Read KO E TOH TAPU KATOA TONGA Mātiú 15 Bible Online

Mātiú 15 - KO E TOH TAPU KATOA TONGA bible

Mātiú 15

¹PEA na‘e toki ha‘u kia Sīsū mei Selusalema ha kau Fālesi mo ha kau sikalaipe, ‘o nau pehē,

²Ko e hā ‘oku laka kehe ai ‘a ho‘o kau ako pea mo e lau ‘a e mātu‘a? he ‘oku ‘ikai te nau fanofano honau nima ‘i he‘enau nofo ke kai.

³Ka ka tali ‘e ia, ‘o ne pehē kiate kinautolu, Ko e hā ‘oku mou laka kehe ai foki kimoutolu pea mo e lao ‘a e ‘Otua, koe‘uhi ko e lau fakaeono‘aho ‘amoutolu?

⁴He ko e tu‘utu‘uni ‘a e ‘Otua na‘e pehē, Faka‘apa‘apa ki ho‘o tamai mo ho‘o fa‘ē: mo ‘eni, Ko ia te ne lea kovi ki he‘ene tamai, pe ko ‘ene fa‘ē; ke ne mate tāmate‘i.

⁵Ka ‘oku mou pehē, ‘Ilonga ‘a ia te ne pehē ki he‘ene tamai, pe ko ‘ene fa‘ē ‘Ā, kuo tuku ki he ngāue ‘a e ‘Eiki ‘a e me‘a na‘a ku mei ‘aonga ai kiate koe:

⁶pea ‘e ‘ikai leva te ne fai ‘ene faka‘apa‘apa ki he‘ene tamai,[13] pe ko ‘ene fa‘ē: pea tā kuo mou fakata‘e‘aonga‘i ‘a e lao ‘a e ‘Otua ‘aki ho‘omou lau fakaeono‘aho.

⁷‘a e kau mālualoi! ‘E hala ā ‘a e palofisai ‘a ‘Aisea ‘iate kimoutolu, ‘o pehē,

⁸Ko e kakai ni ‘oku nau faka‘apa‘apa kiate au ‘aki honau loungutu, ka ko honau loto ‘oku fakamama‘o.

⁹Ka ko e kula noa ‘enau lotu mai; ‘oku nau ako ‘aki ha ngaahi tokāteline ‘a ia ko e ngaahi tu‘utu‘uni pē ‘a e tangata.

¹⁰Pea ne ui ange ‘a e kakai, ‘o ne pehē kiate kinautolu, Fanongo mai ka mou ‘ilo.

¹¹‘Oku ‘ikai ko e me‘a ‘oku hū ki he ngutu ‘oku ‘uli ai ha tangata, ka ko ia ‘oku hū mei he ngutu, ko eni ia ‘oku ‘uli ai ‘a e tangata.

¹²Pea na‘e toki ‘unu‘unu atu ‘e he kau ako, ‘o nau pehē ki ai, ‘oku ke mea‘i na‘e tūkia ai ‘a e kau Fālesi, ‘i he‘enau fanongo ki he lea na?

¹³Ka ka tali ‘e ia ‘o pehē, ‘Ilonga ha tō ‘akau, ‘a ia na‘e ‘ikai ko e fai ‘e he‘eku Tamai ‘oku ‘i he langi, ‘e ta‘aki fu‘u ia.

¹⁴Tuku ai pe ā ‘a kinautolu: ko e koto takimu‘a kui kinautolu, pea ka taki ‘e he kui ‘a e kui, te na fakatou tō ki ha luo.

¹⁵Pea tali ‘e Pita ‘o lea ki ai, Fakamatala mai ‘a e fakatātā ni.

¹⁶Pea ne pehē, ‘oku kei ta‘e‘ilo mo kimoutolu foki?

¹⁷Kuo te‘eki koā ke mahino atu, ka ‘ilonga ha me‘a ‘oku hū ki he ngutu, ‘oku mole ia ki he kete, pea toki laku atu ki tua‘ā?

¹⁸Ka ko e ngaahi me‘a ‘oku hū mei he ngutu ‘oku mei he loto; pea ko ‘ena pē me‘a ‘oku ‘uli ai ‘a e tangata.

¹⁹He ‘oku mei he loto ‘a e ngaahi fakakaukau pango, ‘a e ngaahi fakapō, ‘a e ngaahi faikovi ‘a alafia, ‘a e ngaahi fe‘auaki. ‘A e ngaahi kaiha‘a, ‘a e ngaahi tukuaki, ‘a e ngaahi laukovi ki he ‘Otua.

²⁰Ko eni ‘a e ngaahi me‘a ‘oku ‘uli ai ha tangata: ka ko e kai ta‘efanofano ‘oku ‘ikai ‘uli ai ‘a e tangata.

²¹Pea ‘alu ‘e Sīsū mei he feitu‘u ko ia, ‘o ne mole ki he ngaahi potu ‘o Taia mo Saitoni.

²²Pea ‘iloange, ko ha fefine Kēnani na‘e nofo ‘i he tafa‘ifonua ko ia, na‘a ne ‘alu atu ‘o kalanga, ‘o pehē, ‘E ‘Eiki, ko e Hako ‘o Tēvita, ke ke ‘alo‘ofa mai: ko si‘eku ta‘ahine ko e me‘a kovi ange hono ‘āvea.

²³Ka na‘e ‘ikai ha‘ane ki‘i lea ki ai. Pea ‘unu‘unu atu ‘ene kau ako, ‘o nau kole kia Sīsū, ‘o pehē, Faka‘ata‘atā ange ‘a e fefine, he ‘oku ne tangi toupili mai.

²⁴Ka ka tali ‘e ia ‘o ne pehē, Kuo ‘ikai fekau mai au, ka ki he fanga sipi kuo mole ‘i he hako ‘o ‘Isileli.

²⁵Pea ha‘u ‘a e fefine, ‘o tū‘ulutui kiate ia, ‘o ne pehē, ‘Eiki, tokoni mai.

²⁶Ka ka tali ‘e ia, ‘o ne pehē, ‘oku ‘ikai ngofua ke to‘o ‘a e mā ‘a e fānau, ‘o lī ki he fanga kulī.

²⁷Pea pehē ‘e he fefine, Ka na‘e fai, ‘Eiki; he ‘oku kai ‘a e fanga kulī foki he ngaahi momo ‘oku ngangana mei he tēpile ‘a honau ‘eiki.

²⁸Pea tali ‘e Sīsū ‘o ne pehē kiate ia, Fefine, tā ‘oku lahi ho‘o tui; ‘e fai ma‘au ‘a e me‘a ‘oku ke loto ki ai. Pea na‘e mo‘ui ‘ene ta‘ahine mei he feitu‘ula‘ā ko ia.

²⁹Pea kuo hiki ‘a Sīsū mei ai, na‘a ne ‘alu ‘o ofi ki he Tahi ‘o Kāleli; pea ne fai hake ki he mo‘unga, ‘o nofo hifo ai.

³⁰Pea ‘alu atu kiate ia ha ngaahi fu‘u kakai, ‘o nau omi mo kinautolu ha ni‘ihi na‘e heke, mo e ni‘ihi na‘e kui, mo e ni‘ihi na‘e noa, mo e ni‘ihi na‘e pai, pea mo ha tokolahi na‘e puke kehe: ‘o nau laku kinautolu ki he va‘e ‘o Sīsū, pea ne fakamo‘ui kinautolu.

³¹Pea ofo ai ‘a e kakai, he‘enau sio ki he noa ‘oku lea, mo e pai ‘oku mo‘ui, mo e heke ‘oku ‘eve‘eva, mo e kui ‘oku ‘ā: pea nau fakamālō‘ia ‘a e ‘Otua ‘o ‘Isileli.

³²Pea ui ange ‘e Sīsū ‘ene kau ako, ‘o ne pehē, ‘oku langa hoku fatu ‘i he ‘ofa ki he kakai ni, he ko e ‘aho tolu mālō ‘eni mo ‘enau nofo mai, pea ‘oku ‘ikai ha‘anau me‘a tokoni: pea ‘oku ‘ikai te u loto ke tukuange kinautolu fiekaia, na‘a ‘iloange te nau pōngingia ‘i he hala.

³³Pea pehē kiate ia ‘e he kau ako, Te tau ma‘u mei fē ‘i he lala ha mā pehē, ke totofu ai ha fu‘u kakai ‘oku pehē ni fau?

³⁴Pea pehē ange ‘e Sīsū, ‘oku fiha ho‘omou fo‘i mā? Pea nau tali, ‘oku fitu: mo e ngaahi mata‘i ika.

³⁵Pea ne fekau ki he kakai ke nau tākoto atu ‘i he funga kelekele.

³⁶Pea na‘a ne to‘o ‘a e fo‘i mā ‘e fitu, mo e ngaahi ika; pea ne fakafeta‘i; ‘o ne toki pakipaki, ‘o toutou ‘ange ki he kau ako, pea ‘ange ‘e he kau ako ki he kakai.

³⁷Pea nau kai kotoa pē, ‘o mākona; pea nau tānaki ‘a e ngaahi mapakipaki‘i mā na‘e toe, pea pito ai ‘a e kato ‘e fitu.

³⁸Pea ko kinautolu na‘e tokoni na‘e toko fā afe ‘a e tangata, ‘o ta‘elau ai ‘a e fefine mo e tamaiki iiki.

³⁹Pea na‘a ne tukuange ‘a e kakai, ‘o ne heka ki he vaka, ‘o ne a‘u ki he ngaahi feitu‘u ‘o Makatani.