Read KO E TOH TAPU KATOA TONGA Luké 14 Bible Online

Luké 14 - KO E TOH TAPU KATOA TONGA bible

Luké 14

¹PEA ko e Sāpate ‘e taha na‘a ne hū ki he fale ‘o ha toko taha ‘o e hou‘eiki Fālesi ke kai, pea na‘e ‘i ai foki ‘a e hou‘eiki ko ia, ‘o lamasi ia.

²Pea tā na‘e nofo ‘o fehangahangai mo ia ha tangata na‘e mahaki fatu.

³Pea tali ‘e Sīsū ‘o ne pehē ki he kau tufunga lao mo e kau Fālesi, ‘Oku ngofua koā ke faito‘o ‘i he ‘aho Sāpate, pe ‘ikai?

⁴Pea nau felongoi pē.

⁵Pea ne puke ‘a e tangata, ‘o fakamo‘ui, ‘o tukuange: ‘o ne tali kiate kinautolu, tau lau ko ha toko taha ‘iate kimoutolu, pea kuo tō hano foha, pe ko ha‘ane pulu ki ha luo, ‘ikai te ne hanga leva ‘o fusi hake neongo ko e ‘aho Sāpate?

⁶Pea na‘e ‘ikai te nau lava ke tali ‘a e me‘a ko ia.

⁷Pea ne hanga ‘o lea‘aki ha fakatātā kiate kinautolu na‘e tala ki he kātoanga, ko ‘ene vakai ‘oku nau fili ‘a e ngaahi nofo‘a mu‘a; pea ne pehē kiate kinautolu,

⁸‘Oka tala koe ‘e ha toko taha ke ha‘u ki ha kātoanga, ‘oua te ke tokoto ‘i he ‘uluaki nofo‘a; na‘a kuo tala ‘a e kātoanga ki ha toko taha ‘oku mā‘olunga ‘iate koe.

⁹Pea ‘i he faifai pea hū mai ‘a e matāpule ‘a ia ko ‘ene kātoanga ‘oku mo fakatou ‘i ai, pea ne pehē kiate koe, Tuku ‘a e potu ko ena ki he toko taha ni; pea ke toki hanga ‘o hiki ki he potu ki mui kuo ke mā.

¹⁰Ka ‘oka tala kātoanga kiate koe, ‘alu ‘o tokoto ‘i he potu ki mui; koe‘uhi ‘oka hū mai ‘a e matāpule ‘oku ‘a‘ana ‘a e kātoanga, pea ne pehē atu, Nga‘ata, ma‘uma‘u hake ki mu‘a: pea te ke toki faka‘apa‘apa‘ia ‘iate kinautolu kotoa pē ‘oku mou keinanga.

¹¹He ko ia ‘oku ne hākeaki‘i ia ‘e fakavaivai‘i; pea ko ia ‘oku ne fakavaivai‘i ia ‘e hākeaki‘i.

¹²Pea ne hanga ‘o lea foki kiate ia na‘a ne fai ‘a e kātoanga, ‘oka ke ka fai ha fu‘u pelekifasi pe ha tina, ‘oua na‘a tala ia ki ho ngaahi kaume‘a, ‘uma‘ā ho ngaahi tokoua, pe ko ho ngaahi kāinga, pe ko ho ngaahi kaungā‘api ‘oku koloa‘ia; na‘a toe tala kātoanga kiate koe ‘e kinautolu, pea fai ai ha totongi kiate koe.

¹³Ka ‘oka ke ka fai ha kātoanga, tala ia ki he kau masiva, ‘a e mamatea, ‘a e heke, ‘a e kui:

¹⁴pea te ke toki monū‘ia; he ‘oku ‘ikai ha‘anau me‘a ke totongi ‘aki kiate koe, ka ‘e toki totongi kiate koe ‘i he Toetu‘u ‘a Lotumo‘oni.

¹⁵Pea ko e toko taha ‘iate kinautolu na‘a nau keinanga, ‘i he‘ene fanongo ki he me‘a ko ia, na‘a ne pehē kia Sīsū, Ha monū‘ia ā ka ko ia te ne keinanga ‘i he Pule‘anga ‘o e ‘Otua!

¹⁶Ka ka tali ‘e ia ki ai, Tokua na‘e ‘i ai ha tangata na‘a ne teu ha fu‘u tina, ‘o ne tala ki he tokolahi:

¹⁷pea ‘i he hokosia ‘a e taimi ‘o e kātoanga, na‘a ne fekau atu ‘ene tamaio‘eiki ke fanongonongo kiate kinautolu kuo tala, Mou omi; he kuo ‘osi hono teu.

¹⁸Ka na‘e hu‘ufataha ‘enau tali, ‘o nau lolou kotoa pē. Ko e ‘uluaki, na‘a ne pehē ki he tamaio‘eiki, ‘ā, kuo u fakatau ha ngoue‘anga, pea kuo pau ke u ‘alu ‘o vakai ia: ke ke tala ange ke ne fakamolemole au.

¹⁹Pea lea ‘e hono ua, ‘o pehē, ‘ā, kuo u fakatau ha taulua‘i pulu ‘e nima, pea ko ‘eku ‘alu ‘eni ke ‘ahi‘ahi kinautolu: ke ke tala ange ke ne fakamolemole au.

²⁰Pea lea ange ‘e hono tolu, ‘o pehē, ‘ā, kuo u ma‘u uaifi, pea ko ia ‘e ‘ikai te u lava atu.

²¹Pea ha‘u ‘a e tamaio‘eiki, ‘o tala ‘a e ngaahi me‘a ko ia ki he‘ene ‘eiki. Pea tuputāmaki ‘a e tangata‘eiki, ‘o ne pehē ki he‘ene tamaio‘eiki, ‘alu ke vave ki he ngaahi hala lalahi mo e ngaahi hala iiki ‘o e kolo, pea taki mai ‘a e kau masiva, mo e mamatea, mo e kui, mo e heke.

²²Faifai pea pehē ‘e he tamaio‘eiki, ‘Eiki, kuo fai pē ‘a e me‘a na‘a ke tu‘utu‘uni mai, ka ‘oku kei ‘atā pē.

²³Pea me‘a ‘e he ‘eiki ki he tamaio‘eiki, ‘alu ki he ngaahi hala pule‘anga, mo e ngaahi lolo ‘akau, pea ‘omi fakamālohi ‘a e kakai: kehe pē ke fonu hoku ‘api.

²⁴He ‘oku ou tala atu kiate kimoutolu, ‘e ‘ikai ha taha ‘i he kau tangata ko ia na‘e tomu‘a tala te ne mama ha me‘a ‘i he‘eku kātoanga.

²⁵Pea na‘e ‘i ai ha ngaahi fu‘u kakai lahi na‘e fononga fakataha mo ia; pea ne tafuli ‘o lea kiate kinautolu, ‘o pehē,

²⁶Kapau ‘oku ‘ikai ke fehi‘a ‘e ha tangata ki he‘ene tamai, mo ‘ene fa‘ē, mo hono uaifi, mo ‘ene fānau, mo hono ngaahi tokoua, mo hono ngaahi tuofāfine, ‘io, mo ‘ene mo‘ui ‘a‘ana foki, neongo ‘ene ha‘u kiate au ka ‘e ‘ikai te ne fa‘a hoko ko ‘eku ako.

²⁷Pea ko ia ‘e ‘ikai fua hono kolosi ‘o muimui kiate au, ‘e ‘ikai te ne fa‘a hoko ko ‘eku ako.

²⁸‘ē, tau lau ‘oku ai hamou toko taha ‘oku ne loto ke langa ha fu‘u taua, ‘ikai te ne nofo mu‘a ‘o fatu hono totongi, pe ‘oku fe‘unga ‘ene pa‘anga mo hono fai ke ‘osi?

²⁹Na‘a ‘iloange, kuo hili ‘ene ‘ai ‘a e tu‘unga, ‘oku ‘ikai te ne lava ke faka‘osi;

³⁰pea ko e kakai kotoa pē te nau sio ki ai te nau hanga ‘o luma‘i ia, he‘enau pehē, ūē! ko e siana ni na‘a ne kamata ke langa, ka na‘e ‘ikai te ne lava ke faka‘osi!

³¹Pea tau lau ko ha tu‘i ‘oku ne ‘alu ke fakahoko ‘a e tau mo ha tu‘i ‘e taha, ‘ikai te ne nofo mu‘a ‘o fifili, pe te ne lava mo ‘ene taha mano ke tali ‘a e ‘eiki ‘oku ha‘u ke tau‘i ia mo ha ua mano?

³²Pea ka hā ‘e ‘ikai, pea lolotonga ‘oku kei mama‘o ‘a e fili te ne fekau atu ha fakafofonga ke kole ‘a e fakalelei.

³³Pehē foki, ‘ilonga kimoutolu ‘oku ‘ikai te ne fai ene tatau ki he ngaahi me‘a kotoa pē ‘oku ‘a‘ana, ‘e ‘ikai te ne fa‘a hoko ko ‘eku ako.

³⁴‘ē, ko e me‘a ‘aonga ‘a e māsima: ka ‘oka mole mei he māsima foki hono kona, pea ‘e fakamahimahi ‘aki ia ‘a e hā?

³⁵‘Oku ‘ikai taau ke laku ki he ngoue, pe ki he tu‘unga veve: ka ‘oku laku pē kitua‘ā. Ko ia ‘oku ma‘u telinga ke ongo ‘aki, ke ne ongo‘i.