Read KO E TOH TAPU KATOA TONGA Ma‘aké 4 Bible Online

Ma‘aké 4 - KO E TOH TAPU KATOA TONGA bible

Ma‘aké 4

¹PEA hanga ia ‘o toe faiako ‘i he matātahi: pea fakataha kiate ia ha fu‘u kakai tokolahi ‘aupito, ko ia na‘a ne heka ki ha vaka ‘o nofo mei tahi; ka ko e fu‘u fakataha na‘a nau tutu‘u ‘i ‘uta, ‘o hanga ki tahi.

²Pea na‘e lahi ‘ene ako‘i kinautolu ‘i he ngaahi fakatātā, pea ne pehē kiate kinautolu ‘i he‘ene ako:

³Fanongo mai: Ko eni, na‘e ‘alu atu ha tangata tūtuu‘i ke tūtuu‘i;

⁴pea ‘i he‘ene fai ‘ene tūtuu‘i, na‘e tō ha me‘a ‘i he ve‘ehala, pea puna mai ‘a e fanga manupuna, ‘o nau kai ‘o ‘osi ia.

⁵Pea tō mo ha me‘a ki he potu maka, mo e potu na‘e ‘ikai loko lahi ai ‘a e kelekele: pea tuaiekemo ‘ene ‘oho hake, koe‘uhi ko e ‘ikai matolu ‘a e kelekele:

⁶pea ‘i he ‘alu hake ‘a e la‘ā ne velehia, pea ko e me‘a ‘i he ‘ikai fai aka ne mate ia.

⁷Pea tō mo ha me‘a ki he potu ‘akau talatala, pea tupu hake ‘a e ngaahi ‘akau talatala ‘o kāsia ia, pea na‘e ‘ikai te ne a‘u ki he fua.

⁸Pea ngangana ha ni‘ihi ki he kelekele kuo lelei; pea fakafeitama ia, ‘a ia na‘e fai hake mo ngengesi; pea na‘e fua, ‘o fua tolungofulu ha taha, pea onongofulu ha taha, pea teau ha taha.

⁹Pea pehē ‘e ia, ko ia ‘oku ma‘u telinga ke ongo ‘aki, ke ne ongo‘i.

¹⁰Pea ‘i he‘enau fakaekinautolu leva, pea ko kinautolu na‘e ‘iate ia, kae‘uma‘ā ‘a e kau Hongofulumāua, na‘a nau ‘eke kiate ia ‘a e ngaahi fakatātā.

¹¹Pea ne pehē kiate kinautolu, Kuo tuku kiate kimoutolu ‘a e misiteli ‘o e Pule‘anga ‘o e ‘Otua: ka ‘oku fai fakatātā kotoa pē kiate kinautolu ‘oku ‘i tua‘ā:

¹²koe‘uhi ke nau sio mo‘oni, kae ‘ikai ‘ilo; pea fanongo mo‘oni, kae ‘ikai ongo‘i; na‘a ‘iloange te nau tafoki, pea fakamolemole kinautolu.

¹³Na‘a ne pehē foki kiate kinautolu, ‘oku ‘ikai koā te mou ‘ilo ‘a e fakatātā ko eni? pea mou ‘ilo fēfē ki he ngaahi fakatātā kehekehe?

¹⁴Ko e tangata tūtuu‘i ‘oku ne tūtuu‘i ‘a e folofola.

¹⁵Pea ko eni ia ‘a kinautolu ‘i he ve‘ehala; ko kinautolu na‘e tūtuu‘i ai ‘a e folofola, ka ‘i he‘enau fanongo ki ai, pea ha‘u leva ‘a Sētane, ‘o ne ‘ave ‘a e folofola kuo tō ‘iate kinautolu.

¹⁶Pehē foki, ko eni ‘a kinautolu na‘e tūtuu‘i ‘i he ngaahi potu maka; ko kinautolu ‘oku fanongo ki he folofola, pea puke fiefia leva ki ai:

¹⁷ka ‘oku ‘ikai hanau aka ‘iate kinautolu, ka ‘oku nau fakataimi pē. Faifai, pea hoko ha faingata‘a, pe ha fakatanga, koe‘uhi ko e folofola, pea nau tūkia leva.

¹⁸Pea ‘oku ai mo ha ni‘ihi ‘oku tūtuu‘i ‘i he potu ‘akau talatala: ko kinautolu ia ‘oku fanongo ki he folofola;

¹⁹ka ko e fa‘a loto mo‘ua ki māmani, mo e fakahekeheke ‘a koloa, pea mo e holi ki he ngaahi me‘a kehekehe, ‘oku nau hūhū mai, ‘o kāsia ‘a e folofola, pea ne ta‘efua.

²⁰Pea ‘oku ai mo kinautolu na‘e tūtuu‘i ki he kelekele kuo lelei; ko e fa‘ahinga ia ‘oku fanongo ki he folofola, pea tali lelei ia, pea nau fua, ‘o fuo tolungofulu ‘a e taha, pea onongofulu ‘a e taha, pea teau ‘a e taha.

²¹Na‘a ne pehē foki kiate kinautolu, He ‘oku ‘omi ha maama ke ‘ai ki he loto puha fua, pe ki he lalo mohenga? ‘ikai koe‘uhi ke ‘ai ki he tu‘unga maama?

²²He ‘oku ‘ikai ke lilo ha me‘a, ka koe‘uhi ke toki fakahā, ‘uma‘ā hano fakafufū, ka koe‘uhi ke hoko ‘o fu‘u e‘a.

²³Ka ai ha taha ‘oku ma‘u telinga ke ongo ‘aki, ke ne ongo‘i.

²⁴Na‘a ne pehē foki kiate kinautolu, Tokanga pe ko e hā ‘a e me‘a ‘oku mou fanongoa. Ko e fua ‘oku mou fua ‘aki, ko ia pē ‘e fua ‘aki kiate kimoutolu, pea ‘e fakalahi atu.

²⁵He ko ia ‘oku ne ma‘u ha me‘a, ‘e ‘ange ki ai mo ha me‘a: pea ko ia ‘oku ‘ikai ke ma‘u, na‘a mo e me‘a ‘oku ne ma‘u, ‘e to‘o meiate ia.

²⁶Pea lea atu ia ‘o pehē, Ko e anga ‘eni ‘o e Pule‘anga ‘o e ‘Otua: ‘Oku hangē ko e laku tenga ‘e ha tangata ki he kelekele;

²⁷‘o ne mohe pē mo ‘ā, ‘i he pō mo e ‘aho, pea tupu pē ‘a e tenga ‘o ‘alu hake, kae molekemama‘o ha‘ane ‘ilo pe ‘oku fakafēfē.

²⁸‘Oku fakatupu ia ‘e he kelekele ‘iate ia pē; ‘o fuofua fakatupu ‘a e sino, hoko mo e moto, hoko mo ‘ene fo‘i koane.

²⁹Pea ‘i he‘ene motu‘u ‘a e fua, pea toki hanga ‘e he tangata ‘o ‘ai ‘a e hele tu‘usi, he kuo hoko ‘a e ututa‘u.

³⁰Pea fai atu ia ‘o pehē, Te u fakatatau ki he hā ‘a e Pule‘anga ‘o e ‘Otua? ‘io, ko e hā nai ha fakatātā te u fai‘aki ki ai?

³¹‘Oku hangē ko ha fo‘i tenga‘i mūsita; ‘a ia ‘i hono tūtuu‘i ki he kelekele ‘oku si‘i ange ‘i he tenga kotoa pē ‘oku tō:

³²kae hili hono tō, ‘oku ne ‘alu hake ‘o hoko ko e lahi ‘i he fa‘ahinga mohuku kai, pea ‘oku ne va‘ava‘a lalahi; ko ia ‘oku lava ai ‘a e fanga manupuna ‘o e ‘atā ke nofo ‘i hono malu.

³³Pea lahi ‘a e ngaahi fakatātā pehē na‘a ne lea‘aki ai ‘a e folofola kiate kinautolu, ‘o fakatatau ki he‘enau mafai ke fanongo ki ai.

³⁴Ka na‘e ‘ikai te ne lea kiate kinautolu ‘o ta‘eha fakatātā: pea ‘i he‘enau fakaekinautolu, na‘a ne faka‘uhinga kotoa pē ki he‘ene kau ako ‘a‘ana.

³⁵Pea ‘i he‘ene efiafi ‘i he ‘aho ko ia, na‘a ne pehē kiate kinautolu,

³⁶Tau ō ki he kauvai. Pea kuo nau tukuange ‘a e kakai, na‘a nau ‘ave ai pē ia ‘i he vaka na‘a ne ‘i ai: pea na‘e ‘i ai mo e ngaahi vaka kehe na‘e folau mo ia.

³⁷Pea tō mai hā fu‘u ‘ahiohio, pea kamata heka ‘a e ngaahi peau ki he vaka, pea kamata ngoto ‘a e vaka.

³⁸Ka na‘e ‘i he taumuli ‘a Sīsū, ‘o ne mohe ki he me‘a fakamolū: pea fafangu ia, ‘o nau pehē ki ai, Tangata‘eiki, ‘oku ‘ikai te ke toka‘i ‘etau tu‘utāmaki?

³⁹Pea ne ‘ā, ‘o ne lolomi ‘a e matangi, ‘o ne pehē ki he tahi, Longo ā, ‘oua ‘e momo‘i ngū, pea tālolo ‘a e matangi, pea hoko ha tofu lahi.

⁴⁰Pea ne pehē kiate kinautolu, Ko e hā ‘oku pehē ai fau ai ho‘omou lotosi‘i? Ko e hā ‘oku ‘ikai ai ha‘amou tui?

⁴¹Pea nau manavahē — ko e manavahē ka ko ha manavahē — pea nau fealēlea‘aki, ‘o pehē, Ko hai tū ‘eni? he na‘a mo e matangi mo e tahi ‘oku fakaongo kiate ia.