Read KO E TOH TAPU KATOA TONGA Mātiú 26 Bible Online

Mātiú 26 - KO E TOH TAPU KATOA TONGA bible

Mātiú 26

¹PEA ko eni, ‘i he faka‘osi ‘e Sīsū ‘ene ngaahi lea ko ia kotoa, na‘a ne pehē ki he‘ene kau ako,

²‘Oku mou ‘ilo ‘oku toe ha ‘aho ‘e ua pea hoko ‘a e Pāsova, pea ‘e tukuange ai ‘a e Fanautama ‘a Tangata ke kalusefai.

³Ko e taimi ko ia na‘e fakataha ‘a e hou‘eiki taula‘eiki, mo e kau mātu‘a ‘o e kakai ‘Isileli, ki he loto‘ā ‘o e Taula‘eiki Lahi, ‘a ia ko hono hingoa ko Kaiafasi;

⁴pea na‘a nau puleaki‘i ha‘anau puke fakaolo kia Sīsū, ‘o tāmate‘i.

⁵Ka na‘a nau pehē, ‘oua ‘e fai lolotonga ‘a e kātoanga, na‘a ai ha maveuveu ‘i he kakai.

⁶Pea ko eni, lolotonga ‘a e nofo ‘a Sīsū ‘i Pētani, ‘i he fale ‘o Saimone ko e kilia,

⁷mo e ‘unu‘unu mai ha fefine kuo ha‘u mo ia ha hina ‘alapasita, na‘e fonu ‘i he lolo tākai mātu‘aki mahu‘inga, ‘o ne lilingi ia ki hono fofonga, lolotonga ‘ene tokoto ‘i he kai.

⁸Pea ‘i he sio ki ai ‘e he kau ako na‘a nau lāunga, ‘o nau pehē, Ko e maumau me‘a pehē koe‘uma‘ā?

⁹He ka ne fakatau ia, ne ma‘u ai ha me‘a lahi ke foaki ki he masiva.

¹⁰Ka ka mea‘i ‘e Sīsū, ‘o ne pehē kiate kinautolu, Ko e hā ‘oku mou fakamamahi ai ki he fefine? He ko e ngāue lelei kuo ne fai kiate au.

¹¹He ko e me‘a ki he masiva te mou feangai ai pē mo kinautolu; ka ‘e ‘ikai te mou feangai ai pē mo au.

¹²He ko ‘ene laku? ‘a e lolo ni ki hoku sino, ko ‘ene fai pē ko e teu hoku ‘anga‘anga ki fa‘itoka.

¹³Ko au ē ‘oku ou tala atu, ‘Ilonga ha potu ‘i māmani kātoa ‘e malanga‘aki ai ‘a e Kōsipeli ni, ‘e lea‘aki ai foki ‘a e me‘a ne fai ‘e si‘i fefine ni, ko e fakamanatu kiate ia.

¹⁴Ko e taimi ko ia na‘e ‘alu ki he hou‘eiki taula‘eiki ha toko taha ‘o e kau Hongofulumāua, ‘a ia ko hono hingoa ko Siutasi ‘Isikāliote,

¹⁵‘o ne pehē, Ko e hā te mou fie ‘omi ka u lavaki‘i ia kiate kimoutolu? Pea nau tu‘utu‘uni ma‘ana ha konga siliva ‘e tolungofulu.

¹⁶Pea mei he taimi ko ia na‘a ne kumi ha faingamālie ke lavaki‘i ia.

¹⁷Pea ‘i he ‘uluaki ‘o e ngaahi ‘aho tapu lēvani, na‘e ‘unu‘unu mai ‘a e kau ako kia Sīsū, ‘o nau pehē, Ko e potu fē ‘oku ke loto ke mau teuteu ai ma‘au ke ke ‘ilo ‘a e Pāsova?

¹⁸Pea ne pehē, Mole ki he kolo kia Me‘a, pea lea ki ai, ‘Oku pehē ‘e he Tangata‘eiki, ‘oku ofi hoku taimi, ka u fai ‘i ho fale ‘a e Pāsova mo ‘eku kau ako.

¹⁹Pea na‘e fai ‘e he kau ako, ‘o hangē ko e tu‘utu‘uni kinaua ‘e Sīsū, ‘o na teuteu ‘a e Pāsova.

²⁰Pea ‘i he‘ene efiafi na‘a ne tokoto hifo ke kai, fakataha mo e kau Hongofulumāua ‘o ‘ene ako.

²¹Pea lolotonga ‘enau kai na‘a ne pehē, Ko au ē, ‘oku ou tala atu, Ko e toko taha ‘iate kimoutolu te ne lavaki‘i au.

²²Pea nau loto mamahi ‘aupito, ‘o nau kamata lea kiate ia tāutaha, ‘oku ‘ikai nai ko au, ‘Eiki, ‘ē?

²³Pea tali ‘e ia, ‘o ne pehē, Ko ia kuo ne velo fakataha mo au hono nima ki he tisi, ko ia ia te ne lavaki‘i au.

²⁴‘Oku mo‘oni ko e mole ‘a e Fanautama ‘a Tangata ‘oku hangē ko ia kuo tohi ma‘ana, ka ‘oiauē ‘a e tangata ko ia, ‘a ia te ne lavaki‘i ‘a e Fanautama ‘a Tangata! ne ngutuhua ange ki he tangata ko ia ‘oka ne ‘ikai fanau‘i.

²⁵Pea tali ‘e Siutasi, ‘a ia na‘a ne lavaki‘i ia, ‘o pehē, ‘oku ‘ikai nai ko au, Lāpai, ‘ē? Pea ne pehē ki ai, ‘E toe lau?

²⁶Pea lolotonga ‘enau kai, na‘e to‘o ‘e Sīsū ha fo‘i mā, ‘o ne tāpuaki ia, mo ne pakipaki ‘o tufaki ki he kau ako, ‘o ne pehē, To‘o ‘o kai; ko hoku sino ‘eni.

²⁷Na‘a ne to‘o foki ha ipu, mo ne fakafeta‘i, ‘o ne ‘ange kiate kinautolu, mo ne pehē, Mou inu kotoa pē mei ai;

²⁸he ko hoku toto ‘eni ko e toto fuakava, ‘a ia ‘oku lilingi koe‘uhi ko e tokolahi ke lava ai ‘a e fakamolemole angahala.

²⁹Ka ‘oku ou tala atu, hili ‘eni ‘e ‘ikai ‘aupito te u inu mei he fua ko eni ‘o e vaine, ‘o a‘u ki he ‘aho ko ia te u toki inu ia kuo fo‘ou ‘i he pule‘anga ‘o ‘eku Tamai, fakataha mo kimoutolu.

³⁰Pea hili ‘enau fai ha hiva, na‘a nau ‘alu ki he mo‘unga ko ‘Ōlive.

³¹Pea toki pehē ‘e Sīsū kiate kinautolu, Te mou tūkia kotoa pē ‘iate au he pō ni: he kuo tohi, Te u taa‘i ‘a e tauhi, pea ‘e movete ‘a e fanga sipi kuo ne tauhi.

³²Ka ‘oka hili hoku fokotu‘u, te u mu‘omu‘a ‘iate kimoutolu ki Kāleli.

³³Ka ka tali ‘e Pita ‘o ne pehē ki ai, Neongo ‘e tūkia kotoa pē ‘iate koe, ka ko au ‘e ‘ikai te u tūkia ‘o ta‘engata.

³⁴Pea lea ‘a Sīsū ki ai, Ko au ē, ‘oku ou tala atu, Ko e pō ni, ‘i he te‘eki ke ‘u‘ua ‘a e moa, ‘e tu‘o tolu mālō ha‘o fakafisinga au.

³⁵Pea pehē ‘e Pita ki ai, ‘E ‘ikai ‘aupito te u fakafisinga koe, neongo ‘e iku pē ki ha‘aku mate mo koe. Pehē foki mo e lau ‘ene kau ako kotoa.

³⁶Pea toki hoko ‘a Sīsū mo kinautolu ki ha potu ‘oku ui ko Ketisemani, pea ne pehē ki he‘ene kau ako, Mou nofo hē, ka u ‘alu ki hena ‘o lotu.

³⁷Pea ne ‘ave ‘a Pita, mo e ongo foha ‘o Sēpeti, pea ne kamata ke mamahi hono loto ‘o hoha‘a lahi.

³⁸Pea pehē ‘e ia kiate kinautolu, ‘oku mamahi fu‘u hoku laumālie, ‘o hangē ka mate; mou tatali ‘i heni ‘o fe‘ao mo au.

³⁹Pea ne ‘unu‘unu si‘i atu, ‘o ne fo‘ohifo ki hono fofonga, ‘o ne hū ‘o pehē, ‘Alā Tamai, kapau ‘e lava, tuku ke tolona ‘a e ipu ni meiate au: kaekehe ke ‘oua na‘a fai ki hoku loto, ka ki ho‘ou pē.

⁴⁰Pea ne ha‘u ki he kau ako, ‘o ne ‘ilo kinautolu ‘oku nau mohe; pea ne pehē kia Pita, ‘oku pehē koā ho‘omou ta‘elava ke ‘ā mo au ‘o houa taha?

⁴¹Le‘o pē mo lotu; ke ‘oua na‘a mou hū ki ha ‘ahi‘ahi: ‘oku loto pē ‘a laumālie ke fai, ka ‘oku vaivai ‘a kakano.

⁴²Pea toe ‘alu ia hono tu‘o ua, ‘o lotu, ‘o pehē, ‘Alā Tamai, kapau ‘e ‘ikai lava ke tolona ‘eni, ka ‘i he‘eku inu ia, pea ke fai ho finangalo.

⁴³Pea toe ha‘u ia ‘o ne ‘ilo kinautolu ‘oku nau kei mohe pē: he na‘e mafatukituki honau mata.

⁴⁴Pea ne tuku kinautolu, ‘o toe ‘alu ke lotu, ‘o ne toe fai‘aki ‘a e lea ko ia.

⁴⁵Pea toki ha‘u ia ki he kau ako, ‘o ne pehē kiate kinautolu, Mohe ai pē ā ‘eni mo mālōlō: ‘ē, kuo ofi ‘a e taimi, pea ‘oku lavaki‘i ‘a e Fanautama ‘a Tangata ki he kau angahala.

⁴⁶Mou tu‘u, tau ō; vakai kuo ofi mai hoku lavaki‘i.

⁴⁷Pea lolotonga ‘ene kei lea, tā ‘oku ha‘u ‘a Siutasi, ‘a ia ko e taha ‘o e kau Hongofulumāua, pea ha‘u mo ia ha fu‘u kakai tokolahi ‘oku nau fakaheletā mo faka‘akau, ko e omi mei he hou‘eiki taula‘eiki, mo e kau mātu‘a ‘o e kakai.

⁴⁸Pea ko hono lavaki kuo ne tuku kiate kinautolu ha faka‘ilonga, he‘ene pehē, Ka u ka ‘uma ki ha taha, ko ia ia, mou puke.

⁴⁹Pea ‘unu‘unu leva ia kia Sīsū, ‘o ne pehē, Lāpai, si‘oto‘ofa; ‘o ne ‘uma lolomi kiate ia.

⁵⁰Pea pehē ‘e Sīsū ki ai, Siana, ko e me‘a kuo ke ha‘u ai[27] — Pea toki ‘unu‘unu mai ‘a e kakai, ‘o nau ala mālohi kia Sīsū, ‘o puke ia.

⁵¹Pea ‘iloange, ko ha toko taha ‘iate kinautolu na‘e kau mo Sīsū na‘a ne ala ‘o unuhi ‘ene heletā, ‘o ne taa‘i ‘a e tamaio‘eiki ‘a e Taula‘eiki Lahi, ‘o ne tu‘usi hono lau‘i telinga.

⁵²Pea toki pehē ‘e Sīsū ki ai, Fakafoki ho‘o heletā ki hono tu‘unga; he ‘ilonga kinautolu ‘oku ala ki he heletā te nau mate heletā.

⁵³He ‘oku ke pehē koā ‘oku faingata‘a kiate au ke kole ‘eni ki he‘eku ‘Eiki, ke ne ‘omi ha konga kau ‘āngelo ‘e hongofulu mā ua, pe lahi hake, ke tapa kiate au?

⁵⁴Kae fakamo‘oni fēfē ai ‘a e ngaahi folofola, ‘a ia ‘oku fakahā kuo pau ke hoko ‘o pehē?

⁵⁵Ko e taimi ko ia na‘e lea ai ‘e Sīsū ki he kakai, Ko ho‘omou omi fakaheletā mo faka‘akau ke puke au, ‘o hangē ko ha kaiha‘akau au! Ko e ‘aho kotoa pē na‘a ku nofo ‘i he Temipale ‘o faiako, ka na‘e ‘ikai te mou puke au.

⁵⁶Ka ko e fai ‘eni kotoa pē, koe‘uhi ke fakamo‘oni ki he ngaahi folofola ‘a e kau palōfita. Pea na‘e toki li‘aki ia ‘e he kau ako kotoa, ‘o nau hola.

⁵⁷Pea ko kinautolu na‘e puke ‘a Sīsū na‘a nau taki ange ki he fale ‘o Kaiafasi, ko e Taula‘eiki Lahi, ‘a ia kuo fakataha ai ‘a e kau sikalaipe mo e kau mātu‘a.

⁵⁸Pea muimui atu ki ai ‘a Pita mei he mama‘o, ‘o a‘u ki he loto‘ā ‘o e Taula‘eiki Lahi, pea ne hū ki loto, ‘o ne nofo mo e kau ‘ōfisa ke vakai ‘a e me‘a ‘e hoko.

⁵⁹Pea ko e hou‘eiki taula‘eiki, mo e Sanetalimi kātoa, na‘a nau fiu‘a kumi ha tukuaki‘i ‘o Sīsū, ke nau tāmate‘i ia;

⁶⁰ka na‘e ‘ikai te nau ma‘u, neongo na‘e ‘i ai ha tokolahi na‘e tu‘u mai ke tukuaki‘i ia.

⁶¹Ka na‘e faifai pea tu‘u mai ha toko ua ‘o na pehē, Na‘e lau ‘a e siana ni, Faingofua kiate au ke vete ‘a e Fale Tapu ‘o e ‘Otua, ‘o toe langa ‘i he ‘aho ‘e tolu.

⁶²Pea tu‘u ‘a e Taula‘eiki-lahi, ‘o ne pehē kiate ia, ‘Oku ‘ikai ha‘o tali ki he me‘a ‘oku talatalaaki‘i ai koe ‘e he tu‘unga me‘a ni?

⁶³Ka ka fakalongo pē ‘a Sīsū. Pea toe lea ‘e he Taula‘eiki-lahi, ‘o ne pehē ki ai, ‘Oku ou hū atu ‘i he ‘Otua ‘oku ‘afio ni, ke ke tala mai pe ko e Mīsaia koe, ko e ‘Alo ‘o e ‘Otua.

⁶⁴Pea tali ‘a Sīsū ki ai, Ko ia pē ‘oku ke me‘a: ka ‘oku ou tala atu, hili ‘eni te mou mamata ki he Fanautama ‘a Tangata, ‘oku ne nofo ki he nima to‘omata‘u ‘o Mālohi, pea ‘oku ne hoko mai ‘oku heka ki he ngaahi ‘ao ‘o e langi.

⁶⁵Pea na‘e toki hae hifo ‘e he Taula‘eiki-lahi hono kofu ‘o‘ona, ‘o ne pehē, Kuo ne lea fie‘otua; koe‘uma‘ā ‘etau toe kumi fakamo‘oni? Ko eni kuo mou toki fanongo ni ki he lea fie‘otua.

⁶⁶Ko e hā ho‘omou poa? Pea nau tali ‘o pehē, Ko e tangata ia ke mate.

⁶⁷Pea nau toki ‘anuhi hono fofonga, pea nau tuki‘i ia; pea sipi‘i ia ‘e ha ni‘ihi,

⁶⁸‘o nau pehē, ‘E Mīsaia, mate mai pe ko hai na‘e taa‘i koe.

⁶⁹Pea nofo pē ‘a Pita ‘i tu‘a ‘i he loto‘ā: pea ‘unu‘unu ki ai ha toko taha, ko ha kaunanga, ‘o ne pehē, Ko koe foki na‘a ke ‘ia Sīsū mei Kāleli.

⁷⁰Pea ne faka‘ikai ‘i he ‘ao ‘onautolu kotoa pē, he‘ene pehē, ‘oku ‘ikai te u ‘ilo pe ko ho‘o lau ki he hā.

⁷¹Pea kuo ne ‘alu ki he falehū‘anga, pea sio kiate ia ‘e ha fefine ‘e taha, pea ne pehē kiate kinautolu ‘i he potu ko ia, Ko e siana ni foki na‘e ‘ia Sīsū mei Nāsaleti.

⁷²Pea toe faka‘ikai ‘e ia, ‘o ne lea tuki, ‘oku ‘ikai te u ‘iloa ‘a e tangata.

⁷³Pea toe si‘i atu na‘e ‘unu‘unu kiate ia ‘a kinautolu na‘e tutu‘u ai, ‘o nau pehē kia Pita, ‘Ā, ‘oku mo‘oni pē ‘oku ke kau koe foki ki he fa‘ahinga ko ia; kae‘uma‘ā ‘oku ke ‘ilonga mei ho‘o fasi.

⁷⁴Pea toki hanga ia, ‘o tuki mo fuakava, ‘oku ‘ikai te u ‘iloa ‘a e tangata. Pea ‘iloange na‘e ‘u‘ua ‘a e moa.

⁷⁵Pea manatu ‘e Pita ki he lea na‘e fai ‘e Sīsū, ‘I he te‘eki ke ‘u‘ua ‘a e moa, ‘e tu‘o tolu mālō ha‘o fakafisinga au. Pea ne ‘alu atu kitua‘ā, ‘o ne tangi mamahi.