Read KO E TOH TAPU KATOA TONGA Mātiú 3 Bible Online

Mātiú 3 - KO E TOH TAPU KATOA TONGA bible

Mātiú 3

¹‘I he kuonga ko ia na‘e ha‘u ‘a Sione Papitaiso, ‘o malanga ‘i he toafa ‘o Siutea,

²‘o ne pehē, Mou fakatomala, he kuo ofi ‘a e Pule‘anga ‘o e Langi.

³He ko eni ia na‘e lea ki ai ‘e he palōfita ko ‘Aisea, ‘o pehē, Ko e le‘o ‘o ha toko taha ‘oku kalanga he toafa, Mou teuteu ‘a e hā‘ele‘anga ‘o Sihova; Fakatonutonu hono ngaahi hala.

⁴Pea ko e kofu ‘o Sione ko ia na‘e ngaohi mei he fulufulu‘i kāmeli, pea fakama‘u leta ‘i hono kongaloto: pea ko ‘ene me‘akai ko e he‘e mo e honi ‘o e vao.

⁵Pea na‘e toki ‘alu atu kiate ia ‘a Selusalema, mo Siutea kotoa, pea mo e feitu‘u kotoa ‘o Soatani:

⁶pea nau papitaiso ‘iate ia ‘i he vaitafe ko Soatani, he vete ‘enau ngaahi angahala.

⁷Pea ‘i he ene vakai ki he tokolahi ‘o e kau Fālesi mo e Sātusi ‘oku nau ha‘u ki he papitaiso, na‘a ne pehē kiate kinautolu, ‘a e hako‘i ngata fekai, ko hai ne fale‘i kimoutolu ke hola mei he houhau ‘oku tu‘unuku mai?

⁸Kapau ko ia, pea mou fua ‘o taau mo ha fakatomala.

⁹Pea ‘oua te mou hanga ‘o fuataki ‘i homou loto, ‘o pehē, Ko ‘Epalahame ‘a ‘emau tamai: he ‘oku ou tala atu, ‘oku mafai ‘e he ‘Otua ke fokotu‘u mei he ngaahi maka ni ha fānau kia ‘Epalahame.

¹⁰Pea ‘oku lolotonga tu‘u ni ‘a e toki ‘i he tefito ‘o e ngaahi ‘akau: ko ia ‘ilonga ha ‘akau ‘oku ‘ikai fua lelei, ‘oku tā ‘o laku ki he afi.

¹¹Ko au ‘oku ou papitaiso vai kimoutolu ki he fakatomala: ka ko ia ‘oku muimui mai ‘oku ne mālohi ‘iate au, ko e Toko Taha ia ‘oku ‘ikai te u taau ke takitaki hono topuva‘e: ‘e papitaiso kimoutolu ‘e ia ‘i he Laumālie Mā‘oni‘oni mo e afi.

¹²Ko e Toko Taha ia ‘oku ‘i hono nima ‘a e ī, pea te ne tapili ke ‘osi ‘a ‘ene ‘au‘au‘anga: pea te ne tānaki ‘ene ngaahi fo‘i uite ki he feleoko, ka te ne tutu ‘a e kafukafu ‘aki ‘a e afi ‘oku ‘ikai matāmate‘i.

¹³Pea toki ha‘u ‘a Sīsū mei Kāleli ki Soatani kia Sione ke papitaiso ‘iate ia.

¹⁴Ka ka teke‘i ia ‘e Sione, ‘o ne pehē, Na‘e totonu mu‘a ke u papitaiso ‘iate koe, pea ‘oku ke ha‘u koā kiate au?

¹⁵Pea tali ‘e Sīsū ‘o ne pehē kiate ia, Tukuange pē ‘i he taimi ni: he ‘oku taau pehē mo kitaua ke fakakakato ‘a e tu‘utu‘uni kotoa pē. Pea ne toki tukuange ia.

¹⁶Pea kuo papitaiso ‘a Sīsū, na‘a ne ‘alu hake leva mei he vai; pea vakai, na‘e matangaki ‘a e langi kiate ia, pea ne mamata ki he Laumālie ‘o e ‘Otua ‘oku ‘alu hifo ‘i he tatau ‘o ha lupe, ‘o ne a‘u kiate ia

¹⁷Pea ‘iloange, na‘e ai ha le‘o mei he langi na‘e pehē mai, Ko Hoku ‘Alo Pele ‘ena, ‘a ia kuo u hōifua ai.