ki he masiva:

⁶pea monū‘ia ā ka ko ia ‘oku ‘ikai tūkia ‘iate au.

⁷Pea kuo na ō, pea hanga ‘e Sīsū ‘o lea ki he kakai ‘ia Sione, Ko ho‘omou ‘alu atu ki he toafa ke siofi ‘a e hā? Ko ha kaho ‘apē ‘oku lulu‘i ‘e he matangi, ‘ō?

⁸Ka ko e hā nai na‘a mou ‘alu ke mātā? Ko ha tangata ‘apē na‘e kofu silika fakatafu‘ufu‘u, ‘ō? ‘Ē, ko e fa‘ahinga ‘oku kofu silika ‘oku ‘i he ‘api ‘o e ngaahi tu‘i.

⁹Ka ko ho‘omou ‘alu atu ki he hā? ke mamata ki ha palōfita? ‘āua; tala atu, ‘oku lahi ia ‘i ha palōfita.

¹⁰Ko eni ia na‘e kau ki ai ‘a e folofola; Vakai, ‘oku ou fekau atu ‘e au hoku fakamelomelo ke mu‘omu‘a kiate koe, ‘a ia te ne ngaohi ho hala mo‘ou.

¹¹Ko au ē, ‘oku ou tala atu, ‘I he kakai kotoa kuo fanau‘i ‘e he fefine kuo te‘eki ke fokotu‘u ha toko taha ‘oku lahi ‘ia Sione Papitaiso: ka neongo pe ko hai ‘oku faka‘ange‘ange ‘i he Pule‘anga ‘o Hēvani, ka ‘oku lahi ia ‘ia Sione.

¹²Talu meia Sione Papitaiso ‘o fai mai, mo e ‘ohofia ‘o e Pule‘anga ‘o Hēvani,[10] mo hono fa‘ao ‘e ha kau fakamālohi.

¹³He ko e kau Palōfita kotoa pē mo e Lao, ‘o a‘u mai kia Sione na‘a nau palofisai pē.

¹⁴Pea hei‘ilo pe te mou tali ‘a e lea, ka ko eni ia ‘a e ‘Ilaisiā ka hoko mai.

¹⁵Ko ia ‘oku telinga, ke ne ongo‘i.

¹⁶Ka te u fakatatau ki he hā ‘a e to‘utangata ni? ‘Oku hangē ko ha tu‘unga tamaiki ‘oku nofo ‘i he mala‘e, ‘o kalanga ange ki ha tamaiki kehe,

¹⁷‘o pehē, Ne mau tā nafa atu, kae ‘ikai te mou me‘e; pea mau hua ‘a e ‘oiauē, kae ‘ikai te mou sī fatafata.

¹⁸He na‘e ha‘u ‘a Sione ‘o ‘ikai keinanga mo faikava; pea nau pehē, ‘oku ‘iate ia ha tēvolo.

¹⁹Na‘e ha‘u ‘a e Fanautama ‘a Tangata ‘o keinanga mo faikava; pea nau pehē, ‘Isa, ko e tama fa‘a kai mo fa‘a inu kava, ko e kaume‘a ‘o e kau pōpilikane mo e kau angahala. Ka na‘e fakatonuhia ‘a Poto ‘e he‘ene fānau.

²⁰Toki hanga ‘e Sīsū ‘o valoki‘i ‘a e ngaahi kolo ‘a ia na‘e fai lahi ai ‘ene ngaahi ngāue mamafa, koe‘uhi na‘e ‘ikai te nau fakatomala.

²¹‘Oiauē koe, Kōlesini! ‘Oiauē koe, Petesaita! he ka ne fai ‘i Taia mo Saitoni ‘a e ngaahi ngāue mamafa ne fai ‘iate kimoua, ne loa pē ‘enau fakatomala, ‘o ‘ai tauanga‘a mo pani efuefu.

²²Ka ‘oku ou tala atu, ‘E kātakingofua ‘i he ‘Aho Fakamaau ‘a Taia mo Saitoni ‘iate kimoua.

²³Pea ko koe foki, Kāpaneume; ‘e hiki koe koā ki langi? ‘e hifo koe ki Hētesi: he ka ne momo‘i fai ‘i Sōtoma ‘a e ngaahi ngāue mamafa ne fai ‘iate koe, pehē ne tolonga ‘o a‘u mai ki he ‘aho ni.

²⁴Ka ‘oku ou tala atu, ‘E kātaki ngofua ‘i he ‘Aho fakamaau ‘a e fonua ko Sōtoma ‘iate koe.

²⁵‘I he taimi ko ia na‘e tali ki ai ‘e Sīsū, ‘o ne pehē, ‘oku ou fakatonuhia‘ia koe, ‘e Tamai, ko e ‘Eiki ‘o e langi mo māmani, ‘i ho‘o fufū ‘a e ngaahi me‘a peheni mei ha kakai ‘oku poto mo ‘ilo‘ilo, ka ke tatala ki ha kau tamaiki.

²⁶‘Io, ‘e Tamai: tonuhia ho‘o finangalo ke pehē.

²⁷Kuo tuku mai kiate au ‘e he‘eku Tamai ‘a e ngaahi me‘a fuli pē: pea ‘oku ‘ikai ha toko taha ‘e ‘ilo lelei ‘a e Foha, ngata pē ‘i he Tamai; kae‘uma‘ā ‘a e ‘ilo ‘o e Tamai ‘e ha taha, ngata pē ‘i he Foha, pea mo ha taha ‘e loto ‘e he Foha ke faka‘ilo ia ki ai.

²⁸Ha‘u kiate au, ‘a kimoutolu kotoa pē ‘oku fakaongosia mo mafasia, pea te u fakamālōlō kimoutolu.

²⁹‘Ai ‘eku ‘ioke kiate kimoutolu, pea mou ako ‘iate au: he ‘oku ou fa‘a kātaki mo anga fākatu‘a, pea te mou ‘ilo ha mālōlō ‘i homou laumālie.

³⁰He ko e ‘ioke ‘a‘aku ‘oku molū, pea ko e kavenga ‘a‘aku ‘oku ma‘ama‘a.