Read KO E TOH TAPU KATOA TONGA KO TEUTALŌNOME 11 Bible Online

KO TEUTALŌNOME 11 - KO E TOH TAPU KATOA TONGA bible

KO TEUTALŌNOME 11

¹KO ia te ke ‘ofa kia Sihova ko ho ‘Otua, ‘o tauhi hono fatongia, mo hono ngaahi lao, mo ‘ene konisitūtone, mo ‘ene ngaahi tu‘utu‘uni, ma‘u ai pē.

²Pea ke mou ‘ilo he ‘aho ni — he tala‘ehai ko ho‘omou fānau ‘oku ou lea ki ai, ‘a ia kuo ‘ikai te nau ‘ilo, pea kuo ‘ikai te nau mamata ki he akonaki na‘e fai ‘e Sihova ko homou ‘Otua, ‘a hono mā‘olunga, ‘a hono nima mālohi mo nima kuo hiki tā,

³mo ‘ene ngaahi faka‘ilonga, mo ‘ene ngaahi ngāue, ‘a ia na‘a ne fai ‘i he lotolotonga ‘o ‘Isipite kia Felo ko e Tu‘i ‘Isipite, pea ki hono fonua kotoa;

⁴mo e me‘a na‘a ne fai ki he tau ‘a ‘Isipite, ki he‘enau tau hoosi, pea ki he‘enau tau sāliote; ‘a ‘ene fakatafe ‘a e Tahi Kulokula[11] ‘i honau mata ‘i he‘enau tuli kimoutolu, mo ‘ene faka‘auha kinautolu ‘o talu ai pē.

⁵Mo e me‘a na‘a ne fai kiate kimoutolu ‘i he Toafa, ‘o a‘u ki ho‘omou lava mai ki he potu ni.

⁶Mo e me‘a na‘a ne fai kia Tētani, pea kia ‘Apilami, ko e fānau ‘a ‘Eliapi, hako ‘o Lūpeni; ‘a e fakamanga ‘e he kelekele hono ngutu, ‘o ne folo fua kinautolu, mo honau fale, mo honau ngaahi tēniti, mo e me‘a mo‘ui kotoa pē na‘e fakaongo kiate kinautolu, ‘i he lotolotonga ‘o ha‘a ‘Isileli,

⁷ka ko homou mata kuo māta‘i hono kotoa ‘o e fu‘u ngāue ‘a e ‘Eiki na‘a ne fai.

⁸Ko ia te mou tauhi ‘a e tu‘utu‘uni kotoa ‘a ia ‘oku ou tu‘utu‘uni atu he ‘aho ni, koe‘uhi ke mou mālohi, pea ke mou hū ‘o ma‘u ‘a e fonua ‘oku mou a‘a atu ke ma‘u;

⁹pea koe‘uhi ke mou fakalahi homou ngaahi ‘aho ‘i he kelekele, ‘a ia na‘e fuakava ai ‘e Sihova ki ho‘omou ngaahi kui te ne foaki kiate kinautolu mo honau hako, ko e fonua ‘oku mahutafea ‘i he hu‘akau mo e honi.

¹⁰He ko e fonua ‘oku ke hū ki ai ke ma‘u ‘oku ‘ikai hangē ko e fonua ‘o ‘Isipite, ‘a ia na‘a mou ha‘u mei ai, ‘a ia na‘a ke tō ai ho‘o pulopula, pea ke fakaviviku ‘aki ho va‘e, ‘o hangē ha ngoue mohuku kai;

¹¹ka ko e fonua ‘oku ke a‘a atu ke ma‘u, ko e fonua mo‘unga‘ia mo tele‘a‘ia, ‘oku inu vai ‘uha mei langi:

¹²ko e fonua ‘oku mamahi‘i ‘e Sihova; ‘oku toka ai ‘a e ongo fo‘i fofonga ‘o Sihova ko ho ‘Otua, mei he kamata‘anga ‘o e ta‘u ‘o a‘u ki hono ngata‘anga.

¹³Pea ko eni, kapau te mou mātu‘aki tokanga ki he‘eku ngaahi fekau, ‘a ia ‘oku ou ‘atu he ‘aho ni, ke ‘ofa ki he ‘Eiki ko homou ‘Otua, pea ke tauhi ia ‘aki ‘a e kotoa ‘o ho loto mo e kotoa ‘o ho laumālie.

¹⁴Pea te u toki ‘atu ‘a e ‘uha ‘o homou fonua ‘i hono taimi totonu, ko e vai mu‘a mo e vai mui, koe‘uhi ke ke utu ho‘o koane, mo ho‘o uaine, mo ho‘o lolo.

¹⁵Pea te u ‘atu mohuku ‘i ho ngaahi vao ki ho‘o monumanu, pea te ke kai ‘o mākona.

¹⁶Lamasi kimoutolu na‘a oloa homou loto, ‘o mou afe ai ‘o tauhi ‘otua kehe, ‘o lotu ki ai;

¹⁷pea langa‘i ai ‘a e houhau ‘o Sihova kiate kimoutolu, pea ne tāpuni ‘a e langi, ‘o ‘ikai ha ‘uha, ‘o ‘ikai lakuna ‘e he kelekele hono mahu; pea mou ‘auha vave mei he fonua lelei ‘oku foaki ‘e Sihova kiate kimoutolu.

¹⁸Ko ia te mou ‘ai ‘eku ngaahi lea ni ki homou loto, pea ki homou laumālie; pea te mou no‘o ia mo‘o faka‘ilonga ‘i homou nima, pea te nau tu‘u mo‘o failaketeli ‘i homou vaha‘a mata.

¹⁹Pea te mou ako ia ki ho‘omou fānau, ho‘omou talanoa ki ai ‘i ho‘o nofo ‘i ho fale, pea ‘i ho‘o fononga ‘i he hala, pea ‘i ho‘o tokoto, pea ‘i ho‘o tu‘u hake.

²⁰Pea te ke tohi ia ki he ngaahi pou matapā ‘o ho fale, pea ki ho‘o ngaahi matanikolo: p

²¹koe‘uhi ke fakalahi homou ngaahi ‘aho mo e ngaahi ‘aho ‘o ho‘omou fānau ‘i he kelekele, ‘a ia na‘e fuakava ai e Sihova ki ho‘omou ngaahi kui ke a‘u kiate kinautolu — ke tatau mo e ngaahi ‘aho ‘o e ‘i he funga ‘o māmani ‘a e langi.

²²He kapau te mou tauhi ke matauhi ‘a e tu‘utu‘uni ko eni kotoa, ‘a ia ‘oku ou fokotu‘u atu kiate kimoutolu ke fai ki ai; ke ‘ofa pē he ‘Eiki ko homou ‘Otua, ke foua hono ngaahi hala kotoa, pea ke piki kiate ia;

²³pea ‘e toki kapusi kotoa ‘e Sihova ‘a e ngaahi pule‘anga na mei homou ‘ao, pea te mou ma‘u ha ngaahi pule‘anga ‘oku lahi ange mo kaukaua ‘iate kimoutolu.

²⁴‘Ilonga ha potu ‘e tu‘u ai homou ‘aofiva‘e ‘e ‘omoutolu ia: te mou fai mei he Toafa mo Lepanoni, mei he Vaitafe, ‘a e vaitafe ko ‘Eufaletesi,

²⁵‘io, ‘o a‘u ki he tahi lulunga. ‘E ‘ikai matu‘u ha taha ‘i homou ‘ao; ko Sihova ko homou ‘Otua te ne tuku homou ngeia mo homou manavahē‘ia ki he funga kotoa ‘o e fonua ‘oku mou tu‘u ai, ‘o hangē ko ‘ene folofola kiate kimoutolu.

²⁶Vakai, ‘oku ou tuku ‘i homou ‘ao he ‘aho ni ha monū mo ha mala;

²⁷ko e monū, ‘o kapau te mou tauhi ‘a e ngaahi tu‘utu‘uni ‘a Sihova ko homou ‘Otua, ‘a ia ‘oku ou fokotu‘u atu he ‘aho ni:

²⁸pea ko e mala, ‘o kapau ‘e ‘ikai te mou fakaongo ki he ngaahi tu‘utu‘uni ‘a Sihova ko homou ‘Otua, ka mou afe mei he hala, ‘a ia ‘oku ou tu‘utu‘uni atu he ‘aho ni, ‘o mou muimui ‘otua kehe, ‘a ia na‘e ‘ikai te mou ‘iloa.

²⁹Pea ka faifai pea fakahū koe ‘e Sihova ko ho ‘Otua ki he fonua ‘oku ke ‘alu ki ai ke ma‘u pea te ke toki tuku ‘a e monū ki he mo‘unga ko Kelisimi, ka ko e mala ki Mo‘unga ‘Īpale.

³⁰‘Ikai ‘oku na ‘i he feitu‘u ko e ‘o Soatani, ki kō ‘i he hifonga la‘ā, ‘i ha fonua ‘o ha‘a Kēnani ‘oku nofo ‘i he ‘Alapā, ‘i he hāngai ki Kilikali, ‘i he tafa‘aki ‘o e ‘ulu ‘oke ‘o Mole?

³¹He ko ho‘omou a‘a eni ‘i Soatani ke hū ‘o ma‘u ‘a e fonua ‘a ia ‘oku foaki atu ‘e Sihova ko homou ‘Otua, pea te mou ma‘u ia ‘o nofo ai.

³²Pea te mou tokanga ke fai ‘a e ngaahi lao kotoa mo e konisitūtone, ‘a ia ‘oku ou tuku ‘i homou ‘ao he ‘aho ni.