Read KO E TOH TAPU KATOA TONGA Luké 19 Bible Online

Luké 19 - KO E TOH TAPU KATOA TONGA bible

Luké 19

¹PEA ‘i he‘ene a‘u ki Selikō, na‘a ne ‘alu atu ‘i he loto kolo.

²Pea tā na‘e ‘i ai ha tangata na‘e hingoa ko Sākeasi; pea ko e toko taha ko ia ko e Pōpilikane lahi, pea ko e toko taha ia na‘e koloa‘ia.

³Pea na‘a ne feinga ke mamata kia Sīsū, pe ko hai nai ia; ka na‘e ‘ikai te ne lava koe‘uhi ko e fu‘u kakai, he na‘e pukupuku.

⁴Pea lele tāimu‘a ia, ‘o kaka ‘i ha fu‘u sukamino, koe‘uhi ke ne mamata kiate ia: he na‘e hu‘u ‘ene fononga ki he feitu‘u ko ia.

⁵Pea ‘i he a‘u ‘a Sīsū ki he potu, na‘a ne me‘a hake, ‘o ne pehē kiate ia, ‘E Sākeasi, fai vave, pea ‘alu hifo; he kuo pau ke u ‘apitanga ‘i ho fale he ‘aho ni.

⁶Pea ne fai vave, ‘o ‘alu hifo, ‘o ne tali fiefia ia.

⁷Pea lāunga kotoa pē ‘a e kakai ‘i he‘enau mamata ki ai, he‘enau pehē, ‘ā, kuo ne ‘alu ke nofo mo ha fu‘u angahala.

⁸Pea tu‘u ai ‘a Sākeasi, ‘o ne pehē ki he ‘Eiki; ‘Eiki, ko eni te u ‘atu ni hono vaeua ‘o ‘eku nga‘oto‘ota ki he masiva; pea kapau kuo u ma‘u ha me‘a ‘i he lohiaki‘i ha taha, te u toe totongi ni, ‘o liunga fā.

⁹Pea pehē ‘e Sīsū kiate ia, Ko e ‘aho ni kuo hoko mai ‘a e fakamo‘ui ki he fale ni, kae‘uma‘ā ko e hako foki ia ‘o ‘Epalahame.

¹⁰He na‘e ha‘u ‘a e Fanautama ‘a Tangata ke kumi mo fakamo‘ui ‘a ia kuo mole.

¹¹Pea lolotonga ‘enau fakafanongo ki he me‘a ko ia, na‘a ne fokotu‘u atu mo ha fakatātā; ko hono ‘uhinga, he ‘oku ne ofi ki Selusalema, pea ‘oku ‘amanaki ‘a e kakai, ‘oku panaki ‘aupito ‘a e fakahā mai ‘o e Pule‘anga ‘o e ‘Otua.

¹²Ko ia, na‘a ne lea ‘o pehē, Tokua na‘e ai ha tangata, ko e fo‘i ‘eiki, na‘a ne ‘alu ki ha fonua mama‘o ke ma‘u mo‘ona ha pule‘anga, pea toki foki mai.

¹³Pea ne ui ha toko hongofulu ‘o ‘ene kau tamaio‘eiki, ‘o ne tuku kiate kinautolu ha mina pa‘anga ‘e hongofulu, ‘o ne pehē kiate kinautolu, Fai fakatau ‘aki ia lolotonga ‘eku mama‘o.

¹⁴Ka ko e kakai ‘o hono fonua na‘a nau fehi‘a kiate ia, ‘o nau fekau atu ha tu‘unga fakafofonga ke fakatale‘i ia, pea ke fakahā, ‘Oku ‘ikai te mau loto ke ke fakanofo ‘a e siana ni ke tu‘i kiate kimautolu.

¹⁵Pea faifai pea ne foki mai, kuo ‘o‘ona ‘a e pule‘anga; pea ne fekau ke ui mai ‘a e tu‘unga tamaio‘eiki ko ia, ‘a ia na‘a ne tuku ki ai ‘a e pa‘anga, koe‘uhi ke ne mea‘i pe kuo fēfē ‘enau fakatau.

¹⁶Pea tu‘u mai ‘a e ‘uluaki, ‘o ne pehē; ‘Eiki ko ho‘o mina kuo ne ma‘u mai mo ha mina ‘e hongofulu.

¹⁷Pea me‘a mai ia, ‘Oi seuke! mālō, si‘i tamaio‘eiki lelei! pea ko e me‘a ‘i ho‘o lototō ‘i ha ki‘i momo‘i me‘a pehē, ke ke nofo ko e pule ‘o ha kolo ‘e hongofulu.

¹⁸Pea ha‘u mo hono ua, ‘o ne pehē, ‘Eiki, ko ho‘o mina kuo ne fakatupu ha mina ‘e nima.

¹⁹Pea ki he toko taha ko ia foki na‘a ne me‘a mai, Mo koe, foki, ke ke hoko ko e pule ‘o e ngaahi kolo ‘e nima.

²⁰Pea toki ha‘u ‘a e taha na‘e kehe, ‘o ne pehē ‘Eiki, ko ena ho‘o mina, ‘a ia kuo u mo‘u tauhia, kuo kofu ‘i ha holoholo:

²¹he ne u manavahē kiate koe, koe‘uhi ko e tangata fakata‘ehuohuesia koe: he ko ho‘o anga ke ‘eke ‘a e me‘a na‘e ‘ikai te ke ‘ange, pea ke utu ‘a e me‘a na‘e ‘ikai te ke tō.

²²Pea folofola mai ia, ‘a e tamaio‘eiki pau‘u! te u fakamaau koe mei ho‘o lea ‘a‘au. Na‘a ke ‘ilo koā ko e tangata faingata‘a au, ‘oku ou ‘eke ‘a e me‘a na‘e ‘ikai te u ‘ange, mo utu ‘a e me‘a na‘e ‘ikai te u tō, ‘ō?

²³Pea ko e hā ai na‘e ‘ikai te ke tuku ‘eku pa‘anga ki he pangikē, pehē kuo u ma‘u ai ia mo hono fua foki ‘i he‘eku ha‘u ni?

²⁴Pea me‘a ia kiate kinautolu na‘e ha‘ofia ia, Mou to‘o ‘a e mina meiate ia, ‘o tuku kiate ia ‘oku ma‘u ‘a e hongofulu.

²⁵(Pea nau pehē ange, ‘Eiki, ka ‘oku hongofulu ‘ene mina ‘a‘ana.)

²⁶Tala atu, ‘ilonga ha taha ‘oku ma‘u ha me‘a ‘e ‘ange ki ai mo ha me‘a; ka ko ia ‘oku ‘ikai ke ma‘u, na‘a mo e me‘a ‘oku ne ma‘u ‘e to‘o meiate ia.

²⁷Ka ko hoku ngaahi fili ko ia na‘e ‘ikai loto ke u tu‘i kiate kinautolu, taki mai ki heni, pea tāmate‘i ‘i hoku ‘ao.

²⁸Pea ‘i he‘ene fai ‘a e ngaahi lea ko ia, na‘a ne laka atu ‘i honau ‘ao, ko ‘ene ‘alu hake ki Selusalema.

²⁹Pea ‘i he faifai ‘o ne ofi ki Petefesi, mo Pētani, ki he mo‘unga ‘oku ui ko ‘ōlive, na‘a ne fekau atu ha toko ua ‘o e kau ako,

³⁰‘o ne pehē, Mole pē ki he vilisi ‘oku hanga mai; pea ‘i ho‘omo a‘u atu, te mo ‘ilo ha ki‘i ‘asi ‘oku no‘otaki ai, ‘a ia kuo te‘eki si‘i ha tangata ‘e heka ai: pea mo vete ia, ‘o taki mai.

³¹Pea ka ai ha taha te ne fehu‘i atu, Ko e hā ‘oku mo vete ai? pea mo lea ‘o pehē, ‘oku fiema‘u ia ‘e he ‘Eiki.[26]

³²Pea ō atu ‘a e ongo me‘a na‘e fekau, ‘o na ‘ilo pē ‘o hangē ko ‘ene me‘a kiate kinaua.

³³Pea lolotonga ‘ena vete ‘a e ki‘i ‘asi, mo e lea mai ‘a e kakai na‘e ‘anautolu ia, Ko e hā ‘oku mo vete ai ‘a e ki‘i ‘asi?

³⁴Pea na pehē, ‘oku fiema‘u ia ‘e he ‘Eiki.[27]

³⁵Pea na taki ia kia Sīsū: pea nau laku honau pulupulu ki he ‘asi, ‘o nau fakaheka ai ‘a Sīsū.

³⁶Pea ‘i he‘ene kamata me‘a atu, na‘a nau falikiliki ‘a e hala ‘aki honau ngaahi pulupulu.

³⁷Pea ‘i he‘ene fakaofiofi atu, ‘o ne fai ke hifo ‘i he mo‘unga ko ‘ōlive, pea pā mavava ‘a e fu‘u fakataha kātoa ‘o e kau ako, ‘o nau vīkiviki ki he ‘Otua, ‘o lau le‘o lahi ki he ngaahi ngāue fakaofo kuo nau mamata ki ai.

³⁸‘O nau pehē, Hoto‘ofa ki he Tu‘i ‘Oku hoko mai ‘i he huafa ‘o e ‘Eiki! Ke ai ha melino ‘i Langi, Mo ha kolōlia ‘i Langi Taupotu!

³⁹Pea ko e ni‘ihi ‘o e kau Fālesi na‘e ‘i he kakai, na‘a nau lea kiate ia, Tangata‘eiki, lolomi ho‘o kau ako.

⁴⁰Ka ka tali ‘e ia ‘o ne pehē, Tala atu, kapau te nau fakalongo ‘e kinautolu, ‘e kalakalanga ‘e he ngaahi maka.

⁴¹Pea ‘i he‘ene ofi atu, ‘o hā mai ‘a e kolo, na‘a ne tēngihia ia,

⁴²‘o ne pehē, ‘ē, taumaiā ne ke lavea — kehe ā ho taimi ko eni — ‘io, ‘o lavea ‘e koe foki ‘a e ngaahi me‘a ‘oku tu‘u ai ho‘o lelei! ka kuo fufū ‘eni meiate koe.

⁴³He tokaange hao taimi ‘e ‘ākolo‘i koe ‘e ho ngaahi fili, pea te nau kapui koe, mo punipuni mei he potu kotoa pē, pea te nau laiki koe mo ho‘o fānau foki.

⁴⁴Pea ‘e ‘ikai te nau fakatoe hao maka ‘o ta‘eholoki; koe‘uhiā na‘e ‘ikai te ke lavea ‘a e kuonga ‘o ho ‘a‘ahi.

⁴⁵Pea ne hū ki he Temipale, ‘o ne hanga ‘o kapusi ‘a kinautolu na‘e fai fakatau ai;

⁴⁶‘o ne pehē kiate kinautolu, Kuo tohi, Pea ‘e tu‘u hoku fale ko e falelotu; ka ko kimoutolu kuo mou ngaohi ia ko e ‘ananga ‘o ha kaiha‘akau.

⁴⁷Pea na‘a ne ‘i he Temipale ‘i he ‘aho kotoa pē, ‘o faiako. Pea ko e hou‘eiki taula‘eiki mo e kau sikalaipe na‘a nau feinga ke tāmate‘i ia; pehē foki mo e kau tu‘ukimu‘a ‘o e kakai:

⁴⁸ka nau fiu‘a fili pe ko e hā ‘anautolu ai ‘e fai; he ko e kakai kātoa na‘e mātu‘aki tukutukutāupe honau loto kiate ia ‘i he‘enau fanongo ki ai.