Read KO E TOH TAPU KATOA TONGA Luké 18 Bible Online

Luké 18 - KO E TOH TAPU KATOA TONGA bible

Luké 18

¹PEA ne lea‘aki ha fakatātā kiate kinautolu ke fakahā, ko hono tonu ke nau lotu ma‘u pē, ‘o ‘oua na‘a fiu: ‘o ne pehē.

²Tokua na‘e nofo ‘i he kolo ‘e taha ha fakamaau, ‘a ia na‘e ‘ikai te ne ‘a‘apa ki he ‘Otua, pe toka‘i ‘a e tangata.

³Pea na‘e ai ha fefine uitou ‘i he kolo ko ia, ‘a ia na‘e fa‘a ha‘u kiate ia he‘ene pehē, Ke ke sauni ma‘aku mo fakahaofi au mei hoku fili.

⁴Pea fuoloa mo e ‘ikai te ne tali: ka na‘e faifai pea ne pehē ‘i hono loto, Neongo ‘oku ‘ikai te u ‘a‘apa ki he ‘Otua, ‘uma‘ā ha‘aku toka‘i ha tangata.

⁵Ka koe‘uhiā ko e fakafiu mai ‘a e uitou ni te u taukapo‘i ia, na‘a toutu‘u mai ia ‘o ta‘engata, pea u kina ai.

⁶Pea folofola ‘a e ‘eiki, Fanongo ā ki he lau ‘a e fakamaau kākā.

⁷Pea ‘e ‘ikai koā ke fai ‘e he ‘Otua ‘a e sauni ma‘a hono kakai fili, ‘a ia ‘oku nau tangi kiate ia ‘i he ‘aho mo e pō, neongo ‘ene fakatotoka ange?

⁸Tala atu, te ne fai pē ha sauni ma‘anautolu, pea ‘e vave. Ka ‘oka hoko mai ‘a e Fanautama ‘a Tangata, te ne ‘ilo koā ha kei tui pehē ‘i māmani?

⁹Pea na‘a ne lea‘aki mo e fakatātā ko eni ke tau ki ha ni‘ihi na‘e ‘afungi ‘oku nau mā‘oni‘oni, mo nau fakasīkaka‘i hono toe ‘o e kakai:

¹⁰Tokua ko ha ongo tangata na‘a na ō hake ki he Temipale ke fai ‘ena lotu; ko e Fālesi ‘a e taha pea ko e taha ko e pōpilikane.

¹¹Ko e Fālesi na‘a ne tu‘u taha atu, ‘o ne lotu,[25] ‘o pehē, ‘E ‘Otua, ‘oku ou fakafeta‘i atu, ‘oku ‘ikai te u hangē ko hono toe ‘o e kakai, ‘a e kau fakamālohi, mo e kau kākā, mo e kau fe‘auaki, kae‘uma‘ā ha‘aku hangē ko e pōpilikane ko eni.

¹²‘Oku ou ‘aukai tu‘o ua ‘i he uike, ‘oku ou ‘atu ki he siasi hono vahehongofulu ‘o e me‘a kotoa ‘oku ou ma‘u ‘i he‘eku ngāue.

¹³Ka ko si‘i pōpilikane na‘a ne tu‘u pē mei ha potu, ‘o mama‘o atu, pea na‘a mo hono mata na‘e ‘ikai te ne fa‘a hiki ki he langi; ka ka sī fatafata pē ia, ‘o ne pehē, ‘E ‘Otua, ke ke fakamolemole au, ‘a au angahala.

¹⁴Tala atu, na‘e ‘alu atu ‘a e toko taha ko ia ki hono ‘api, kuo ne ma‘u ha tonuhia na‘e lahi ‘i he tonuhia ‘a e tangata ‘e taha: he ko ia ‘oku ne hākeaki‘i ia, ‘e fakavaivai‘i; pea ko ia ‘oku ne fakavaivai‘i ia, ‘e hākeaki‘i.

¹⁵Pea na‘e ‘omi ‘e he kakai kiate ia ‘enau kau valevale foki, koe‘uhi ke ne ala kiate kinautolu: pea ‘i he vakai ki ai ‘e he kau ako na‘a nau kamata lolomi ‘a e kakai.

¹⁶Ka ka ui ange ‘e Sīsū ‘a e kau valevale, ‘o ne pehē, Tuku pē ‘a e kau tamaiki ke nau ha‘u kiate au, pea ‘oua ‘e ta‘ofi kinautolu: he ‘oku ma‘a e fa‘ahinga ko ia ‘a e Pule‘anga ‘o e ‘Otua.

¹⁷Ko au ē, ‘oku ou tala atu, Ko ia ‘e ‘ikai te ne tali ‘a e Pule‘anga ‘o e ‘Otua ‘o hangē ko ha tamasi‘i, ‘e ‘ikai ‘aupito hū ia ki ai.

¹⁸Pea fakafehu‘i kiate ia ‘e ha toko taha, ‘a ia ko ha pule, ‘o ne pehē, ‘A e Tangata‘eiki lelei, ko e hā te u fai kae tō mo‘oku ‘a e mo‘ui ta‘engata?

¹⁹Pea pehē ‘e Sīsū kiate ia, Ko e hā ‘oku ke ui ai au ko e lelei? ‘Oku ‘ikai ha taha ‘oku lelei, ngata pē ‘i he ‘Otua toko taha.

²⁰‘Oku ke ‘ilo pē ‘a e ngaahi fekau, ‘Oua na‘a ke fe‘auaki, ‘Oua na‘a ke fakapō, ‘Oua na‘a ke kaiha‘a, ‘Oua na‘a ke tukuaki, Faka‘apa‘apa ki ho‘o tamai mo ho‘o fa‘ē.

²¹Pea pehē ‘e ia, Ko e ngaahi lao ko ia kuo u tauhi ki ai kotoa pē talu ‘ete tamasi‘i.

²²Pea ‘i he fanongo ki ai ‘e Sīsū, na‘a ne pehē kiate ia, ‘Oku kei toe ha me‘a ‘e taha ke ke fai: fakatau atu ‘a e me‘a kotoa pē ‘oku ke ma‘u, pea tufa hono pa‘anga ki he masiva, pea ‘e ai ha fu‘u koloa ‘e fa‘oaki ma‘au ‘i Hēvani: pea ke ha‘u, ‘o kau ‘i hoku lahi.

²³Pea ‘i he‘ene fanongo ki he lea ko ia, na‘a ne mamahi lahi: he ko e toko taha ia na‘a ne koloa‘ia ‘aupito.

²⁴Pea ‘i he sio kiate ia ‘e Sīsū na‘a ne pehē, Hono ‘ikai faingata‘a ki he kakai ma‘u pa‘anga ke a‘usia ‘a e Pule‘anga ‘o e ‘Otua!

²⁵He ‘oku faingofua ke hū ha kāmeli ‘i ha ava‘i hui tuitui, ‘i he hū ‘a ha koloa‘ia ki he Pule‘anga ‘o e ‘Otua.

²⁶Pea ko kinautolu na‘e fanongo ki ai na‘a nau pehē, Pea ko hai nai ‘e ala mo‘ui?

²⁷Ka ka pehē ‘e ia, Ko e ngaahi me‘a ‘oku ‘ikai fa‘a lava ‘i he vakai ‘a e tangata, ‘oku malava pē ki he ‘Otua.

²⁸Pea lea ‘a Pita, Vakai, ko kimautolu kuo mau li‘aki ‘a e ngaahi me‘a tonu ‘amautolu, ‘o mau muimui kiate koe.

²⁹Pea ne pehē kiate kinautolu, Ko au ē, ‘oku ou tala atu, ‘oku ‘ikai ha taha kuo ne li‘aki ha fale, pe ha uaifi, pe ha ngaahi tokoua, pe ha mātu‘a, pe ha fānau, koe‘uhiā ko e Pule‘anga ‘o e ‘Otua.

³⁰Ka te ne toe ma‘u mai ‘o lōlahi ‘i he nofo ko eni, pea ‘i he maama ka ha‘u ko e mo‘ui ta‘engata.

³¹Pea ne ‘ave ‘a e kau Hongofulumāua, ‘o ne pehē kiate kinautolu, Ko eni, ‘oku tau ‘alu hake ki Selusalema, pea ‘e lava ai ‘a e ngaahi me‘a kotoa pē na‘e tohi ‘i he kau Palōfita ma‘a e Fanautama ‘a Tangata.

³²He ‘e tuku atu ia ki he kau Senitaile, pea ‘e taukaea ia, mo pā‘usi‘i, mo ‘anuhia:

³³pea te nau haha ia, mo tāmate‘i; pea ‘i hono tolu ‘o e ‘aho te ne toetu‘u.

³⁴Ka ko kinautolu, na‘e ‘ikai ke momo‘i o‘o ki ai ha me‘a ‘e taha ‘o e ngaahi me‘a ko ia: pea na‘e mo‘u pulia ‘a e lea ni meiate kinautolu, ‘o nau ta‘elavea ai pē ‘a e ngaahi me‘a ‘oku lau.

³⁵Pea ‘i he faifai ‘o ne fakaofiofi ki Selikō, tokua na‘e nofo mei he ve‘ehala ha motu‘a kui, ko e fai ‘ene kole.

³⁶Pea ‘i he‘ene fanongo ki he ‘alu ange ha fu‘u kakai, na‘a ne fehu‘i pe ko e hā nai ia.

³⁷Pea nau tala ki ai, Ko Sīsū mei Nāsaleti ‘oku me‘a mai.

³⁸Pea ne kalanga ange, ‘o pehē, Sīsū ē! Hako ‘o Tēvita, ‘alo‘ofa mai!

³⁹Pea ko kinautolu na‘e mu‘omu‘a na‘a nau kamata lolomi ia ke ne tuku: ka ko e motu‘a, na‘e fakautuutu ai ‘ene kalanga, Hako ‘o Tēvita ē, ‘alo‘ofa mai!

⁴⁰Pea tu‘u ai ‘a Sīsū, ‘o fekau ke taki mai ‘a e motu‘a: pea ‘i he‘ene ofi mai, na‘a ne fehu‘i kiate ia.

⁴¹Ko e hā ‘a e me‘a ‘oku ke holi ke u fai ma‘a u? Pea ne pehē, ‘Eiki, ke u ‘ā mu‘a.

⁴²Pea folofola ‘e Sīsū kiate ia, Ke ke ‘ā; kuo fakamo‘ui koe ‘e ho‘o tui.

⁴³Pea ne ‘ā leva; ‘o ne muimui ki ai, mo fakamālō‘ia ‘a e ‘Otua. Pea ko e kau Siu kotoa ‘i he‘enau sio ki ai, na‘a nau vīkiviki ki he ‘Otua.