Read KO E TOH TAPU KATOA TONGA Luké 17 Bible Online

Luké 17 - KO E TOH TAPU KATOA TONGA bible

Luké 17

¹PEA pehē ‘e ia ki he‘ene kau ako, ‘e ‘ikai mata‘ofi ‘a e hoko mai ‘o e ngaahi tūkia‘anga: ka ‘oiauē ‘a e toko taha ko ia ‘e hoko mei ai!

²‘ē, ka ne tau ha makatukinga ‘i he kia ‘o e toko taha ko ia, ‘o pe‘ehi ia ki he tahi, ‘e ‘aonga ia ki ai, ‘i he‘ene mo‘ui kae fakatūkia ha fo‘i toko taha ‘o si‘i tamaiki ni.

³Mou lamasi kimoutolu: kapau ‘e fai hala ‘e ho tokoua, valoki ia; pea kapau te ne fakatomala, fakamolemole ia.

⁴Pea neongo ‘e tu‘o fitu ‘i he ‘aho ‘ene faihala kiate koe, kae tu‘o fitu ‘ene tafoki kiate koe, ‘o ne pehē, ‘ā, ‘oku ou fakatomala; ka pehē, te ke fakamolemole ia.

⁵Pea lea ‘a e kau ‘Aposetolo ki he ‘Eiki, Ke ke fakalahi ‘emau tui.

⁶Pea folofola ‘e he ‘Eiki, Ka ne ai ha‘amou tui, ‘o tatau mo e fo‘i tenga‘i mūsita hono lahi, pea ‘i ha‘amou kamata lea ki he fu‘u fiki moli ni, Fei mo mata‘aki koe, pea hiki ‘o tu‘u ‘i tahi, kuo ne fai leva ‘o hangē ko ho‘omou tala.

⁷Pea tau lau ko e toko taha ‘iate kimoutolu ‘oku ‘i ai ‘ene tamaio‘eiki ‘oku ngoue, pe tauhi manu; pea ‘i he faifai pea ne ha‘u mei he ngoue, te ke pehē koā ki ai, Ha‘u ange leva, ‘o tokoto ke kai, ‘ō?

⁸‘ā, ‘ikai ko ho‘o lea ‘e pehē, Ke ke teuteu mai mu‘a ha‘aku tina, pea ke huke ho kofu ‘o tauhi au, kae‘oua ke ‘osi ‘eku kai mo ‘eku inu; pea hili ia, pea ke kai mo inu koe?

⁹Ka ‘oku ke pehē koā, ko e me‘a ke fakafeta‘ia ‘a e fai ‘e he‘ene tamaio‘eiki ‘a e ngaahi me‘a na‘e tu‘utu‘uni?

¹⁰Pehē foki mo kimoutolu; neongo kuo mou fai kotoa pē ‘a e ngaahi me‘a na‘e tu‘utu‘uni atu, ka mou pehē, Ko e kau tamaio‘eiki ta‘e‘aonga ai pē kimautolu, kuo mau fai pē ‘a e me‘a na‘e totonu ke mau fai.

¹¹Pea ‘i he‘ene ‘alu ki Selusalema, tokua na‘e fononga atu ‘e ia ‘i he ve‘e fonua ‘o Samēlia mo Kāleli.

¹²Pea ‘i he‘ene a‘u ki ha vilisi ‘e taha, na‘e fakafetaulaki mai kiate ia ha tu‘unga tangata ‘e toko hongofulu na‘e kilia, ‘o nau tutu‘u mei he mama‘o.

¹³Pea kalanga ‘a e kau tangata ko ia, ‘o nau pehē, ‘ēī Sīsū, ‘alo‘ofa mai.

¹⁴Pea ‘i he‘ene vakai ki ai na‘a ne pehē kiate kinautolu, Mou ō pē, ‘o fakahā kimoutolu ki he kau taula‘eiki. Pea ‘iloange, ‘i he‘enau mole atu, na‘e fakama‘a[22] kinautolu.

¹⁵Pea ko e toko taha ‘iate kinautolu, ‘i he‘ene vakai leva kuo ne mo‘ui, na‘a ne tafoki, ‘o kalanga le‘olahi he‘ene fakamālō‘ia ‘a e ‘Otua;

¹⁶‘o ne fo‘ohifo ‘i he va‘e ‘o Sīsū, ‘o ne fakafeta‘i kiate ia: pea ko e toko taha ko ia ko e Samēlia.

¹⁷Pea tali ‘e Sīsū, ‘o ne pehē, ‘ikai na‘e toko hongofulu na‘e fakama‘a? Pea kofa‘ā ‘a e toko hiva?

¹⁸‘Oku ‘ikai ‘iloa mai koā hanau taha kuo foki ke fai ha fakafeta‘i ki he ‘Otua; ka ko si‘i muli ni pē?

¹⁹Pea ne pehē ki he tangata, Tu‘u ‘o ‘alu: kuo fakamo‘ui koe ‘e ho‘o tui.

²⁰Pea na‘e fai ha fehu‘i kiate ia ‘e he kau Fālesi, pe ‘e hoko fakakū ‘a e Pule‘anga ‘o e ‘Otua; pea ne tali kiate kinautolu, ‘o pehē, Ko e hoko mai ‘o e Pule‘anga ‘o e ‘Otua ‘e ‘ikai ala lamasia:

²¹‘uma‘ā ha fa‘a pehē ‘e ha kakai, ‘ē, ko eni ia; pe, Ko ena: he vakai, ko e Pule‘anga ‘o e ‘Otua ‘oku ‘i homou lotolotonga ni.[23]

²²Pea lea ia ki he kau ako, Tokaange ha taimi te mou faka‘amu ai ke toe mamata ki ha taha ‘o e ngaahi ‘aho ‘o e Fanautama ‘a Tangata, kae ‘ikai te mou mamata ki ai.

²³Pea ‘e pehē ‘e he ni‘ihi kiate kimoutolu, ‘ē, ko eni ia; pe, ‘ē, ko ena ia: kae‘oua te mou afe ki ai, pe kumia.

²⁴He ‘oku hangē ko e tapa mai ‘a e ‘uhila mei he potu ‘e taha ‘o e langi, ‘o ne hulu‘ia ‘o a‘u ki he potu ‘e taha ‘o e langi; ‘e pehē pē foki ‘a e Fanautama ‘a Tangata ‘oka hoko mai hono ‘aho.

²⁵Ka kuo pau ke tomu‘a lahi hono fakamamahi‘i, mo hono fakatale‘i ‘e he to‘utangata ni.

²⁶Pea hangē ko ia na‘e fai ‘i he kuonga ‘o Noa, ‘e pehē foki ‘i he kuonga ‘o e Fanautama ‘a Tangata.

²⁷Na‘a nau kai, na‘a nau inu, na‘a nau ma‘u uaifi, na‘a nau ma‘u husepāniti, ‘o a‘u ki he ‘aho ko ia na‘e hū ai ‘a Noa ki he ‘a‘ake, mo e hoko mai ‘a e Lōmaki, ‘o faka‘auha kinautolu fuli pē.

²⁸‘E tatau foki mo ia na‘e fai ‘i he kuonga ‘o Lote, na‘a nau kai, na‘a nau inu, na‘a nau fakatau mai, na‘a nau fakatau atu, na‘a nau tō ta‘u, na‘a nau langa fale,

²⁹ka ‘i he ‘aho ko ia na‘e hū atu ai ‘a Lote mei Sōtoma, ne faka‘uha hifo ‘a e afi mo e sūlifa mei langi, ‘o faka‘auha kinautolu fuli pē.

³⁰‘E tatau tofu pē mo ia ‘i he ‘aho ‘e fakapū mai ai ‘a e Fanautama ‘a Tangata.

³¹Ka hoko ‘a e ‘aho ko ia, pea ka ai ha taha ‘oku ‘i he tu‘a fale, kae ‘i loto fale ‘ene nga‘oto‘ota, ke ‘oua te ne ‘alu hifo ke ‘ave ia: pehē foki, ko ia ‘oku ne ‘i he ngoue; ke ‘oua te ne tafoki ke ‘omi ‘a e ngaahi me‘a kuo tuku ‘i ‘api.

³²Manatu‘i ‘a e uaifi ‘o Lote.

³³Ka ai ha taha kuo ne ta‘ofi ma‘ana ‘ene mo‘ui, ‘e toki mole ia; ka ko ia kuo ne tuku ia ke mole, te ne toki fakatupu mo‘ui ai ia.

³⁴Tala atu, Ko e pō ko ia ‘ene tokaange ha ongo tangata ‘oku na mohenga taha; ‘e ‘ave ‘a e taha, kae tuku ‘a e taha.

³⁵‘Ene tokaange ha ongo fafine ‘oku kau ‘i he momosi koane; ‘e ‘ave ‘a e taha, kae tuku ‘a e taha.

³⁶‘Ene tokaange ha ongo tangata ‘e toko ua te na ‘i he ngoue, ‘e ‘ave ‘a e taha kae tuku ‘a e taha.[24]

³⁷Pea nau tali, ‘o pehē ki ai, ‘i fē, ‘Eiki? Pea pehē ‘e ia kiate kinautolu, Ko e potu ‘oku ‘i ai ‘a e ‘anga‘anga, ‘e fakataha ki ai foki ‘a e fanga ‘īkale.