Read KO E TOH TAPU KATOA TONGA Mātiú 5 Bible Online

Mātiú 5 - KO E TOH TAPU KATOA TONGA bible

Mātiú 5

¹PEA ‘i he‘ene sio ki he ngaahi fu‘u kakai, na‘a ne ‘alu hake ki he mo‘unga, pea ‘i he‘ene nofo hifo ke malanga na‘e ‘unu‘unu atu kiate ia ‘ene kau ako:

²pea ne ‘ofa‘aki ‘ene lea, ‘o ne ako‘i kinautolu, ‘o pehē,

³Monū‘ia ā ka ko kinautolu ‘oku ongo‘i masiva honau laumālie; he ‘oku ‘onautolu ‘a e Pule‘anga ‘o Hēvani.

⁴Monū‘ia ā ka ko kinautolu ‘oku fakamamahi: he ‘e fakafiemālie ‘a kinautolu.

⁵Monū‘ia ā ka ko kinautolu ‘oku fa‘a kātaki: he ‘e tō mo‘onautolu ‘a e fonua.

⁶Monū‘ia ā ka ko kinautolu ‘oka fie kai mo fie inu ki he mā‘oni‘oni: he ‘e fakamākona ‘a kinautolu.

⁷Monū‘ia ā ka ko kinautolu ‘oku manava‘ofa: he ‘e fai manava‘ofa kiate kinautolu.

⁸Monū‘ia ā ka ko kinautolu ‘oku ma‘a honau loto: he te nau mamata ki he ‘Otua.

⁹Monū‘ia ā ka ko kinautolu ‘oku fakatupu melino: he ‘e ui ‘a kinautolu ko e ngaahi foha ‘o e ‘Otua.

¹⁰Monū‘ia ā ka ko kinautolu ‘oku fakatanga‘i koe‘uhi ko e failelei: he ‘oku ‘onautolu ‘a e Pule‘anga ‘o Hēvani.

¹¹Monū‘ia ā ka ko kimoutolu, ‘oka manukia kimoutolu, mo fakatanga‘i, mo lohiekina ‘i he kovi kehekehe, koe‘uhi ko au.

¹²Mou fiefia mo hākailangitau: he lahi ho‘omou totongi ‘i Hēvani; he na‘e pehē ‘enau fakatanga‘i ‘a e kau palōfita, ‘a ia na‘e holomu‘a ‘iate kimoutolu.

¹³Ko kimoutolu ko e māsima ‘o e fonua: pea ka mole mei he māsima hono kona, ‘e fakamāsima ‘a e māsima ‘e he hā? ‘Oku ‘ikai kei ‘aonga ki ha me‘a, ka ke laku pē kitu‘a ke molo ai ‘a e kakai.

¹⁴Ko kimoutolu ko e maama ‘o māmani: ko e kolo ‘oku tu‘u ‘i ha funga mo‘unga ‘oku ‘ikai te ne lava ke puli.

¹⁵Pea tala‘ehai ‘oku tutu ha maama ‘o ‘ai ki he loto puha fua, ka ki he tu‘unga maama pē, pea ‘oku ulo atu ia ki he kakai kotoa pē ‘oku ‘i he fale.

¹⁶Pehē foki, ke ulo atu ho‘omou maama ke hā ki he kakai, ke nau mamata ki ho‘omou ngaahi ngāue lelei, pea fakamālō‘ia ‘a ho‘omou Tamai ‘oku ‘i Hēvani.

¹⁷‘Oua te mou mahalo kuo u ha‘u ke tāmate‘i ‘a e Lao, pe ko e Tohi Palōfita: na‘e ‘ikai te u ha‘u ke tāmate‘i, ka ke fakakakato.

¹⁸He ko au ē, ‘oku ou tala atu, Lolotonga ‘oku te‘eki mole ‘a e langi mo māmani, ‘e ‘ikai mole mei he Lao ha mata‘itohi ‘e taha, pe ko ha fo‘i kohi, kae‘oua ke fai hono kotoa.[1]

¹⁹Ko ia, ‘ilonga ‘a ia te ne tāmate‘i ha taha ‘i he ngaahi tu‘utu‘uni ni ‘oku kihi‘i si‘i, pea ako pehē ki he kakai, ‘e lau ia ko e kihi‘i si‘i ‘i he Pule‘anga ‘o Hēvani: ka ‘ilonga ‘a ia te ne fai ki ai mo ako‘aki, ‘e lau ia ko e lahi ‘i he Pule‘anga ‘o Hēvani.

²⁰He ‘oku ou tala atu, Kapau ‘e ‘ikai lahi hake ho‘omou mā‘oni‘oni ‘i he mā‘oni‘oni ‘a e kau sikalaipe mo e kau Fālesi, ‘e ‘ikai, ‘aupito te mou hū ki he Pule‘anga ‘o Hēvani.

²¹Kuo mou fanongo ne folofola‘aki ki he mātu‘a ‘i mu‘a, ‘o pehē, ‘oua na‘a ke fakapō; pea ‘ilonga ‘a ia te ne fakapō, ‘e fakamāumatea ia ‘i he fakamā‘anga fakakolo:

²²ka ‘oku ou tala kiate kimoutolu ‘e au, ‘Ilonga ‘a ia te ne ‘ita[2] ki hono kāinga, ‘e fakamāumatea‘i he fakamāu‘anga fakakolo; pea ka ‘ilonga ‘a ia te ne pehē ki hono kāinga, Siana vale, ‘e fakamāumatea ia ‘i he Sanetalimi; ka ‘ilonga ha taha te ne pehē, Siana angatu‘u, ‘e fakamāumatea pea tutu ‘i he afi ‘o Kihena.

²³Ko ia, ka kuo ke ha‘u mo koe ha feilaulau ki he ‘ōlita, ‘o ke toki manatu‘i ai ‘oku ai ha me‘a ‘oku kovi‘ia ai ho kāinga kiate koe:

²⁴tuku pē hena ho‘o feilaulau ‘i he ve‘e ‘ōlita, pea ke mole atu mu‘a ‘o fakalelei ho kāinga, pea ke toki ha‘u ‘o ‘atu ho‘o feilaulau.

²⁵‘Alu vave ‘o ‘ahi‘ahi fakamolemole ki he tangata faka‘ilo, ‘o toutou kole ‘o a‘u ki ho‘omo fangafanga hū ki he fakamaau; na‘a ‘iloange; ‘e ‘oatu koe ‘e he faka‘ilo ki he fakamaau, pea ‘oatu ‘e he fakamaau ki he ‘ōfisa, pea ‘e lī koe ki he pilīsone.

²⁶Ko au ē, ‘oku ou tala atu, ‘E ‘ikai te ke ‘alu mei ai kae‘oua ke ‘osi ho‘o totongi ‘o a‘u ki he toenga sēniti.

²⁷Kuo mou fanongo na‘e folofola‘aki, ‘oua na‘a ke tono fefine:

²⁸ka ‘oku ou tala kiate kimoutolu ‘e au, ‘Ilonga ‘a ia te ne fakasio ki ha fefine ke tafunaki ‘ene holi ki ai, kuo ne tono‘i ia ‘i hono loto.

²⁹Ko ia, neongo ko ho mata to‘omata‘u ‘oku fakahingaki koe, kape‘i ia ‘o li‘aki: he ‘oku lelei mu‘a kiate koe ke mole hao kupu pē ‘e taha, ‘i he lī ho sino kotoa ki Heli.

³⁰Pea neongo ko ho nima to‘omata‘u ‘oku fakahingaki koe, tu‘usi ia pea li‘aki; he ‘oku lelei mu‘a kiate koe ke mole hao kupu pē ‘e taha, ‘i he a‘u ho sino kotoa ki Heli.

³¹Ka na‘e folofola‘aki, ‘Ilonga ha taha te ne li‘aki hono uaifi, ke ne ‘ange ki ai ha tohi vete:

³²ka ‘oku ou tala kiate kimoutolu ‘e au, Ko ia ‘oku ne li‘aki hono uaifi, kae ‘ikai ‘i ha‘ane faihala mo ha taha, ‘oku ne tuku ia ke tonoa: pea ko e tangata te ne mali mo ia kuo li‘aki ‘oku ne tono fefine.

³³Ko eni foki, kuo mou fanongo na‘e folofola‘aki ki he mātu‘a ‘i mu‘a, ‘oua na‘a ke fuakava loi, ka ke vete ki he ‘Eiki ho‘o ngaahi fuakava:

³⁴Ka ‘oku ou tala kiate kimoutolu ‘e au, ‘oua ‘aupito na‘a lea tuki, ‘oua ‘e lea ki he langi, he ko e taloni ia ‘o e ‘Otua:

³⁵pe ki he fonua, he ko hono tu‘ungava‘e; pe ki Selusalema, he ko e kolo ia ‘o e Tu‘i Fakaleveleva.

³⁶‘Oua ‘e lea tuki ki ho ‘ulu, he ‘oku ‘ikai te ke mafai hano liliu ‘o ha tu‘oni lou‘ulu ‘e taha ke hinehina pe ‘uli‘uli.

³⁷Ka ke peheni ho‘omou lea, ‘Io, ‘Io, ‘Ikai, ‘Ikai: he ka ai hano fakalahi ‘oku mei he Fili ia.

³⁸Kuo mou fanongo na‘e folofola‘aki, Ke totongi ‘aki ‘a e fo‘i mata ha fo‘i mata, mo e fo‘i nifo ha fo‘i nifo:

³⁹ka ‘oku ou tala kiate kimoutolu ‘e au, ‘oua na‘a taliteke‘i ho fili; ka ‘oka sipi‘i ‘e ha taha ho kou‘ahe to‘omata‘u, hanga koe, ‘o fulihi ki ai ho to‘ohema.

⁴⁰Pea ka loto ha taha ke mo hopo, pea ke ne ma‘u ho sote; tuku kiate ia mo ho pulupulu.

⁴¹Pea ka fakafatongia koe ‘e ha talafekau ke ke ‘ave ia ‘i ha maile ‘e taha, pea mole mo ia ‘o maile ua.

⁴²Ka fai ha kole ‘e ha taha kiate koe, tali pē; pea ka loto ha taha ke nō meiate koe, ‘oua na‘a ke fulitu‘a ki ai.

⁴³Kuo mou fanongo na‘e folofola‘aki, Te ke ‘ofa‘i ho kaungā‘api, kae fehi‘a ki ho fili:

⁴⁴ka ‘oku ou tala kiate kimoutolu ‘e au, Mou ‘ofa‘i homou ngaahi fili, pea hūfia ‘a kinautolu ‘oku nau fakatanga‘i kimoutolu.

⁴⁵Koe‘uhi ke mou hokosi ho‘omou Tamai ‘oku ‘i Hēvani: he ‘oku ne fakahopo ‘ene la‘ā ki he kovi mo e lelei, pea ‘oku ne faka‘uha ki he faitotonu mo e faihala.

⁴⁶He kapau te mou ‘ofa‘i ‘a kinautolu pē ‘oku ‘ofa mai, ko e me‘a ia ‘e fakakoloa? ‘ikai ‘oku fai pehē mo e kau pōpilikane?

⁴⁷Pea kapau ‘oku mou fetapa ki homou kāinga pē, ko e hā ha me‘a ‘oku mou fai ‘oku hulu atu? ‘Ikai ‘oku fai ‘e he Senitaile foki ‘a e me‘a ko ia?

⁴⁸Ka mou haohaoa pē ‘a kimoutolu; ‘o hangē ‘oku haohaoa ‘a ho‘omou Tamai Fakalangi.