Read KO E TOH TAPU KATOA TONGA KO TEUTALŌNOME 12 Bible Online

KO TEUTALŌNOME 12 - KO E TOH TAPU KATOA TONGA bible

KO TEUTALŌNOME 12

¹KO eni ‘a e ngaahi lao mo konisitūtone, ‘a ia te mou tauhi ‘o fai ki ai ‘i he fonua kuo foaki atu ‘e Sihova ko e ‘Otua ‘o ho tupu‘anga, ke ke ma‘u ‘i he ngaahi ‘aho kotoa pē ‘oku mou mo‘ui ai ‘i māmani.

²Te mou mātu‘aki faka‘auha ‘a e ngaahi potu kotoa pē, ‘a ia na‘e tauhi ai ki honau ngaahi ‘otua ‘e he ngaahi pule‘anga te mou ma‘u, ‘i he ngaahi funga mo‘unga mā‘olunga, mo e ngaahi fo‘i mā‘olunga, mo e lolo ‘akau mata fua pē:

³pea te mou holoki ‘enau ngaahi ‘ōlita, mo laiki ‘enau ngaahi pou tapu, pea tutu ‘enau ngaahi ‘āsela; pea te ke tā ‘a e ngaahi ‘īmisi ‘o honau ‘otua, pea te ke tāmate‘i honau hingoa mei he ngaahi potu ko ia.

⁴‘E ‘ikai te mou fai pehē kia Sihova ko homou ‘Otua.

⁵Kaekehe, ko e potu ‘e fili ki ai ‘e Sihova ko homou ‘Otua mei homou ngaahi matakali ke ‘ai ki ai hono huafa, ‘io, ko hono ‘afio‘anga te mou kumi ki ai, pea te mou ‘alu ki ai:

⁶pea te mou fetuku ki ai ho‘omou ngaahi feilaulau-mōifua, mo ho‘omou tāmate manu, mo ho‘omou tukuhau-hongofulu, mo e me‘a kuo hapai ‘e homou nima, mo ho‘omou ngaahi tukumo‘ui, pea mo ho‘omou ngaahi me‘a‘ofa, mo e ‘olopo‘ou ‘o ho‘omou fanga manu:

⁷pea ko e potu ko ia te mou kai ai ‘i he ‘ao ‘o Sihova ko homou ‘Otua, pea te mou fiefia ‘i he me‘a kotoa te mou ala ki ai, ‘e kimoutolu mo homou ngaahi fale, ‘a ia kuo tāpuaki ‘aki koe ‘e Sihova ko ho ‘Otua.

⁸‘E ‘ikai te mou fa‘ifa‘itaki ki ha ngaahi me‘a ‘oku tau fai heni he ‘aho ni, ‘o takitaha fai ‘a e me‘a ‘oku hā lelei kiate ia:

⁹he kuo te‘eki te mou a‘u ki he mālōlō‘anga, mo e tofi‘a ‘oku ‘atu kiate koe ‘e Sihova ko ho ‘Otua.

¹⁰Ka ‘oka mou ka a‘a atu ‘i Soatani, ‘o mou nofo ‘i he fonua ‘oku fakatofi‘a ‘aki kimoutolu ‘e Sihova ko homou ‘Otua, pea kuo ne fakamālōlō kimoutolu mei homou ngaahi fili takatakai, pea ‘oku mou nofo nonga;

¹¹pea ko e potu ‘e fili ‘e Sihova ko homou ‘Otua ke ‘afio ai hono huafa, te mou ‘omi ki ai ‘a e ngaahi me‘a kehekehe ‘oku ou tu‘utu‘uni atu; ‘a ho‘omou ngaahi feilaulau-mōifua, mo ho‘omou ngaahi tāmate manu, mo ho‘omou tukuhau, mo e me‘a kuo hapai ‘e homou nima, mo ho‘omou fungani tukumo‘ui, ‘a ia kuo mou fakapapau kia Sihova:

¹²pea te mou fakafiefia ai ‘i he ‘ao ‘o Sihova ko homou ‘Otua, ‘a kimoutolu mo homou ngaahi foha, mo homou ngaahi ‘ōfefine, mo ho‘omou kau tamaio‘eiki, mo ho‘omou kau kaunanga, mo e Līvai ‘oku ‘i ho kolo, he ‘oku ‘ikai hano ‘inasi pe tofi‘a mo kimautolu.

¹³Lamasi koe ke ‘oua te ke ‘atu ho‘o ngaahi feilaulau-mōifua ‘i ha potu pē ‘oku ke sio ki ai:

¹⁴ka ko e potu pē ‘e fili ki ai ‘e Sihova, ‘i ha taha ‘o ho ngaahi matakali, ko e potu pē ia te ke fai ai ‘a e me‘a kehekehe ‘oku ou tu‘utu‘uni atu.

¹⁵Ka neongo ia, ka ‘oka holi ho loto ki ai, ‘e ‘atā ha‘o tāmate‘i manu mo kai kakano ‘i ho ngaahi loto kolo kotoa pē, ha me‘a kuo tāpuaki‘i ai koe ‘e Sihova ko ho ‘Otua: ‘e ‘atā ki he ta‘ema‘a mo e ma‘a ke kai, ha me‘a hangē ko e kaseli mo e tia.

¹⁶Kaekehe ‘e ‘ikai te mou kai ‘a e toto; te ke lilingi ia ki he kelekele hangē ko e vai.

¹⁷‘Oku tapu ho‘o kai ‘i ho loto kolo ‘a e tukuhau-hongofulu ‘a ho‘o uite, pe ko ho‘o uaine, pe ko ho‘o lolo, pe ko e ‘olopo‘ou ‘o ho‘o monumanu, pe ha taha ‘o e ngaahi tukumo‘ui kuo ke fakapapau, pe ko ha me‘a‘ofa, pe ko e me‘a kuo hapai ‘e ho nima:

¹⁸ka te ke kai ia ‘i he ‘ao ‘o Sihova ko ho ‘Otua ‘i he potu ‘e fili ki ai ‘e Sihova ko ho ‘Otua, ‘a koe, mo ho foha, mo ho ‘ōfefine, mo ho‘o tamaio‘eiki, mo ho‘o kaunanga, mo e Līvai ‘oku ‘i ho kolo: pea te ke fakafiefia ‘i he ‘ao ‘o Sihova ko ho ‘Otua ‘i he me‘a kotoa kuo ke ala ki ai.

¹⁹Lamasi koe ke ‘oua na‘a ke li‘aki ‘a e Līvai lolotonga ho‘o nofo ‘i ho kelekele.

²⁰Ka faifai pea toloaki ho kau‘ā ‘e Sihova ko ho ‘Otua, ‘o hangē ko ‘ene folofola kiate koe, pea te ke pehē, Ka u kai kakano, koe‘uhi ‘oku holi ho loto ke kai kakano; te ke kai kakano pē, pe ko e hā ‘a e me‘a ‘oku holi ho loto ki ai.

²¹Ka ‘oka mama‘o fau ‘a e potu kuo fili ki ai ‘e Sihova ko ho ‘Otua ke ‘ai ki ai hono huafa, pea te ke tāmate‘i ha me‘a mei ho‘o monumanu, ‘a ia kuo foaki ‘e he ‘Eiki kiate koe, ‘o hangē ko ‘eku tu‘utu‘uni atu, pea te ke kai ‘i ho loto kolo, ‘o hangē ā ko e holi ‘a ho loto.

²²‘O hangē ‘oku kai ‘a e kaseli mo e tia, ‘e pehē ho‘o kai ia; ‘e kai ai ‘a e ta‘ema‘a mo e ma‘a fakatou‘osi.

²³Kae sinoeme‘a ke pau ho loto ke faka‘ehi‘ehi mei he kai toto: he ko e toto ko e mo‘ui ia; pea ‘oku tapu ho‘o kai ‘a e mo‘ui mo e kakano.

²⁴‘E ‘ikai te ke kai ia; te ke lilingi ia ki he kelekele ‘o hangē ko e vai.

²⁵‘Oua te ke kai ia; koe‘uhi ke ke tu‘umālie, pea hili ia pea tu‘umālie mo ho‘o fānau, ‘i ho‘o fai ‘a e me‘a ‘oku totonu ‘i he ‘ao ‘o Sihova.

²⁶Ka ko e ngaahi me‘a tapui ‘a ia ‘oku ‘iate koe, pea mo ho‘o ngaahi tukumo‘ui, te ke to‘o ‘o ‘alu mo koe ki he potu ‘e fili ‘e Sihova:

²⁷pea te ke ‘atu ho‘o ngaahi feilaulau-mōifua, ‘a e kakano mo e toto, ‘i he ‘ōlita ‘o Sihova ko ho ‘Otua: pea ko e toto ‘o ho‘o ngaahi feilaulau ‘e lilingi ki he ‘ōlita ‘o Sihova ko ho ‘Otua, pea ko hono kakano te ke kai.

²⁸Ke ke tokanga pea fakaongo ki he ngaahi lea ko eni ‘a ia kuo u tu‘utu‘uni atu, koe‘uhi ke ke tu‘umālie, ‘a koe mo ho hako ‘amui ‘o ta‘engata, ‘oka ke ka fai ‘a e me‘a ‘oku lelei mo totonu ‘i he ‘ao ‘o Sihova ko ho ‘Otua.

²⁹Ka kuo tu‘usi ‘e Sihova ko ho ‘Otua mei ho ‘ao ‘a e ngaahi pule‘anga, ‘a ia ‘oku ke ‘alu ki hē ke ma‘u, pea kuo ke ma‘u kinautolu, ‘o nofo ‘i honau fonua;

³⁰lamasi koe na‘a tauhelea koe ke muimui kiate kinautolu; ‘osi, kuo faka‘auha kinautolu mei ho ‘ao; pea na‘a ‘iloange te ke ‘eke ki honau ngaahi ‘otua, ‘o pehē, Na‘e fēfē ‘a e tauhi ‘e he ngaahi pule‘anga ni ki honau ngaahi ‘otua? ka u fai pehē foki ‘e au.

³¹‘E ‘ikai te ke fai pehē kia Sihova ko ho ‘Otua: he ko e ngaahi me‘a ‘oku fakalili‘a ki ai ‘a Sihova, ‘a ia ‘oku ne fehi‘a ki ai, kuo nau fai ia ki honau ngaahi ‘otua; he na‘a mo ‘enau fānau tangata mo ‘enau fānau fefine kuo nau fakamomofi ‘i he afi ki honau ngaahi ‘otua.

³²‘Ilonga ha me‘a ‘oku ou tu‘utu‘uni atu, te mou tokanga ke fai ia: tapu ho‘o fakalahi ki ai, pea tapu ho‘o fakasi‘isi‘i ki ai.