Read KO E TOH TAPU KATOA TONGA Luké 12 Bible Online

Luké 12 - KO E TOH TAPU KATOA TONGA bible

Luké 12

¹LOLOTONGA ia kuo fakataha ange mo ha fu‘u kakai laui mano, pea kamata ta‘omia ha ni‘ihi; pea hanga ‘e ia ‘o lea, ‘o fua fai ki he‘ene kau ako, ‘o pehē, Mou lamasi kimoutolu, telia ‘a e lēvani ‘a e kau Fālesi, ‘a ia ko e koto fakamatamatalelei pē.

²Ka ‘oku ‘ikai ha me‘a, neongo kuo fufū ‘aupito, ka ‘e fakahā; pe lilo ka ‘e ‘iloa.

³Ko ia, ‘ilonga ha me‘a ‘oku mou tala po‘uli, ‘e ongona ‘aho; pea ko e me‘a kuo mou fanafana‘aki ki he telinga ‘i he loki, ‘e fanongonongo mei he tu‘a fale.

⁴Pea‘oku ou lea atu kiate kimoutolu, si‘oku tākanga, ‘oua te mou momo‘i manavahē kiate kinautolu ‘oku tāmate‘i ‘a e sino pē, kae hili ia ‘oku ‘ikai te nau toe lava mo ha me‘a.

⁵Ka te u hīnoi‘i kimoutolu ki he toko taha te mou manavahēa: mou manavahē kiate ia, ‘a ia ‘e hili ‘ene tāmate‘i ‘a e sino pea ne mafai ke lī ki Heli; ‘io, ‘oku ou tala atu, mou manavahē ki he Toko Taha ko ia.

⁶‘Ikai ‘oku fakatau ha fanga ki‘i misi ‘e toko nima ki ha konga sēniti ‘e ua? Pea ‘oku ‘ikai tuku ta‘emanatu hanau toko taha ‘i he ‘afio ‘a e ‘Otua.

⁷Ka na‘a mo e ngaahi tu‘oni lou‘ulu ‘omoutolu kuo ‘osi lau fakalāutelau. ‘oua te mou manavahē: ‘oku mou mahu‘inga ‘i ha fanga misi tokolahi.

⁸Pea ‘oku ou tala atu, ‘ilonga ‘a ia te ne fakahaa‘i he ‘ao ‘o e kakai ‘ene kau kiate au, ‘e fakahā foki ‘e he Fanautama ‘a Tangata ‘ene kau kiate ia ‘i he ‘ao ‘o e kau ‘āngelo ‘a e ‘Otua:

⁹ka ko ia kuo ne fakafisinga au ‘i he ‘ao ‘o e kakai, ‘e mātu‘aki fakafisinga‘i ia ‘i he ‘ao ‘o e kau ‘āngelo ‘a e ‘Otua.

¹⁰Pea ‘ilonga ‘a ia te ne talakā ki he Fanautama ‘a Tangata, ‘e fakamolemole pē ia: ka ko ia kuo laukovi ki he Laumālie Mā‘oni‘oni ‘e ‘ikai fakamolemole.

¹¹Pea ka nau ka ‘ave kimoutolu ki he fakataha fakasiasi, mo e hou‘eiki, mo e kau pule, pea ‘oua te mou lotomo‘ua pe ‘e fēfē ha‘amou fakamatala, pe ko e hā ha me‘a te mou lea‘aki:

¹²he ko e Laumālie Mā‘oni‘oni te ne ako kiate kimoutolu ‘i he taimi ko ia ‘a e lea ‘oku totonu ke fai.

¹³Pea na‘e lea mai ha toko taha mei he kakai, ‘o pehē, Tangata‘eiki, ke ke tala ki hoku tokoua, ke ne vaeua mo au ‘a e tofi‘a.

¹⁴Ka ka tali ‘e ia ki ai, Siana, ko hai na‘a ne fakanofo au ke fai fakamaau ‘iate kimoutolu, pe ke tufa?

¹⁵Pea ne lea kiate kinautolu ‘o pehē, Mou ‘ā, ‘o le‘ohi kimoutolu telia ‘a e ngaahi mānumanu: he neongo ‘oku fu‘u lahi ‘a e koloa ‘a ha taha, ka ‘oku ‘ikai hoko ai ‘o tautau ‘ene mo‘ui ki he‘ene nga‘oto‘ota.

¹⁶Pea ne lea‘aki ha fakatātā kiate kinautolu, ‘o pehē, Tokua na‘e ‘i ai ha tangata koloa‘ia, ne fua lahi ‘ene ngoue:

¹⁷pea ne fifili ‘i hono loto, ‘o pehē, Ko e hā ‘aku ai ‘e fai, he ‘oku ‘ikai haku kei fale ke tānaki ki ai ‘eku ngaahi fua?

¹⁸Pea ne pehē, ‘ā, ko eni pē ‘a e me‘a te u fai: Te u veteki hoku ngaahi feleoko pea langa ke lalahi; pea u toki tānaki kātoa ki ai ‘eku koloa tupu mo, ‘eku ngaahi me‘a lelei.

¹⁹Pea te u pehē ki hoku laumālie, Si‘i Laumālie, kuo lahi ‘eni ho‘o ngaahi me‘a lelei kuo tuku, ‘o fe‘unga mo ha ngaahi ta‘u lahi; mālōlō ā, kai, inu, mo nēkeneka.

²⁰Ka ka folofola kiate ia ‘e he ‘Otua, ‘o pehē, ‘A e ta‘eloto! ko e pō ni pē te nau tala ke ke tuku mai ho laumālie: pea ‘e ‘a hai koā ‘a e ngaahi me‘a na‘a ke tokonaki?

²¹Ko e anga ‘eni ‘o ia ‘oku fokotu‘u koloa ma‘ana, ka ‘oku ‘ikai te ne fakatupu koloa ki he ‘Otua.

²²Pea lea ia ki he‘ene kau ako, Ko e me‘a ‘i he‘ene pehē, ko ia ‘oku ou tala ai kiate kimoutolu, ‘oua te mou lotomo‘ua koe‘uhi ko ho‘omou mo‘ui, ki ha me‘a te mou kai; ‘uma‘ā homou sino, ki ha me‘a te mou ‘ai ki ai.

²³He ‘oku lahi ‘a e mo‘ui ‘i he me‘akai, mo e sino ‘i hono kofu.

²⁴Mou vakai ‘a e fanga lēveni: he ‘oku nau tūtuu‘i pe tu‘usi, pe ai hanau loki pe feleoko? ka ‘oku fafanga kinautolu ‘e he ‘Otua; hono ‘ikai mahu‘inga noa pē kimoutolu ‘i he fanga manupuna!

²⁵Pea neongo ho‘omou lotomo‘ua, tala‘ehai ‘e lava ‘e ha taha ke tolo‘i atu hono ta‘u ko ha fo‘i hanga.[19]

²⁶‘Io, pea kapau ‘oku ‘ikai te mou lava ha ki‘i momo‘i me‘a pehē, koe‘uma‘ā ho‘omou lotomo‘ua ki ha ngaahi me‘a ange.

²⁷Vakai ‘a e ngaahi lile, pe kuo fēfē ‘enau tupu: he ‘oku nau fiu‘a ngāue, pe ‘oku nau filo? ka ‘oku ou tala atu, Na‘a mo Solomone, ‘i he‘ene ‘ai hono nāunau kotoa, na‘e ‘ikai ke vaha‘ateunga‘ia ai ha taha ‘o e ngaahi lile na.

²⁸Pea kapau ‘oku kofu fakatafu‘ufu‘u pehē ‘e he ‘Otua ‘a e mohuku, ‘a ia ‘oku ‘i he kelekele he ‘aho ni, kae tafu ‘aki ‘a e ‘ōvani ‘apongipongi; huanoa ‘a kimoutolu, ‘a e kau tui vaivai!

²⁹Ka ko kimoutolu, ‘oua te mou fepōkaki ki ha‘amou kai, pe ko hamou inu, pea ‘oua te mou loto tāla‘a.

³⁰He ko e alā me‘a pehē ia ‘oku hehenga ki ai ‘a e ngaahi kakai ‘o māmani: pea ko ho‘omou Tamai ‘oku ne mea‘i ‘oku taau mo kimoutolu ‘a e ngaahi me‘a ko ia.

³¹Kehe pē ke mou kumi ‘a e pule‘anga ‘o‘ona; pea ‘e ‘atu mo ia foki ‘a e ngaahi me‘a ko ia.

³²Na‘i fanga sipi toko si‘i, ‘oua ‘e manavahē; he kuo finangalo ‘e ho‘omou Tamai ke ‘atu kiate kimoutolu ‘a e pule‘anga.

³³Fakatau atu ho‘omou nga‘oto‘ota, pea fai foaki ‘aki hono totongi; ngaohi ma‘amoutolu ‘a e ngaahi ‘angapa‘anga ‘e ‘ikai ‘osi‘osi, mo ha koloa ta‘e‘unu ‘i Hēvani; ko e potu ‘oku ‘ikai ke ofi ai ha kaiha‘a, ‘uma‘ā ha maumau ‘e ha ane,

³⁴he ko e potu ‘oku ‘i ai ho‘omou koloa ‘e ‘i ai foki mo homou loto.

³⁵Ko kimoutolu ke ma‘u huke homou kofu, pea tutu ai pē ho‘omou maama;

³⁶pea mou tatau mo ha kau tangata ‘oku talitali ho‘onautolu ‘eiki, ha‘ane foki mei he ta‘ane; koe‘uhi ka a‘u mai ia, ‘o tukituki, pea nau to‘o leva ki ai.

³⁷Monū‘ia ā ka ko e kau tamaio‘eiki ko ia, ‘a ia ‘e ‘iloa kinautolu ‘e he ‘eiki ‘i he‘ene hā‘ele mai ‘oku nau le‘o pē: ko au ē, ‘oku ou tala atu, te ne hanga ‘o huke hono kofu ‘o‘ona, mo ne fakatākoto kinautolu ki he kai, ka ne tu‘u atu ‘o teu kai ma‘anautolu.

³⁸Pea kapau ko hono ua ‘o e uasi ‘oku ne ha‘u ai, pe ko hono tolu, ka ‘oku ne ‘ilo kinautolu ‘oku nau pehē pē, pea monū‘ia ā ka ko kinautolu.

³⁹Pea ko e me‘a ko eni ‘oku mou lāu‘ilo ki ai, ‘oka ne toka mea‘i ‘e he tangata‘eiki pe ko e fē ‘a e taimi ‘e ha‘u ai ‘a e kaiha‘a, pehē ne le‘o, ‘o ‘ikai tuku hono fale ke haea.

⁴⁰Ko kimoutolu foki ke mou toka teuteu: he ko e hoko mai ‘a e Fanautama ‘a Tangata ‘e fai ‘i ha taimi ‘oku ‘ikai te mou ‘amanaki ai kiate ia.

⁴¹Pea lea ‘a Pita ki ai ‘o ne pehē, ‘Eiki, ko ho‘o fai ‘a e fakatātā ni kiate kimautolu pē, pe ‘oku kau ai mo e kakai kotoa?

⁴²Pea folofola ‘e he ‘Eiki, ‘Io, ko hai nai ‘a e matāpule lototō mo fai fakapotopoto, ‘a ia ‘e fakanofo ‘e he ‘Eiki ke pule‘i hono kau nofo‘anga, mo ‘ange ‘a e me‘akai kuo tu‘utu‘uni ‘i hono taimi totonu?

⁴³Monū‘ia ā ka ko e tamaio‘eiki ko ia, ‘a ia ‘e ‘iloa ‘e he‘ene ‘eiki ‘i he‘ene ha‘u ‘oku ne fai pehē.

⁴⁴Seuke, ‘oku ou tala atu, te ne fakanofo ia ke ne pule ki he‘ene ngaahi me‘a kotoa.

⁴⁵Ka ‘oka ka pehē ‘e he tamaio‘eiki ko ia ‘i hono loto, ‘Oku fakatotoka ‘e he‘eku ‘eiki ‘ene ha‘u; pea ne hanga ai ‘o haha ‘a e kau tamaio‘eiki mo e kau kaunanga, mo ne kai mo inu mo konā;

⁴⁶‘e toki ha‘u ‘a e ‘eiki ‘a e tamaio‘eiki ko ia ‘i ha ‘aho ‘oku ‘ikai te ne ‘amanekina ia, pea mo ha houa ‘oku ‘ikai te ne ‘ilo ki ai, pea te ne fahi ua ia,[20] pea tu‘utu‘uni ke ‘inasi fakataha ia mo e kau angatu‘u.

⁴⁷Pea ko e tamaio‘eiki ko ia na‘a ne ‘ilo ki he finangalo ‘o ‘ene ‘eiki, kae ‘ikai toka teuteu, pe fai ki he‘ene tu‘utu‘uni, ‘e lahi ‘a e fo‘i tā ‘i hono haha.

⁴⁸Ka ko ia na‘e ‘ikai te ne ‘ilo ki ai, ka ne fai pē ‘a e ngaahi me‘a ‘oku taau mo ha tautea, ‘e si‘i pē ‘a e fo‘i tā ‘e ‘ai. Pea ko ia kuo foaki ki ai ha me‘a lahi, ‘e fiema‘u mei ai ha me‘a lahi: pehē foki, ka tuku ‘e he kakai ha fu‘u me‘a ki ha taha ke tauhi, pea hulu atu mo e me‘a ‘e ‘eke kiate ia.

⁴⁹Kuo u ha‘u ke laku ha afi ki māmani; pea ko e hā hoku loto? taumaiā kuo tutu!

⁵⁰Ka ‘oku ‘i ai haku papitaiso ke u papitaiso ai; pea hono ‘ikai ‘oku ou kukuta tu‘u kae‘oua ke lava!

⁵¹‘Oku mou mahalo koā kuo u ‘i heni ke tuku ha melino ki māmani? Tala atu, ‘oku ‘ikai; ka ko e mavahevahe.

⁵²Seuke, hili ‘eni, tokaange ha toko nima ‘i ha ‘api pē taha te nau mavahevahe, ‘o fetu‘usi ‘a e toko tolu mo e tokoua, ‘a e tokoua mo e toko tolu;

⁵³‘a e motu‘a mo hono foha, mo e foha mo ‘ene motu‘a; ‘a e fefine mo ‘ene ta‘ahine, mo e ta‘ahine mo ‘ene fa‘ē; ‘a e finemotu‘a mo e uaifi ‘o ‘ene tama, mo e ta‘ahine mo e fa‘ē ‘a hono husepāniti.

⁵⁴Pea ne lea foki he kakai ‘o pehē, Ka mou ka sio ki ha loa ‘oku tu‘u hake ‘i lulunga, ‘oku mou pehē leva, ‘E ‘uha; pea ‘oku hoko ‘o pehē.

⁵⁵Pea ‘oka mou ka vakai ‘oku angi mei he tonga ‘a e matangi, ‘oku mou pehē, ‘E faka‘a‘afu; pea ‘oku hoko.

⁵⁶‘a e kau ‘afungi; ‘oku mou vavanga koā ki he mata ‘o e fonua mo e langi, pea fēfē ai ho‘omou ta‘evavanga ki he kuonga ni?

⁵⁷Pea ko e hā ai ‘oku ‘ikai te mou ‘ilo foki ‘a e totonu ‘iate kimoutolu pē?

⁵⁸He ko eni ‘oku ke lolotonga ō pē mo e faka‘ilo ki he pule; ‘ē, ke ke fai feinga ke ke fakahaofi koe meiate ia lolotonga ho‘omo ‘i he hala; na‘a ‘iloange te ne toho koe ki he fakamaau, pea ‘oatu ‘e he fakamaau ki he polisi, pea ‘e lī koe ‘e he polisi ki he pilīsone.

⁵⁹Tala atu, ‘e ‘ikai te ke ‘alu mei ai kae‘oua ke ‘osi ha‘o totongi, ‘o a‘u ki he konga fāteni.