Read KO E TOH TAPU KATOA TONGA Luké 3 Bible Online

Luké 3 - KO E TOH TAPU KATOA TONGA bible

Luké 3

¹TOKUA ‘i hono hongofulu mā nima ta‘u ‘o e pule ‘a Taipiliō ko e Sisa, pea lolotonga ‘a e kōvana ‘a Ponitō Pailato ‘i Siutea, pea tu‘i ‘a Hēlota ‘i Kāleli, mo hono tehina ko Filipe ‘i ‘Aitulia mo e feitu‘u ko Telakonaitisi, pea tu‘i ‘a Lisaniasi ‘i ‘Apiline,

²pea Taula‘eiki Lahi ‘a ‘ānasi mo Kaiafasi — ko e kuonga ia na‘e hoko ai ‘a e folofola ‘a e ‘Otua kia Sione ko e foha ‘o Sākalaia ‘i he toafa.

³Pea ‘alu ia ki he feitu‘u kotoa ‘o Soatani, ‘o ne malanga ‘aki ‘a e papitaiso fakatomala ki he fakamolemole angahala:

⁴‘o hangē ko ia kuo tohi ‘i he puka ‘o e ngaahi lea ‘a ‘Aisea ko e palōfita, Ko e le‘o ‘o ha toko taha ‘oku kalanga he toafa, Mou teuteu ‘a e hā‘ele‘anga ‘o Sihova; Fakatonutonu hono ngaahi hala.

⁵‘Ilonga ha tele‘a pea ‘e tanu, Pea ‘ilonga ha mo‘unga pe tafungofunga ‘e holoki; Pea ‘e ngaohi ‘a e pikopiko ke totonu, Mo e tokatāmaki ke tokamālie.

⁶Pea ‘e mamata ‘e he kakano kotoa ki he fakamo‘ui‘anga ‘a e ‘Otua.

⁷Pea toki lea ia ki he ngaahi fu‘u kakai na‘e fononga mai ke papitaiso ‘iate ia, ‘o ne pehē, ‘A e hako‘i ngata fekai, ko hai ne fale‘i kimoutolu ke hola mei he houhau ‘oku tu‘unuku mai?

⁸Kapau ko ia, pea mou fua ‘o taau mo ha kau fakatomala; pea ‘oua te mou kamata fuataki ‘i homou loto, ‘o pehē, Ko ‘Epalahame ‘a ‘emau tamai; he ‘oku ou tala atu, ‘oku mafai ‘e he ‘Otua ke fokotu‘u mei he ngaahi maka ni ha fānau kia ‘Epalahame.

⁹Kae‘uma‘ā ‘oku lolotonga tu‘u ni ‘a e toki ‘i he tefito ‘o e ngaahi ‘akau: ko ia, ‘ilonga ha ‘akau ‘oku ‘ikai fua lelei ‘oku tā ‘o laku ki he afi.

¹⁰Pea fa‘a fehu‘i kiate ia ‘e he ngaahi kakai, ‘o nau pehē, pea ko e hā te mau fai?

¹¹Pea tali ‘e ia kiate kinautolu, ‘o ne pehē, ‘Ilonga ha toko taha ‘oku ua hono sote, ke ne vaeua mo ha taha ‘oku ‘ikai: pea ‘ilonga ha ma‘u me‘akai, ke ne fai pehē foki.

¹²Pea ha‘u foki ha kau tānaki tukuhau ke papitaiso, ‘o nau pehē kiate ia, Tangata‘eiki, ko e hā te mau fai?

¹³Pea ne pehē kiate kinautolu, ‘oua na‘a mou ‘eke ‘o fakamahili ‘i he me‘a kuo tu‘utu‘uni kiate kimoutolu.

¹⁴Pea fehu‘i kiate ia mo ha kau tau, ‘o nau pehē, Ko e hā te mau fai ‘e kimautolu foki? Pea ne pehē ki ai, ‘Oua te mou fakamālohi ha taha; pea ‘oua na‘a fasitu‘u‘i; pea mou fiemālie ‘i he tokonaki ‘oku ‘atu.

¹⁵Pea ‘i he fakanganga ‘a e kakai, mo nau fifili kotoa pē ‘i honau loto kia Sione, na‘a ko e Mīsaia ia:

¹⁶pea toe lea ‘a Sione kiate kinautolu kotoa, ‘o pehē, Ko au ‘oku ou papitaiso kimoutolu ‘aki ‘a e vai: ka ‘oku ha‘u ha toko taha ‘oku mālohi ‘iate au, ko e toko taha ‘oku ‘ikai te u taau ke vete ‘a e nono‘o ‘o hono topuva‘e: te ne papitaiso kimoutolu ‘e ia ‘i he Laumālie Mā‘oni‘oni mo e afi.

¹⁷Ko e toko taha ia ‘oku ‘i hono nima ‘a e ī, pea te ne tapili ke ‘osi ‘ene ‘au‘au‘anga; pea te ne tānaki ‘a e ngaahi fo‘i uite ki hono feleoko; ka te ne tutu ‘a e kafukafu ‘aki ‘a e afi ‘oku ‘ikai matāmate‘i.

¹⁸Na‘e lahi mo e ngaahi tala mālie, ‘o taha kehe mo eni, na‘a ne fai‘aki ‘i he‘ene tokoni ki he kakai.

¹⁹Ka na‘a ne valokia ‘a Hēlota, pea na‘e touia ‘a e loto ‘o e Tu‘i, koe‘uhi ko Helotiasi ko e uaifi ‘o hono tehina, pea koe‘uhi ko e ngaahi kovi kehekehe ne fai ‘e Hēlota:

²⁰pea na‘a ne kanoni ‘aki ia kotoa ‘a e me‘a ni foki, ‘ene lī ‘a Sione ki he pilīsone.

²¹Pea ‘i he ‘osi papitaiso ‘a e kakai, pea kuo papitaiso mo Sīsū foki, pea ‘oku ne fai ‘ene hū, ‘iloange na‘e matangaki ‘a e langi,

²²pea ‘alu hifo kiate ia ‘a e Laumālie Mā‘oni‘oni, ‘i ha sino na‘e tatau mo ha lupe; pea na‘e ai ha le‘o mei he langi na‘e pehē mai, Ko hoku ‘alo Pele koe, ko koe kuo u hōifua ai.

²³Pea ko Sīsū na‘e fe‘unga nai ia mo e tolungofulu ta‘u ‘i he‘ene kamata ngāue; pea na‘e lau ko e foha ia ‘o Siosifa, ‘a ia ko e foha ‘o Hēlai.

²⁴‘A ia ko e foha ‘o Mātati, ‘A ia ko e foha ‘o Līvai, ‘A ia ko e foha ‘o Melikai, ‘A ia ko e foha ‘o Sianai, ‘A ia ko e foha ‘o Siosifa.

²⁵‘A ia ko e foha ‘o Matataiasi, ‘A ia ko e foha ‘o ‘ēmosi, ‘A ia ko e foha ‘o Nēhumi, ‘A ia ko e foha ‘o ‘Esilai, ‘A ia ko e foha ‘o Nākai.

²⁶‘A ia ko e foha ‘o Mā‘ati, ‘A ia ko e foha ‘o Matataiasi, ‘A ia ko e foha ‘o Semaini, ‘A ia ko e foha ‘o Sioseki, ‘A ia ko e foha ‘o Siota.

²⁷‘A ia ko e foha ‘o Sioanani, ‘A ia ko e foha ‘o Lesa, ‘A ia ko e foha ‘o Seluipepeli, ‘A ia ko e foha ‘o Saletili, ‘A ia ko e foha ‘o Nēlai.

²⁸‘A ia ko e foha ‘o Melikai, ‘A ia ko e foha ‘o ‘ātai, ‘A ia ko e foha ‘o Kōsame, ‘A ia ko e foha ‘o ‘ēlimatami, ‘A ia ko e foha ‘o ‘Ea.

²⁹‘A ia ko e foha ‘o Sīsū, ‘A ia ko e foha ‘o ‘Eliesa, ‘A ia ko e foha ‘o Siolimi, ‘A ia ko e foha ‘o Mātati, ‘A ia ko e foha ‘o Līvai.

³⁰‘A ia ko e foha ‘o Simione, ‘A ia ko e foha ‘o Siuta, ‘A ia ko e foha ‘o Siosifa, ‘A ia ko e foha ‘o Sionami, ‘A ia ko e foha ‘o ‘Īlaiakimi.

³¹‘A ia ko e foha ‘o Melea, ‘A ia ko e foha ‘o Mena, ‘A ia ko e foha ‘o Mātata, ‘A ia ko e foha ‘o Nētani, ‘A ia ko e foha ‘o Tēvita.

³²‘A ia ko e foha ‘o Sese, ‘A ia ko e foha ‘o ‘ōpeti, ‘A ia ko e foha ‘o Poasi, ‘A ia ko e foha ‘o Solomone, ‘A ia ko e foha ‘o Na‘asoni.

³³‘A ia ko e foha ‘o ‘Aminatape, ‘A ia ko e foha ‘o ‘Atamaini, ‘A ia ko e foha ‘o ‘Alanai, ‘A ia ko e foha ‘o ‘Esilome, ‘A ia ko e foha ‘o Felesi, ‘A ia ko e foha ‘o Siuta.

³⁴‘A ia ko e foha ‘o Sēkope, ‘A ia ko e foha ‘o ‘Aisake, ‘A ia ko e foha ‘o ‘Epalahame, ‘A ia ko e foha ‘o Tela, ‘A ia ko e foha ‘o Nēhoa.

³⁵‘A ia ko e foha ‘o Sēluki, ‘A ia ko e foha ‘o Le‘u, ‘A ia ko e foha ‘o Pēleki, ‘A ia ko e foha ‘o Hepelū, ‘A ia ko e foha ‘o Sela.

³⁶‘A ia ko e foha ‘o Kēnani, ‘A ia ko e foha ‘o ‘Aafakisate, ‘A ia ko e foha ‘o Semi, ‘A ia ko e foha ‘o Noa, ‘A ia ko e foha ‘o Lēmeki.

³⁷‘A ia ko e foha ‘o Mētuisela, ‘A ia ko e foha ‘o ‘Īnoke, ‘A ia ko e foha ‘o Sēleti, ‘A ia ko e foha ‘o Melilieli, ‘A ia ko e foha ‘o Kēnani.

³⁸‘A ia ko e foha ‘o ‘Īnosi, ‘A ia ko e foha ‘o Seti, ‘A ia ko e foha ‘o ‘ātama, ‘A ia ko e foha ‘o e ‘OTUA.