Read KO E TOH TAPU KATOA TONGA Mātiú 23 Bible Online

Mātiú 23 - KO E TOH TAPU KATOA TONGA bible

Mātiú 23

¹NA‘E toki folofola ‘a Sīsū ki he ngaahi fu‘u kakai, pea mo ‘ene kau ako,

²‘o pehē, Ko e kau sikalaipe mo e Fālesi ‘oku nau ma‘u ‘a e tu‘unga ‘o Mōsese:

³ko ia, ‘ilonga ha me‘a ‘oku nau fekau kiate kimoutolu, mou fai ki ai mo tauhia; kae ‘oua na‘a mou fa‘ifa‘itaki ki he‘enau ngāue: he ‘oku nau lea kae ‘ikai fai ki ai.

⁴Pea ‘oku nau ha‘iha‘i ‘a e ngaahi kavenga mamafa, mo ‘ai ki he uma ‘o e kakai; ka ko kinautolu ‘oku ‘ikai te nau fie ‘ai hanau fo‘i tuhu ke hiki ia.

⁵Pea ka ai ha‘anau ngāue ‘oku fai, ko e fai pē ke mātā ‘e he kakai: he ‘oku nau failaketeli laulalahi, pea pao lōloa honau kofu;[22]

⁶pea nau manako ke tākoto ki mu‘a ‘i ha kātoanga, pea ke nofo ki mu‘a ‘i he falelotu,

⁷pea ke faka‘apa‘apa‘ia ‘i he mala‘e fakatau, pea ke ui ia ‘e he kakai, Lāpai.

⁸Ka ko kimoutolu ‘oua na‘a ui ko Lāpai: he ‘oku taha pē ho‘omou Faiako, ka ko kimoutolu ko e ngaahi tokoua kotoa pē.

⁹Pea ‘oua na‘a ui ha toko taha ‘i māmani ko ho‘omou tamai: he ‘oku taha pē ho‘omou Tamai, ko e Tamai Fakalangi.

¹⁰Kae‘uma‘ā ‘oua na‘a ui kimoutolu ko e kau takimu‘a: he ‘oku taha homou Takimu‘a, ko Kalaisi.

¹¹Ka ‘oka ai ha taha ‘iate kimoutolu ‘e lahi hake, te ne nofo ko ho‘omou sevāniti.

¹²Pea ko ia te ne hākeaki‘i ia ‘e fakavaivai‘i: pea ko ia te ne fakavaivai‘i ia ‘e hākeaki‘i.

¹³Ka ‘oiauē kimoutolu, sikalaipe mo e Fālesi, he mā‘oni‘oni loi! he ‘oku mou songo ‘a e Pule‘anga ‘o Hēvani ki he kakai ‘oku fangafanga hū ki ai: ‘io, ‘oku ‘ikai te mou fie hū kimoutolu, pea ko kinautolu ‘oku fai ke hū ‘oku ‘ikai te mou tuku ke nau hū.

¹⁴‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou folo kotoa ‘a e ngaahi ‘api ‘o si‘i kau uitou, pea mou mounu ‘aki ha lotu lōloa; ko ia, te mou ma‘u ‘e kimoutolu ha tautea ‘oku kehe ange.[23]

¹⁵‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou foli ‘a e tahi mo e fonua ke fakatafoki ha toko taha; pea ‘oka tafoki ia, ‘oku ne hoko ‘i ho‘omou ngāue ko e tama tātu‘oua ‘a Heli ‘iate kimoutolu.

¹⁶‘Oiauē kimoutolu, ‘a e kau takimu‘a kui! ho‘omou lau, Ka lea tuki ‘e ha taha ki he Fale Tapu ko e va‘inga ia, ka ‘oka lea tuki ‘e ha taha ki he koula ‘i he Fale Tapu pea pau ai ‘a e alea!

¹⁷‘a e koto vale mo kui! He ko e fē ‘oku lahi, ‘a e koula ko ia, pe ko e Fale ‘a ia ‘oku tu‘u ai ‘a e tapu ‘o e koula?

¹⁸Mo ho‘omou lau foki, Ka lea tuki ‘e ha taha ki he ‘ōlita, ko e va‘inga ia; ka ka lea tuki ‘e ha taha ki he me‘a‘ofa kuo hilifaki ki ai, pea pau ai ‘a e alea.

¹⁹‘a e koto kui! he ko e fē ‘oku lahi, ‘a e me‘a‘ofa ko ia, pe ko e ‘ōlita ‘oku tu‘u ai ‘a e tapu ‘o e me‘a‘ofa?

²⁰‘Āua, ko ia ‘oku ne lea tuki ki he ‘ōlita, ‘oku ‘ikai te ne lea ki ai pē, ka ‘oku ne lea foki ki he me‘a kotoa pē kuo hilifaki ki ai.

²¹Pea ko ia ‘oku ne lea tuki ki he Fale Tapu, ‘oku ‘ikai te ne lea ki ai pē, ka kiate Ia foki ‘oku ‘afio ai.

²²Pea ko ia ‘oku ne lea tuki ki he langi, ‘oku ne lea tuki ki he taloni ‘o e ‘Otua, pea mo Ia ‘oku ne ‘afio mei ai.

²³‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou ‘atu ki he siasi ‘a e vahe hongofulu ‘o ho‘omou minite mo e ‘aneto mo e kumino; ka kuo mou tuku ‘a e ngaahi me‘a mamafa ‘o e Lao, ‘a e fakamaau totonu, mo e fai meesi, mo e lototō: ka na‘e totonu ke fai ‘eni, pea ‘oua na‘a tuku ‘ena.

²⁴‘a e koto takimu‘a kui! ho‘omou sivi mei ho‘omou inu ‘a e namu, kae folofua ‘a e kāmeli!

²⁵‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou fufulu ‘a e tu‘a ipu mo e tisi, ka ‘oku fokotu‘uniu ‘i loto ‘a e fakamālohi mo e ta‘efakama‘uma‘u.

²⁶Fālesi kui! fufulu mu‘a ‘a e loto ipu, koe‘uhi ke hoko ‘o ma‘a mo tu‘a foki.

²⁷‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou tatau tofu pē mo e ngaahi fonualoto kuo vali hina, ‘a ia ‘oku matamatalelei ‘i tu‘a nai, ka ‘i loto ‘oku fokotu‘uniu ai ‘a e hui ‘o e pekia mo e ngaahi fakalielia kehekehe.

²⁸Pehē ‘a kimoutolu foki; ‘i tu‘a ‘oku mou hā ki he kakai ko e kau mā‘oni‘oni, ka ‘i loto ‘oku mou pito ‘i he mā‘oni‘oni loi mo e maumau lao.

²⁹‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou langafale‘i ‘a e ngaahi fonualoto ‘o e kau palōfita, mo fakasanisani ‘a e ngaahi fale fa‘itoka ‘o e kakai lotu;

³⁰‘o mou pehē, ‘Ē, ka ne mau ‘i he kuonga ‘o ‘emau ngaahi kui, ‘e ‘ikai te mau kau mo kinautolu ‘i he tāmate‘i ‘o e kau palōfita.

³¹Tā ‘oku mou fakamo‘oni kiate kimoutolu, ko e hako kimoutolu ‘o e kakai na‘a nau fakapoongi ‘a e kau palōfita.

³²Pe‘i mou fakalato ā ‘a e ngafa hia ‘a ho‘omou ngaahi kui.

³³‘a e fanga ngata! ‘a e hako‘i ngata fekai! Te mou hao fēfē mei he fakamaau Kihena?

³⁴Vakai ā! ko hono ō ia ‘oku ou fekau atu kiate kimoutolu ha kau palōfita, mo ha kau poto, mo ha kau sikalaipe: te mou tāmate‘i honau ni‘ihi mo kalusefai; pea te mou haha honau ni‘ihi ‘i homou ngaahi falelotu, pea fakafe‘ātungia mei he kolo ki he kolo:

³⁵koe‘uhi ke ‘eke kiate kimoutolu e toto kotoa ‘o e kakai mā‘oni‘oni ‘a ia kuo lilingi ki he kelekele, mei he toto ‘o ‘Ēpeli mā‘oni‘oni ‘o a‘u ki he toto ‘o Sākalaia ko e foha ‘o Palakaia, ‘a ia na‘a mou fakapoongi ‘i he vaha‘a ‘o e Fale Tapu mo e ‘ōlita.

³⁶Ko au ē, ‘oku ou tala atu, ‘E ‘eke ia kotoa pē ki he to‘utangata ko eni.

³⁷‘A Selusalema! ‘a Selusalema! ‘a e kolo ‘oku fakapoongi ‘a e kau palōfita, mo tolongi ‘a e kakai ‘oku talafekau ki ai! hono tu‘o taha ‘eku loto ke tānaki ho‘o fānau, ‘o hangē ko e tānaki ‘e he motu‘a moa hono fānganga ‘o‘ona ki hono lalo kapakau, ka na‘e ‘ikai te mou loto ki ai!

³⁸Ko eni kuo motuhi atu kiate kimoutolu ‘a homou fale kuo li‘aki.

³⁹He ‘oku ou tala atu, Hili ‘eni ‘e ‘ikai ‘aupito te mou toe sio kiate au, kae‘oua ke mou pehē, Hoto ‘ofa kiate ia ‘oku hoko mai ‘i he huafa ‘o e ‘Eiki.