Read KO E TOH TAPU KATOA TONGA Luké 20 Bible Online

Luké 20 - KO E TOH TAPU KATOA TONGA bible

Luké 20

¹PEA ko e ‘aho ‘e taha ‘o e ngaahi ‘aho ko ia, lolotonga ‘ene faiako ki he kakai mo malanga‘aki ‘a e Kōsipeli ‘i he Temipale, na‘e tutu‘u mai ‘a e kau taula‘eiki mo e kau sikalaipe, fakataha mo e kau mātu‘a ‘o nau pehē kiate ia,

²Tala mai pe ko e hā ho tu‘unga ‘oku ke fai ai ‘a e ngaahi me‘a ko ‘eni? pea ko hai ia na‘a ne tuku kiate koe ‘a e tu‘unga ko ia?

³Pea tali ‘e ia, ‘o ne pehē kiate kinautolu, Ka u fai atu mo au ha‘aku fehu‘i, pea mou tali:

⁴ko e fai papitaiso ‘a Sione, na‘e mei he langi ia, pe mei he tangata?

⁵Pea nau fealēlea‘aki ai ‘iate kinautolu, ‘o pehē, Kapau te tau tali, Mei langi; te ne pehē, Pea ko e hā ai na‘e ‘ikai te mou tuitala kiate ia?

⁶Pea kapau te tau pehē, Mei he tangata; ‘e tolongi kitautolu ‘e he kakai Siu kotoa: he ‘oku nau mātu‘aki tui ko Sione ko e palōfita.

⁷Pea na‘a nau tali, ‘oku ‘ikai te mau ‘ilo pe na‘e mei fē ia.

⁸Pea pehē ‘e Sīsū kiate kinautolu, pea ‘e ‘ikai ā te u tala atu ‘e au, pe ko e hā hoku tu‘unga ‘oku ou fai ai ‘a e ngaahi me‘a ko ‘eni.

⁹Pea ne hanga ‘o lea ki he kakai Siu ‘i he fakatātā ko eni: Tokua ko e tangata na‘a ne tō ha ngoue vaine, pea na‘a ne tuku ke lisi ia ‘e ha kau fa‘a, pea ne ‘alu ki muli, ‘o ne fuoloa ai.

¹⁰Pea ‘i he to‘ukai, na‘a ne fekau ha tamaio‘eiki ki he kau fa‘a, koe‘uhi ke nau tuku kiate ia hono ‘inasi he fua ‘o e ngoue: ka ko e kau fa‘a na‘a nau haha ia, mo fakafoki mola.

¹¹Pea ne fai atu, ‘o fekau mo ha tamaio‘eiki kehe: pea nau haha mo pā‘usi‘i mo fakafoki mola mo e toko taha ko ia.

¹²Pea ne fai atu, ‘o fekau mai mo hano toko tolu: pea nau taa‘i mo ia, ‘o lī kitua‘ā kuo makafokafo.

¹³Pea pehē ‘e he ‘eiki ‘o e ngoue vaine, Ko e hā ‘aku ai ‘e fai? ‘ē, ka u fekau atu hoku foha ko e pele: te nau toka‘i nai ia.

¹⁴Ka ‘i he vakai ‘a e kau fa‘a kiate ia, na‘a nau fepehē‘aki, Ko e hoko ‘ena; tau tāmate‘i mu‘a ia, kae ‘otautolu ‘a e tofi‘a.

¹⁵Pea nau toho ia ki he tua‘ā ngoue, ‘o tāmate‘i, pea ko e hā ai ‘e fai kiate kinautolu ‘e he ‘eiki ‘o e ngoue vaine?

¹⁶Te ne hoko mai ‘o faka‘auha ‘a e kau fa‘a ko ia, pea ‘ange ‘a e ngoue vaine ki ha ni‘ihi kehe. Pea ‘i he‘enau fanongo ki ai, na‘a nau pehē, ‘oua ā foki!

¹⁷Pea ne siofia kinautolu, ‘o ne pehē, Ka ko e hā ai ‘eni kuo tohi, Ko e maka ne fakatale‘i ‘e he kau tufunga, Kuo hoko ‘o tuliki tau‘olunga?

¹⁸‘Ilonga ha taha te ne tō ki he maka ko ia ‘e mafesifesi; ka ‘ilonga ‘a ia ‘e tō ‘a e maka ki ai, ‘e laiki ke efu.

¹⁹Pea ko e kau sikalaipe mo e hou‘eiki taula‘eiki na‘a nau feinga ke ala kiate ia leva ‘i he taimi ko ia; ka na‘a nau manavahē ki he kakai: he na‘a nau ‘ilo kuo ne lea‘aki ‘a e fakatātā ko ia ke tau kiate kinautolu.

²⁰Pea nau lamalama ha faingamālie, ‘o nau fekau ange ha ni‘ihi kuo fale‘i ke nau fakamā‘oni‘oni loi‘i kinautolu, koe‘uhi ke nau mo‘ua ia ‘i ha alea, ka nau tuku ia ki he pule‘anga, pea ke tu‘unganaki ‘aki ‘e he Kōvana.

²¹Pea nau fakafehu‘i kiate ia, ‘o pehē, Tangata‘eiki, ‘oku mau ‘ilo ‘oku totonu ha‘au lea mo e ako, pea ‘oku ‘ikai te ke filifilimānako; ka ‘oku ke ako totonu ‘aki ‘a e hala ‘o e ‘Otua:

²²pe ‘oku ngofua ke mau tukuhau kia Sisa, pe ‘ikai?

²³Ka ka vavanga ‘e ia ki he‘enau olo, ‘o ne pehē kiate kinautolu.

²⁴Fakahā mai ha fo‘i pa‘anga. Ko e fofonga mo e hingoa ‘o hai ‘oku ‘i ai? Pea nau tali, ‘o pehē, ‘o Sisa.

²⁵Pea pehē ‘e ia kiate kinautolu, ‘āua; pe‘i ‘ange kia Sisa ‘a e ngaahi me‘a ‘a Sisa, pea ki he ‘Otua ‘a e ngaahi me‘a ‘a e ‘Otua.

²⁶Pea na‘e ‘ikai te nau lava ke puke ki he‘ene lea ‘i he ‘ao ‘o e kakai: pea nau ofo ‘i he‘ene tali, ‘o nau longo pē.

²⁷Pea ‘unu‘unu mai ha ni‘ihi ‘o e kau Sātusi, ‘a kinautolu ‘oku faka‘ikai‘i ‘a e toetu‘u; pea na‘a nau fehu‘i kiate ia, ‘o pehē,

²⁸Tangata‘eiki, na‘e tohi mai ‘e Mōsese, Kapau ‘e pekia ha taha ‘i ha tautehina, ‘a ia na‘e fakafinemotu‘a, ka ‘oku ‘ikai ha‘ane fānau, pea ke ma‘u ‘e hono tokoua ‘a e finemotu‘a, ‘o fakatupu ai ha hako ki hono tokoua.

²⁹Pea na‘e ai ha tu‘unga me‘a ‘e toko fitu ko e tautehina: pea na‘e ma‘u uaifi ‘a e ‘uluaki, pea na‘e pekia ta‘ehako.

³⁰Ko hono ua foki, mo hono toko tolu na‘a na ma‘u ia:

³¹pea pehē mo e toko fitu kātoa; na‘e ‘ikai hanau hako, pea nau pekia.

³²Pea pekia ki mui mo e fefine.

³³Pea ‘i he toetu‘u ‘e hoko ‘a e fefine ko ia ko e uaifi nai ‘o hai ‘iate kinautolu? he ko e toko fitu kātoa na‘a nau ma‘u ia ko honau uaifi.

³⁴Pea pehē ‘e Sīsū kiate kinautolu, Ko e fānau ‘a e maama ko ‘eni ‘oku nau ma‘u uaifi, mo ma‘u husepāniti:

³⁵ka ko kinautolu ‘oku nau lava hono tau ke ma‘u ‘a e maama ko ‘ena, mo e toetu‘u mei he pekia, ‘e ‘ikai te nau ma‘u uaifi, pe ma‘u husepāniti.

³⁶He ‘oku ‘ikai foki te nau kei lava ke pekia, he ‘oku nau ‘ulungātatau mo e kau ‘āngelo; pea ko e fānau kinautolu ‘a e ‘Otua, he ko e fānau ‘a e Toetu‘u.

³⁷Ka ko e me‘a ki he toe fokotu‘u ‘o e pekia, na‘a mo Mōsese ‘oku ne fakahā ia ‘i he vahe ‘oku kau ki he Talatala‘āmoa, he‘ene lau ‘a e ‘Eiki ko e ‘Otua ‘o ‘Epalahame, mo e ‘Otua ‘o ‘Aisake, mo e ‘Otua ‘o Sēkope.

³⁸Ka ‘oku ‘ikai ko e ‘Otua ia ‘o e mate ka ‘o e mo‘ui: koe‘uhi ‘i he‘ene ‘afio ‘a‘ana ‘oku nau mā‘u‘ui kotoa pē.

³⁹Pea tali ‘e he ni‘ihi ‘o e kau sikalaipe, ‘o nau pehē, Tangata‘eiki, kuo mālō ho‘o lea.

⁴⁰He na‘e ‘ikai te nau toe fakato‘oto‘a ke fai kiate ia ha momo‘i fehu‘i ‘e taha.

⁴¹Ka ka lea ‘e ia kiate kinautolu, ‘oku fēfē ‘enau lau ko e Mīsaia ko e Hako ‘o Tēvita ia?

⁴²Ka ‘oku lau ‘e Tēvita ‘e ia ‘i he Tohi Saame:

⁴³Ne folofola ‘e he ‘eiki ki hoku ‘Eiki, Nofo koe ‘i hoku to‘omata‘u, Kae‘oua ke u ngaohi ho ngaahi fili ko ho tu‘ungava‘e.

⁴⁴Tā ‘oku ui ia ‘e Tēvita ko hono ‘Eiki, pea ko hono hako fēfē ai?

⁴⁵Pea ‘i he kei tokanga ‘a e kakai kotoa na‘a ne pehē kiate kinautolu.

⁴⁶Mou lamalama ‘a e kau sikalaipe, ‘a ia ko honau manako ke ‘eve‘eva mo e kofu faka‘ilonga, pea nau havala ki he faka‘apa‘apa‘ia ‘i he mala‘e fakatau, mo e nofo ki mu‘a‘i he falelotu, mo e tokoto ki mu‘a ‘i ha kātoanga.

⁴⁷Ko e fa‘ahinga ‘oku nau folo kotoa ‘a e ngaahi ‘api ‘o si‘i kau uitou, mo nau mounu ‘aki ‘enau lotu lōloa: ‘e ma‘u ‘e he kau siana ko ia ha tautea ‘oku kehe ange.