Read KO E TOH TAPU KATOA TONGA KO TEUTALŌNOME 10 Bible Online

KO TEUTALŌNOME 10 - KO E TOH TAPU KATOA TONGA bible

KO TEUTALŌNOME 10

¹‘I he taimi ko ia na‘e folofola mai ‘a Sihova kiate au, Ke ke tā ha‘o ongo lau‘i maka ‘o hangē ko e ‘uluaki, pea ‘alu hake kiate au ki he mo‘unga, pea te ke ngaohi hao ‘a‘ake ‘akau.

²Pea te u tohi ki he ongo maka ‘a e ngaahi lea na‘e tu‘u ‘i he ongo ‘uluaki maka, ‘a ia na‘a ke laiki, pea te ke ‘ai kinaua ki he ‘a‘ake.

³Ko ia na‘a ku ngaohi ha ‘a‘ake ‘akau sitimi, pea u tā ha ongo makatohi hangē ko e ‘uluaki, pea u ‘alu hake ki he mo‘unga, ‘o u to‘o ‘a e ongo maka.

⁴Pea ne tohi ki he ongo lau‘i me‘a ‘o tatau mo e ‘uluaki tohi, ‘a e Hongofulu‘i Fekau, ‘a ia ne folofola‘aki ‘e Sihova kiate kimoutolu ‘i he mo‘unga, mei he loto afi ‘i he ‘aho ‘o e fakataha: pea na‘e ‘omi kinaua ‘e Sihova kiate au.

⁵Pea u tafoki ‘o ‘alu hifo mei he mo‘unga, pea u ‘ai ‘a e ongo makatohi ki he ‘a‘ake kuo u ngaohi; pea ‘oku na ‘i ai pē, ‘o hangē ko hoku fekau ‘e he ‘Eiki.

⁶(Pea hiki fononga ‘e ha‘a ‘Isileli mei he ngaahi vaikeli ‘o ha‘a Siakani ki Mōsela: pea pekia ai ‘a ‘Ēlone, pea na‘e telio ai; pea ko hono foha ko ‘Eliesa na‘e fetongi ia ‘i he ngāue fakataula‘eiki.

⁷Pea nau hiki mei ai ki Kutukota; pea mei Kutukota ki Siotipata ko e fonua vaitafe‘ia.

⁸‘I he taimi ko ia[10] na‘e vahe‘i ‘e Sihova ‘a e matakali ‘o Līvai ke fua ‘a e ‘a‘ake ‘o e kovinānite ‘o Sihova, ke fakafe‘ao kia Sihova, ke tauhi ia, pea ke fai tāpuaki ‘i hono huafa, pea talu ai pē.

⁹Ko hono ‘uhinga ia ‘oku ‘ikai ha ‘inasi pe tofi‘a ‘o ha‘a Līvai fakataha mo hono kāinga; ko Sihova pē ‘a hono tofi‘a, ‘o hangē ko e folofola ki ai ‘a Sihova ko ho ‘Otua.

¹⁰Pea ko au na‘a ku nofo pē ‘i he mo‘unga ‘o hangē ko e ‘uluaki taimi, ko e fāngofulu‘i ‘aho mo e fāngofulu‘i pō: pea na‘e ongo‘i au ‘e Sihova ‘i he taimi ko ia foki; tokua ‘e ‘ikai te ne faka‘auha faka‘osi koe.

¹¹Pea folofola ‘a Sihova kiate au, Tu‘u, laka mu‘omu‘a ‘i he kakai; pea te nau hū, ‘o ma‘u ‘a e fonua na‘a ku fuakava ai ki he‘enau ngaahi kui ke ‘atu kiate kinautolu.

¹²Pea ko eni, ‘e ‘Isileli, ko e hā fua ‘a e me‘a ‘oku tangi ki ai ‘e Sihova ko ho ‘Otua meiate koe? ‘a ‘eni pē, ke ‘apasia ki he ‘Eiki ko ho ‘Otua, ke fou ‘i hono ngaahi hala, pea ke ‘ofa kiate ia, pea ke tauhi kia Sihova ko ho ‘Otua ‘aki ‘a e kotoa ‘o ho loto mo e kotoa ‘o ho laumālie.

¹³Ke tauhi ‘ene ngaahi tu‘utu‘uni mo ‘ene ngaahi fekau, ‘a ia ‘oku ou fokotu‘u atu he ‘aho ni ma‘ao lelei.

¹⁴Vakai, ‘oku ‘o Sihova ko ho ‘Otua ‘a e langi, ‘io, ‘a e langi ‘o e ngaahi langi, ‘a e fonua mo e me‘a kotoa ‘oku ‘i ai.

¹⁵Ka ne ta‘e‘oua pē ‘a e mamana ‘a Sihova ki ho tupu‘anga, ‘o ne ‘ofa‘i, ‘a ia kuo ne fili ai honau hako ki mui, ‘io, ‘a kimoutolu pē ‘i he ngaahi kakai, ‘o hangē ko ia he ‘aho ni.

¹⁶Ko ia mou kamu homou loto, ‘o ‘oua te mou toe kia kekeva.

¹⁷He ko Sihova ko homou ‘Otua ko e ‘Otua ia ‘o e ngaahi ‘otua, pea ko e ‘Eiki ‘o e ngaahi ‘eiki, ko e ‘Otua lahi, ko e Mafi mo e Ngeia, ‘a ia ‘oku ‘ikai te ne hūmataniu.

¹⁸Pea ‘oku ‘ikai te ne tali holo. ‘Oku ne fakamaau ‘a e me‘a ‘a e tamai mate mo e uitou, pea ‘oku ne ‘ofa‘i ‘a e muli he‘ene ‘ange ki ai ‘a e me‘akai mo e kofu.

¹⁹Ko ia mou ‘ofa ki he muli: he na‘a mou nofo muli ‘i ‘Isipite.

²⁰Ko Sihova ko ho ‘Otua te ke ‘apasia ki ai; ko ia ia te ke tauhi ki ai; pea ko ia ia te ke piki ki ai, pea ko hono huafa te ke fuakava ai.

²¹Ko ia pē ho vīkiviki‘anga, pea ko ia pē ho ‘Otua, ‘a ia kuo ne feia ma‘au ‘a e ngaahi me‘a lalahi mo fakangeingei ni, ‘a ia kuo māta‘i ‘e ho mata na.

²²Na‘e ‘alu hifo ki ‘Isipite ho‘o ngaahi kui ‘oku nau toko fitungofulu pē, ka ko ‘eni kuo ‘ai koe ‘e Sihova ko ho ‘Otua ke hangē ko e ngaahi fetu‘u ‘o e langi homou tokolahi.