Read KO E TOH TAPU KATOA TONGA Mātiú 22 Bible Online

Mātiú 22 - KO E TOH TAPU KATOA TONGA bible

Mātiú 22

¹PEA tali ‘e Sīsū, ‘o ne toe lea kiate kinautolu ‘i ha ngaahi fakatātā, ‘o pehē,

²Kuo tatau ‘a e Pule‘anga ‘o Hēvani pea mo ha tangata, ko e tu‘i, ‘a ia na‘a ne fai ‘a e ta‘ane ‘o hono ‘alo;

³pea ne fekau atu ‘ene kau tamaio‘eiki ke ui ‘a e kakai kuo tala ki ai ‘a e kātoanga: ka na‘e ‘ikai te nau fie ha‘u.

⁴Pea ne toe fekau atu ha kau tamaio‘eiki kehe, ‘o ne pehē, Fakahā kiate kinautolu na‘e tala, Ko eni, kuo u ‘osi teu ‘eku pongipongi: kuo tāmate‘i ‘eku fanga pulu, mo ‘eku fanga manu tali ‘eiki, pea kuo napangapangamālie kotoa pē: mou omi ki he ta‘ane.

⁵Ka ka fakava‘iva‘inga ‘aki ia ‘e kinautolu, ‘o nau ‘alu ko e taha ki he‘ene ngoue, ko e taha ki he‘ene fai fakatau;

⁶pea ko e toe na‘a nau puke ‘ene kau tamaio‘eiki, ‘o nau pā‘usi‘i mo tāmate‘i.

⁷Pea houhau ai ‘a e Tu‘i, ‘o ne fekau atu ‘ene ngaahi kongakau, ‘o ne faka‘auha ‘a e kau fakapō ko ia, ‘o tutu ‘enau kolo.

⁸Pea toki folofola ia ki he‘ene kau tamaio‘eiki, Ko e ta‘ane kuo teu; ka ko kinautolu na‘e tala ki ai tā na‘e ‘ikai te nau taau.

⁹Ko ia, mou ō ki he ngaahi manga‘i hala, pea ‘ilonga ha kakai te mou ‘ilo ai, tala ke nau ha‘u ki he kātoanga.

¹⁰Pea ‘alu atu ‘a e kau tamaio‘eiki ko ia ki he ngaahi hala, ‘o nau tānaki ‘a e kakai kotoa pē na‘a nau ‘ilo ki ai, ‘a e kovi mo e lelei fakatou‘osi: pea na‘e ma‘opo ‘a e kātoanga.

¹¹Pea ‘i he me‘a mai ‘a e Tu‘i ke vakai ‘a e kakai na‘e keinanga, na‘a ne ‘ilo ai ha tangata kuo ‘ikai te ne tui ha kofu ta‘ane.

¹²Pea ne folofola ki ai, Siana, na‘e fēfē ho‘o hū mai ki heni ta‘e te ke ‘ai hao kofu ta‘ane?

¹³Pea ne mo‘ulongoa. Pea fekau ‘e he Tu‘i ki he kau sevāniti, Ha‘i hono va‘e mo hono nima, ‘o lī ia ki he po‘uli ‘o tua‘ā. Ko e Potu ia ‘e toki hoko ai ‘a e tangi mo e fengai‘itaki ‘o e nifo.

¹⁴He ‘oku tokolahi ‘a e ui, kae toko si‘i ‘a e fili.

¹⁵Pea toki ‘alu ‘a e kau Fālesi, ‘o nau puleaki‘i pe ‘e fēfē ha‘anau tauhele ia ‘i he alea.

¹⁶Pea nau fekau atu kiate ia ‘enau kau ako fakataha mo e fa‘ahi ‘a Hēlota, ‘a ia na‘a nau pehē, Tangata‘eiki ‘oku mau ‘ilo ‘oku ke mo‘oni koe, pea ‘oku ke ako totonu ‘aki ‘a e hala ‘o e ‘Eiki, pea ‘oku ‘ikai te ke toka‘i ha taha: koe‘uhi ‘oku ‘ikai te ke filifilimānako.

¹⁷Ko ia ke ke tala mai pe ko e hā ho‘o poa, pe ‘oku ngofua ke tukuhau kia Sisa, pe ‘ikai?

¹⁸Ka ka mea‘i ‘e Sīsū ‘enau kovi, ‘o ne pehē, ‘A e kau mālualoi, ko e hā ‘oku mou ‘ahi‘ahi‘i ai au?

¹⁹faka‘ali‘ali mai ‘a e pa‘anga tukuhau. Pea nau ‘omi kiate ia ha fo‘i tēnali.

²⁰Pea pehē ‘e ia kiate kinautolu, Ko e fofonga ‘ena mo e hingoa ‘o hai?

²¹Pea nau pehē, ‘o Sisa. Pea folofola ‘e ia kiate kinautolu, Pe‘i ‘ange kia Sisa ‘a e ngaahi me‘a ‘a Sisa; pea ki he ‘Otua ‘a e ngaahi me‘a ‘a e ‘Otua.

²²Pea ‘i he‘enau fanongo ki ai na‘a nau ofo; pea nau tuku ia ‘o nau ‘alu.

²³Ko e ‘aho ko ia na‘e ‘unu‘unu atu ai kiate ia ha kau Sātusi, ko ‘enau pehē ‘oku ‘ikai ha toetu‘u;

²⁴‘o nau fai ha fehu‘i kiate ia, ‘o pehē, Tangata‘eiki, na‘e pehē ‘e Mōsese, Kapau ‘e pekia ha tangata ta‘eha‘ane fānau, pea ke mali hono tokoua mo e finemotu‘a, ‘o ne fakatupu ha hako ki hono tokoua.

²⁵Pea ko eni, na‘e nofo mo kimautolu ha tu‘unga me‘a ‘e toko fitu, ko e tautehina: pea mali ‘a e ‘uluaki ‘o pekia, pea ko e me‘a ‘i he ‘ikai hano hako na‘a ne tuku hake hono finemotu‘a ki hono tehina.

²⁶Pehē foki ‘a hono toko ua, mo hono toko tolu, kae‘oua ke ‘osi ‘a e toko fitu.

²⁷Pea toki pekia kimui ‘a e fefine.

²⁸Pea ‘i he toetu‘u te ne hoko ko e uaifi ‘o hai ‘i he toko fitu? he na‘a nau ma‘u ia kotoa pē.

²⁹Ka ka tali ‘e Sīsū, ‘o ne pehē kiate kinautolu, ‘oku mou hē, ko e ta‘e te mou ‘ilo ‘a e Tohitapu, kae‘uma‘ā ‘a e māfimafi ‘o e ‘Otua.

³⁰He ‘oku ‘ikai ha ma‘u uaifi, pe ha ma‘u husepāniti ‘i he toetu‘u, ka ‘oku nau hangē ko e kau ‘āngelo ‘i he langi.

³¹Ka ko e me‘a ki he toetu‘u ‘a e pekia, ne ‘ikai te mou lau koā ‘a e folofola ‘a e ‘Otua kiate kimoutolu, ‘o pehē,

³²Ko au ko e ‘Otua ‘o ‘Epalahame, pea ko e ‘Otua ‘o ‘Aisake, pea ko e ‘Otua ‘o Sēkope? Ko e ‘Otua ‘oku ‘ikai ko e me‘a ia ‘a ha kau mate, ka ‘a ha kau mo‘ui.

³³Pea ‘i he fanongo ki ai ‘a e ngaahi fu‘u kakai, na‘e to‘oa honau loto ‘i he anga ‘o ‘ene ako.

³⁴Ka ko e kau Fālesi, ‘i he‘enau fanongo kuo ne fakasīlongo‘i ‘a e kau Sātusi, na‘a nau fakataha ki he potu ko ia.

³⁵Pea ko honau toko taha, ko e tufungalao, na‘a ne fai ha fehu‘i ki ai, ko ‘ene ‘ahi‘ahi‘i ia, ‘o ne pehē,

³⁶Tangata‘eiki, ko e fa‘ahinga tu‘utu‘uni fē ‘i he Lao ‘oku mamafa taha?

³⁷Pea ne pehē ki ai, Te ke ‘ofa ki he ‘Eiki ko ho ‘Otua, ‘o fai‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ‘atamai.

³⁸Ko eni ia ‘a e tu‘utu‘uni ‘oku mamafa taha mo tu‘ukimu‘a.

³⁹Pea ‘oku fa‘ahinga mo ia ‘a hono ua, Te ke ‘ofa ki ho kaungā‘api ‘o hangē ko ho‘o ‘ofa kiate koe.

⁴⁰Ko e ongo tu‘utu‘uni ko eni ‘e ua ‘oku tautau ki ai ‘a e Lao kotoa mo e Tohi Palōfita.

⁴¹Pea lolotonga kuo fakataha mai ‘a e kau Fālesi, pea fai ‘e Sīsū ‘ene fehu‘i kiate kinautolu, ‘o pehē,

⁴²Ko e hā ho‘omou poa ki he Mīsaia? Ko e hako nai ia ‘o hai? Pea nau tali, ‘O Tēvita.

⁴³Pea pehē ‘e ia kiate kinautolu, Kae fēfē ai hono ui ko e ‘Eiki ‘e Tēvita ‘i he‘ene Laumālie‘ia, ‘o ne pehē,

⁴⁴Ne folofola ‘e he ‘Eiki ki hoku ‘Eiki, Nofo koe ‘i hoku to‘omata‘u, Kae‘oua ke u ‘ai ho fili ki ho lalo va‘e?

⁴⁵Pea kapau ‘oku ui ia ‘e Tēvita ko hono ‘Eiki, pea ko hono hako fēfē ia?

⁴⁶Pea na‘e ‘ikai ha taha ‘e lava ha‘ane momo‘i tali; pea hili ‘a e ‘aho ko ia na‘e ‘ikai toe ai ha toko taha ‘e fakato‘oto‘a ke fai ha fehu‘i kiate ia.