Read KO E TOH TAPU KATOA TONGA Mātiú 18 Bible Online

Mātiú 18 - KO E TOH TAPU KATOA TONGA bible

Mātiú 18

¹KO E feitu‘ula‘ā ko ia na‘e ‘unu‘unu atu ‘a e kau ako kia Sīsū, mo nau pehē, pea ko hai nai ‘e lahi ‘i he Pule‘anga ‘o Hēvani?

²Pea ne ui ange ha tamasi‘i, ‘o ne tuku ia ‘i honau lotolotonga,

³‘O ne pehē, Ko au ē, ‘oku ou tala atu, Kapau ‘e ‘ikai te mou liliu, ‘o hoko ‘o hangē ko e tamaiki, ‘e ‘ikai ‘aupito te mou hū ki he Pule‘anga ‘o Hēvani.

⁴Ko ia, ‘ilonga ‘a ia te ne fakavaivai‘i ia ‘o hangē ko e tamasi‘i ko eni, ko ia ia ‘oku lahi ‘i he Pule‘anga ‘o Hēvani.

⁵Pea ka ai ha taha ‘oku ne tali ha tamasi‘i peheni ‘e toko taha, koe‘uhi ko hoku hingoa, ‘oku ne tali au.

⁶Pea ka ai ha tangata te ne fakatūkia ha taha ‘i si‘i tamaiki ni ‘oku tui kiate au, ‘e oli ange ki he tangata ko ia ‘oka ne tautau ha fu‘u maka fale ‘i hono kia, ‘o lōmaki‘i ‘i he moana hauhau.

⁷‘Oiauē ‘a māmani koe‘uhi ko e ngaahi tūkia‘anga! he kuo pau ke hoko ‘a e ngaahi tūkia‘anga; ka ‘oiauē ‘a e tangata ko ia ‘a ia ‘oku hoko ai ‘a e tūkia‘anga!

⁸Pea ka ‘oku fakatūkia koe ‘e ho nima, pe ko ho va‘e, tu‘usi, pea li‘aki atu: ‘oku ngutuhua ange ke ke a‘u ki he mo‘ui nima taha pe ve‘e taha, ‘i he lī koe nima ua pe ve‘e ua ki he afi ta‘engata.

⁹Pea ka ‘oku fakatūkia koe ‘e ho mata, kape‘i ia, ‘o li‘aki atu: ‘oku ngutuhua ange ha‘o a‘u mata taha ki he mo‘ui, ‘I ho lī mata ua ki he afi ‘o Heli.

¹⁰Vakai ke ‘oua te mou fakasīkaka‘i ha taha ‘i he fa‘ahinga iiki ni; he ‘oku ou tala atu, ko honau kau ‘āngelo ‘i he langi ‘oku nau fakafe‘ao ma‘u pē ki he‘eku Tamai ‘oku ‘i Hēvani.

¹¹He kuo ha‘u ‘a e Fanautama ‘a Tangata ke fakamo‘ui ‘a ia na‘e mole.[16]

¹²Ko e hā ho‘omou poa? Ka ne ma‘u ‘e ha tangata ha sipi ‘e teau, pea hē hanau taha, ‘ikai te ne tuku ‘a e toko hivangofulu mā hiva ‘i he mo‘unga, ka ka ‘alu ke kumi ‘a ia kuo hē?

¹³Pea kapau ‘e faifai pea ne ‘ilo ia, ko au ē, ‘oku ou tala atu, ‘oku ‘ange‘ange ‘ene fiefia ‘i he hivangofulu mā hiva na‘e ‘ikai hē ‘i he fo‘i sipi ko ia.

¹⁴Pehē, ‘oku ‘ikai ko e tu‘utu‘uni ‘a ho‘omou[17] Tamai ‘oku ‘i Hēvani ke mole ha toko taha ‘i he fanga ki‘i sipi ni.

¹⁵Pea kapau ‘e fai hala[18] ‘e ho tokoua, mole pē koe ‘o fakamahino kiate ia, fakaekimoua pē: kapau te ne tokanga kiate koe, kuo ke ma‘u mai ho tokoua.

¹⁶Ka ‘oka ‘ikai te ne tokanga, ke ke toe ‘alu mo koe ha toko taha, pe ha toko ua, koe‘uhi ke fakapapau ‘a e ngaahi me‘a mei he fakamo‘oni ‘a ha toko ua, pe toko tolu.

¹⁷Pea kapau te ne ta‘etoka‘i kinautolu, tala ki he Fakataha: pea kapau te ne ta‘etoka‘i mo e Fakataha foki, pea ke ne tatau kiate koe mo ha Senitaile, pe ko ha pōpilikane.

¹⁸Ko au ē, ‘oku ou tala atu, ‘Ilonga ha me‘a te mou tapui ‘i māmani kuo tapui ‘i langi: pea ‘ilonga ha me‘a te mou fakangofua ‘i māmani kuo fakangofua ‘i langi.

¹⁹Mo ‘eni foki ‘oku ou tala atu, Ka ai ha toko ua ‘iate kimoutolu ‘i māmani te na loto taha ‘i ha me‘a pē te na kole ki ai, ‘e fai pē ma‘anaua ‘e he‘eku Tamai ‘oku ‘i Hēvani.

²⁰He ko e potu kuo fakataha ai ha toko ua pe ha toko tolu ki hoku hingoa, ‘oku ou ‘i he potu ko ia au ‘i honau lotolotonga.

²¹Na‘e toki ‘unu‘unu atu ‘a Pita, ‘o ne pehē kiate ia, ‘Eiki, ‘e tu‘o fiha ‘a e fai hala ‘a hoto tokoua kia kita, ka te fakamolemole pē? ‘O tu‘o fitu ‘apē?

²²Tali pē ‘e Sīsū, ‘oku ‘ikai te u pehē kiate koe, ‘o tu‘o fitu: ka, ‘o tu‘o fitu liunga ‘aki ‘a e fitungofulu.[19]

²³Ko ia, kuo hoko ‘o tatau ‘a e Pule‘anga ‘o Hēvani pea mo ha tangata, ko ha tu‘i, ‘a ia na‘a ne finangalo ke sivi ‘ene kau tamaio‘eiki.

²⁴Pea ‘i he‘ene kamata ‘a e sivi, na‘e ‘omi kiate ia ha toko taha na‘e mo‘ua ki he taleniti ‘e mano.

²⁵Pea ‘i he ‘ikai ha‘ane me‘a ke totongi ‘aki, na‘e fekau ‘e he‘ene ‘eiki ke fakatau tuki, ‘a ia, mo hono uaifi, mo e fānau, mo ‘ene me‘a kotoa, ke totongi ‘aki.

²⁶Ka ka tōmape‘e ‘a e tamaio‘eiki ‘o hū kiate ia, ‘o ne pehē, Ke ke fakatotoka mai, pea te u totongi kotoa.

²⁷Pea manava‘ofa ai ‘a e ‘eiki ‘a e tamaio‘eiki ko ia, ‘o ne tukuange ia, mo ne fakamolemole hono mo‘ua.

²⁸Ka ‘i he ‘alu atu ‘a e tamaio‘eiki ko ia, na‘a ne ‘ilo ha taha na‘e ‘i he kau ngāue mo ia; pea ko e toko taha ia na‘e mo‘ua kiate ia ko e tēnali ‘e teau: pea ne puke ia ‘o sisina hono kia, ‘o ne pehē, Kapau kuo ke mo‘ua, totongi.

²⁹Ka ka tōmape‘e ‘a e toko taha ko ia na‘a na kaungā ngāue, ‘o ne kole kiate ia ‘o pehē, Ke ke fakatotoka mai, pea te u totongi kiate koe.

³⁰Ka na‘e ‘ikai te ne tali ‘ene kole: ka ka ‘alu mei ai, ‘o ne lī ki he pilīsone ‘a e tangata kae‘oua ke ne totongi ‘a e me‘a ‘oku ne mo‘ua ki ai.

³¹Ka ko kinautolu na‘a nau kaungā ngāue, ‘i he‘enau vakai ‘a e me‘a kuo fai, na‘a nau mamahi ‘aupito, ‘o nau ‘alu ‘o fakamatala ki he‘enau ‘eiki ‘a e me‘a kotoa kuo fai.

³²Toki ui ange ‘a e tangata ‘e he‘ene ‘eiki, ‘o ne pehē ki ai, ‘a e tamaio‘eiki angakovi, na‘a ku fakamolemole koe ‘a e fu‘u mo‘ua ko ia kotoa ‘i ho‘o kole mai:

³³‘ikai na‘e mei totonu ha‘o ‘ofa mo koe kiate ia ‘oku mo kaungā ngāue, ‘o hangē ko ‘eku ‘ofa ‘aku kiate koe?

³⁴Pea tuputāmaki ‘a ‘ene ‘eiki, ‘o ne tukuange ia ki he kau fakamamahi, kae‘oua ke ne totongi ‘a e me‘a kotoa na‘a ne mo‘ua ki ai.

³⁵‘E pehē foki mo e fai ‘a ‘eku Tamai fakalangi kiate kimoutolu, ‘o kapau ‘e ‘ikai te mou fakamolemole takitaha hono tokoua, ‘o fai‘aki homou loto.