Read KO E TOH TAPU KATOA TONGA Luké 4 Bible Online

Luké 4 - KO E TOH TAPU KATOA TONGA bible

Luké 4

¹PEA na‘e foki mai ‘a Sīsū mei Soatani kuo fonu ‘i he Laumālie Mā‘oni‘oni; pea tākiekina fano ia ‘i he toafa ‘i he mālohi ‘o e Laumālie.

²Pea ‘ahi‘ahi‘i ia ‘e he Tēvolo ‘i he ‘aho ‘e fāngofulu: pea ko e ngaahi ‘aho ko ia na‘e ‘ikai te ne kai ai ha me‘a; pea hili ia na‘a ne hālofia.

³Pea pehē ‘e he Tēvolo kiate ia, Kapau ko e ‘Alo koe ‘o e ‘Otua, fekau ki he fo‘i maka ni ke hoko ko e fo‘i mā.

⁴Pea tali 'e Sīsū kiate ia, 'o pehē, Kuo tohi, 'Oku 'ikai mo'ui 'a e tangata 'i he mā pē.

⁵Pea ne ‘ohake ia ki ha potu mā‘olunga, ‘o ne faka‘ali‘ali ki ai ‘a e ngaahi pule‘anga kotoa pē ‘o māmani ‘i ha kemo pē taha.

⁶Pea pehē kiate ia ‘e he Tēvolo, Te u foaki kiate koe ‘a e pule ki he ngaahi me‘a ni kotoa, mo hono nāunau: he kuo tuku ia kiate au; pea ‘ilonga ha taha ‘oku ou loto ki ai ‘oku ou foaki ia ki ai:

⁷ko ia, kapau te ke punou ‘o lotu kiate au ‘e koe, ‘e ‘o‘ou kotoa.

⁸Ka ka tali ‘e Sīsū ‘o ne pehē kiate ia, Kuo tohi, Te ke lotu ki he ‘Eiki ko ho ‘Otua, pea ko ia pē toko taha te ke ‘Otua‘aki.

⁹Pea ne ‘ave ia ki Selusalema, ‘o ne fokotu‘u ki he tu‘ahivi ‘o e Temipale, ‘o ne pehē ki ai, Kapau ko e ‘Alo koe ‘o e ‘Otua, hopo ki lalo mei heni.

¹⁰He kuo tohi, He ‘e kouna ‘e ia ‘ene kau ‘āngelo ke vakavakai koe;

¹¹mo ‘eni foki, Te nau fatakinima koe, na‘a pākia ho va‘e ‘i ha maka.

¹²Pea tali ‘e Sīsū ‘o ne pehē ki ai, Kuo folofola‘aki, ‘e ‘ikai te ke ha‘aki ‘ahi‘ahi‘i ‘a e ‘Eiki ko ho ‘Otua.

¹³Pea kuo faka‘osi ‘e he Tēvolo ‘a e ‘ahi‘ahi kotoa pē, pea ne ‘alu meiate ia ‘o tali faingamālie.

¹⁴Pea na‘e foki ‘a Sīsū ki Kāleli ‘i he ivi ‘o e Laumālie, pea pavake atu hono ongoongo ki he feitu‘u ko ia kātoa.

¹⁵Pea na‘a ne fa‘a faiako ‘i honau ngaahi falelotu, pea fakamālō kiate ia ‘e he kakai kotoa pē.

¹⁶Pea ‘alu ia ki Nāsaleti, ‘a ia na‘a ne nofo ai ‘i he‘ene si‘i: pea hangē ko ‘ene fa‘a fai, na‘a ne hū ki he falelotu ‘i he ‘aho Sāpate, ‘o ne tu‘u hake ke lau folofola.

¹⁷Pea na‘e ‘ange kiate ia ‘a e Puka ‘a e Palōfita ko ‘Aisea.

¹⁸Pea ‘i he‘ene folahi ‘a e puka, na‘a ne ‘ilo ‘a e potu ‘a ia ‘oku tohi ai ‘a e lea ni, Ko e Laumālie ‘o e ‘Eiki ‘oku ‘iate au; he na‘a ne pani au ke u ‘alu mo e ongoongolelei ki he masiva:

¹⁹kuo ne fekau au ke fanongonongo ‘a e tukuange ki he pōpula, mo e ‘ā ki he kui; ke fekau ‘a e ta‘eliekina ke ‘alu kuo tau‘atāina; ke fanongonongo ‘a e ta‘u ‘o e hōifua ‘a e ‘Eiki.

²⁰Pea ne takai ‘a e tohi, ‘o ‘ange ki he motu‘a tauhi, ‘o ne nofo ke malanga; pea sio fakamama‘u kiate ia ‘a e mata ‘o kinautolu kotoa pē na‘e ‘i he falelotu.

²¹Pea ne kamata lea kiate kinautolu, ‘o pehē, Ko e ‘aho ni kuo fakamo‘oni ‘a e potu folofola ni ‘i ho‘omou fanongo.

²²Pea nau fakamo‘oni ki ai kotoa pē; ‘o nau ofo ‘i he ngaahi lea mālie na‘e tō mei hono fofonga, mo nau pehē, ‘ikai ko e foha ‘eni ‘o Siosifa?

²³Pea pehē ‘e ia kiate kinautolu, Kuo pau te mou ‘ai kiate au ‘a e lea ko eni, Faito‘o, fakamo‘ui koe; ko e ngaahi me‘a na‘a mau fanongo ne fai ‘i Kāpaneume, fai foki ‘i heni ‘i ho fonua ‘o‘ou.

²⁴Pea ne fai atu ‘o pehē, Ko au ē, ‘oku ou tala kiate kimoutolu, ‘oku ‘ikai mamalu ha palōfita ‘i hono fonua ‘o‘ona.

²⁵‘Oku mou lāu‘ilo ‘a e me‘a ‘oku ou tala, Na‘e tokolahi ‘a e kau fefine ‘Isileli na‘e uitou ‘i he kuonga ‘o ‘Ilaisiā — ‘a e taimi na‘e tāpuni ai ‘a e langi ‘i he ta‘u ‘e tolu mo e māhina ‘e ono, pea hoko ai ha fu‘u honge ki he fonua kotoa-

²⁶ka tala‘ehai na‘e kouna ‘a ‘Ilaisiā ki ha taha ‘iate kinautolu; ka ki ha fefine uitou pē ‘i Salepita, ‘i he fonua ‘o Saitoni.

²⁷Pea na‘e tokolahi ‘a e tangata ‘Isileli na‘e kilia ‘i he kuonga ‘o e palōfita ko ‘Ilaisa; ka tala‘ehai na‘e fakama‘a ha taha ‘iate kinautolu, ka ko Neamani pē, ‘a ia ko e tangata Sīlia.

²⁸Pea ko kinautolu kotoa pē na‘e ‘i he falelotu, na‘a nau mātu‘aki lili he‘enau fanongo ki he ngaahi me‘a ko ia;

²⁹‘o nau tutu‘u, ‘o kapusi ia kitu‘a kolo, ‘o nau taki ia ki ha lilifa ‘i he mo‘unga na‘e tu‘u ai ‘enau kolo, koe‘uhi ke lī hifo ia.

³⁰Ka ka moulu mai ia ‘i he lotolotonga ‘o e kakai, ‘o ‘alu:

³¹‘o ne hifo ki Kāpaneume, ko e kolo ‘i Kāleli; pea na‘a ne nofo ai ‘o faiako kiate kinautolu he Sāpate.

³²Pea nau to‘oa ‘i he anga ‘o ‘ene fai; he ko ‘ene fakamatala na‘e ngali ko ha pule ia.

³³Pea na‘e ‘i he falelotu ha tangata na‘e ‘āvea ‘e ha fa‘ahikehe; pea na‘a ne kalanga le‘o lahi, ‘o pehē, Tuku ā! ko ho hā kimaua, ‘e Sīsū ‘o Nāsaleti?

³⁴Kuo ke ha‘u ke faka‘auha kimaua? ‘Oku ou ‘ilo koe, ko e Toko Taha Tapu ‘o e ‘Otua.

³⁵Pea lolomi ia ‘e Sīsū, ‘o ne pehē, Tuku ho‘o lea, pea mahu‘i mai meiate ia. Pea pe‘ehi ‘a e tangata ‘e he fa‘ahikehe ki he lotofale, ‘o ne toki mahu‘i atu: ka na‘e ‘ikai lavea ‘a e tangata.

³⁶Pea nau fu‘u ofo ai kotoa pē; ‘o nau fealēlea‘aki ‘o pehē, Ko e folofola hā ‘eni! he ‘oku ne kouna ‘a e ngaahi fa‘ahikehe, ‘o ngali ko ha pule mo ha mālohi, pea nau mahu‘i atu.

³⁷Pea pavake atu hono ongoongo ki he potu kotoa pē ‘o e feitu‘u ko ia.

³⁸Pea ‘i he‘ene tu‘u atu mei he falelotu na‘a ne hū ki he fale ‘o Saimone: pea na‘e ‘i ai ‘a e fa‘ē ‘a e uaifi ‘o Saimone kuo puke ‘i he fa‘ahinga mofi lahi: pea nau kole kiate ia koe‘uhi ko ia.

³⁹Pea tu‘u atu ia ‘o hanga hifo ki ai, ‘o ne lolomi ‘a e mofi; pea mahu‘i ia mei he fefine, pea ne tu‘u leva ‘o tauhi kinautolu.

⁴⁰Pea ‘i he kamata tō ‘a e la‘ā, ‘ilonga kinautolu na‘e ai ha‘anau kakai na‘e puke ‘i he fa‘ahinga mahaki kehekehe, na‘a nau ‘omi kinautolu kiate ia: pea ne kamata fakamo‘ui kinautolu, he‘ene hilifaki hono nima kiate kinautolu tāutaha.

⁴¹Pea ‘alu atu foki ‘a e ngaahi fa‘ahikehe mei he ni‘ihi, ‘oku nau kalanga ‘o pehē, Ko koe ko e ‘Alo ‘o e ‘Otua: ka ka lolomi ‘e ia, ‘o ‘ikai te ne tuku ke nau lea; koe‘uhi na‘a nau ‘ilo ko e Mīsaia ia.

⁴²Pea kuo ‘aho, pea ‘alu ia kitua‘ā ‘o mole ki ha potu lala; pea fiema‘u ia ‘e ha fu‘u kakai, ‘o nau ‘alu kiate ia, ‘o nau fai ke ta‘ofi ke ‘oua na‘a ne ‘alu meiate kinautolu.

⁴³Ka ka tali ‘e ia kiate kinautolu, Kuo pau ke u ‘ave ‘a e ongoongolelei ki he ngaahi kolo kehe foki, ‘o tala ‘a e Pule‘anga ‘o e ‘Otua; he na‘e fekau mai au ki he me‘a ko ia.

⁴⁴Pea na‘a ne malanga ‘i he ngaahi falelotu ‘o Siutea.