Read KO E TOH TAPU KATOA TONGA Ma‘aké 2 Bible Online

Ma‘aké 2 - KO E TOH TAPU KATOA TONGA bible

Ma‘aké 2

¹PEA hili ‘a e ‘aho ni‘ihi na‘a ne toe ‘alu ki Kāpaneume: pea ongo atu ‘oku ‘i ‘api ia.

²Pea fakataha leva ki ai ha tokolahi; ‘io, na‘e faifai pea na‘a mo e matafale na‘e ‘ikai haofia: pea ne lea kiate kinautolu ‘i he folofola.

³Pea ha‘u ha ni‘ihi ‘oku nau ‘omi kiate ia ha tangata mamatea, ‘oku kauala ‘e ha toko fā.

⁴Pea ‘i he ‘ikai te nau lava ke fakaofi ia kia Sīsū, koe‘uhi ko e tokolahi ‘o e kakai, pea nau tupangi ‘a e ‘ato ‘o e potu fale na‘a ne ‘i ai; pea kuo ‘a‘au kotoa, na‘a nau tuku hifo ‘a e mohenga ‘a ia na‘e tokoto ai ‘a e mamatea.

⁵Pea ‘i he vakai ‘e Sīsū ‘enau tui, pea pehē ‘e ia ki he mamatea, nga‘ata, kuo fakamolemole ho‘o ngaahi angahala.

⁶Pea na‘e ai ha ni‘ihi ‘i he kau sikalaipe na‘e nofo ai, na‘a nau fifili ‘i honau loto,

⁷‘o pehē, Ko e hā ‘oku lau pehē ai ‘e he siana ni? ‘oku ne lea fie ‘Otua. Ko hai ha taha ‘oku mafai ke fakamolemole angahala, ka ko e Toko Taha pē, ko e ‘Otua?

⁸Ka ka ‘ilo leva pē ‘e Sīsū ‘i hono laumālie ‘oku nau fifili pehē, pea ne lea kiate kinautolu ‘o pehē, Ko e hā ‘a e ngaahi me‘a ni ‘oku mou fifili ki ai ‘i homou loto?

⁹Ko e fē ‘oku faingofua, ‘a e pehē ki he tangata mamate ni, kuo fakamolemole ho‘o ngaahi angahala: pe ko e pehē, Tu‘u, to‘o ho mohenga, pea ‘eve‘eva?

¹⁰Ka koe‘uhi ke mou ‘ilo, ‘oku mafai ‘e he Fanautama ‘a Tangata ke fakamolemole angahala ‘i māmani, (pea hanga ia ‘o lea ki he tangata mamatea)

¹¹‘Oku ou tala kiate koe, Tu‘u, to‘o ho mohenga, pea mole ki ho ‘api.

¹²Pea tu‘u ia, ‘o ne to‘o leva hono mohenga, ‘o ne ‘alu atu mei ai ‘i he ‘ao ‘o e kakai kotoa pē. Ko ia na‘a nau fakatumutumu kotoa pē, ‘o nau fakamālō‘ia ‘a e ‘Otua, mo nau pehē, Kuo te‘eki ke tau mamata ki ha me‘a pehē.

¹³Pea ne toe hā‘ele atu ‘i he matātahi; pea ha‘u kiate ia ‘a e kakai kotoa, pea ne ako‘i kinautolu.

¹⁴Pea ‘i he‘ene ‘alu ange, na‘a ne ‘ilo ‘a Līvai, ko e foha ‘o ‘Alefiusi, ‘oku ne nofo ‘i he fale tute: pea ne pehē kiate ia, Muimui kiate au: pea ne tu‘u ‘o muimui kiate ia.

¹⁵Pea ‘i he‘ene keinanga ‘i he fale ‘o Līvaí:[5] na‘e tokolahi foki ‘a e kau pōpilikane mo e kau angahala na‘a nau fetākoto‘i mo Sīsū mo ‘ene kau ako ‘i he kai: he na‘a nau fa‘a tokolahi, pea nau muimui kiate ia.

¹⁶Pea ko e kau sikalaipe mo e kau Fālesi, ‘i he‘enau mamata kiate ia ‘oku ne kai mo e kau angahala mo e pōpilikane, na‘a nau kamata lau ki he‘ene kau ako, ‘o pehē, ‘oku ne kai mo inu fakataha mo e kau pōpilikane mo e kau angahala!

¹⁷Pea ongo‘i ‘e Sīsū, ‘o ne pehē kiate kinautolu, Ko e tangata faito‘o ‘oku ‘ikai ma‘a e mālohi, ka ma‘a e mahaki. Na‘e ‘ikai te u ha‘u ke ui ‘a e angatonu, ka ko e angahala.

¹⁸Pea na‘e ‘i ai ‘a e kau ako ‘a Sione mo e kau Fālesi, ‘oku nau ‘aukai, pea nau ha‘u ‘o pehē kiate ia, Ko e hā ‘oku ‘aukai ai ‘a e kau ako ‘a Sione, mo e kau ako ‘a e kau Fālesi; ka ko e kau ako ‘oku ‘iate koe ‘oku ‘ikai te nau ‘aukai?

¹⁹Pea tali ‘e Sīsū kiate kinautolu, He ‘e lava ke ‘aukai ‘e he kakai ‘o e fale ta‘ane, ‘i he kei ‘iate kinautolu ‘a e tangata-ta‘ane? Lolotonga ‘oku nau ma‘u ‘a e tangata ta‘ane ke kau mo kinautolu, ‘oku ‘ikai te nau fa‘a ‘aukai.

²⁰Kae tokaange ha taimi ‘e hiki ‘a e tangata-ta‘ane meiate kinautolu; pea te nau toki ‘aukai ‘i he ‘aho ko ia.

²¹‘Oku ‘ikai ha taha te ne ‘oposi ha kofu motu‘a ‘aki ha konga tupenu fo‘ou; he ka pehē, ko e konga fo‘ou ‘oku ‘oposi ‘aki, ‘oku ne maikiiki‘i ‘a e kofu motu‘a, pea hoko ai ha fu‘u mahae ‘oku lahi ange.

²²Pea ‘oku ‘ikai ha taha te ne ‘utu ha uaine fo‘ou ki he ngaahi hina leta ‘oku motu‘a; he ka pehē, ‘e hae ‘a e ngaahi hina ‘e he uaine, pea ‘e maumau ‘a e uaine mo e hina fakatou‘osi.

²³Pea ko eni, ko e Sāpate ‘e taha na‘a ne fononga ange ‘o hala loto ngoue: pea hanga ‘e he‘ene kau ako ‘o tofa hala, he‘enau toli ‘a e ngaahi fo‘i uite.

²⁴Pea lea ‘e he kau Fālesi kiate ia, Vakai ē; ko e hā ‘oku nau fai ai ‘i he Sāpate ‘a e me‘a ‘oku ‘ikai ngofua?

²⁵Pea pehē ‘e ia kiate kinautolu, Kuo te‘eki koā ke mou lau ‘a e me‘a na‘e fai ‘e Tēvita ‘i he‘ene tu‘utāmaki, ‘o hālofia, ‘a ia mo kinautolu na‘e ‘iate ia?

²⁶‘A ‘ene hū ki he Fale ‘o e ‘Otua, ‘i he kuonga na‘e Taula‘eiki Lahi ai ‘a ‘Apaiata, pea ne kai ‘a e mā fono, ‘a ia ‘oku ‘ikai ngofua hono kai, ka ki he kau taula‘eiki pē: mo ne ‘ange foki kiate kinautolu na‘e ‘iate ia?

²⁷Pea ne toe pehē kiate kinautolu, Na‘e fokotu‘u ‘a e Sāpate ma‘a e tangata, ‘o ‘ikai ko e tangata ma‘a e Sāpate:

²⁸ko ia ko e Fanautama ‘a Tangata ko e ‘Eiki ia ‘o e Sāpate foki.