Read KO E TOH TAPU KATOA TONGA Mātiú 24 Bible Online

Mātiú 24 - KO E TOH TAPU KATOA TONGA bible

Mātiú 24

¹PEA hū atu ‘a Sīsū mei he Temipale, ‘o kamata fononga: pea ‘unu‘unu ange ‘ene kau ako ke faka‘ali‘ali tala kiate ia ‘a e ngaahi fale ‘o e Temipale.

²Ka ka tali ‘e ia ‘o ne pehē kiate kinautolu, ‘Ikai ‘oku mou sio ni ki he ngaahi me‘a ni kotoa pē? Ko au ē, ‘oku ou tala atu, ‘E ‘ikai ‘aupito tuku ‘i heni ha fo‘i maka ‘o ta‘eholoki.

³Pea ‘i he‘ene nofo hifo ‘i he funga mo‘unga ko ‘Ōlive, na‘e ‘unu‘unu kiate ia ‘a e kau ako fakaekinautolu, ‘o nau pehē, Tala mai pe ‘e hoko fakakū ‘a e ngaahi me‘a ko ia? Pea ko e hā nai ‘a e faka‘ilonga ‘o ha‘o hā mai, mo e faka‘osi ‘o e kuonga?

⁴Pea tali ‘e Sīsū ‘o ne pehē kiate kinautolu, Vakavakai, na‘a taki hē kimoutolu ‘e ha taha.

⁵Koe‘uhi ‘e ai ha tokolahi te nau ha‘u ‘i he hingoa ‘o‘oku, mo nau pehē, Ko au ko e Mīsaia; pea te nau taki hē ha tokolahi.

⁶Pea ‘e faifai pea te mou fanongo ki ha ngaahi tau, mo ha ngaahi tala tau: tokanga ke ‘oua na‘a fakamanavasi‘i ai kimoutolu: he kuo pau ke hoko ia, kae kei tuai pē ‘a e ngata‘anga.

⁷Koe‘uhi ‘e tu‘u ha kakai ki ha kakai, mo ha pule‘anga ki ha pule‘anga: pea ‘e ai ha ngaahi honge mo ha ngaahi mofuike ‘i he ngaahi potu kehekehe.

⁸Ka ko e ngaahi me‘a kotoa ko ia ko e kamata‘anga pē ‘o e langā.

⁹Ko e taimi ko ia te nau tukuange kimoutolu ki he fakamamahi, pea te nau tāmate‘i kimoutolu: pea te mou fehi‘anekina ‘e he ngaahi kakai kehekehe, ko e me‘a ‘i he hingoa ‘o‘oku.

¹⁰Pea ko e taimi ko ia ‘e tūkia ha tokolahi, pea te nau tau‘aki faka‘ilo kinautolu, mo fefehi‘anaki.

¹¹Pea ‘e tokolahi ha kau palōfita loi ‘e tupu hake, pea te nau taki hē ha tokolahi.

¹²Pea ko e me‘a ‘i he ope ‘o e maumau lao, ‘e faka‘a‘au ‘o momoko ‘a e ‘ofa ‘a e tokolahi.

¹³Ka ko ia te ne kātaki ‘o a‘u ki he ngata‘anga, ko e toko taha ko ia te ne mo‘ui.

¹⁴Pea ‘oua ke fanongonongo ki māmani kātoa ‘a e ongoongo lelei ko eni ‘o e pule‘anga, ke ai ha fakamatala ki he ngaahi kakai kotoa pē, pea toki hoko ‘a e ngata‘anga.

¹⁵Ko ia, ka mou ka vakai ‘oku tu‘u ‘i he Potu Tapu ‘a e me‘a fakalielia ‘o e faka‘auha, ‘a ia na‘e folofola ki ai ‘i he palōfita ko Tāniela; (‘ilonga ha taha ‘oku lau, pea ke ne tokanga ki ai)

¹⁶pea ke toki hola ki he mo‘unga ‘a kinautolu ‘oku ‘i Siutea:

¹⁷pea ko ia ‘oku ‘i he tu‘a fale ke ‘oua te ne ‘alu hifo ke ‘ave ‘a e ngaahi me‘a mei hono fale:

¹⁸pea ko ia ‘oku ‘i he ngoue, ke ‘oua te ne foki ki ‘api ke ‘ave hono kofu.

¹⁹Ka ‘oiauē ‘a kinautolu ‘oku feitama, mo kinautolu ‘oku toutama ‘i he taimi ko ia!

²⁰Pea mou lotua ke ‘oua na‘a hoko ho‘omou hola ‘i he fa‘ahita‘u momoko, kae‘uma‘ā ‘i ha Sāpate:

²¹koe‘uhi ‘e toki hoko ai ha mamahi lahi, ‘a ia kuo te‘eki hano tatau mei he kamata‘anga ‘o māmani ‘o a‘u mai ki he taimi ni, ‘oi, pea ‘e ‘ikai ‘aupito toe ‘i ai.

²²Pea ka ne ta‘e‘oua ‘a e fakanounou ‘o e taimi ko ia, pehē ‘e ‘auha ‘a e kakano kotoa pē: kae telia ‘a e kakai fili ‘e fakanounou ai ‘a e taimi ko ia.

²³Pea kapau ‘e toki pehē atu ‘e ha taha, ‘Ē, ko e Mīsaia ‘oku ‘i heni, pe ‘i hena; ‘oua te mou momo‘i tui ki ai.

²⁴Koe‘uhi ‘e tupu hake ha kau mīsaia loi, mo ha kau palōfita loi, pea ‘e ha‘u mo kinautolu ha ngaahi faka‘ilonga lahi mo e ngaahi me‘a fakaofo; ‘io, ka ne lava, na‘a mo e kakai fili ‘e taki hē ai.

²⁵Ko eni kuo u sinaki tala atu.

²⁶Ko ia, kapau te nau pehē kiate kimoutolu, Sī, ‘oku ne ‘i he toafa; ‘oua te mou ‘alu ki ai; Sī, ‘oku ne ‘i ha tukunga koloa; ‘oua te mou momo‘i tui ki ai.

²⁷He hangē ko e pā mai ‘a e ‘uhila mei hahake, pea ‘oku hā ‘o a‘u ki hihifo; ‘e pehē foki ‘a e hoko mai ‘a e Fanautama ‘a Tangata.

²⁸‘Ilonga ha potu ‘e ‘i ai ha ‘anga‘anga, pea ‘e fakataha ki ai ‘a e fanga ‘īkale.

²⁹Pea hili leva ‘a e mamahi ‘o e taimi ko ia ‘e fakapo‘uli ‘a e la‘ā, pea ‘e tuku ‘e he māhina ‘ene huhulu, pea ‘e ngangana ‘a e ngaahi fetu‘u mei langi, pea ‘e ngatōtō ‘a e ngaahi mālohinga ‘o e ngaahi langi:

³⁰pea ‘e toki hā ‘i he langi ‘a e faka‘ilonga ‘o e Fanautama ‘a Tangata; pea ‘e toki lau‘aitu ‘a e ngaahi matakali ‘o māmani, pea te nau sio ki he Fanautama ‘a Tangata ‘oku hoko mai, ‘oku ne heka ki he ngaahi ‘ao ‘o e langi pea ha‘u mo ia ‘a e fakangeingei mo e nāunau lahi.

³¹Pea te ne fekau atu ‘ene kau ‘āngelo ke ifi ‘a e talupite lahi; pea te nau tānaki ‘ene kakai fili mei he matangi ‘e fā, mei he ngata‘anga ‘e taha ‘o e ngaahi langi ‘o a‘u ki hono ngata‘anga ‘e taha.

³²Mou ma‘u mei he fiki hono fakatātā; ‘oka muimui hono muka pea ne kamata lau, ‘oku mou ‘ilo ‘oku ofi ‘a e fa‘ahita‘u māfana:

³³pehē foki kimoutolu ka mou ka mamata ki he ngaahi me‘a ko ia pea mou ‘ilo kuo panaki ia, ‘io, kuo a‘u ki he matapā.[24]

³⁴He ko au ē, ‘oku ou tala atu, ‘E ‘ikai ‘aupito mole ‘a e to‘utangata ko eni, kae‘oua ke hoko ‘a e ngaahi me‘a ko ia kotoa pē.

³⁵‘E mole ‘a e langi mo māmani, ka ko ‘eku ngaahi lea ‘e ‘ikai ‘aupito mole.

³⁶Ka ko e me‘a ki he ‘aho ko ia mo hono houa, ‘oku ‘ikai ha taha ‘oku ‘ilo ki ai; ‘io, pe ko e kau ‘āngelo ‘i he langi; pea na‘a mo e ‘Alo ‘oku ‘ikai;[25] ngata pē ‘i he Tamai toko taha.

³⁷Kae hangē ko e taimi ‘o Noa, ‘e pehē foki ‘a e hoko mai ‘a e Fanautama ‘a Tangata.

³⁸He hangē na‘e nofo ‘a e kakai ‘i he kuonga ‘o e Lōmaki, ‘o nau kai mo inu, ‘o nau ma‘u uaifi mo ma‘u husepāniti, ‘o a‘u ki he ‘aho ko ia na‘e hū ai ‘a Noa ki he ‘a‘ake;

³⁹pea na‘e ‘ikai te nau ‘alo‘iloa kae‘oua ke hoko mai ‘a e Lōmaki, ‘o ‘ave kinautolu fuli pē: ‘e pehē foki ‘a e hoko mai ‘a e Fanautama ‘a Tangata.

⁴⁰Ko e taimi ko ia, ‘ene tokaange ha ongo me‘a te na ‘i he ngoue; ‘e ‘ave ‘a e taha, kae tuku ‘a e taha.

⁴¹‘Ene tokaange ha ongo fafine ‘oku fai ‘ena momosi koane; ‘e ‘ave ‘a e taha kae tuku ‘a e taha.

⁴²Ko ia, ke mou le‘o; he ‘oku ‘ikai te mou ‘ilo pe ko e ‘aho fē ‘e hoko mai ai ‘a homou ‘Eiki.

⁴³Ka ko e me‘a ko eni ‘oku mou lāu‘ilo ki ai, ‘oka ne tokamea‘i ‘e he Tangata‘eiki pe ko e uasi fē ‘e ha‘u ai ‘a e kaiha‘a, pehē ne le‘o, ‘o ‘ikai tuku hono fale ke haea.

⁴⁴Ko ia, ke toka teuteu ‘a kimoutolu foki: he ko e hoko mai ‘a e Fanautama ‘a Tangata ‘e fai ‘i ha taimi ‘oku ‘ikai te mou ‘amanaki ai kiate ia.

⁴⁵‘Io, ko hai nai ‘a e tamaio‘eiki lototō mo fai fakapotopoto, ‘a ia ne fakanofo ‘e he‘ene ‘eiki ke pule‘i hono kau nofo‘anga, mo ‘ange ‘enau me‘akai ‘i hono taimi totonu?

⁴⁶Monū‘ia ā ‘a e tamaio‘eiki ko ia, ‘a ia ‘e ‘iloa ‘e he‘ene ‘eiki ‘i he‘ene hoko mai, ‘oku ne fai pehē.

⁴⁷Ko au ē, ‘oku ou tala atu, te ne fakanofo ia ke ne pule ki he‘ene ngaahi me‘a kotoa.

⁴⁸Ka ‘oka ka pehē ‘e he tamaio‘eiki kovi ko ena ‘i hono loto, ‘oku fakatotoka ‘e he‘eku ‘eiki ‘ene ha‘u;

⁴⁹Pea ne hanga ai ‘o haha ‘a kinautolu ‘oku ‘i he kau ngāue mo ia, pea ne kai foki mo inu kava mo e kau inu;

⁵⁰‘e toki ha‘u ‘a e ‘eiki ‘a e tamaio‘eiki ko ia ‘i ha ‘aho ‘oku ‘ikai te ne ‘amanekina ia, pea mo ha houa ‘oku ‘ikai te ne ‘ilo ki ai,

⁵¹pea te ne fahi ua ia,[26] pea tu‘utu‘uni ke ‘inasi fakataha ia mo e kau mā‘oni‘oni loi. Ko e potu ia ‘e toki hoko ai ‘a e tangi mo e fengai‘itaki ‘o e nifo.