Read KO E TOH TAPU KATOA TONGA Mātiú 21 Bible Online

Mātiú 21 - KO E TOH TAPU KATOA TONGA bible

Mātiú 21

¹PEA ‘i he‘enau ofi ki Selusalema, pea kuo nau a‘u ki Petefesi ‘i he mo‘unga ko ‘Ōlive, na‘e toki fekau atu ‘e Sīsū ha ongo ako ‘e toko ua,

²‘o ne pehē kiate kinaua, Mo ō ki he vilisi ko ena ‘oku hanga mai, pea te mo ‘ilo leva ki ha ‘asi ‘oku no‘otaki, pea ai mo hono ‘uhiki: vete, ‘o taki mai.

³Pea ka ai ha lea ‘e fai atu ‘e ha taha, pea mo pehē, ‘Ou fiema‘u kinaua ‘e he ‘Eiki;[20] pea te ne tuku mai leva kinaua.

⁴Pea na‘e fai ‘eni koe‘uhi ke fakamo‘oni ki he me‘a ne folofola‘aki ‘i he palōfita, ‘o pehē,

⁵Mou lea ki si‘i Saione, Ko ena ho Tu‘i ‘oku me‘a mai kiate koe. Ko e ‘Eiki fa‘a kātaki, pea ‘oku ne heka ki ha ‘asi: ‘Io, ki ha ki‘i manu, Ko e tama ‘a ha manu toho palau.

⁶Pea ‘alu ‘a e ongo ako, ‘o na fai ‘o hangē ko e tu‘utu‘uni kinaua ‘e Sīsū;

⁷pea na taki mai ‘a e ‘asi mo hono ‘uhiki, pea nau ‘ai ki ai honau ngaahi pulupulu, pea ne heka ai.

⁸Pea ko e fu‘u tokolahi ‘o e kakai na‘a nau falikiliki ‘a e hala ‘aki honau pulupulu ‘onautolu; pea ko e ni‘ihi na‘a nau tu‘usi ‘a e ngaahi va‘akau, ‘o falikiliki ‘aki ‘a e hala.

⁹Pea ko e fu‘u kakai na‘e ‘alu mu‘omu‘a ‘iate ia, pea mo kinautolu na‘e muimui mai, na‘a nau fekālanga‘i ‘o pehē, Hōsana ki he Hako ‘o Tēvita! Hoto ‘ofa kiate ia ‘oku hoko mai ‘i he huafa ‘o e ‘Eiki! Hōsana ki Langi Taupotu!

¹⁰Pea ‘i he‘ene hū ki Selusalema, na‘e ngatū ‘a e kolo kotoa, ‘o nau pehē, Ko hai ‘eni?

¹¹Pea tali ‘e he fu‘u fononga, Ko Sīsū ‘eni ko e palōfita mei Nāsaleti ‘i Kāleli.

¹²Pea hū ‘a Sīsū ki he Temipale, ‘o ne kapusi ‘a kinautolu kotoa pē na‘e fakatau atu mo fakatau mai ‘i he Temipale, ‘o ne fulihi ‘a e ngaahi tēpile ‘a e kau fetongi pa‘anga, mo e ngaahi nofo‘a ‘o e kakai na‘e ‘omi lupe ke fakatau;

¹³pea ne pehē kiate kinautolu, Kuo tohi, Ko hoku fale ‘e ui ko e falelotu; ka ko kimoutolu ‘oku mou ngaohi ia ko e ‘ananga ‘o ha kaiha‘akau.

¹⁴Pea na‘e ha‘u kiate ia ‘i he Temipale ha kau kui mo ha kau heke, pea ne fakamo‘ui kinautolu.

¹⁵Ka ko e hou‘eiki taula‘eiki mo e kau sikalaipe, ‘i he‘enau vakai ki he ngaahi me‘a fakaofo na‘a ne fai, mo e kau tamaiki ‘oku nau kalanga ‘i he Temipale, ‘o pehē, Hōsana ki he Hako ‘o Tēvita; na‘a nau ‘ita;

¹⁶pea nau pehē kiate ia, ‘oku ke fanongo ki he me‘a ‘oku lau ‘e kinautolu na? Pea pehē ange ‘e Sīsū, ‘Io: pea kuo te‘eki koā ke mou lau, ‘o pehē, Ko e ngutu ‘o e tamaiki mo e valevale Kuo ke tu‘utu‘uni mei ai hao fakamālō.

¹⁷Pea ne mahu‘i meiate kinautolu, ‘o ne ‘alu mei ai kitua‘ā kolo, ki Pētani, ‘o ne toka ‘i he potu ko ia.

¹⁸Pea pongipongi hake, ‘i he‘ene foki ki he kolo, na‘a ne hālofia.

¹⁹Pea ‘i he‘ene vakai ki ha fu‘u fiki ‘oku tu‘u taha ‘o heke mai ki hala, na‘a ne ‘alu ki ai; ka na‘e ‘ikai te ne ‘ilo ai ha me‘a, ko e ngaahi lau pē. Pea folofola ia ki ai, ‘o pehē, Ke ‘oua na‘a toe ai hao fua ‘o ta‘engata. Pea mate leva ‘a e fu‘u fiki.

²⁰Pea ‘i he mamata ki ai ‘a e kau ako, na‘a nau ofo, ‘o nau pehē, Na‘e fēfē ‘ene mate vave pehē ‘a e fu‘u fiki?

²¹Pea tali ‘e Sīsū ‘o ne pehē kiate kinautolu, Ko au ē, ‘oku ou tala atu, Kapau te mou tui, ‘o ‘oua ‘e tāla‘a, ‘e ‘ikai ngata ‘i he me‘a kuo fai ki he fiki ‘a e me‘a te mou lava; ka ‘o kapau te mou lea ki he mo‘unga ni, Fei mo mahiki koe, ‘o patū ki tahi; pea ‘e hoko.

²²Pea ko e me‘a kotoa pē te mou kole‘i he hū, ‘o mou tui pē, te mou ma‘u.

²³Pea kuo ne hū ki he Temipale, pea ko e hou‘eiki taula‘eiki mo e kau mātu‘a ‘o e kakai Siu na‘a nau ‘unu‘unu kiate ia ‘i he‘ene faiako, ‘o nau pehē, Ko e hā ho tu‘unga ‘oku ke fai ai ‘a e ngaahi me‘a ko eni? Pea ko hai na‘a ne tuku kiate koe ‘a e tu‘unga ko ia?

²⁴Pea tali ‘e Sīsū, ‘o ne pehē kiate kinautolu, Ka u fai atu mo au ha‘aku fehu‘i ‘e taha, pea kapau te mou tali mai, pea te u toki fakahā atu pe ko e hā hoku tu‘unga ‘oku ou fai ai ‘a e ngaahi me‘a ko eni.

²⁵Ko e fai papitaiso ‘a Sione na‘e mei fē ia? mei he langi, pe mei he tangata? Pea nau fekīhiaki, ‘o pehē, Kapau te tau tali, mei langi; te ne pehē mai, pea ko e hā ai na‘e ‘ikai te mou tuitala kiate ia?

²⁶Pea kapau te tau pehē, Mei he tangata; kae telia ‘a e kakai; he ‘oku nau lau kotoa pē ko e palōfita ‘a Sione.

²⁷Pea nau tali kia Sīsū ‘o pehē, ‘oku ‘ikai te mau ‘ilo. Pea lea ai mo ia kiate kinautolu, pea ‘e ‘ikai ā te u tala atu ‘e au pe ko e hā hoku tu‘unga ‘oku ou fai ai ‘a e ngaahi me‘a ko eni.

²⁸Ka ko e hā ho‘omou poa ki he me‘a ni? Tokua na‘e ai ha tangata mo hono ongo foha; pea ne ‘unu‘unu atu ki he ‘uluaki, ‘o ne pehē, Tama, ke ke ‘alu ‘o ngāue he ‘aho ni ‘i he ngoue vaine.

²⁹Ka ka tali ‘e ia, ‘o ne pehē, ‘E ‘ikai: ka na‘e tautea ia ‘e hono loto ki mui, ‘o ne ‘alu.

³⁰Pea ne ‘unu‘unu ki he tama ‘e taha, ‘o ne lea ki ai ‘o hangē ko e ‘anenai. Pea tali ‘e ia, ‘o ne pehē, ‘Oku lelei, Tangata‘eiki: ka na‘e ‘ikai ‘alu ia.

³¹Ko e fē nai ‘i he ongo tama ne ne fai ‘a e tu‘utu‘uni ‘a ‘ena tamai? Pea nau pehē, Ko e ‘uluaki. Pea pehē ‘e Sīsū kiate kinautolu, Ko au ē, ‘oku ou tala atu, Ko e kau pōpilikane mo e kau fe‘auaki ‘oku nau takimu‘a kiate kimoutolu ‘i he hū ki he Pule‘anga ‘o e ‘Otua.

³²He na‘e ha‘u ‘a Sione kiate kimoutolu ‘i he hala ko e tauhi tu‘utu‘uni, pea na‘e ‘ikai te mou tuitala ki ai: ka ko e kau pōpilikane mo e fe‘auaki na‘a nau tuitala ‘e kinautolu: pea ko kimoutolu, neongo na‘a mou sio ki ai, ka na‘e ‘ikai tautea homou loto kimui ke mou tuitala kiate ia.

³³Mou fanongo mai ki ha fakatātā ‘e taha: Tokua na‘e ai ha tangata, ko e matāpule, ‘a ia na‘a ne tō ha ngoue vaine, pea na‘a ne ‘aa‘i takai ia, mo ne foa ai ha tata‘o‘anga kālepi, ‘o ne langa ai ha taua, pea ne tuku ke lisi e ha kau fa‘a, ‘o ne ‘alu ki muli.

³⁴Pea ‘i he ofi ‘a e to‘ukai kālepi, na‘a ne fekau atu ‘ene kau tamaio‘eiki ki he kau fa‘a ke ma‘u mai hono ‘inasi:

³⁵ka ka puke ‘e he kau fa‘a ‘ene kau tamaio‘eiki, ‘o nau haha ha toko taha, pea tāmate‘i ha toko taha, pea tolomaka‘i ha toko taha.

³⁶Pea ne toe fekau atu mo ha tu‘unga tamaio‘eiki kehe, ‘o tokolahi ‘i he fua ō: pea nau ngaohi ‘a kinautolu ‘o hangē ko e ‘uluaki.

³⁷Pea na‘a ne fekau atu kimui hono foha, he‘ene pehē, Te nau toka‘i hoku foha.

³⁸Ka ko e kau fa‘a ‘i he‘enau mamata ki he foha, na‘a nau fealēlea‘aki, ‘o pehē, Ko e hoko ‘ena; ‘ē, tau tāmate‘i mu‘a ia, ‘o tau ma‘u hono tofi‘a.

³⁹Pea nau puke ia ‘o toho ki he tua‘ā ngoue, ‘o nau tāmate‘i ai.

⁴⁰Pea ka ‘iloange ai ‘e hoko mai ‘a e ‘eiki ‘o e ngoue vaine, ko e hā te ne fai ki he kau fa‘a ko ia?

⁴¹Pea nau pehē kiate ia, Te ne faka‘auha fakalielia‘i ‘a e kau fakalielia ko ia, pea te ne tuku ke lisi ‘a e ngoue ‘e ha kau fa‘a kehe, ‘a ia ko e fa‘ahinga te nau ‘ange hono ‘inasi ‘i hono taimi totonu.

⁴²Pea lea ‘a Sīsū kiate kinautolu, Kuo te‘eki koā ke mou lau ‘i he Tohitapu? Ko e maka ne fakatale‘i ‘e he kau tufunga Kuo hoko ‘o tuliki tau‘olunga: Ko e me‘a mei he ‘Eiki ia, pea fakaofo ki hotau mata.

⁴³Ko ia, ‘oku ou tala atu, ‘E to‘o meiate kimoutolu ‘a e Pule‘anga ‘o e ‘Otua, pea ‘e tuku ki ha kakai ‘oku fua ‘o taau mo ia.

⁴⁴Pea ko ia te ne tō ki he maka ko ia ‘e mafesifesi: ka ka ‘ilonga ‘a ia ‘e tō ‘a e maka ki ai ‘e laiki ke efu.[21]

⁴⁵Pea ‘i he fanongo ‘a e hou‘eiki taula‘eiki mo e kau Fālesi ki he‘ene ngaahi fakatātā, na‘a nau ‘ilo ‘oku kau ‘ene lea kiate kinautolu.

⁴⁶Pea nau feinga ke puke ia, ka nau manavahē pē ki he kakai, ko ‘enau lau ko e palōfita ia.