Read KO E TOH TAPU KATOA TONGA Ma‘aké 7 Bible Online

Ma‘aké 7 - KO E TOH TAPU KATOA TONGA bible

Ma‘aké 7

¹PEA fakataha kiate ia ‘a e kau Fālesi, mo e ni‘ihi ‘o e kau sikalaipe, kuo nau omi mei Selusalema,

²pea kuo nau vakai ha ni‘ihi ‘o ‘ene kau ako ‘oku nau kai ‘a e ngaahi fo‘i mā mo e nima ‘uli: na‘e ui pehē, ko e ‘ikai tomu‘a fanofano.

³He ko e kau Fālesi mo e ha‘a Siu kotoa ‘oku ‘ikai te nau tokoni, ka ‘i he‘enau tomu‘a fanofano mo‘oni, ko ‘enau tauhi ‘a e lau ‘a e Mātu‘a.

⁴Pea ka nau ka foki mei he mala‘e fakatau, ‘oku ‘ikai te nau tokoni ka ‘i he‘enau tomu‘a papitaiso.[12] Pea lahi mo e ngaahi me‘a kehekehe kuo nau puke ‘o tauhi; ‘o pehē, ko e papitaiso ‘o e ngaahi ipu, mo e ngaahi me‘afua, mo e ngaahi ipu kapa, mo e ngaahi nofo‘a.[13])

⁵Pea fehu‘i kiate ia ‘e he kau Fālesi mo e kau sikalaipe, Ko e hā ‘oku ‘ikai laka tatau ai ‘a ho‘o kau ako pea mo e kau ‘a e Mātu‘a; ka nau kai mo e nima ‘uli?

⁶Pea tali ‘e ia, ‘E hala ā ‘a e palofisai ‘a ‘Aisea ‘iate kimoutolu mālualoi! ‘o hangē ko ia kuo tohi, Ko e kakai ni ‘oku nau faka‘apa‘apa kiate au ‘aki honau loungutu, ka ko honau loto ‘oku fakamama‘o.

⁷Ka ko e kulanoa pe ‘enau lotu mai, he ‘oku nau ako‘aki ha ngaahi tokāteline, ‘a ia ko e ngaahi tu‘utu‘uni pē ‘a e tangata.

⁸‘Oku mou tuku pē ‘a e tu‘utu‘uni ‘a e ‘Otua, ‘o mou puke ki he talatupu‘a ‘a e tangata.

⁹Na‘a ne pehē foki kiate kinautolu, Mālō mu‘a ho‘omou ta‘etoka‘i ‘a e tu‘utu‘uni ‘a e ‘Otua, ka mou mamafa ki he lau fakaeono‘aho ‘amoutolu!

¹⁰He ko e lau ‘a Mōsese na‘e pehē, Faka‘apa‘apa ki ho‘o tamai mo ho‘o fa‘ē: mo pehē, Ko ia te ne lea kovi ki he‘ene tamai, pe ko ‘ene fa‘ē, ‘e mate tāmate‘i:

¹¹ka ‘oku mou pehē, Kapau ‘e lea ‘e ha tangata ki he‘ene tamai, pe ko ‘ene fa‘ē, ‘o pehē, ‘Ā, ko e me‘a na‘a ku mei ‘aonga ai kiate koe kuo kōpano ia; (ko hono ‘uhinga, kuo tuku ki he ngāue ‘a e ‘Eiki)

¹²‘oku ‘ikai te mou kei tuku ke ne fai ha me‘a ma‘a ‘ene tamai, pe ko ‘ene fa‘ē.

¹³‘Oku mou fakata‘e‘aonga‘i ‘a e folofola ‘a e ‘Otua ‘i ho‘omou lau fakaeono‘aho, ‘a ia kuo mou ‘atu ki he kakai; pea ‘oku lahi mo e ngaahi me‘a pehē ‘oku mou fai, hangē ko ia.

¹⁴Pea ne toe ui ange ‘a e kakai, ‘o ne pehē kiate kinautolu, Mou fanongo mai kotoa pē, ka mou ‘ilo:

¹⁵‘Oku ‘ikai fa‘a ‘uli ha tangata mei ha me‘a ‘oku hū kiate ia mei tu‘a; ka ko e ngaahi me‘a ‘oku hū mai mei he tangata, ko eni ia ‘oku ‘uli ai ‘a e tangata.

¹⁶Kapau ‘oku ‘i ai ha taha ‘oku ma‘u telinga ke ongo, ke ne fanongo.[14]

¹⁷Pea kuo nau hū ki fale ‘o mavahe mo e kakai, na‘e ‘eke kiate ia ‘e he‘ene kau ako ‘a e fakatātā ni.

¹⁸Pea ne lea kiate kinautolu, ‘o pehē, ‘oku ta‘e‘ilo pehē mo kimoutolu foki? ‘oku ‘ikai koā ke mahino kiate kimoutolu, ‘a e ‘ikai fa‘a ‘uli ‘a e tangata ‘i he ngaahi me‘a ‘oku hū kiate ia mei tu‘a;

¹⁹Koe‘uhi ‘oku ‘ikai ke ‘alu ia ki hono loto ka ki hono kete, pea ‘oku mole atu ki tua‘ā? — ko ‘ene lea pehē na‘a ne fakangofua ai ‘a e ngaahi me‘akai kotoa.

²⁰Pea ne fai atu, Ko ia ‘oku hū mai mei he tangata, ko eni pē e me‘a ‘oku ‘uli ai ‘a e tangata.

²¹He ‘oku hū kitu‘a mei he loto ‘o e kakai ‘a e ngaahi fakakaukau ‘oku kovi, ‘a e ngaahi fe‘auaki, ‘a e ngaahi kaiha‘a, ‘a e ngaahi fakapō,

²²‘a e ngaahi faikovi ‘a alafia, ‘a e ngaahi mānumanu, ‘a e anga fīta‘a, ‘a e kākā, ‘a e pau‘u, ‘a e meheka, ‘a e laukovi ki he ‘Otua, ‘a e ‘afungi, ‘a e fai fakavalevale:

²³ko eni kotoa ‘a e ngaahi kovi ‘oku hū kitu‘a, pea ‘uli ai ‘a e tangata.

²⁴Pea ne tu‘u, ‘o hiki mei he potu ko ia ki he tafa‘ifonua ‘o Taia, ‘o ne hū ki ha fale, ‘o ne loto ke ‘oua na‘a ‘ilo ki ai ‘e ha taha, ka na‘e ‘ikai te ne lava ke puli.

²⁵Ka na‘e fanongo leva ki hono talanoa ‘e ha fefine ‘e taha, ‘a ia ne mo‘ua ‘ene ta‘ahine ‘i ha fa‘ahikehe;

²⁶pea ne ha‘u ‘o hinga atu ki hono va‘e; (ko ha fefine Senitaile ia, pea ko hono fa‘ahinga ko e Sīlia mei Finisia) pea ne kole kiate ia ke kapusi ‘a e tēvolo mei he‘ene ta‘ahine.

²⁷Pea pehē ‘e ia ki ai, ‘oua mu‘a ke mākona ‘a e fānau: he ‘oku ‘ikai taau ke to‘o ‘a e mā ‘a e fānau, ‘o lī ki he fanga kulī.

²⁸Pea tali ‘e he fefine ‘o ne pehē, Ka na‘e fai, ‘Eiki; he ‘oku kai ‘a e fanga kulī foki ‘i he lalo tēpile mei he ngaahi momo ‘a e tamaiki.

²⁹Pea ne pehē ki ai, Koe‘uhi ko e lea ko ia, ke ke ‘alu ā; kuo mahu‘i ‘a e tēvolo mei ho‘o ta‘ahine.

³⁰Pea ne mole mei ai ki hono ‘api, ‘o ne ‘ilo ‘a e ki‘i ta‘ahine ‘oku tokoto ‘i he mohenga, pea kuo mahu‘i atu ‘a e tēvolo.

³¹Pea toe hiki ia mei he tafa‘ifonua ‘o Taia, ‘o ne ‘alu ‘i Saitoni ‘o a‘u ki he Tahi ‘o Kāleli, he‘ene fai mai ‘i he matāfonua ‘o Tikapolusi.

³²Pea nau ‘omi kiate ia ha tangata na‘e tuli mo le‘o vale; pea nau kole kiate ia ke ne hilifaki hono nima ki ai.

³³Pea ne taki ia mei he kakai ‘o fakaekinaua pē, pea na‘a ne ‘ai hono tuhu ki he ongo telinga ‘o e tangata, pea ne ‘a‘anu ki hono nima ‘o ‘ai ki hono ‘elelo;

³⁴pea ne tāngaki ki he langi, ‘o ne māpuhoi, ‘o ne pehē ki he tangata, ‘Ēfata, ‘a ia ko hono hiki, Ke ava mai.

³⁵Pea na‘e ava ai hono telinga, pea movete ‘a e no‘o ‘o hono ‘elelo, ‘o lea totonu.

³⁶Pea ne na‘ina‘i kiate kinautolu ke ‘oua te nau fakahū ki ha taha; ka ko e lahi ‘ene na‘ina‘i kiate kinautolu, tā na‘e ‘āsili ai ‘enau ongoongoa ia.

³⁷Pea nau mātu‘aki to‘oa fakamanavahē, ‘o nau pehē, Hono ‘ikai tu‘utai ‘ene ngāue kotoa pē! kuo ne ngaohi ‘a e tuli ke ongo, mo e noa ke lea.