Read KO E TOH TAPU KATOA TONGA Luké 23 Bible Online

Luké 23 - KO E TOH TAPU KATOA TONGA bible

Luké 23

¹PEA tu‘u hake ‘a e fakataha kotoa, ‘o nau taki ia kia Pailato.

²Pea nau hanga ‘o talatalaaki‘i ia, ‘o pehē, Na‘a mau ‘ilo ‘a e siana ni ‘oku ne veuveuki homau kakai, mo ne ta‘ofi ‘a e fai tukuhau kia Sisa, mo ne pehē ko Kingi Kalaisi ia.

³Pea fehu‘i ‘e Pailato kiate ia, ‘o ne pehē, Ko koe ko e Tu‘i ‘o e kakai Siu, ‘ō? Pea ne tali ki ai ‘o ne pehē, Ko ia pē ‘oku ke me‘a.

⁴Pea lea ‘a Pailato ki he hou‘eiki taula‘eiki mo e kakai, ‘oku ‘ikai te u ‘ilo ha hala ‘i he tangata ni.

⁵Ka ka faka‘utufī pē kinautolu he‘enau pehē, ‘ā, ‘oku ne o‘i ‘a e kakai, he‘ene faiako ‘i Siutea kātoa, ‘o ne fai mei Kāleli ki heni.

⁶Pea ‘i he fanongo ki ai ‘a Pailato, na‘a ne fehu‘i pe ko e tangata Kāleli ia.

⁷Pea ‘i he‘ene mea‘i ‘oku mei he pule‘anga ‘o Hēlota ia, na‘a ne fekau ke ‘ave ia kia Hēlota, he na‘e ‘i Selusalema mo ia ‘i he taimi ko ia.

⁸Pea ‘i he vakai ‘e Hēlota kia Sīsū, na‘a ne fakamālie lahi: he kuo fuoloa mo ‘ene faka‘amu ke mamata kiate ia, koe‘uhi ko hono fa‘a tala ongo mai; pea kuo ne ‘unaloto ke sio ki ha me‘a fakaofo te ne fai.

⁹Pea na‘e lahi ‘a e ngaahi fehu‘i na‘a ne fai kiate ia; ka ka ‘ikai momo‘i tali ‘e ia ha me‘a.

¹⁰Pea tutu‘u ai ‘a e hou‘eiki taula‘eiki, mo e kau sikalaipe, ‘o nau tōtōivi hono talatalaaki‘i.

¹¹Pea fakasīkaka‘i ia ‘e Hēlota mo va‘inga‘aki, he ‘ai kiate ia ha kofu ngingila, pea kau ai mo ‘ene kau tau; pea ne toki fekau ke toe ‘ave kia Pailato.

¹²Pea na‘e kamata fe‘ofo‘ofani ‘a Pailato mo Hēlota ‘i he ‘aho ko ia: he ne na vākovi mu‘a.

¹³Pea fakataha ‘e Pailato ‘a e hou‘eiki taula‘eiki, mo e kau pule, mo e kakai,

¹⁴pea ne pehē kiate kinautolu, Na‘a mou ‘omi kiate au ‘a e tangata ko eni, ko e toko taha tokua, ‘oku ne taki kehe ‘a e kakai: pea ko eni, ne u ‘eke ‘a e tangata ni ‘i homou ‘ao ‘e au, pea na‘e ‘ikai te u ‘ilo ha‘ane momo‘i hala ‘e taha ‘i he ngaahi me‘a na‘a mou talatalaaki‘i ai ia.

¹⁵Kae‘uma‘ā ‘oku pehē mo Hēlota; he kuo ne fekau ke toe ‘omi ia kiate kitautolu; pea tā ‘oku ‘ikai ha me‘a kuo ne fai ‘oku taau mo e mate.

¹⁶Ko ia, te u ‘ai hano kini pea vete ange.

¹⁷(Pea ka hoko leva te ne vete ange ha pōpula ‘e taha ‘i he kātoanga.)[31]

¹⁸Pea kalanga hake ‘a e fu‘u kakai kātokatoa, ‘o pehē, Tafi‘i ‘a e siana ni, pea vete mai ‘a Palāpasa:

¹⁹(‘a ia ko e toko taha na‘e mo‘ua ‘i he pilīsone, koe‘uhi ko ‘ene kau ‘i ha angatu‘u ne hoko ‘i he olo, mo ‘ene fakapō).

²⁰Pea na‘e toe lea ‘a Pailato kiate kinautolu, ko ‘ene loto ke vete ange ‘a Sīsū.

²¹Ka ka lea ange ‘a kinautolu, ‘o pehē, Kalusefai, kalusefai ia.

²²Pea me‘a ia kiate kinautolu ko hono tu‘o tolu, He ko e hā ha kovi kuo fai ‘e he tangata ni? Kuo ‘ikai te u momo‘i ‘ilo ha‘ane hiamatea: ko ia te u ‘ai hano kini, pea vete ange.

²³Ka ka ta‘omaki atu pē kinautolu, ‘o nau longoa‘a, he‘enau kole ke kalusefai ia.

²⁴Pea na‘e lava‘i ‘e he‘enau longoa‘a. Pea ko e fakamaau ‘a Pailato na‘e fai ki honau loto.

²⁵Pea ne vete ange ‘a e siana na‘a nau kole ki ai, ‘a e siana na‘e lī ki he pilīsone ko ‘ene angatu‘u mo fakapō: ka ko Sīsū na‘a ne tuku atu ke fai honau loto ki ai.

²⁶Pea ‘i he‘enau taki ange ia, na‘a nau puke ‘a Saimone, ko e motu‘a Sailine, ‘i he‘ene ha‘u mei ‘uta, ‘o nau hilifaki kiate ia ‘a e kolosi, ke ne fua atu ia ‘o muimui kia Sīsū.

²⁷Pea na‘e muimui atu ki ai ha fu‘u tokolahi ‘o e kakai, kae‘uma‘ā ha kau fefine, ‘a ia na‘a nau sī fatafata mo ‘oiauē ‘iate ia.

²⁸Ka ka tafoki ‘a Sīsū kiate kinautolu ‘o ne pehē, Si‘i kau fefine Selusalema, ‘oua te mou tangi koe‘uhi ko au, ka mou tangi pē koe‘uhi ko kimoutolu, pea koe‘uhi ko ho‘omou fānau:

²⁹he tala atu, ‘oku tu‘unuku mai ha taimi ‘a ia te nau pehē ai, Monū‘ia ā ka ko e pa‘a, pea mo e manava na‘e ‘ikai fanau, mo e huhu na‘e ‘ikai fai ai ha huhu.

³⁰Ko e taimi ko ia te nau hanga ‘o lea ki he ngaahi mo‘unga, Hinga mai ā kiate kimautolu, pea ki he ngaahi mā‘olunga, Fufū kimautolu.

³¹He kapau ‘oku nau fai pehē ki he ‘akau mata, ko e hā ‘e fai ki he mōmoa!

³²Pea na‘e taki ange mo ia ke tāmate‘i ha ongo angahala kehe ‘e toko ua.

³³Pea ‘i he‘enau a‘u ki he potu ‘oku ui ko Kalevale,[32] na‘a nau kalusefai ‘i ai ia mo e ongo angahala, ko e taha mei to‘omata‘u, mo e taha mei to‘ohema.

³⁴Pea me‘a ‘e Sīsū, ‘Alā Tamai, fakamolemole ‘a kinautolu; he ‘oku ‘ikai te nau ‘ilo ‘a e me‘a ‘oku nau fai.[33] Pea ‘i he tufa hono ngaahi kofu, na‘a nau talotalo ki ai.

³⁵Pea na‘e tu‘u ‘a e kakai ‘o mamata. Pea fingofingo foki ‘a e kau pule, he‘enau pehē, Na‘a ne fakahaofi ‘a e kakai kehe; ‘ē, tuku ke ne fakahaofi ia, ‘o kapau ko e Mīsaia ia ‘a e ‘Otua, ko e toko taha kuo ne fili.

³⁶Pea na‘e luma‘i ia ‘e he kau tau foki, he‘enau ‘unu‘unu atu ‘o ‘ange ha vinika.

³⁷Mo nau pehē, Kapau ko e Tu‘i Siu koe, fakahaofi koe.

³⁸Pea na‘e ai mo ha tohi na‘e ‘ai he ‘ulu‘i kolosi, ‘o pehē,

³⁹Pea ko e toko taha‘i he ongo angahala na‘e tautau na‘a ne tālalakulaku kiate ia, ‘o pehē, ‘Ikai ko e Mīsaia koe? Pe‘i fakahaofi koe mo kimaua.

⁴⁰Ka ka tali ‘a e taha ‘o ne valoki‘i ia, ‘o pehē, Hilinga mo koe ke ke ‘apasia ki he ‘Otua, he ‘oku mo kaungā tautea mo ia.

⁴¹Pea tonuhekina ho‘otaua; he ‘oku ta kai ‘a e nunu‘a ‘o e ngāue na‘a ta fai: ka ko e toko taha ni, kuo ‘ikai ha‘ane momo‘i me‘a ta‘etaau ‘e fai.

⁴²Pea ne pehē, ‘E Sīsū, manatu‘i au, ‘oka ke ka hoko mai kuo ke pule‘anga.

⁴³Pea folofola ‘e ia ki ai, Ko au ē, ‘oku ou tala atu, Ko e ‘aho ni te ke ‘i Palataisi mo au.

⁴⁴Pea ‘i he‘ene fe‘unga nai mo hono ono ‘o e houa, na‘e hoko ha po‘uli ki he fonua kotoa, ‘o a‘u ki hono hiva ‘o e houa.

⁴⁵Pea na‘e fakapo‘uli ‘a e la‘ā, pea na‘e mahae ‘a e loto tatau ‘o e Fale Tapu.

⁴⁶Pea kalanga le‘o lahi ‘a Sīsū, ‘o ne pehē, ‘e Tamai, ‘oku ou tuku hoku laumālie ki ho nima: pea ‘i he‘ene lea pehē na‘a ne hokotaki.

⁴⁷Pea ‘i he vakai ‘e he senituliō ki he me‘a na‘e hoko, na‘a ne fakaongoongolelei‘i ‘a e ‘Otua, he‘ene pehē, Tā ko e mo‘oni pē, ko e tangata ta‘ehalaia ‘eni.

⁴⁸Pea ko e kakai kātoa kuo fakataha ange ke mamata ki he me‘a ko ia, ‘i he‘enau vakai ki he ngaahi me‘a na‘e hoko, na‘a nau sī fatafata, mo nau foki.

⁴⁹Ka na‘e tu‘u mei he mama‘o hono kau fe‘iloaki kotoa pē, mo e kau fefine foki na‘e muimui mai kiate ia mei Kāleli, ‘o nau mamata ki he ngaahi me‘a ko ia.

⁵⁰Pea tā na‘e ai ha matāpule na‘e hingoa ko Siosifa ‘a ia na‘e kau ‘i he falealea; ko e tangata lelei ia mo faitotonu:

⁵¹(ko e taha ‘eni na‘e ‘ikai loto ki he‘enau tu‘utu‘uni mo ‘enau ngāue) ko e matāpule ia mei ‘Alematea, ko e kolo Siu; pea ko e toko taha na‘e nofo ‘amanaki ki he Pule‘anga ‘o e ‘Otua.

⁵²Ko e tangata ni na‘a ne ‘alu kia Pailato, ‘o kole ‘a e sino ‘o Sīsū.

⁵³Pea ne ‘ohifo ia, ‘o teu ‘aki ha tupenu mahu‘inga; ‘o ne telio ‘a Sīsū ‘i ha fonualoto na‘e to‘oliu ‘i he maka, ‘a ia ‘oku te‘eki ‘aupito toka ai ha taha.

⁵⁴Pea ko e ‘aho Tokonaki ia, pea na‘e ofi mai ‘a e tapu.

⁵⁵Pea toupili ‘i mui ha tu‘unga fafine, ko e fa‘ahinga na‘e fononga mo ia mei Kāleli; pea nau vakai ‘a e fonualoto, mo e anga ‘o e fakatoka ‘o hono ‘anga‘anga.

⁵⁶Pea nau foki, ‘o nau tokonaki ‘a e ngaahi fa‘ahinga ahi mo e lolo tākai.