Read KO E TOH TAPU KATOA TONGA Mātiú 2 Bible Online

Mātiú 2 - KO E TOH TAPU KATOA TONGA bible

Mātiú 2

¹PEA hili ‘a e ‘alo‘i ‘o Sīsū ‘i Pētelihema ‘i Siutea, ‘i he kuonga ‘o e tu‘i ko Hēlota, ‘iloange na‘e hoko ki Selusalema ‘ani Maki mei Hahake,

²‘oku nau fehu‘i, Kofa‘ā ia kuo ‘alo‘i ko e Tu‘i ‘o e kakai Siu? he na‘a mau mamata ‘i Hahake ki hono fetu‘u pea kuo mau omi ke hū kiate ia.

³Pea ‘i he fanongo ki ai ‘a e tu‘i ko Hēlota, na‘a ne puputu‘u, ‘a ia mo Selusalema kātoa.

⁴Pea na‘a ne fakataha ‘a e hou‘eiki taula‘eiki kotoa pē, mo e kau sikalaipe faka-Siu; ‘o ne ‘eke kiate kinautolu pe ‘e ‘alo‘i ‘i fē ‘a e Mīsaia.

⁵Pea nau tali kiate ia, ‘i Pētelihema ‘i Siutea; he ‘oku pehē hono tohi ‘e he palōfita,

⁶Pea ko koe, Pētelihema, konga ‘o Siuta, ‘oku ‘ikai ‘aupito ko e si‘i taha koe ‘i he hou‘eiki ‘o Siuta; koe‘uhi ‘e ha‘u meiate koe ha takimu‘a ‘a ia te ne pule‘i hoku kakai ko ‘Isileli.

⁷Pea toki ‘omi fakafufū ‘e Hēlota ‘a e kau Maki, ‘o ne ‘eke kiate kinautolu ke mahu‘ingamālie ‘a e taimi ‘o e hā ‘a e fetu‘u.

⁸Pea ne fekau ke nau ō ki Pētelihema, ‘o ne pehē, Mou ‘alu ‘o ‘eke fakatotolo ki he tamasi‘i; pea ka mou ka ‘ilo pea mou tala mai, koe‘uhi ke u ‘alu mo au ‘o hū kiate ia.

⁹Pea kuo nau ma‘u ‘a e fekau ‘a e Tu‘i pea nau ‘alu; pea ‘iloange, ko e fetu‘u na‘a nau mamata ki ai ‘i Hahake, na‘a ne tataki kinautolu ‘o a‘u atu ki he potu na‘e ‘i ai ‘a e tamasi‘i, ‘o ne tu‘u ai mei ‘olunga.

¹⁰Pea ‘i he‘enau sio ki he fetu‘u, na‘a nau fiefia ‘aupito, ‘aupito.

¹¹Pea ‘i he‘enau hū ki he fale, na‘a nau ‘ilo ‘a e tamasi‘i, ‘oku ‘i he‘ene fa‘ē ko Mele; pea nau fakatōmape‘e ‘o hū kiate ia: pea na‘a nau tangaki ‘enau ngaahi ‘angame‘a, ‘o nau ‘atu kiate ia ‘a e ngaahi me‘a‘ofa, ko e koula mo e laipeno mo e mula.

¹²Pea ‘i he valokia kinautolu ‘i ha misi ke ‘oua te nau foki kia Hēlota, ne nau ‘alu ki honau fonua ‘i ha hala kehe.

¹³Pea kuo nau ‘alu, ‘iloange, na‘e hā kia Siosifa ha ‘āngelo ‘a e ‘Eiki ‘i ha misi, ‘o ne pehē, ‘Ā hake, ‘o to‘o ‘a e tamasi‘i mo ‘ene fa‘ē, pea ke holataki ki ‘Isipite; pea ke nofo ai kae‘oua ke u toki fakahā atu; he ‘oku teu kumi ‘e Hēlota ‘a e tamasi‘i ke fakapoongi.

¹⁴Pea ‘ā hake ia, ‘o ne to‘o ‘a e tamasi‘i mo ‘ene fa‘ē ‘i he pō ko ia, ‘o nau ‘alu ki ‘Isipite;

¹⁵pea na‘a nau nofo ai ‘o a‘u ki he pekia ‘a Hēlota: koe‘uhi ke fakamo‘oni ki he me‘a na‘e folofola‘aki ‘e he ‘Eiki ‘i he palōfita, ‘o pehē, Na‘a ku ui mai hoku foha mei ‘Isipite.

¹⁶Pea ‘i he toki hā kia Hēlota kuo va‘inga‘aki ia ‘e he kau Maki, na‘a ne tuputāmaki ‘aupito; ‘o ne fekau ke tāmate‘i ‘a e tamaiki kotoa pē ‘i Pētelihema mo e ngaahi ‘api na‘e kau ki ai, ‘o ngata meiate kinautolu na‘e ua ta‘u ‘o fai ki mui; ‘o fakatatau ki he taimi na‘a ne ma‘u mei he kau Maki.

¹⁷Pea na‘e toki fakamo‘oni ki he me‘a na‘e lea‘aki ‘e he palōfita ko Selemaia, ‘o pehē,

¹⁸Na‘e ongona ‘i Lama ha le‘o, ko e tangi mo e fu‘u tangilāulau; ko e tēngihia ‘e Lesieli ‘ene fānau, pea ‘ikai te ne tali ha fakafiemālie koe‘uhi kuo nau mole.

¹⁹Pea ‘i he hili ‘a e pekia ‘a Hēlota, ‘iloange, na‘e hā mai kia Siosifa ‘i ‘Isipite ha ‘āngelo ‘a e ‘Eiki ‘i ha misi,

²⁰‘o ne pehē, ‘Ā hake, pea to‘o ‘a e tamasi‘i mo ‘ene fa‘ē, pea ‘alu ki he fonua ‘o ‘Isileli; he kuo mate ‘a kinautolu na‘e kumi ki he tamasi‘i ke fakapoongi.

²¹Pea ‘ā hake ia, ‘o ne to‘o ‘a e tamasi‘i mo ‘ene fa‘ē, pea ne ‘alu atu ‘o hū ki he fonua ‘o ‘Isileli.

²²Ka ‘i he‘ene fanongo ko ‘Akileosi ‘oku pule ‘i Siutea, ko e fetongi ‘o ‘ene tamai ko Hēlota, na‘a ne manavahē ke ‘alu ki he potu ko ia: pea na‘e valokia ia ‘i ha misi, ko ia na‘a ne fononga ki he ngaahi feitu‘u ‘o Kāleli.

²³Pea ne ‘alu ‘o nofo ‘i he kolo ‘oku hingoa ko Nāsaleti; koe‘uhi ke fakamo‘oni ki he me‘a na‘e lea‘aki ‘e he kau Palōfita, ‘o pehē, ‘E ui ia ko ha Nāsaleti.