Read KO E TOH TAPU KATOA TONGA Luké 22 Bible Online

Luké 22 - KO E TOH TAPU KATOA TONGA bible

Luké 22

¹PEA na‘e fakaofiofi mai ‘a e kātoanga tapu lēvani, ‘a ia ko hono hingoa ko e Pāsova.

²Pea ko e hou‘eiki taula‘eiki, mo e kau sikalaipe, na‘a nau fiu‘a feinga pe ‘e fēfē ha‘anau fakapoongi ia; he na‘a nau manavahē ki he kakai.

³Pea hū ‘a Sētane kia Siutasi na‘e ui ko ‘Isikāliote, ‘a ia na‘a ne ‘i he kau Hongofulumāua.

⁴Pea ne ‘alu mei ai ‘o alea mo e hou‘eiki taula‘eiki, mo e ngaahi ‘eikitau, ki ha anga ‘o ‘ene lavaki‘i ia kiate kinautolu.

⁵Pea nau fiefia, mo nau fakapapau ke ‘ange ha‘ane pa‘anga.

⁶Pea na‘a ne tala‘ofa ke fai, pea ne kumi ha faingamālie ke lavaki‘i ia kiate kinautolu ‘i ha taimi ‘oku mama‘o ai ‘a e kakai.

⁷Pea na‘e hoko ‘a e ‘aho ‘o e tapu lēvani, ‘a ia na‘e totonu ke tāmate‘i ai ‘a e Pāsova.

⁸Pea ne fekau ‘a Pita mo Sione, ‘o ne pehē, ‘alu ‘o teuteu ma‘atautolu ‘a e Pāsova, ke tau kai ia.

⁹Pea na pehē ki ai, Ko e potu fē ‘oku ke loto ke ma teuteu ai?

¹⁰Pea ne pehē kiate kinaua, Ko eni, ‘i ho‘omo hū ki he kolo, te mo fetaulaki mo ha tangata ‘oku fua ha hina vai; mo muimui ki ai ‘o a‘u ki he fale ‘oku ne ‘alu ki ai.

¹¹Pea te mo lea ki he matāpule ‘o e fale, ‘Oku pehē mai ‘e he Tangata‘eiki, pe ko e fē ‘a e loki ke u kai ai ‘a e Pāsova mo ‘eku kau ako?

¹²Pea ko e tangata ko ia, te ne fakahā kiate kimoua ha fu‘u falekai ‘i ‘olunga, kuo ‘osi faliki: mo hanga ‘o teuteu ‘i he potu ko ia.

¹³Pea ‘i he‘ena ‘alu atu, na‘a na ‘ilo pē ‘o hangē ko ‘ene tala kiate kinaua, ‘o na teu ‘a e Pāsova.

¹⁴Pea ‘i he hokosia hono houa, na‘a ne tokoto hifo, ‘a ia mo e kau ‘Aposetolo.

¹⁵Pea ne pehē kiate kinautolu, Kuo u mātu‘aki holi ke kai ‘a e Pāsova ko eni fakataha mo kimoutolu, ‘i he te‘eki ke hoko ‘eku mamahi:

¹⁶he ‘oku ou tala atu, ‘e ‘ikai ‘aupito te u toe kai ia, ‘o a‘u ki he taimi ‘e fakakakato ai ia ‘i he Pule‘anga ‘o e ‘Otua.

¹⁷Pea ‘i he‘ene ma‘u ha ipu, na‘a ne fai ha fakafeta‘i, ‘o ne pehē, To‘o ‘eni ‘o vahevahe kiate kimoutolu:

¹⁸he ‘oku ou tala atu, Hili ‘eni, ‘e ‘ikai ‘aupito te u inu mei he fua ‘o e vaine, kae‘oua ke hoko mai ‘a e Pule‘anga ‘o e ‘Otua.

¹⁹Na‘a ne to‘o foki ha fo‘i mā, ‘o ne fakafeta‘i, mo ne pakipaki ‘o ‘ange kiate kinautolu, ‘o ne pehē, Ko hoku sino ‘eni, ‘a ia ‘oku foaki koe‘uhi ko kimoutolu: mou fai ‘eni mōku fakamanatu.

²⁰Na‘a ne to‘o pehē foki ‘a e ipu, hili ‘a e ‘ohomohe, ‘o ne pehē, Ko e ipu ni ko e fuakava fo‘ou ia ‘oku fai‘aki hoku toto, ‘a ia ‘oku lilingi koe‘uhi ko kimoutolu.[28]

²¹Ka neongo ia, vakai, ko e nima ‘o hoku lavaki ‘oku ala mo au ki he tēpile ni.

²²‘ē, ko e ‘alu ‘a e Fanautama ‘a Tangata ‘oku hangē ko ia ne tu‘utu‘uni: ka neongo ia, ‘oiauē ‘a e tangata ko ia te ne lavaki‘i ia!

²³Pea nau kamata fefehu‘i‘aki, pe ko hai tū ia ‘iate kinautolu ‘oku teu fai pehē.

²⁴Pea na‘e ai foki ha fakakikihi ‘iate kinautolu, pe ko hai ‘iate kinautolu ‘oku matamata ko e mā‘olunga.

²⁵Ka ka pehē ‘e ia kiate kinautolu, Ko e ngaahi tu‘i ‘o e Senitaile ‘oku nau pule‘i kinautolu; pea ko kinautolu ‘oku fa‘iteliha kiate kinautolu ‘oku lau ko e kau Ngāuemālō.

²⁶Ka ‘e ‘ikai te mou pehē kimoutolu: ka ko ia ‘oku mā‘olunga ‘iate kimoutolu ke ne hoko ‘o hangē ko e kimui; pea ko e takimu‘a ke hangē ko e sevāniti.

²⁷He ko hai ‘oku mā‘olunga, ko ia ‘oku nofo ‘i he kai, pe ko ia ‘oku sevāniti? ‘ikai ko ia ‘oku nofo ‘i he kai? ka ko au ‘oku ou ‘i homou lotolotonga ‘o hangē ko e sevāniti.

²⁸Ka ko kimoutolu ia kuo nofo‘i ma‘u mo au ‘i hoku ngaahi ‘ahi‘ahi.

²⁹Pea ko au ‘oku ou tu‘utu‘uni ha pule‘anga mo‘omoutolu, ‘o hangē ko e tu‘utu‘uni ha pule‘anga mo‘oku ‘e he‘eku ‘Eiki.

³⁰Ke mou kai mo inu ‘i he‘eku tēpile ‘i hoku pule‘anga, pea nofo ki ha ngaahi taloni, ‘o fakamāu‘i ‘a e matakali ‘e hongofulu mā ua ‘o ‘Isileli.

³¹‘E Saimone, ‘e Saimone, tā kuo tala kimoutolu ‘e Sētane, ke ne sivi kimoutolu ‘o hangē ko e uite:

³²ka kuo u hūfia koe, ke ‘oua na‘a mate ‘aupito ho‘o tui ‘a‘au: pea ‘oka ke ka toki foki mai, ke ke poupou ‘e koe ho ngaahi tokoua.

³³Ka ka pehē ‘e ia ki ai, ‘Eiki, kuo ‘osi teu hoku loto ke ‘alu, ‘io, ki he pilīsone mo e mate, ‘o kapau ko e fakataha mo koe.

³⁴Pea ne pehē, Pita, ‘oku ou tala atu, ‘e ‘ikai ‘u‘ua ‘a e moa ‘anai, kae‘oua ke ke faka‘ikai ‘o tu‘o tolu mālō ‘oku ke ‘ilo au.

³⁵Pea ne pehē kiate kinautolu, ‘i he‘eku fekau atu kimoutolu ta‘eha kato pa‘anga, pe ha kato ‘oho, pe ha ngaahi sū, na‘a mou masiva ‘i ha me‘a? Pea nau pehē, ‘Ikai.

³⁶Pea ne toki lea kiate kinautolu, Ka ‘i he taimi ni, ‘ilonga ha taha ‘oku ne ma‘u ha kato pa‘anga, ke ne to‘o ia, pehē foki mo ha kato ‘oho; pea ko ia ‘oku ‘ikai ke ma‘u ha me‘a pehē, ke ne fakatau atu hono kofu ke ma‘u ‘aki ha heletā.

³⁷He ‘oku ou pehē atu kiate kimoutolu, kuo pau ke fakamo‘oni ‘iate au ‘a e me‘a ko eni ne tohi, pea na‘e fakakau ia mo e kau maumau lao: he ko eni ‘oku faka‘a‘au ke iku ‘a e me‘a na‘e tohi kiate au.

³⁸Pea nau pehē, ‘Eiki, vakai ko e heletā ‘eni ‘e ua. Pea ne pehē kiate kinautolu, ‘Oku lahi pē ia.[29]

³⁹Pea ‘i he‘ene ‘alu atu, na‘a ne fononga ki he mo‘unga ko ‘ōlive, ‘o hangē ko ‘ene fa‘a fai; pea muimui foki kiate ia ‘a e kau ako.

⁴⁰Pea ‘i he‘ene hoko ki he potu, na‘a ne pehē kiate kinautolu, Mou lotu ke ‘oua na‘a mou hū ki ha ‘ahi‘ahi.

⁴¹Pea mahu‘i atu ‘e ia meiate kinautolu, fe‘unga nai mo e lisi‘anga maka, ‘o ne tū‘ulutui ‘o lotu,

⁴²‘o ne pehē, ‘E Tamai, kapau ko ho finangalo, ke ke fakalaka ‘a e ipu ni meiate au: kaekehe ke ‘oua na‘a fai hoku loto, ka ko ho‘ou pē.

⁴³Pea na‘e hā kiate ia ha ‘āngelo mei he langi, ‘o ‘omi ha‘ane mālohi.

⁴⁴Pea hoko ia ‘o feinga lahi, pea fakautuutu ‘ene lotu fakamātoato: pea hoko ‘ene tauta‘a ‘o hangē ko e ngaahi tulutā ta‘ata‘a, ‘o vāngana ki kelekele.[30]

⁴⁵Pea ‘i he‘ene tu‘u hake mei he‘ene lotu, ‘o ‘alu ki he kau ako, na‘a ne ‘ilo kinautolu kuo fakamohe ‘e he‘enau mamahi.

⁴⁶Pea ne pehē kiate kinautolu, Ko e hā ‘oku mou mohe ai? mou tu‘u hake, ‘o lotu ke ‘oua na‘a mou hū ki ha ‘ahi‘ahi.

⁴⁷Lolotonga ‘ene kei lea, tā ko ha fu‘u kakai ‘oku ha‘u; pea ko e tangata na‘e hingoa ko Siutasi, ko e toko taha ‘o e kau Hongofulumāua, na‘a ne ‘alu mu‘omu‘a ‘iate kinautolu, ‘o ne fakaofi kia Sīsū ke ‘uma kiate ia.

⁴⁸Pea pehē ‘e Sīsū ki ai, ‘E Siutasi, koe‘uma‘ā koā ‘oku ke lavaki‘i ‘aki ‘a e Fanautama ‘a Tangata?

⁴⁹Pea ko kinautolu na‘e ‘ia Sīsū, ‘i he‘enau vakai ‘a e me‘a ‘e hoko, na‘a nau pehē, ‘Eiki, te mau taa‘i ‘aki ‘a e heletā?

⁵⁰Pea ko e toko taha ‘iate kinautolu tokua, na‘a ne taa‘i ‘a e tamaio‘eiki ‘a e Taula‘eiki Lahi, ‘o ne tu‘usi hono telinga to‘omata‘u.

⁵¹Pea tali ‘e Sīsū, ‘o ne pehē kiate kinautolu, Tuku si‘i ange kae‘oua ke lava ‘eni. Pea ne ala ki he lau‘i telinga, ‘o ne fakamo‘ui ia.

⁵²Pea lea ‘a Sīsū kiate kinautolu kuo hoko kiate ia, (ko e ni‘ihi ‘o e hou‘eiki taula‘eiki, mo e hou‘eiki tau ‘o e Temipale, mo e kau mātu‘a), ‘o ne pehē, Ko ho‘omou omi fakaheletā mo faka‘akau, ‘o hangē ko ha kaiha‘akau au!

⁵³Ko e ‘aho kotoa pē mo ‘eku ‘iate kimoutolu ‘i he Temipale, pea na‘e ‘ikai te mou ala mai kiate au: ka ko hono ‘uhinga, ko homou ava ‘eni, pea mo e tu‘u ‘a fakapo‘uli.

⁵⁴Pea nau puke ia, ‘o taki ‘o a‘u ki he fale ‘o e Taula‘eiki Lahi. Ka ka muimui atu ‘a Pita mei he mama‘o.

⁵⁵Pea kuo nau tafu ha afi ‘i he loto loto‘ā, mo nau nonofo, pea nofo ‘a Pita ‘o lotolotoi ‘iate kinautolu.

⁵⁶Pea ko e kaunanga ‘e taha na‘a ne vakai kiate ia ‘i he‘ene nofo ki he maama; pea ne sio fakamama‘u kiate ia, ‘o ne pehē, Ko e siana ni foki na‘e ‘iate ia.

⁵⁷Ka ka faka‘ikai ‘e ia, he‘ene pehē, Fefine, ‘oku ‘ikai te u ‘ilo ‘a e toko taha ko ia.

⁵⁸Pea fuoloa si‘i atu na‘e mamata ki ai ‘e ha toko taha kehe, ko e tangata, ‘o ne pehē, Ko koe foki ‘oku ke kau ki he fa‘ahinga ko ia. Pea pehē ‘e Pita, Tangata, ‘oku ‘ikai.

⁵⁹Pea kuo mahili nai ha houa ‘e taha, pea fakapapau mai ha tangata ‘e taha, ‘o pehē, ‘ā, ‘oku mo‘oni, na‘e kau mo ia ‘a e siana ni foki: kae‘uma‘ā ko e Kāleli ia.

⁶⁰Ka ka pehē, ‘e Pita, Tangata, ‘oku ‘ikai te u ‘ilo ‘a e me‘a ‘oku ke lau ki ai. Pea fakafokifā, lolotonga ‘ene kei lea, na‘e ‘u‘ua ‘a e moa.

⁶¹Pea tafoki ‘a e ‘Eiki ‘o sio fakamama‘u kia Pita. Pea manatu hifo ‘a Pita ki he folofola ‘a e ‘Eiki, ‘a ‘ene pehē mai, ‘I he te‘eki ke ‘u‘ua ‘a e moa ‘anai, te ke fakafisinga au ‘o tu‘o tolu mālō.

⁶²Pea ne ‘alu atu kitua‘ā, ‘o ne tangi mamahi.

⁶³Pea ko e kau tangata na‘a nau kuku ‘a Sīsū na‘a nau pā‘usi‘i ia, he‘enau haha ia.

⁶⁴Pea nau fakapūlou ia, ‘o nau fakafehu‘i ki ai, ‘o pehē, Mate mai pe ko hai ia na‘e taa‘i koe?

⁶⁵Pea lahi ‘a e ngaahi lea kehekehe na‘a nau ‘ai kiate ia, ko e tālalakulaku.

⁶⁶Pea ‘i he‘ene ‘aho hake, na‘e tefua mai ‘a kinautolu na‘e kau ki he Fakataha Fakamātu‘a ‘o ‘Isileli, ‘o ‘ikai ko e hou‘eiki taula‘eiki pē, ka ko e kau sikalaipe foki; ‘o nau taki ange ia ki he‘enau fakataha mo nau pehē, Kapau ko e Mīsaia koe, tala mai.

⁶⁷Pea ne pehē kiate kinautolu, Kapau te u tala kiate kimoutolu, tala‘ehai te mou tui.

⁶⁸Pea kapau te u fai atu ha fehu‘i, tala‘ehai te mou tali.

⁶⁹Ka hili ‘eni ‘e nofo ‘a e Fanautama ‘a Tangata ki he nima to‘omata‘u ‘o e māfimafi ‘o e ‘Otua.

⁷⁰Pea nau pehē kotoa pē, ‘Io! pea ko e ‘Alo ‘o e ‘Otua koe? Pea ne pehē kiate kinautolu, Ka na‘e fai; ko au.

⁷¹Pea nau pehē, Koe‘uma‘ā ‘etau toe kumi fakamo‘oni: he kuo tau fanongo kitautolu ki he‘ene lea ‘a‘ana.