Read KO E TOH TAPU KATOA TONGA Luké 24 Bible Online

Luké 24 - KO E TOH TAPU KATOA TONGA bible

Luké 24

¹PEA lolotonga ‘a e Sāpate na‘a nau mālōlō ‘o hangē ko e tu‘utu‘uni: ka ‘i he ‘uluaki ‘aho ‘o e uike, ‘oku kei hengihengi ‘aupito, na‘a nau ‘alu ki he fonualoto, ‘o ‘ave ‘a e ahi kuo nau teu.

²Pea nau ‘ilo ‘a e maka kuo teka‘i mei he fonualoto.

³Ka ‘i he‘enau hū ki ai, na‘e ‘ikai te nau ‘ilo ‘a e sino ‘o e ‘Eiki ko Sīsū.

⁴Pea lolotonga ‘enau puputu‘u ‘i he me‘a ko ia, pea tā na‘e tu‘u mai kiate kinautolu ha ongo tangata na‘e huhulu hona kofu.

⁵Pea ‘i he‘enau manavahē fu‘u, mo fo‘ohifo ki he kelekele, na‘a na pehē kiate kinautolu, Ko e hā ‘oku mou kumi ai ‘a ia ‘oku mo‘ui ki he kau pekia?

⁶‘Oku ‘ikai te ne ‘i heni, ka kuo toetu‘u: manatu ki he‘ene me‘a kiate kimoutolu ‘i he‘ene kei ‘i Kāleli, ‘o pehē,

⁷Kuo pau ki he Fanautama ‘a Tangata ke tukuange ia ki he kakai angahala, pea ke kalusefai, pea ke toetu‘u ‘i hono ‘aho tolu.

⁸Pea nau manatu ai ki he‘ene ngaahi lea,

⁹pea nau foki mei he fonualoto, ‘o nau tala ‘a e ngaahi me‘a ko ia ki he kau Hongofulu mā taha, pea mo hono toe ‘o e kakai.

¹⁰Pea ko Mele mei Makitala, mo Sioana, mo Mele ko e fa‘ē ‘a Sēmisi, ko kinautolu ia na‘e tala; pea ko hono toe ‘o e kau fefine ‘a ia na‘e kau mo kinautolu, na‘e tala foki ‘e kinautolu ‘a e ngaahi me‘a ko ia ki he kau ‘Aposetolo.

¹¹Ka na‘e hā ‘a e ngaahi lea ko ia kiate kinautolu ‘o hangē ko e muna; pea na‘e ‘ikai te nau tui ki he kau fefine.

¹²Ka na‘e tu‘u ‘a Pita, ‘o ne lele ki he fonualoto, ‘o ne tulolo ‘o sio ko e ngaahi tupenu pē; ‘o ne ‘alu ki ‘api, ‘oku ne ofoofo ‘i he me‘a kuo hoko.[34]

¹³Pea tā ko honau toko ua na‘e fai hona fononga ‘i he ‘aho ko ia ki he vilisi na‘e hingoa ko ‘Emeasi, ko hono mama‘o mo Selusalema ko e maile ‘e fitu nai.

¹⁴Pea na fai‘aki ‘ena talanoa ‘a e ngaahi me‘a kehekehe kuo toki hoko ni.

¹⁵Pea lolotonga ‘ena talanoa mo fe‘eke, mo ‘ene fakaofiofi mai ‘a Sīsū ‘e ia, ‘o ō fakataha mo kinaua.

¹⁶Ka na‘e ta‘ofi hona mata ke ‘oua te na ‘ilo ko ia.

¹⁷Pea ne pehē kiate kinaua, Ko e hā nai ‘a e ngaahi me‘a ‘oku mo fekīhiaki ai ‘i ho‘omo ō ni? Pea na tu‘u ‘oku na fofonga mamahi.

¹⁸Pea tali ‘e he toko taha na‘e hingoa ko Kaliopasi, ‘o ne pehē kiate ia, Tā ko e sola ‘apē koe ‘i Selusalema, ‘o ke nofo toko taha, ‘i ho‘o ta‘e‘ilo ‘a e ngaahi me‘a kuo hoko ‘i he ngaahi ‘aho ko eni.

¹⁹Pea ne pehē kiate kinaua, ‘a e hā koā? Pea na pehē kiate ia, ‘a e ngaahi me‘a ‘oku kau kia Sīsū mei Nāsaleti, ‘a ia ko e tangata palōfita na‘e hā ki he ‘Otua mo e kakai kotoa ‘ene mafai ‘i he ngāue mo e lea:

²⁰‘a hono tukuange foki ‘e he hou‘eiki taula‘eiki, mo e kau pule ‘amautolu, ke fakamāumatea, mo nau kalusefai ia.

²¹Ka ko kimautolu na‘a mau falala tu‘u, ko eni ia ‘oku hapa ke huhu‘i ‘a ‘Isileli.

²²Kae‘uma‘ā ‘eni kotoa pē, ‘oku ne ‘i hono ‘aho tolu talu ‘a e fai ‘o e me‘a ko ia; ‘io, pea fakalele mo‘ui kiate kimautolu ‘e ha ni‘ihi ‘i homau kau fefine, ‘a ia na‘a nau uhu ki he fonualoto;

²³pea ‘i he ‘ikai te nau ‘ilo hono sino, na‘a nau omi ‘o tala kuo nau sio tokua ki ha vīsone, ko ha ongo ‘āngelo ‘a ia na‘a na fakahā ‘oku ne mo‘ui.

²⁴Pea ‘alu ki he fonualoto ha ni‘ihi ‘iate kinautolu ‘oku mau kau, ‘o nau ‘ilo ‘o hangē tofu pē ko e lau ‘a e kau fefine: ka na‘e ‘ikai te nau sio kiate ia.

²⁵Pea toki me‘a ia kiate kinaua, ‘a e kau ta‘eloto, pea tō‘ohi ke tui ki he ngaahi me‘a na‘e lea‘aki ‘e he kau palōfita!

²⁶‘Ikai na‘e pau ke mamahi pehē ‘a e Mīsaia, ka ne hoko ki he‘ene lāngilangi‘ia?

²⁷Pea ne kamata mei he ngaahi tohi ‘a Mōsese, mo e kau Palōfita kātoa pē, ‘o ne faka‘uhinga mei he Tohi tapu kātoa ‘a e ngaahi me‘a na‘e kau kiate ia.

²⁸Pea na‘a nau a‘u ki he vilisi na‘a na fononga ki ai: pea fai ‘e ia ke mole atu.

²⁹Ka ka ta‘ofi tu‘u ia ‘e kinaua, ‘o na pehē, Afe mai ā mo kimaua: he kuo efiafi ‘eni, pea kuo pale ‘aupito ‘a e la‘ā. Pea ne hū ki he vilisi ke nofo mo kinaua.

³⁰Pea ‘iloange, ‘i he‘ene tokoto mo kinaua ‘i he kai, na‘a ne to‘o ‘a e mā, ‘o ne fai ha tāpuaki, ‘o ne pakipaki ‘o ‘atu kiate kinaua.

³¹Pea ‘ā ai hona mata, ‘o na ‘ilo tā ko IA; ka ka puli leva ia, ‘o ne mole meiate kinaua.

³²Pea na fepehē‘aki, Hono ‘ikai ne vela hota loto lolotonga ‘ene talanoa mai ‘i he hala, mo ‘ene vete kiate kitaua ‘a e Tohitapu!

³³Pea na tu‘u hake ‘i he houa pē ko ia, ‘o na foki ki Selusalema; pea ‘i he‘ena a‘u, tā kuo fakatahataha ‘a e kau Hongofulu mā taha mo kinautolu na‘a nau kau.

³⁴Pea nau pehē mai, Kuo toetu‘u mo‘oni ‘a e ‘Eiki, pea kuo hā kia Saimone.

³⁵Pea fakamatala mo kinaua ‘a e me‘a na‘e hoko ‘i he hala, pea mo hono ‘iloa ‘e kinaua ‘i he pakipaki ‘o e mā.

³⁶Pea lolotonga ‘enau talanoa pehē mo ‘ene tu‘u ‘e ia ‘i honau lotolotonga, ‘o ne pehē kiate kinautolu, Si‘oto ‘ofa atu![35]

³⁷Pea nau lilika mo manavahē tu‘u, ko ‘enau mahalo ko ha fa‘ahikehe ‘oku nau sio ki ai.

³⁸Pea ne pehē kiate kinautolu, Ko e hā ‘oku mou puputu‘u ai? pea ko e hā ‘oku ake ai ‘a e ngaahi fifili pehē ‘i homou loto?

³⁹Vakai mai ki hoku ongo nima ni, mo hoku va‘e, ko au mo‘oni ia: fāfā au ‘o ‘ilo; he ‘oku ‘ikai kakano mo hui ha fa‘ahikehe, ‘o hangē ko ia ‘oku mou sio ai ‘iate au.

⁴⁰Pea ‘i he‘ene lea pehē, na‘a ne faka‘ali‘ali kiate kinautolu hono ongo nima mo e va‘e.[36]

⁴¹Pea ‘i he‘enau kei tuingata‘a, koe‘uhi ko ‘enau fiefia mo ofoofo, na‘a ne toe pehē kiate kinautolu, ‘oku ai ha‘amou me‘akai heni?

⁴²Pea nau ‘ange ki ai ha konga ika tunu.

⁴³Pea ne to‘o ia, ‘o kai ‘i honau ‘ao.

⁴⁴Pea ne pehē kiate kinautolu, Ko ‘eku ngaahi lea ē na‘a ku fai kiate kimoutolu ‘i he‘eku kei nofo mo kimoutolu, ‘o pehē, Kuo pau ke hoko ‘a e ngaahi me‘a kotoa pē kuo tohi kiate au ‘i he Lao ‘a Mōsese, mo e Tohi Palōfita, mo e Tohi Saame.

⁴⁵Pea ne toki tatala honau loto ke nau ‘ilo hono ‘uhinga ‘o e Tohitapu;

⁴⁶‘o ne folofola kiate kinautolu, Na‘e pehē pē hono tohi, ‘e feia ‘a e Mīsaia, pea te ne toetu‘u mei he pekia ‘i hono ‘aho tolu:

⁴⁷pea ‘e malanga‘aki ‘i hono hingoa ‘a e fakatomala mo e fakamolemole angahala ki he kakai kotoa pē, ‘o kamata mei Selusalema.

⁴⁸Ko kimoutolu ko e kau fakamo‘oni ki he ngaahi me‘a ni.

⁴⁹Pea ko au ‘eni ‘oku ou tuku atu ‘a e tala‘ofa ‘a ‘eku ‘eiki kiate kimoutolu: pea ko kimoutolu te mou nofo ‘i Kolo, kae‘oua ke fakakofu ‘aki kimoutolu ha mālohi mei ‘olunga.

⁵⁰Pea ne taki atu kinautolu ‘o a‘u ki. Pētani; pea ne mafao atu hono ongo nima kiate kinautolu, ‘o ne tāpuaki‘i kinautolu.

⁵¹Pea ‘iloange, lolotonga ‘ene tāpuaki‘i kinautolu, ne mavahe ia meiate kinautolu, ‘o tukutuku hake ki he langi.[37]

⁵²Pea ko kinautolu, na‘a nau hū kiate ia, ‘o nau foki ki Selusalema ‘oku nau fiefia ‘aupito.

⁵³Pea na‘a nau ma‘unganofo ki he Temipale he‘enau fakamālō‘ia ‘a e ‘Otua.