Read KO E TOH TAPU KATOA TONGA Ma‘aké 1 Bible Online

Ma‘aké 1 - KO E TOH TAPU KATOA TONGA bible

Ma‘aké 1

¹KO E kamata‘anga ‘o e Kōsipeli ‘o Sīsū Kalaisi, ko e ‘Alo ‘o e ‘Otua.[1]

²Hangē pē ko e me‘a kuo tohi ‘i he Palōfita ko ‘Aisea, Vakai ‘oku ou fekau atu hoku fakamelomelo ke mu‘omu‘a kiate koe, ‘A ia te ne ngaohi ho hala.

³Ko e le‘o ‘o ha toko taha ‘oku kalanga he toafa, Mou teuteu ‘a e hā‘ele‘anga ‘o Sihova; Fakatonutonu hono ngaahi hala:

⁴pehē na‘e ‘i ai ‘a Sione Papitaiso ‘i he toafa, ‘oku ne malanga‘aki ‘a e papitaiso fakatomala[2] ki he fakamolemole ‘o e angahala.

⁵Pea na‘e ‘alu atu kiate ia ‘a e fonua kātoa ‘o Siutea, mo e kakai Selusalema fuli pē; ‘o nau papitaiso ‘iate ia ‘i he vaitafe ko Soatani, he vete ‘enau ngaahi angahala.

⁶Pea na‘e ‘ai ‘e Sione ha kofu fulufulu‘i kāmeli, mo ha fakama‘u leta ‘i hono kongaloto; pea ne kai ‘a e fanga he‘e mo e honi vao.

⁷Pea na‘a ne malanga, ‘o pehē, ‘oku muimui mai ha Toko Taha ‘oku mālohi ‘iate au; ko e Toko Taha ‘oku ‘ikai te u taau ke punou ‘o vete ‘a e nono‘o ‘o hono topuva‘e.

⁸Na‘a ku papitaiso kimoutolu ‘aki ‘a e vai: ka te ne papitaiso kimoutolu ‘e ia ‘aki ‘a e Laumālie Mā‘oni‘oni.

⁹Pea na‘e hoko ‘i he kuonga ko ia ‘a e ha‘u ‘a Sīsū mei Nāsaleti ‘i Kāleli, ‘o ne papitaiso ‘ia Sione ‘i Soatani.

¹⁰Pea ‘i he‘ene ‘alu hake leva mei he vai, na‘a ne vakai kuo mahae ange ‘a e langi pea ‘oku ‘alu hifo kiate ia ‘a e Laumālie ‘i he tatau ‘o ha lupe.

¹¹Pea na‘e ai ha le‘o mei he langi na‘e pehē mai, Ko hoku ‘alo Pele koe; ko koe kuo u hōifua ai.

¹²Pea fakapuna leva ia ‘e he Laumālie ki he toafa.

¹³Pea na‘a ne ‘i he toafa ‘o ‘Aho fāngofulu, he fai hono ‘ahi‘ahi ‘e Sētane; pea na‘a ne ‘i he fanga manu kaivao: pea na‘e tauhi kiate ia ‘a e kau ‘āngelo.

¹⁴Pea hili ‘a e tuku ‘o Sione ki he pilīsone, na‘e ‘alu ‘a Sīsū ki Kāleli, ‘o ne malanga‘aki ‘a e Kōsipeli ‘a e ‘Otua,

¹⁵‘o ne pehē, Kuo kakato hono taimi, pea kuo ofi ‘a e Pule‘anga ‘o e ‘Otua: mou fakatomala ‘o tui ki he Kōsipeli.

¹⁶Pea ‘i he‘ene hā‘ele ange ‘i he matātahi ‘o e Tahi ‘o Kāleli, na‘a ne vakai kia Saimone, pea mo ‘Anitelū ko e tehina ‘o Saimone, ‘oku na lalafo ‘i tahi, he ko e ongo toutai.

¹⁷Pea lea ‘a Sīsū kiate kinaua, Mo omi ‘o muimui ‘iate au; pea te u ngaohi kimoua ke mo hoko ko e ongo toutai tangata.

¹⁸Pea na li‘aki leva hona kupenga, ‘o muimui kiate ia.

¹⁹Pea kuo ne laka si‘i atu, na‘a ne vakai kia Sēmisi ko e foha ‘o Sēpeti, pea mo Sione ko hono tehina, mo kinautolu na‘e ‘i he vaka, ‘oku fai ‘enau pena kupenga.

²⁰Pea ne ui leva kinaua; pea na tuku ‘ena tamai ko Sēpeti ‘i he vaka mo e kau ngāue unga, ‘o na ‘alu mei ai ke muimui kiate ia.

²¹Pea nau fononga atu ‘o hū ki Kāpaneume; pea ‘i he Sāpate na‘a ne faiako leva ‘i he falelotu.

²²Pea na‘e to‘oa honau loto ‘i he anga ‘o ‘ene fai: he na‘a ne ako‘i kinautolu ‘o ngali ko ha pule, ‘o ‘ikai hangē ko e kau sikalaipe.

²³Pea na‘e ‘i honau falelotu ha tangata na‘e ulusino ai ha fa‘ahikehe: pea na‘a ne kalanga hake,

²⁴‘o ne pehē, Ko ho hā kimaua, ‘e Sīsū mei Nāsaleti? Kuo ke ha‘u ke faka‘auha kimaua? ‘Oku ou ‘ilo koe, ko e Toko Taha Tapu ‘o e ‘Otua.

²⁵Pea lolomi ia ‘e Sīsū, ‘o ne pehē, Tuku ho‘o lea, pea ke mahu‘i meiate ia.

²⁶Pea hanga ‘a e fa‘ahikehe, ‘o ne fakatekelili‘i ‘a e tangata; mo ne ‘ai ‘ene fu‘u kaila, ‘o ne toki mahu‘i mai.

²⁷Pea nau fu‘u ofo kotoa pē; ‘o nau fefakafehu‘i‘aki ‘iate kinautolu, ‘o pehē, Ko e hā ‘eni? Tā ko e fa‘ahinga ako ‘oku mālohi kehe: he na‘a mo e ngaahi fa‘ahikehe, ‘oku ne kouna pea nau talangofua kiate ia.

²⁸Pea pavake atu leva hono ongoongo ki he feitu‘u kotoa ‘o Kāleli.

²⁹Pea ‘i he‘ene ha‘u leva mei he falelotu, na‘a ne hū ki he fale ‘o Saimone mo ‘Anitelū, ‘oku ‘iate ia ‘a Sēmisi mo Sione.

³⁰Pea na‘e tokoto ai ‘a e fa‘ē ‘a e uaifi ‘o Saimone, ‘oku puke ‘i he mofi: pea nau lea leva kia Sīsū ‘i he fefine.

³¹Pea tu‘u atu ia ki ai, ‘o ne puke hono nima ‘o fokotu‘u; pea mahu‘i leva ‘a e mofi meiate ia, pea ne hanga ‘o tauhi kinautolu.

³²Pea ‘i he efiafi, kuo tō ‘a e la‘ā, na‘a nau ‘omai kiate ia ‘a e kakai kotoa pē na‘e puke, pea mo e kau ‘āvea.

³³Pea tefua mai ‘a e kolo kotoa ki he matapā ‘o e fale.

³⁴Pea na‘a ne fakamo‘ui ha ni‘ihi ‘iate kinautolu na‘e puke ‘i he fa‘ahinga mahaki kehekehe, mo ne kapusi ha ni‘ihi ‘i he kau tēvolo; pea na‘e ‘ikai te ne tuku ke lea ‘a e kau tēvolo, koe‘uhi na‘a nau ‘ilo ia.

³⁵Pea ofi ki he ‘aho, kae kei fakapo‘uli ‘aupito, na‘a ne tu‘u hake ‘o ‘alu ki tu‘a; ‘o ne mole ki ha potu na‘e lala, ‘o ne lotu ai.

³⁶Pea tuli kiate ia ‘a Saimone mo kinautolu na‘e ‘iate ia:

³⁷pea ‘i he‘enau ‘ilo ia na‘a nau pehē ki ai, ‘oku fiema‘u koe ‘e he kakai kotoa.

³⁸Pea pehē ‘e ia kiate kinautolu, tau ō ki ha potu kehe, ki he ngaahi vilisi ofi mai, koe‘uhi ke u malanga ki ai foki: he ko ia ia na‘a ku ha‘u ai.

³⁹Pea na‘a ne ‘i ai, ‘o malanga ‘i honau ngaahi falelotu ke ‘osi ‘a Kāleli: pea na‘a ne kapusi tēvolo foki.

⁴⁰Pea ha‘u kiate ia ha kilia, ‘o ne kole mo tū‘ulutui kiate ia, mo ne pehē, Ka ne ke loto ke fai, te ke lava ke fakama‘a au.[3]

⁴¹Pea langa ‘a e fatu ‘o Sīsū ‘i he ‘ofa,[4] ‘o ne mafao atu hono nima ‘o ala kiate ia, mo ne pehē, ‘oku ou loto pē; ke ke ma‘a koe.

⁴²Pea ‘i he‘ene folofola, na‘e matafi leva ‘a e kilia meiate ia, pea ne ma‘a.

⁴³Pea ne na‘ina‘i mamafa kiate ia, ‘o ne teke‘i leva ke ne ‘alu:

⁴⁴‘o ne pehē ki ai, Tokanga ke ‘oua na‘a ke tala ha me‘a ki ha taha; ka ke mole pē ‘o fakahā koe ki he taula‘eiki, pea ‘ange ‘a e ngaahi me‘a na‘e tu‘utu‘uni ‘e Mōsese mo‘ao fakama‘a, kōno fakamo‘oni kiate kinautolu.

⁴⁵Ka ka ‘alu pē ia ‘o ne kamata ke fu‘u ongoongoa mo talanoa holo ‘a e me‘a; ko ia na‘e ‘ikai ke kei lava ‘e Sīsū ke hū fakahā ki ha kolo, ka ka nofo pē ia ‘i tua‘ā, ‘i he ngaahi potu na‘e lala; pea ha‘u ‘a e kakai kiate ia mei he feitu‘u kotoa pē.