Read KO E TOH TAPU KATOA TONGA Mātiú 17 Bible Online

Mātiú 17 - KO E TOH TAPU KATOA TONGA bible

Mātiú 17

¹PEA hili ‘a e ‘aho ‘e ono, na‘e ‘ave ‘e Sīsū ‘a Pita, mo Sēmisi, pea mo Sione ko e tehina ‘o Sēmisi, pea ne ‘ohake kinautolu ki ha mo‘unga mā‘olunga fakaekinautolu.

²Pea na‘e fakakehe hono anga ‘i honau ‘ao, pea na‘e malama hono fōtunga ‘o hangē ko e la‘ā, pea ko hono ngaahi kofu na‘e hinaekiaki mai ‘o hangē ko e maama.

³Pea tā na‘e hā kiate kinautolu ‘a Mōsese mo ‘Ilaisiā ‘oku nau talanoa mo ia.

⁴Pea tali ‘e Pita ‘o ne pehē kia Sīsū, ‘Eiki, ‘oku sai ‘etau ‘i heni: kapau ‘oku ke loto ki ai, pea u ngaohi ‘i heni ha fakahekeheke ‘e tolu; ‘o taha mo‘ou, pea taha mo‘o Mōsese, pea taha mo‘o ‘Ilaisiā.

⁵Pea lolotonga ‘ene kei lea, fakafokifā na‘e fakapūlou kinaua ‘e ha ‘ao maama: pea ‘iloange ko e le‘o mei he ‘ao na‘e folofola mai, ko hoku ‘Alo Pele ‘ena, ‘a ia kuo u hōifua ai; mou fakaongo kiate ia.

⁶Pea ‘i he fanongo ki ai ‘a e kau ako, na‘a nau mape‘e ki honau mata, ‘o nau manavahē ‘aupito.

⁷Pea ‘unu‘unu mai ‘a Sīsū ‘o ne ala kiate kinautolu, mo ne pehē, Tu‘u, pea ‘oua ‘e manavahē.

⁸Pea ‘i he‘enau hanga hake ke vakai, na‘e ‘ikai te nau sio ki ha taha, Ka ko Sīsū pē.

⁹Pea ‘i he‘enau ō hifo mei he mo‘unga, na‘e fonosi kinautolu ‘e Sīsū, ‘o pehē, ‘oua na‘a mou tala ki ha taha ‘a e me‘a kuo hā, kae‘oua ke tu‘u mei he mate ‘a e Fanautama ‘a Tangata.

¹⁰Pea fehu‘i kiate ia ‘e he‘ene kau ako, ‘o pehē, Pea ko e hā ai ‘oku lau ‘e he kau sikalaipe, kuo pau ke motu‘a ha‘u ‘a ‘Ilaisiā?

¹¹Pea ne tali ‘o pehē, Mo‘oni pē ‘a e pehē, ‘Oku ha‘u ‘a ‘Ilaisiā, pea te ne toe fokotu‘u ‘a e ngaahi me‘a.

¹²Ka ‘oku ou tala atu, kuo ha‘u ‘a ‘Ilaisiā, pea na‘e ‘ikai te nau ‘ilo ko ia, ka na‘a nau fai ho‘onautolu loto kiate ia. Pehē foki ‘a e Fanautama ‘a Tangata, ‘oku nānāfaki hono fakamamahi‘i ‘iate kinautolu.

¹³Toki e‘a ki he kau ako, tā ko Sione Papitaiso ‘oku kau ki ai ‘ene lea.

¹⁴Pea ‘i he‘enau ha‘u ki he kakai, na‘e ‘unu‘unu kiate ia ha tangata, ‘o ne tō hifo ‘o puke hono tui,

¹⁵‘o ne pehē, ‘Eiki, ‘alo‘ofa ki hoku ‘uhiki: he ‘oku puke fakataimi, pea kovi ‘ene puke; he kuo tu‘o lahi ‘ene tō ki he afi, pea tu‘o lahi ‘ene tō ki he vai.

¹⁶Pea na‘a ku ‘omi ia ki ho‘o kau ako, ka na‘e ‘ikai te nau lava ke fakamo‘ui ia.

¹⁷Ka ka tali ‘e Sīsū ‘o ne pehē, ‘A e fa‘ahinga ta‘etui mo angakehe, ‘e ngata ‘afē ‘eku ‘iate kimoutolu? ‘E ngata ‘afē ‘eku kātaki‘i kimoutolu? ‘omi ia ki heni kiate au.

¹⁸Pea na‘e lolomi ‘e Sīsū ‘a e tēvolo, pea na‘a ne mahu‘i mei he tama, ‘o ne mo‘ui mei he feitu‘ula‘ā ko ia.

¹⁹Pea toki ha‘u ‘a e kau ako kia Sīsū ‘i he‘enau fakaekinautolu, ‘o nau pehē, Koe‘uhi ko e hā nai, ne ‘ikai lava ai ‘e kimautolu ke kapusi ia?

²⁰Pea ne pehē kiate kinautolu, Koe‘uhi pē ko ho‘omou tui vaivai: he ko au ē, ‘oku ou tala atu ka, ne ai ha‘amou tui, ‘o tatau mo ha fo‘i tenga‘i mūsita hono lahi, te mou pehē ki he mo‘unga ni, Hiki mei heni ki hena; pea ‘e hiki; pea ‘oku ‘ikai ha me‘a ‘e faingata‘a kiate kimoutolu.

²¹Neongo ia, ko e fa‘ahinga ni ‘oku ‘ikai lava ke mahu‘i, ka ‘i he lotu pē mo e ‘aukai.[15]

²²Pea lolotonga ‘enau fakataha ‘i Kāleli, na‘e lea ‘a Sīsū kiate kinautolu, ‘o pehē, ‘oku nānāfaki ke tukuange ‘a e Fanautama ‘a Tangata ki he nima ‘o e kakai:

²³pea te nau tāmate‘i ia, pea ‘i hono ‘aho tolu ‘e toe fokotu‘u ia. Pea na‘a nau mamahi ‘aupito.

²⁴Pea ‘i he‘enau a‘u ki Kāpaneume, pea ko kinautolu na‘e tānaki ‘a e tukuhau fakasiasi na‘a nau ‘alu atu kia Pita, ‘o nau pehē, ‘oku fai ‘apē ‘e ho‘omou tangata‘eiki ‘a e tukuhau fakasiasi? Pea pehē ‘e ia, Ko ē.

²⁵Ka ‘i he‘ene hū ki fale na‘e lea leva ki ai ‘e Sīsū, ‘o pehē, Saimone, ko e hā ho‘o poa? Ko e ngaahi tu‘i ‘o māmani ‘oku nau tānaki tute mo e tukuhau meia hai? mei he fale‘alo, pe mei he kakai kehe?

²⁶Pea tali ‘e ia, Mei he kakai kehe pē. Pea lea ‘a Sīsū ki ai, ‘Āua, pea tā ‘oku ‘ata‘atā ‘a e fale‘alo.

²⁷Ka koe‘uhi ke ‘oua na‘a tau fakatūkia kinautolu, ‘alu koe ki tahi, ‘o lafo ha māta‘u; pea koe ‘uluaki ika ‘e kai, ke ke to‘o ‘o fa‘ai hono ngutu, pea te ke ‘ilo ai ha fo‘i sikeli: to‘o ia ‘o ‘ange kiate kinautolu ma‘aku mo koe.