Read KO E TOH TAPU KATOA TONGA Ma‘aké 16 Bible Online

Ma‘aké 16 - KO E TOH TAPU KATOA TONGA bible

Ma‘aké 16

¹PEA kuo ‘osi ‘a e Sāpate, na‘e hanga ‘a Mele mei Makitala, mo e Mele ko e fa‘ē ‘a Sēmisi, mo Sālome, ‘o nau fakatau ‘a e ngaahi fa‘ahinga ahi, koe‘uhi ke nau ‘alu ‘o tākai ‘aki ia.

²Pea nau ‘alu ki he fonualoto hengihengi ‘aupito ‘i he ‘uluaki ‘aho ‘o e uike, kuo hopo ‘a e la‘ā.

³Pea nau fepehē‘aki, Ko hai te ne fai ma‘atautolu ‘a e fakateka ‘o e maka mei he matapā ‘o e fonualoto?

⁴Pea ‘i he‘enau hanga hake, na‘a nau vakai, tā kuo teka‘i mai ‘a e maka; he na‘e fu‘u lahi.

⁵Pea ‘i he‘enau hū ki he fonualoto, na‘a nau sio ki ha talavou ‘oku nofo fakato‘omata‘u, ‘oku ne ‘ai ha kofu hinehina tōtōlofa; pea nau fu‘u ‘oho.

⁶Pea ne pehē kiate kinautolu, ‘oua te mou ‘oho: ko ho‘omou kumi ‘a Sīsū mei Nāsaleti na‘e kalusefai: kuo toetu‘u ia; ‘oku ‘ikai te ne ‘i heni: vakai ko e potu ē na‘a nau telio ai ia.

⁷Ka mou mole mu‘a, ‘o tala ki he‘ene kau ako, kae‘uma‘ā ‘a Pita, ‘o pehē, ‘oku ne mu‘omu‘a kiate kimoutolu ki Kāleli: ko e potu ko ia te mou mamata ai kiate ia, ‘o hangē ko ‘ene me‘a kiate kimoutolu.

⁸Pea nau hū kitu‘a, ‘o hola mei he fonualoto, he na‘a nau mo‘u tetetete mo tāfu‘ua, pea na‘e ‘ikai te nau momo‘i tala ha me‘a ki ha taha; he na‘a nau manavahē.

⁹Pea ‘i he‘ene toetu‘u ‘i he fua ‘aho ‘o e uike, hengihengi, na‘a ne motu‘a hā kia Mele mei Makitala, ‘a ia kuo ne kapusi mei ai ha tēvolo ‘e toko fitu.[26]

¹⁰Pea ‘alu ‘a e fefine ko ia, ‘o tala kiate kinautolu kuo kau mo Sīsū, ‘oku nau lolotonga nofo mamahi mo tangi.

¹¹Ka ko kinautolu, neongo ‘enau fanongo kuo mo‘ui ia, pea kuo mātā ‘e he fefine, na‘e ‘ikai te nau tui ki ai.

¹²Pea hili ia na‘a ne hā ‘i ha anga ‘e taha ki honau toko ua na‘e ‘a‘eva, ko ‘ena ō ki he tuku‘uta.

¹³Pea ko kinaua ‘i he‘ena liu mai, na‘a na fakahā ‘a e me‘a ki hono toe: ka na‘a mo ha‘anaua na‘e ‘ikai te nau tui ki ai.

¹⁴Hili ia na‘a ne hā ki he kau Hongofulu mā taha ‘a kinautolu, lolotonga ‘enau keinanga, ‘o ne valoki‘i kinautolu ‘i he‘enau ta‘etui mo ongongata‘a, koe‘uhi ko e ‘ikai te nau tui kiate kinautolu na‘e mamata kiate ia kuo ne toetu‘u.

¹⁵Pea ne pehē kiate kinautolu, Mou ō ki māmani kātoa, ‘o malanga‘aki ‘a e Kōsipeli ki he me‘a mo‘ui kotoa pē.

¹⁶‘Ilonga ‘a ia te ne tui mo papitaiso te ne mo‘ui; ka ‘ilonga ‘a ia ‘e ‘ikai te ne tui ‘e mo‘ua.

¹⁷Pea ‘e ō mo kinautolu ‘oku tui ‘a e ngaahi faka‘ilonga ko eni: te nau kapusi tēvolo ‘i he hingoa ‘o‘oku; te nau lea ‘i ha ngaahi lea fo‘ou;

¹⁸te nau puke hake ‘a e fanga ngata; pea ka ‘iloange te nau inu ha me‘a ‘oku kona, ‘e ‘ikai ‘aupito te nau konā ai; te nau hilifaki nima ki he mahaki, pea te nau mo‘ui.

¹⁹Pea ko eni, hili ‘a e folofola ‘e he ‘Eiki kiate kinautolu, na‘e ‘ohake ia ki he langi, ‘o ne ‘afio mei he to‘omata‘u ‘o e ‘Otua.

²⁰Pea ko kinautolu na‘a nau ‘alu atu ‘o malanga holo; pea ngāue fakataha mo kinautolu ‘e he ‘Eiki, ‘o ne poupou ‘a e folofola ‘aki ‘a e ngaahi faka‘ilonga na‘e hoko ai.[27]