Read KO E TOH TAPU KATOA TONGA Luké 15 Bible Online

Luké 15 - KO E TOH TAPU KATOA TONGA bible

Luké 15

¹PEA na‘e toutou fe‘unu‘i atu ‘a e kau pōpilikane kotoa pē mo e kau angahala ke fanongo kiate ia.

²Pea femuhumuhu‘i ai ‘a e kau Fālesi, mo e kau sikalaipe foki, ‘o nau pehē, Ko e siana ni ‘oku ne tali ‘a e kau angahala, mo ne keinanga mo kinautolu.

³Pea na‘a ne lea‘aki ‘a e fakatātā ni kiate kinautolu, ‘o pehē.

⁴Tau lau ko e toko taha ‘iate kimoutolu, ko e tangata, ‘oku ‘i ai ‘ene fanga sipi ‘e toko teau pea kuo mole hanau taha, ‘ikai te ne tuku ‘a e toko hivangofulu mā hiva‘i he toafa, ka ne ‘alu ‘o kumi ‘a ia kuo mole kae ‘oua ke ne ‘ilo ‘a e toko taha ko ia?

⁵Pea ka ‘ilo leva ia, te ne fiefia, mo fua ia ‘i hono uma ‘o‘ona.

⁶Pea ‘i he‘ene a‘u ki ‘api, te ne fakataha hono ngaahi kaume‘a, mo hono ngaahi kaungā‘api, mo ne pehē kiate kinautolu, Tau fakafiefia; he kuo u ‘ilo ‘eku sipi na‘e mole.

⁷Tala atu, ‘e pehē ha fiefia ‘i he langi ‘i he fakatomala ‘a ha fo‘i angahala e toko taha, ‘io, ‘o hulu atu ‘i ha toko hivangofulu mā hiva faitotonu, ‘a ia ‘oku ‘ikai ha‘anau me‘a ke fakatomala ai.

⁸Pea tau lau ko ha toko taha kehe, ko ha fefine, ‘oku ‘i ai ‘ene pa‘anga ‘e hongofulu; pea ka mole ha fo‘i pa‘anga ‘e taha, ‘ikai te ne tutu ha maama, pea tafi ‘a e fale, ‘o kumi fakamātoato kae‘oua ke ‘ilo?

⁹Pea ‘i he‘ene ‘ilo leva te ne fakataha ‘a e kau fefine ‘oku nau kaume‘a, mo e kaungā‘api, mo ne pehē, Tau fakafiefia: he kuo u ‘ilo ‘a e pa‘anga na‘e mole.

¹⁰Tala atu, ‘e hoko ha fiefia pehē ‘i he ha‘oha‘onga ‘o e kau ‘āngelo ‘a e ‘Otua ‘i he fakatomala ‘a ha fo‘i angahala ‘e toko taha.

¹¹Pea ne lea ‘o pehē, Tokua na‘e ai ha tangata mo hono ongo foha ‘e toko ua.

¹²Pea pehē ‘e he tehina ki he‘ene ‘eiki, ‘Alā tamai, vahe‘i mai mu‘a hoku ‘inasi ‘i he koloa. Pea ne tufa kiate kinaua, ‘io, mo e me‘a kotoa na‘e tauhi ‘aki si‘ene mo‘ui.

¹³Pea hili ‘a e ngaahi ‘aho — na‘e ‘ikai loko lahi — na‘e tānaki ‘e he tehina ‘ene me‘a kotoa, ‘o ne hiki ki ha fonua mama‘o; pea ‘i he potu ko ia na‘a ne toloveka ‘aki ‘ene koloa ‘i he‘ene mo‘ui fakalusa.

¹⁴Pea ‘i he faifai pea ‘osi atu ‘ene me‘a kotoa, ‘iloange na‘e honge vale ‘a e fonua ko ia, pea na‘a mo ia na‘a ne kamata masiva me‘akai.

¹⁵Pea ne ‘alu ‘o musu ia ki ha toko taha, ko e tangata totonu ‘o e fonua ko ia; pea ne fekau ia ke ‘alu ki he‘ene ngoue‘anga, ‘o tauhi ‘ene fanga puaka.

¹⁶Pea ne mo‘u faka‘amu ki he ngaahi fo‘i piini na‘e kai ‘e he fanga puaka ke ne mānava ‘aki; he na‘e ‘ikai ke ‘ange ‘e ha taha ha‘ane me‘a.

¹⁷Pea faifai pea foki mai hono loto, pea ne pehē, ‘E ta‘inga ā ‘a e kau ngāue totongi ‘a ‘ete ‘eiki ‘oku fokotu‘u ‘enau toenga kai, ka ko kita ‘oku te mate‘i heni ‘i he honge!

¹⁸Ka u tu‘u mu‘a ‘o ‘alu ki he‘eku tamai; pea u pehē kiate ia, ‘Alā tamai, kuo u fai angahala ki he langi, kae tautonu kiate koe.

¹⁹‘Oku ‘ikai te u kei taau ke lau ko ho foha; ka ke fai kiate au ‘o hangē ko ha taha ‘i ho‘o kau ngāue totongi.

²⁰Pea ne tu‘u pē ‘o ‘alu ki he‘ene ‘eiki. Pea ‘i he‘ene kei mama‘o, na‘e sio ki ai ‘e he‘ene ‘eiki, pea langa hono fatu ‘i he ‘ofa, ‘o ne lele, ‘o tāupe ‘i he u‘a ‘o e tama, ‘o ne ‘uma lolomi kiate ia.

²¹Pea lea ange ‘e he tama, ‘Alā tamai, kuo u fai angahala ki he langi, kae tautonu kiate koe; ‘oku ‘ikai te u kei taau ke lau ko ho foha.

²²Ka ka pehē ‘e he tangata‘eiki ki he‘ene kau tamaio‘eiki, Fai vave to‘o mei he puha ha pulupulu ‘a e fungani pea ‘ai kiate ia; pea ‘ange ha mama ma‘a hono nima, mo ha sū ma‘a hono va‘e:

²³pea ‘omi ‘a e ki‘i pulu, ‘a e pulu vakai ‘eiki; tāmate‘i ia, pea tau kai mo fakafiefia:

²⁴he ko eni si‘oku foha na‘e mate, pea kuo toe mo‘ui; na‘e mole, pea kuo ‘iloa. Pea nau kamata fiefia.

²⁵Kae lolotonga ia na‘e ‘i he ngoue ‘a hono foha lahi: pea ‘i he faifai ‘o ne foki, ‘o ne ofi ki he ‘api, tā na‘e ongo mai ha tā nafa mo e me‘e.

²⁶Pea ne ui ange ha taha ‘o e kau tama, ‘o ne fehu‘i pe ko e hā fua ‘a e me‘a ko ia.

²⁷Pea ne tali, Kuo ha‘u ho tehina, pea kuo tāmate‘i ‘e ho‘o ‘eiki ‘a e ki‘i pulu, ‘a e pulu vakai ‘eiki, koe‘uhi ko ‘ene toe ma‘u mo‘ui ia.

²⁸Pea ne ‘ita ai, ‘o ‘ikai fie hū ki fale: pea ‘alu kitu‘a ‘ene ‘eiki ‘o kole kiate ia.

²⁹Ka ka tali ‘e ia, ‘o ne pehē ki he‘ene ‘eiki, ‘ā, ko futu ta‘u mo ‘eku ngāue kiate koe ‘o hangē ha pōpula; ‘io, ‘anefē ‘eku li‘aki ha‘o fekau ‘e taha? kae ‘anefē ha‘o tuku mai, ‘io, ha ki‘i kosi ke u fakafiefia ‘aki hoku ngaahi kaume‘a?

³⁰Ka ‘i he ha‘u leva ho foha ko ena, ‘a ia kuo ne kai ‘o ‘osi ‘a e me‘a na‘e tauhi ‘aki ‘a ho‘o mo‘ui ‘i he‘ene fafanga ‘a e kau fe‘auaki, pea ke tāmate‘i ma‘ana ‘a e pulu vakai ‘eiki.

³¹Pea tali ‘e ia ki ai, Nga‘ata, ko e me‘a kiate koe, ‘oku ke ‘iate au ma‘u pē, pea ko ‘eku me‘a kotoa ko ho‘o me‘a.

³²Ka na‘e taau pē foki ke tau fakafiefia mo nēkeneka, he ko si‘o tehina ‘eni na‘e mate, pea kuo mo‘ui; na‘e mole pea kuo ‘iloa.