Read KO E TOH TAPU KATOA TONGA Ma‘aké 10 Bible Online

Ma‘aké 10 - KO E TOH TAPU KATOA TONGA bible

Ma‘aké 10

¹PEA ne tu‘u, ‘o ‘alu mei ai ki he tafa‘aki fonua ‘o Siutea mo Tu‘a-Soatani: pea na‘e toe fetautaulaki mai kiate ia ha ngaahi kakai; pea ne toe ako‘i kinautolu, ‘o hangē ko ‘ene fa‘a fai.

²Pea ha‘u ha kau Fālesi, ‘o nau fehu‘i kiate ia pe ‘oku ngofua ki ha tangata ke tukuange hono uaifi? ko ‘enau tauhele‘i ia.

³Ka ka tali ‘e ia ‘o ne pehē kiate kinautolu, Ko e hā ‘a e tu‘utu‘uni ‘a Mōsese kiate kimoutolu?

⁴Pea nau pehē, Na‘e fakangofua ‘e Mōsese ke fai ha tohi vete, pea tukuange.

⁵Pea tali ‘e Sīsū kiate kinautolu, Ko e me‘a ‘i he fefeka ‘o ho‘omou anga, ko ia na‘a ne tohi ai ‘a e tu‘utu‘uni ko ia kiate kimoutolu.

⁶Ka ‘i he kamata‘anga ‘o e fakatupu na‘e ngaohi tangata mo fefine ‘a e kakai.

⁷“Ko e me‘a ko ia ‘e tuku ai ‘e ha tangata ‘ene tamai mo ‘ene fa‘ē ka ne pīkitai ki hono uaifi;[17]

⁸pea ‘e hoko ‘a e toko ua ko e kakano pē taha.” Tā ‘oku ‘ikai te na kei ua, ka ko ha kakano pē taha.

⁹‘Āua; pea ko e me‘a kuo fakahoko ‘e he ‘Otua, ke ‘oua na‘a fakamāvae ‘e ha tangata.

¹⁰Pea kuo nau ‘i fale, pea toe ‘eke kiate ia ‘e he kau ako ‘i he me‘a ko ia.

¹¹Pea ne pehē kiate kinautolu, Ka ai ha taha te ne tukuange hono uaifi, pea ne toki mali mo ha fefine kehe, ‘oku ne fe‘auaki mo e fefine ko ia.

¹²Pea ka tukuange ‘e ha fefine hono husepāniti, ‘o ne toki mali mo ha tangata kehe, ‘oku ne fe‘auaki.

¹³Pea na‘e ‘omi kiate ia ha tamaiki, koe‘uhi ke ne ala kiate kinautolu; pea kamata lolomi ‘e he kau ako ‘a e kakai na‘e ‘omi kinautolu.

¹⁴Ka ‘i he mamata ki ai ‘a Sīsū na‘a ne tuputāmaki, ‘o ne pehē kiate kinautolu, Tuku pē ‘a e kau tamaiki ke nau ha‘u kiate au; ‘oua ‘e ta‘ofi kinautolu: he ‘oku ma‘a e fa‘ahinga ko ia ‘a e Pule‘anga ‘o e ‘Otua.

¹⁵Ko au ē, ‘oku ou tala atu, Ko ia ‘e ‘ikai te ne tali ‘a e Pule‘anga ‘o e ‘Otua ‘o hangē ko ha tamasi‘i, ‘e ‘ikai ‘aupito hū ia ki ai.

¹⁶Pea ne hapai ‘a e kau tamaiki, ‘o ne ‘ai hono nima kiate kinautolu, ‘o ne fu‘u tāpuekina.

¹⁷Pea ‘i he‘ene hū mai ki he hala, na‘e lele mai ha toko taha, ‘o ne tō hifo ‘o puke ‘a e tui ‘o Sīsū, ‘o ne fehu‘i ki ai, ‘a e Tangata‘eiki lelei, ko e hā te u fai, kae tō mo‘oku ‘a e mo‘ui ta‘engata?

¹⁸Pea pehē ‘e Sīsū kiate ia, Ko e hā ‘oku ke ui ai au ko e lelei? ‘Oku ‘ikai ha taha ‘oku lelei, ngata pē ‘i he ‘Otua toko taha.

¹⁹‘Oku ke ‘ilo pē ‘a e ngaahi fekau, ‘Oua na‘a ke fe‘auaki, ‘Oua na‘a ke fakapō, ‘Oua na‘a ke kaiha‘a, ‘Oua na‘a ke tukuaki, ‘Oua na‘a ke fai kākā, Faka‘apa‘apa ki ho‘o tamai mo ho‘o fa‘ē.

²⁰Pea tali ia ‘o ne pehē ki ai, Tangata‘eiki, ko e ngaahi lao ko ia kuo u tauhi ki ai kotoa pē talu mei he‘eku tamasi‘i.

²¹Pea ‘i he siofia ia ‘e Sīsū na‘a ne ‘ofa ki ai, ‘o ne pehē kiate ia, Ko e me‘a pē taha ‘oku ke tōmui ai: mole pē ‘o fakatau atu ‘a e me‘a kotoa pē ‘oku ke ma‘u, pea foaki hono pa‘anga ki he masiva, pea ‘e ai ha koloa ‘e fa‘oaki ma‘au ‘i he langi: pea ke ha‘u ‘o kau ‘i hoku lahi.

²²Ka ka fakamāmāhu‘i pē ia ‘i he lea ko ia, ‘o ne foki kuo mamahi: he ko e toko taha ia na‘e ma‘u me‘a lahi.

²³Pea vakai foli ‘e Sīsū, ‘o ne pehē ki he‘ene kau ako hono ‘ikai faingata‘a ki he kakai ma‘u pa‘anga ke hū ki he pule‘anga ‘o e ‘Otua!

²⁴Pea fu‘u ofo ‘a e kau ako ‘i he‘ene lea. Pea tali ‘e Sīsū hono tu‘o ua, ‘o ne pehē kiate kinautolu, Nga‘ata, hono ‘ikai ko e toki me‘a faingata‘a ke hū ki he Pule‘anga ‘o e ‘Otua!

²⁵‘Oku faingofua ke hū atu ha kāmeli ‘i he ava ‘o e hui tuitui, ‘i he hū ‘a ha koloa‘ia ki he Pule‘anga ‘o e ‘Otua.

²⁶Pea na‘e makehe atu ‘a e ofo ‘a honau loto, ‘o nau fealēlea‘aki ‘o pehē, pea ko hai nai ‘e ala mo‘ui?

²⁷Pea siofia kinautolu ‘e Sīsū, ‘o ne pehē, ‘i he vakai ‘a e tangata ‘e ‘ikai lava, ka ‘oku ‘ikai pehē ki he ‘Otua: he ‘oku malava ‘a e me‘a kotoa pē ki he ‘Otua.

²⁸Pea hanga ‘e Pita, ‘o lea kiate ia, Vakai, ko kimautolu kuo mau li‘aki ‘a e me‘a kotoa pē ‘o mau muimui kiate koe.

²⁹Pea lea ‘a Sīsū, Ko au ē, ‘oku ou tala atu, ‘Oku ‘ikai ha taha kuo ne li‘aki ha fale, pe ha ngaahi tokoua, pe ha ngaahi tuofāfine, pe ha fa‘ē, pe ha tamai, pe ha fānau pe ha ngaahi tōkanga ngoue, koe‘uhi ko au, pea koe‘uhi ko e Kōsipeli,

³⁰ka te ne ma‘u ni, ‘i he nofo ko eni, ‘o lōteau, ha ngaahi fale, mo ha ngaahi tokoua, mo ha ngaahi tuofāfine, mo ha ngaahi fa‘ē, mo ha fānau, mo ha ngaahi tōkanga ngoue, ‘o ō pē mo e ngaahi fakatanga; pea ‘i he maama kaha‘u ko e mo‘ui ta‘engata.

³¹Ka ko e tokolahi ‘oku mu‘omu‘a te nau muimui, pea ko e tokolahi ‘oku muimui te nau mu‘omu‘a.

³²Pea nau fou atu ‘i he hala ko ‘enau ‘alu hake ki Selusalema; pea taki ai pē ‘e Sīsū honau fononga; pea nau fu‘u ofo, pea ko kinautolu na‘e muimui na‘a nau teteki pē. Pea ne toe ‘ave ‘a e kau Hongofulumāua, pea ne hanga ‘o fai kiate kinautolu ‘i he ngaahi me‘a ‘oku ene ke hoko kiate ia;

³³‘o pehē, Ko eni, ‘oku tau ‘alu hake ki Selusalema; pea ‘e tuku atu ‘a e Fanautama ‘a Tangata ki he hou‘eiki taula‘eiki mo e kau sikalaipe; pea te nau fakamāumatea ia; pea te nau tuku atu ia ki he kakai Senitaile:

³⁴‘a ia te nau taukaea ia, mo ‘anuhia, mo haha ia, mo tāmate‘i ia; pea hili ‘a e ‘aho ‘e tolu te ne toetu‘u.

³⁵Pea na‘e omi kiate ia ‘a Sēmisi mo Sione, ko e ongo foha ‘o Sēpeti, ‘o na pehē ki ai, Tangata‘eiki, ‘oku ma holi ke ke fai ma‘amaua ha me‘a te ma kole atu.

³⁶Pea pehē ‘e ia kiate kinaua, Ko e hā ‘a e me‘a ‘oku mo holi ke u fai ma‘amoua?

³⁷Pea na pehē ki ai, Tuku mai ke ma nofo, ko e taha ‘i ho to‘omata‘u, mo e taha ‘i ho to‘ohema, ‘i ha‘o ‘afio ho kolōlia.

³⁸Ka ka pehē ‘e Sīsū kiate kinaua, ‘oku ‘ikai te mo ‘ilo ‘a e me‘a ‘oku mo kole ki ai. He te mo lava koā ke inu ‘i he ipu ‘oku ou inu ai? pe ke papitaiso ‘i he papitaiso‘anga ‘oku ou papitaiso ai au?

³⁹Pea na pehē ki ai, Te ma lava pē. Pea pehē ‘e Sīsū kiate kinaua, Te mo inu pē ‘i he ipu ‘oku ou inu ai, pea te mo papitaiso ‘i he papitaiso‘anga ‘oku ou papitaiso ai.

⁴⁰Ka ko e nofo ki hoku to‘omata‘u, pe ko hoku to‘ohema, ‘oku ‘ikai ‘a‘aku ke ‘atu ia, ka kiate kinautolu pē kuo teuteu ia ki ai.

⁴¹Pea ‘i he fanongo ki ai ‘a e toko hongofulu, na‘a nau kamata ke ‘ita ‘ia Sēmisi mo Sione.

⁴²Pea ui ange kinautolu ‘e Sīsū ‘o ne pehē ki ai, ‘oku mou ‘ilo pē, ko kinautolu ‘oku lau ko e pule ‘o e kau Senitaile ‘oku nau fakafie‘eiki ki he kakai; pea ko honau kau mā‘olunga ‘oku nau fakamo‘ulaloa‘i ‘a e kakai.

⁴³Ka ‘e ‘ikai pehē ‘iate kimautolu, ka ko ia ‘oku ne holi ke hoko ko e lahi ‘iate kimoutolu, te ne nofo ko ho‘omou sevāniti:

⁴⁴Pea ko ia ‘oku ne holi ke hoko ko homou tu‘ukimu‘a, te ne nofo ko e tamaio‘eiki ki homou kotoa.

⁴⁵He ko e Fanautama ‘a Tangata foki na‘e ‘ikai te ne ha‘u ke ma‘u sevāniti, ka ke sevāniti pē ‘e ia, pea ke tuku ‘ene mo‘ui ke huhu‘i ‘aki ha tokolahi, he‘ene fetongi kinautolu.

⁴⁶Pea nau a‘u ki Selikō: pea ‘i he‘ene ‘alu atu mei Selikō, ‘a ia, mo ‘ene kau ako, mo ha fu‘u kakai lahi, tā na‘e nofo mei he ve‘ehala ‘a Pātimiosi ko e foha ‘o Timiosi, ko e motu‘a kui na‘e mo‘ui kole pē.

⁴⁷Pea ‘i he‘ene fanongo ko Sīsū ia mei Nāsaleti, pea ne hanga ‘o kalanga, ‘o pehē, Hako ‘o Tēvita ē! Sīsū, ‘alo‘ofa mai!

⁴⁸Pea lolomi ia ‘e he tokolahi ke ne longo pē; ka ka fakautuutu ai ‘ene kalanga, Hako ‘o Tēvita ē, ‘alo‘ofa mai!

⁴⁹Pea tu‘u ‘a Sīsū, ‘o ne pehē, Ui mai ia. Pea nau ui mai ‘a e motu‘a kui, ‘o nau pehē ki ai, Fiemālie pē, tu‘u; ‘oku ne ui koe.

⁵⁰Pea li‘aki ‘e ia hono pulupulu, ‘o ne puna ki ‘olunga, ‘o ‘alu kia Sīsū.

⁵¹Pea tali ‘e Sīsū ki ai, ‘o ne pehē, Ko e hā ‘a e me‘a ‘oku ke holi ke u fai ma‘a u? Pea tali ‘e he motu‘a kui, Lāponai, ke u ‘ā mu‘a.

⁵²Pea folofola ‘e Sīsū ki ai, ‘Alu ā; kuo fakamo‘ui koe ‘e ho‘o tui. Pea ne ‘ā hake leva, pea ne muimui kiate ia ‘i he fononga.