Read KO E TOH TAPU KATOA TONGA Luké 10 Bible Online

Luké 10 - KO E TOH TAPU KATOA TONGA bible

Luké 10

¹PEA hili ‘a e ngaahi me‘a ko ia, na‘e fakanofo ‘e he ‘Eiki ha ni‘ihi kehe ‘e toko fitungofulu,[14] ‘o ne fekau atu kinautolu, ‘o tautau toko ua, ke fakamelomelo kiate ia ki he kolo takitaha mo e potu ‘oku ne teu ‘alu ki ai ‘e ia.

²Pea ne pehē kiate kinautolu, Kuo lahi ‘a e ta‘u kuo motu‘u, ka ‘oku kaungatāmaki ‘a e kau ngāue: ko ia ke mou kole ki he ‘Eiki ‘oku ‘a‘ana ‘a e ta‘u, ke ne kouna atu mo ha kau ngāue ke utu ‘ene ta‘u.

³Mou ‘alu; ko eni, ‘oku ou tuku atu kimoutolu ke mou hangē ha fanga lami ‘i he lotolotonga ‘o e fanga ulofi.

⁴‘Oua na‘a to‘o ha kato pa‘anga, pe ha kato ‘oho, pe ha ngaahi sū: pea na‘a mo e fetapa mo ha taha ‘i he hala, ‘oua.

⁵Pea ‘ilonga ha fale te mou hū ki ai, mou fuofua lea ‘o pehē, Si‘oto‘ofa ki he fale ni.

⁶Pea kapau ‘oku ‘i ai ha hoa ‘o ho‘omou ‘ofa, pea ‘e nofo kiate ia ‘a ho‘omou tāpuaki: ka ka ‘ikai, pea ‘e foki ia kiate kimoutolu.

⁷Pea mou nofo ‘i he fale pē ko ia, ‘o kai mo inu ‘a e ngaahi me‘a te nau ‘omi. Seuke, ‘ilonga ha taha ‘oku ngāue, ‘oku taau ke ne ma‘u ha‘ane totongi. ‘Oua na‘a hiki mei ha fale ki ha fale.

⁸Pea ‘ilonga ha kolo te mou hū ki ai, pea nau tali kimoutolu, mou kai ‘a e me‘akai te nau tuku ‘i homou ‘ao:

⁹pea mou fakamo‘ui ‘a e kakai ‘i he kolo ko ia ‘oku mahaki, pea mou pehē kiate kinautolu, Kuo ofi mai kiate kimoutolu ‘a e Pule‘anga ‘o e ‘Otua.

¹⁰Pea ‘ilonga ha kolo te mou hū ki ai, pea ‘oku ‘ikai te nau tali kimoutolu, mou ‘alu atu ki he ngaahi mala‘e ‘o e kolo, ‘o mou pehē,

¹¹Na‘a mo e efu ‘o ho‘omou kolo, ‘a ia kuo piki ki homau va‘e, ‘oku mau holoholo atu; ka neongo ia, ka mou ‘ilo ‘a e me‘a ni, Kuo ofi ‘a e Pule‘anga ‘o e ‘Otua.

¹²Pea ‘oku ou tala atu, ‘e kātaki ngofua ‘a Sōtoma ‘i he ‘aho ko ē ‘i he kolo ko ia.

¹³‘Oiauē koe, Kōlesini! ‘oiauē koe, Petesaita! he ka ne fai ‘i Taia mo Saitoni ‘a e ngaahi ngāue mamafa na‘e fai ‘iate kimoua, ne loa pē ‘enau fakatomala, ‘o nau nofo mo e tauanga‘a mo e pani efuefu.

¹⁴Ka ‘e kātaki ngofua ‘i he Fakamaau ‘a Taia mo Saitoni ‘iate kimoua.

¹⁵Pea ko koe foki Kāpaneume, ‘e hiki koe koā ki Langi? ‘e hifo koe ki Hētesi.

¹⁶Ko ia ‘oku ne fakaongo kiate kimoutolu, ‘oku ne fakaongo kiate au; pea ko ia ‘oku ne tekaki kimoutolu, ‘oku ne tekaki au; pea ko ia ‘oku ne tekaki au ‘oku ne tekaki ia na‘a ne fekau mai au.

¹⁷Pea na‘e foki fiefia mai ‘a e kau Fitungofulu,[15] ‘o nau pehē, ‘Eiki, na‘a mo e kau tēvolo ‘oku nau vaivai kiate kimautolu koe‘uhi ko ho huafa.

¹⁸Pea ne pehē kiate kinautolu, Ne u toutou sio ki he tō ‘a Sētane mei he langi, ‘o hangē ha ‘uhila.

¹⁹Ko eni kuo u tuku kiate kimoutolu ‘a e mafai ke mala ‘i he fanga ngata mo e fanga sikapio, pea mo e ngāue kotoa ‘a e Fili: pea ‘e ‘ikai ‘aupito ha me‘a ‘e lavea ai kimoutolu.

²⁰Ka neongo ia, kae ‘oua te mou fiefia ‘i he me‘a ko ia, ‘a e vaivai ‘a e ngaahi fa‘ahikehe kiate kimoutolu; ka ko e me‘a ke mou fiefia ai, ko e tu‘u ‘a homou ngaahi hingoa ‘i he tohi ‘i Hēvani.

²¹‘I he houa ko ia na‘a ne hākailangitau ‘i he Laumālie Mā‘oni‘oni,[16] ‘o ne pehē, ‘oku ou fakatonuhia‘ia koe, ‘e Tamai, ko e ‘Eiki ‘o e langi mo māmani, ‘i ho‘o fufū ‘a e ngaahi me‘a pehē mei ha kakai ‘oku poto mo ‘ilo‘ilo, ka ke tatala ki ha kau tamaiki, ‘io, ‘e Tamai; tonuhia ho‘o finangalo ke pehē.

²²Kuo tuku kiate au ‘e he‘eku Tamai ‘a e ngaahi me‘a fuli pē: pea ‘oku ‘ikai hā toko taha ‘oku ne ‘ilo pe ko hai ‘a e Foha, ngata pē ‘i he Tamai; pe ko hai ‘a e Tamai, ngata pē ‘i he Foha, pea mo ha taha ‘e loto ‘e he Foha ke faka‘ilo ia ki ai.

²³Pea ne tafoki ‘o lea ki he kau ako fakaekinautolu, ‘o pehē, Monū‘ia ā ‘a e ngaahi mata ‘oku sio ki he ngaahi me‘a ‘oku mou sioa.

²⁴Seuke, ‘oku ou tala atu, kuo tokolahi ‘a e kau palōfita, mo e ngaahi tu‘i, na‘a nau feinga ke mamata ki he ngaahi me‘a ‘oku mou sioa, ka na‘e ‘ikai te nau mātā; pea ke fanongo ki he ngaahi me‘a ‘oku mou fanongo ki ai, ka na‘e ‘ikai te nau fanongoa.

²⁵Pea ‘iloange na‘e tu‘u hake ha tufungalao ke sivi hakili ia, ‘o ne pehē, Tangata‘eiki, ko e hā ha me‘a te u fai kae tō mo‘oku ‘a e mo‘ui ta‘engata?

²⁶Pea pehē ‘e ia ki ai, Ko e hā ‘a e me‘a kuo tohi ‘i he Lao? ‘oku fēfē ho‘o lau?

²⁷Pea tali ‘e ia ‘o pehē, Te ke ‘ofa ki he ‘Eiki ko ho ‘Otua, ‘o fai‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ivi, mo e kotoa ‘o ho ‘atamai; pea te ke ‘ofa ki ho kaungā‘api ‘o hangē ko ho‘o ‘ofa kiate koe.

²⁸Pea me‘a ia ki ai, Totonu ho‘o tali; fai ia, pea te ke mo‘ui.

²⁹Ka ‘i he‘ene fie fakatonuhia ia, na‘a ne pehē kia Sīsū, Pea ko hai nai hoku kaungā‘api?

³⁰Pea fokotu‘u atu ‘e Sīsū, ‘o ne pehē, Tokua na‘e ai ha tangata na‘e ‘alu hifo mei Selusalema ki Selikō, pea ne toloto ‘i ha kaiha‘akau; ‘a ia na‘a nau to‘o hono kofu, pea ‘ikai ngata ai, ka na‘a nau taa‘i ia, pea ‘i he tuku ia ‘o nau ‘alu, kuo ne kafo lahi, ‘o tei mate‘i he‘enau ngāue.

³¹Pea fe‘unga mo ia na‘e ‘alu hifo ha taula‘eiki ‘i he hala ko ia: pea ‘i he‘ene sio ki he tangata, na‘a ne halafaki ‘i he kauhala ‘e taha.

³²Pehē foki mo ha motu‘a Līvaite, na‘e hoko ki he potu ko ia, ‘o ne ‘alu atu ia ‘o mamata, pea toki halafaki ‘i he kauhala ‘e taha.

³³Ka ‘i he fononga mai ha tangata Samēlia, na‘a ne a‘u ki he tangata, pea ‘i he‘ene sio ki ai na‘e langa hono fatu ‘i he ‘ofa;

³⁴‘o ne ‘unu‘unu atu, ‘o tulu‘i hono ngaahi lavea ‘aki ‘a e lolo mo e uaine, mo ne ha‘iha‘i; pea ne fakaheka ia ki he‘ene manu, ka ne ‘alu ia ‘i lalo ‘o taki ki he fale tali fononga, ‘o ne tauhi ia ‘i ai.

³⁵Pea pongipongi hake, na‘a ne to‘o mai ha fo‘i tēnali ‘e ua, ‘o ne ‘ange ki he motu‘a na‘e tauhi ‘a e fale tali fononga, ‘o ne pehē, Ke ke tauhi pē ‘a e tangata ni; pea ka ‘oku si‘i ‘eni, pea ‘i he‘eku foki mai te u totongi ‘e au ha‘o me‘a kuo mole ai.

³⁶Ko hai ‘i he toko tolu ni, ‘i ho‘o poa, na‘e hoko ko e kaungā‘api ‘o e siana na‘e mo‘ua ‘e he kaiha‘akau?

³⁷Pea tali ‘e ia, Ko ia na‘a ne fai ‘ofa ki he tangata. Pea pehē ‘e Sīsū kiate ia, ‘alu, ‘o fai pehē mo koe foki.

³⁸Pea lolotonga ‘enau fononga, tokua na‘e ‘alu ‘e ia ki ha vilisi: pea ko ha fefine na‘e hingoa ko Mā‘ata na‘a ne fakaafe ia ki hono fale.

³⁹Pea na‘e ai hono tehina na‘e ui ko Mele, pea ko e fefine ko ia na‘a ne fāite atu ‘i he va‘e ‘o Sīsū, ‘o fanongo ki he‘ene fakamatala.

⁴⁰Kae fehākaaki ‘a Mā‘ata, ‘i he fai ‘o ha fu‘u teuteu; pea tu‘u mai ia ‘o ne lea, ‘Eiki, ‘oku ‘ikai te ke tokanga koā ki he tuku au ‘e hoku tehina ke u fai toko taha pē ‘a e teuteu? ko ia ke ke tala kiate ia ke ne tokoni kiate au.

⁴¹Ka ka tali ‘e Sīsū, ‘o ne pehē ki ai, ‘e Mā‘ata, Mā‘ata, ‘oku ke loto mo‘ua mo fekāmaaki ki he ngaahi me‘a kehekehe:

⁴²ka ‘oku lahi pē ha me‘a ‘e taha: seuke, kuo fili ‘e Mele ‘a e ngafa ‘oku lelei, ‘a ia foki ‘e ‘ikai to‘o meiate ia.