Read KO E TOH TAPU KATOA TONGA Luké 5 Bible Online

Luké 5 - KO E TOH TAPU KATOA TONGA bible

Luké 5

¹PEA ko e ‘aho ‘e taha na‘e feta‘ota‘omi mai kiate ia ha fu‘u kakai, mo nau fakafanongo ki he folofola ‘a e ‘Otua, pea ‘oku tu‘u ‘a Sīsū ‘i he mata anovai ko Kenesaleti:

²‘iloange na‘a ne vakai ha ongo ki‘i vaka ‘oku tau ‘i he mata ano, pea kuo ‘alu mei ai ‘a e kau toutai, ‘o fō honau ngaahi kupenga.

³Pea heka ia ki ha taha ‘o e ongo vaka, ‘a ia ko e vaka ‘o Saimone; pea ne kole kiate ia ke tukutuku si‘i atu mei ‘uta: pea ne nofo hifo ‘o fai ‘ene ako ki he kakai mei he vaka.

⁴Pea kuo ‘osi ‘ene lea, na‘a ne pehē kia Saimone, Tuku atu ki he moana, pea ‘a‘au homou ngaahi kupenga ki ha ika.

⁵Pea tali ‘e Saimone ‘o ne pehē ki ai, ‘ēī, ko e pō kātoa mo ‘emau ngangau, ‘o ‘ikai ma‘u ha mata‘i ika: ka ‘i ho‘o me‘a te u ‘a‘au pē ‘a e kupenga.

⁶Pea ‘i he‘enau fai ia, na‘a nau ha‘o ha fu‘u tākanga ika, pea kamata mahae honau ngaahi kupenga.

⁷Pea nau ta‘alo ki honau kaungā toutai ‘i he vaka ‘e taha ke ha‘u ‘o tokoni kinautolu, pea nau ha‘u, ‘o nau fakafonu ‘a e ongo vaka fakatou‘osi, ‘o na kamata ngoto.

⁸Pea ‘i he sio ki ai ‘a Saimone Pita, na‘a ne hinga atu ki he tui ‘o Sīsū, ‘o ne pehē, Me‘a atu, ‘Eiki, mei hoku vaka, he ko e tangata angahala au.

⁹He na‘a ne mo‘utāfu‘ua, pea pehē mo kinautolu na‘e ‘iate ia, ‘i he ola ‘o ‘enau ha‘o:

¹⁰pea pehē foki ‘a Sēmisi mo Sione ko e ongo foha ‘o Sēpeti, ‘a ia na‘e kaume‘a mo Saimone. Pea tali ‘e Sīsū kia Saimone, ‘oua ‘e manavahē; mei he taimi ni te ke pō tangata.

¹¹Pea kuo nau ‘omi ‘a e ongo vaka ki ‘uta, na‘a nau li‘aki kotoa pē ‘o muimui kiate ia.

¹²Pea ko e ‘aho ‘e taha na‘a ne ‘i ha kolo, pea ‘iloange, ko ha tangata kilia hoko; pea ‘i he‘ene sio kia Sīsū, na‘a ne fakatōmape‘e atu ‘o ne hū kiate ia, ‘o pehē, ‘Eiki, ka ne ke loto ke fai, te ke lava ke fakama‘a au.[5]

¹³Pea mafao atu ‘e ia hono nima, ‘o ala ki he tangata, ‘o ne pehē, ‘oku ou loto pē: ke ke ma‘a koe. Pea matafi atu leva ‘a e kilia meiate ia.

¹⁴Pea ne na‘ina‘i ki he tangata ke ‘oua te ne lea ki ha taha; mo ne pehē, Ka ke hanga ‘alu pē ke fakahā koe ki he taula‘eiki, pea ‘ange ‘a e me‘a ‘o fakatatau ki he tu‘utu‘uni ‘a Mōsese mo‘ao fakama‘a, kōno fakamo‘oni kiate kinautolu.

¹⁵Ka na‘e ‘āsili mafola ai ‘a e talanoa kiate ia; pea fa‘a fakataha ‘a e ngaahi fu‘u kakai ke fanongo kiate ia, pea ke fakamo‘ui mei honau ngaahi alangamahaki.

¹⁶Ka ka taka vao pē ia ‘i he ngaahi toafa, ‘o ne toutou fai ‘ene lotu.

¹⁷Pea ko e ‘aho ‘e taha ‘oku ne faiako, pea ‘oku ‘i he ha‘oha‘onga ha kau Fālesi mo ha kau Faiako-‘i-he-Lao, ‘a ia kuo nau omi mei he ngaahi feitu‘u kehekehe ‘o Kāleli mo Siutea mo Selusalema: pea ko e mālohi ‘o e ‘Eiki na‘e toka ki he faito‘o.

¹⁸Pea ‘iloange, ko e kau siana ‘oku nau lupe‘i mai ‘i ha mohenga ha tangata na‘e mamatea: ‘o nau feinga ke laoaki ia ki loto ke tuku ‘i he ‘ao ‘o Sīsū.

¹⁹Pea ‘i he ‘ikai te nau ‘ilo pe ko e hala fē te nau fakahū ai ia, koe‘uhi ko e tokolahi ‘o e kakai, na‘a nau ‘alu hake ki he tu‘a fale, ‘o nau tuku hifo ia mo e fala ‘i he ‘ato ki he loto fale ki he ‘ao ‘o Sīsū.

²⁰Pea ‘i he‘ene vakai ‘enau tui, na‘a ne pehē, Tangata, kuo fakamolemole ho‘o ngaahi angahala.

²¹Pea kamata fifili ‘a e kau sikalaipe mo e kau Fālesi, ‘o pehē, Ko hai ‘a e siana ni ‘oku lea fie‘otua? Ko hai ha taha ‘oku ne mafai ke fakamolemole angahala, ka ko e ‘Otua pē toko taha?

²²Ka ka ‘ilo pē ‘e Sīsū ‘enau fakakaukau, ‘o ne toe lea ‘o pehē kiate kinautolu, Ko e hā ia ‘oku mou fifili ki ai ‘i homou loto?

²³Ko e fē ‘oku faingofua; ‘a e pehē, Kuo fakamolemole ho‘o ngaahi angahala: pe ko e pehē, Tu‘u ‘o ‘eve‘eva?

²⁴Ka koe‘uhi ke mou ‘ilo, ko e Fanautama ‘a Tangata ‘oku ne mafai ‘i māmani ke fakamolemole angahala, (pea hanga ia ‘o lea ki he tangata mamatea) ‘oku ou tala kiate koe, Tu‘u, pea to‘o ho fala, pea ‘alu ki ho ‘api.

²⁵Pea tu‘u hake leva ia ‘i honau ‘ao, ‘o ne to‘o ‘a e me‘a na‘a ne tokoto ai, ‘o ne ‘alu atu ki hono ‘api, mo ne fakamālō‘ia ‘a e ‘Otua.

²⁶Pea lelea honau loto kotoa pē, ‘o nau fakamālō‘ia ‘a e ‘Otua, pea nau mate ilifia, mo nau pehē, Kuo tau mata me‘a fakato‘ufeiva he ‘aho ni.

²⁷Pea hili ia na‘a ne ‘alu atu, ‘o ne kilofi ha pōpilikane na‘e hingoa ko Līvai, ‘oku nofo ‘i he fale tute; ‘o ne pehē kiate ia, muimui kiate au.

²⁸Pea ne tuku kotoa pē, ‘o ne tu‘u ‘o muimui kiate ia.

²⁹Pea fai ‘e Līvai ha fu‘u kātoanga kia Sīsū ‘i hono fale; pea ko e fu‘u tokolahi ‘o e kau pōpilikane mo e kakai kehe na‘e ‘i he kātoanga mo kinautolu.

³⁰Pea lāutu‘u ‘a e kau Fālesi mo e kau sikalaipe ‘onautolu ki he‘ene kau ako, he‘enau pehē, Ko e hā ‘oku mou kai mo inu fakataha ai mo e kau pōpilikane mo e kau angahala?

³¹Pea tali ‘e Sīsū ‘o ne pehē kiate kinautolu, Ko e tangata faito‘o ‘oku ‘ikai ma‘a e mo‘ui lelei, ka ma‘a e mahaki.

³²Na‘e‘ikai te u ha‘u ke ui ‘a e mā‘oni‘oni ki he fakatomala, ka ko e angahala.

³³Pea nau pehē kiate ia, Ko e hā ‘oku fa‘a ‘aukai ai ‘a e kau ako ‘a Sione, mo nau tauhi ‘a e ngaahi feingalotu; pehē foki ‘a e kau ako ‘a e kau Fālesi: ka ka kai pē, mo inu pē, ‘a kinautolu ‘oku ‘iate koe?

³⁴Pea tali ‘e Sīsū kiate kinautolu, He te mou lava hono fakaloto‘i ‘o e kakai ‘o e fale ta‘ane ke fai ha ‘aukai, ‘i he kei ‘iate kinautolu ‘a e tangata ta‘ane?

³⁵Kae tokaange ha taimi ‘e hiki meiate kinautolu ‘a e tangata ta‘ane, pea te nau toki ‘aukai ‘i he taimi ko ia.

³⁶Pea ne lea‘aki foki ha fakatātā kiate kinautolu, ‘o pehē: ‘oku ‘ikai ha taha te ne hae‘i mei ha kofu fo‘ou ha konga ke ‘oposi ‘aki ha kofu motu‘a: he ka pehē, ko e fo‘ou kuo mahae, pea ko e motu‘a ‘oku ‘ikai tu‘o tatau mo ia ‘a e konga mei he kofu fo‘ou.

³⁷Pea ‘oku ‘ikai ha taha te ne ‘utu ha uaine fo‘ou ki he ngaahi hina leta ‘oku motu‘a; he ka pehē, ‘e hae ‘a e ngaahi hina ‘e he uaine fo‘ou, pea mahua ai ‘a e uaine ia, pea maumau mo e ngaahi hina.

³⁸Ka ko hono taau ke ‘utu ha uaine fo‘ou ki ha ngaahi hina fo‘ou.

³⁹Pea ‘oku ‘ikai ha taha kuo ne inu ‘a e uaine motu‘a pea manako ki he fo‘ou; he ‘oku ne pehē, Ko e uaine motu‘a pē ‘oku sai.