Read KO E TOH TAPU KATOA TONGA Ma‘aké 12 Bible Online

Ma‘aké 12 - KO E TOH TAPU KATOA TONGA bible

Ma‘aké 12

¹PEA ne hanga ‘o lea kiate kinautolu ‘i he ngaahi fakatātā. Tokua na‘e tō ha ngoue vaine ‘e ha tangata, pea na‘a ne ‘aa‘i takai, mo ne foa ha luoki kālepi, mo ne langa ai ha taua, pea na‘a ne tuku ke lisi ‘e ha kau fa‘a, pea ne ‘alu ki muli.

²Pea ‘i he hoko hono to‘ukai, na‘a ne fekau ha tamaio‘eiki ki he kau fa‘a ke ma‘u mei he kau fa‘a ha ‘inasi he ngaahi fua ‘o e ngoue.

³Ka na‘a nau puke ia ‘o haha, mo nau fakafoki mola ia.

⁴Pea ne toe fekau atu kiate kinautolu ha tamaio‘eiki kehe; pea ko e toko taha ko ia ne nau foa‘i hono ‘ulu, mo pā‘usi‘i.

⁵Pea ne fekau atu mo ha taha; pea nau tāmate‘i ia; pea ai mo ha tokolahi kehe; pea nau haha ha ni‘ihi, mo tāmate‘i ha ni‘ihi.

⁶Na‘e kei toe ha toko taha ke fekau, ko hono foha pele; pea na‘a ne tuku atu fakamui ia kiate kinautolu, ko ‘ene pehē, Te nau toka‘i hoku foha.

⁷Ka ko e kau fa‘a ko ia na‘a nau fetālaaki ‘o pehē, Ko e hoko ‘ena; ‘ē, tau tāmate‘i mu‘a ia, pea ‘e ‘otautolu ‘a e tofi‘a.

⁸Pea nau puke ia ‘o tāmate‘i, ‘o nau toho ia ki he tua‘ā ngoue.

⁹Ko e ha nai ha me‘a ‘e fai ‘e he ‘eiki ‘o e ngoue vaine? Te ne hoko mai, ‘o faka‘auha ‘a e kau fa‘a, pea te ne tuku ‘a e ngoue vaine ki ha ni‘ihi kehe.

¹⁰‘Io, ne ‘ikai te mou lau ‘a e kupu‘i folofola ko ia? Ko e maka ne fakatale‘i ‘e he kau tufunga Kuo hoko ‘o tuliki tau‘olunga:

¹¹Ko e me‘a mei he ‘Eiki ia, Pea fakaofo ki hotau mata.

¹²Pea nau feinga ke puke ia, ka nau manavahē ki he kakai: he na‘a nau ‘ilo kuo ne lea ‘aki ‘a e fakatātā ke tau kiate kinautolu: pea nau tuku ia ‘o nau ‘alu.

¹³Pea nau fekau ange kiate ia ha ni‘ihi ‘o e kau Fālesi, pea mo e ni‘ihi he fa‘ahi ‘a Hēlota, ke tauhele ia ‘i he alea.

¹⁴Pea nau omi ‘o pehē kiate ia, Tangata‘eiki, ‘oku mau ‘ilo ‘oku ke mo‘oni koe, pea ‘oku ‘ikai te ke toka‘i ha toko taha: koe‘uhi ‘oku ‘ikai te ke filifilimānako, ka ‘oku ke ako totonu ‘aki ‘a e hala ‘o e ‘eiki. Pe ‘oku ngofua ke tukuhau kia Sisa, pe ‘ikai? te mau ‘ange, pe ‘ikai?

¹⁵Ka ka vakai ‘e ia ‘enau olo, ‘o ne pehē kiate kinautolu, Ko e ha ‘oku mou ‘ahi‘ahi‘i ai au? ‘omi kiate au ha fo‘i tēnali ke u mamata ange.

¹⁶Pea nau ‘omi. Pea pehē ‘e ia kiate kinautolu, Ko e fofonga ‘ena mo e hingoa ‘o hai? Pea nau tali, ‘o Sisa.

¹⁷Pea pehē ‘e Sīsū, ‘ange kia Sisa ‘a e ngaahi me‘a ‘a Sisa, pea ki he ‘Otua ‘a e ngaahi me‘a ‘a e ‘Otua. Pea nau ofo ‘iate ia.

¹⁸Pea omi kiate ia ha kau Sātusi, ko e fa‘ahinga ‘oku lau ‘oku ‘ikai ha toetu‘u; pea nau hanga ‘o fehu‘i kiate ia, ‘o pehē,

¹⁹Tangata‘eiki, na‘e tohi mai ‘a Mōsese, ‘o pehē, Kapau ‘e pekia ha taha ‘i ha tautehina, ‘o ne tuku hono finemotu‘a, kae ‘ikai ha fānau; pea ke ma‘u ‘e hono tokoua ‘a e finemotu‘a, ‘o fakatupu ai ha hako ki hono tokoua.

²⁰Na‘e ai ha tu‘unga me‘a ‘e toko fitu, ko e tautehina; pea na‘e ma‘u uaifi ‘a e ‘uluaki; pea na‘e pekia ia ta‘ehano hako.

²¹Pea ma‘u ‘a e fefine ‘e hono ua; pea pekia mo ia, ‘o ‘ikai hano hako; pea pehē tofu pē mo hono toko tolu;

²²Mo e toko fitu kātoa, kae ‘ikai ha hako. Pea kuo nau ‘osi kotoa pē, pea toki pekia mo e fefine.

²³Te ne hoko ‘i he toetu‘u ko e uaifi ‘o hai ‘iate kinautolu? he ko e toko fitu kātoa na‘e ma‘u ia ko honau uaifi.

²⁴Pea pehē ‘e Sīsū kiate kinautolu, ‘ikai ko hono ‘uhinga ia ‘oku mou hē ai; ko e ta‘e te mou ‘ilo ‘a e Tohitapu, kae‘uma‘ā ‘a e māfimafi ‘o e ‘Otua?

²⁵He ka toetu‘u leva ‘a e kakai mei he pekia, ‘e ‘ikai ha ma‘u uaifi, pe ha ma‘u husepāniti; ka te nau hangē ko e kau ‘āngelo ‘i Hēvani.

²⁶Ka ko e me‘a ki he pekia, ‘a ‘enau toetu‘u, ne ‘ikai te mou lau koā ‘i he Tohi ‘a Mōsese ‘i he vahe ‘oku kau ki he Talatala‘āmoa, ‘a e folofola ‘a e ‘Otua kiate ia, ‘o pehē, Ko au ko e ‘Otua ‘o ‘Epalahame, mo e ‘Otua ‘o ‘Aisake, mo e ‘Otua ‘o Sēkope?

²⁷‘Oku ‘ikai ko e ‘Otua ia ‘o e mate, ka ‘o e mo‘ui. ‘Oku mou hē lahi.

²⁸Pea na‘e ‘unu‘unu mai ha toko taha ‘o e kau sikalaipe, ko ‘ene fanongo ki he‘enau fakafekiki, mo ‘ene ‘ilo kuo mālō ‘ene tali kiate kinautolu; pea na‘a ne fai ha fehu‘i kiate ia, ‘o pehē, Ko e fa‘ahinga tu‘utu‘uni fē ‘oku tu‘ukimu‘a ‘aupito?

²⁹Pea na‘e tali ‘e Sīsū, ‘oku tu‘ukimu‘a ‘a ‘eni, Fanongo mai, ‘a ‘Isileli; ko e ‘Eiki ko hotau ‘Otua, ko e ‘Eiki pē taha ia:[20]

³⁰Pea te ke ‘ofa ki he ‘Eiki ko ho ‘Otua, ‘o fai ‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ‘atamai, mo e kotoa ‘o ho ivi.

³¹Ko eni ‘a hono ua, Te ke ‘ofa ki ho kaungā‘api, ‘o hangē ko ho‘o ‘ofa kiate koe. ‘Oku ‘ikai mo ha tu‘utu‘uni ‘e mamafa ange ‘i he ongo tu‘utu‘uni ko eni.

³²Pea pehē ‘e he sikalaipe kiate ia, Mālō, Tangata‘eiki, mo‘oni ho‘o lau: ‘oku taha pē ia, pea ‘oku ‘ikai hano ua:

³³pea ko ‘ete ‘ofa kiate ia ‘aki ‘a e kotoa ‘o hoto loto, mo e kotoa ‘o hoto ‘atamai, mo e kotoa ‘o hoto ivi, pea mo ‘ete ‘ofa ki hoto kaungā‘api ‘o hangē ko ‘ete ‘ofa kia kita, ‘oku hulu noa pē ia ‘i he ‘atu ‘o e ngaahi feilaulau li‘aki, pe ko e ngaahi ‘inasi.

³⁴Pea ‘i he vakai ‘e Sīsū ki he tangata kuo fakapotopoto ‘ene tali, na‘a ne pehē ki ai, ‘oku ‘ikai te ke mama‘o koe mei he Pule‘anga ‘o e ‘Otua. Pea na‘e ‘ikai toe ‘i ai ha toko taha ‘e fakato‘oto‘a ke fai ha fehu‘i kiate ia.

³⁵Pea na‘e fokotu‘u atu ‘e Sīsū ha lea lolotonga ‘ene faiako ‘i he Temipale, ‘o pehē, ‘Oku fēfē ‘a e lau ‘a e kau sikalaipe, ‘o pehē, Ko e Mīsaia ko e Hako ‘o Tēvita ia?

³⁶He ko Tēvita, ‘i he hā‘ele mai ‘a e Laumālie Mā‘oni‘oni kiate ia, na‘a ne pehē ‘e ia, Ne folofola ‘e he ‘Eiki ki hoku ‘Eiki, Nofo koe ‘i hoku to‘omata‘u, Kae‘oua ke u ‘ai ho ngaahi fili ki ho lalo va‘e.

³⁷Ko Tēvita ‘oku ne ui ia ko hono ‘Eiki; pea fēfē ai koā ‘a e lau ko hono hako ia? Pea mālie‘ia ‘a e fu‘u fakataha ‘o e kakai ‘i he‘enau fanongo kiate ia.

³⁸Pea ‘i he‘ene faiako na‘a ne pehē, Mou faka‘ehi‘ehi mei he kau sikalaipe, ‘a ia ko honau manako ke ‘eve‘eva mo e kofu faka‘ilonga, pea ke faka‘apa‘apa‘ia ‘i he ngaahi mala‘e fakatau,

³⁹Pea ke nofo ki mu‘a ‘i he falelotu, pea ke tokoto ki mu‘a ‘i ha kātoanga:

⁴⁰ko e fa‘ahinga ‘oku nau folo kotoa ‘a e ngaahi ‘api ‘o si‘i kau uitou, pea nau mounu ‘aki ‘enau fa‘a lotu lōloa: ‘e ma‘u ‘e he kau siana ko ia ha tautea ‘oku kehe ange.

⁴¹Pea nofo ia ‘o hanga ki he seifi, ‘o ne vakai ki he anga ‘o e lī pa‘anga ‘a e kakai ki he seifi: pea na‘e ‘i ai ha tokolahi koloa‘ia na‘a nau lī me‘a lahi.

⁴²Pea ha‘u ha toko taha, ko ha fefine uitou masiva, ‘o ne lī ha ongo ki‘i pa‘anga kapa, ‘a ia ‘oku konga sēniti pē lau fakataha.

⁴³Pea ne ui ange ‘ene kau ako, ‘o ne pehē kiate kinautolu, Ko au ē, ‘oku ou tala atu, ko si‘i fefine uitou ni, ‘a e masiva ni, kuo hulu ‘ene lī ‘iate kinautolu kotoa pē kuo lī ki he seifi:

⁴⁴he ko kinautolu kotoa pē na‘a nau lī mei he pa‘anga hulu ‘o ‘enau koloa; ka ka fusimo‘omo ‘a si‘i fefine ni, ka ne lī ‘a e me‘a kotoa na‘a ne ma‘u, ‘io, hono kotoa ‘o e me‘a na‘a ne mo‘ui ‘aki.