Read KO E TOH TAPU KATOA TONGA KO TEUTALŌNOME 13 Bible Online

KO TEUTALŌNOME 13 - KO E TOH TAPU KATOA TONGA bible

KO TEUTALŌNOME 13

¹KAPAU ‘e tu‘u hake ‘i ho lotolotonga ha palōfita, pe tangata-misi, ‘o ne tuku kiate ko e ha faka‘ilonga, pe ha mana,

²pea hoko ‘a e faka‘ilonga pe mana ‘a ia na‘a ne fakahā kiate koe, he‘ene pehē, Tau muimui ki he ngaahi ‘otua kehe (‘a ia kuo ‘ikai te ke ‘ilo ki ai),

³pea tau tauhi kinautolu; ‘Ā, ‘e ‘ikai te mou tokanga ki he lau ‘a e palōfita ko ia, pe ki he tangata-misi mo ia; he ko homou sivi ia ‘e Sihova ko homou ‘Otua, ke mahino pe ko e me‘a ‘oku mou ‘i ai ko e ‘ofa kia Sihova ko homou ‘Otua ‘aki ‘a e kotoa ‘o homou loto mo e kotoa ‘o homou laumālie.

⁴Te mou muimui kia Sihova ko homou ‘Otua, ‘o mou ‘apasia ki ai, pea ko ‘ene ngaahi tu‘utu‘uni te mou tauhia, pea ko hono le‘o te mou fakaongo ki ai, pea te mou tauhi kiate ia mo pīkitai kiate ia.

⁵Pea ko e palōfita ko ia mo e tangata-misi ko ia, ‘e tāmate‘i; koe‘uhi ko ‘ene lea angatu‘u kia Sihova ko homou ‘Otua, ‘a ia na‘a ne fakahao mai kimoutolu mei ‘Isipite, mo ne huhu‘i koe mei he fale pōpula; pea koe‘uhi ko ‘ene fakaafe koe mei he hala ‘a ia na‘e tu‘utu‘uni ‘e Sihova ko ho ‘Otua ke ke fou ai. Ko ia te ke ‘ave ‘a e kovi mei ho lotolotonga.

⁶Kapau ‘e o‘i fufū koe ‘e ho tokoua, ‘a e tama ‘a ho‘o fa‘ē, pe ko ho foha, pe ko ho ‘ōfefine, pe ko e uaifi ‘oku faaki ki ho fatafata, pe ko ho kaume‘a ‘oku ke loto‘aki, ‘o ne pehē, Ta ō ‘o tauhi ‘otua kehe (‘a ia ‘oku ‘ikai te ke ‘ilo ki ai, ‘a koe pe ko ho‘o ngaahi kui);

⁷ha ni‘ihi ‘o e ngaahi ‘otua ‘o e ngaahi kakai ‘oku nofo takatakai kiate kimoutolu, pe ‘oku nau ofi mai, pe ‘oku nau mama‘o atu, mei he potu ‘e taha ‘o māmani ‘o a‘u ki he potu ‘e taha;

⁸‘ā, ‘e ‘ikai te ke momo‘i tui kiate ia, pe fakaongo kiate ia; pea ‘e ‘ikai ‘ofa ho mata ki ai, pea ‘e ‘ikai te ke mamae‘i, pea ‘e ‘ikai te ke fufū ‘ene me‘a: ka te ke mātu‘aki tāmate‘i ia;

⁹ko ho nima ‘e fua ala ‘i hono tāmate‘i, pea toki ala ‘a e kakai kotoa.

¹⁰‘Io, te ke tolomaka‘i ia ke ne mate; koe‘uhi kuo ne feinga ke fakaafe koe meia Sihova ko ho ‘Otua, ‘a ia na‘a ne fakahao koe mei ‘Isipite, mei he fale pōpula.

¹¹Pea ‘e fanongo ‘e ‘Isileli kātoa, pea te nau manavahē ai, ‘o ‘ikai toe feia ha kovi pehē ‘i ho lotolotonga.

¹²Kapau te ke fanongo talanoa ki ha kolo ‘e taha ‘i he ngaahi kolo ‘oku ‘atu ‘e Sihova ko ho ‘Otua ke ke nofo ai,

¹³tokua kuo ‘alu atu mei ho lotolotonga ha tu‘unga me‘a ko e hako‘i Pileali, pea kuo nau fakaafe ‘a e kakai ‘o honau kolo, he‘enau pehē, Tau ō, ‘o tauhi ‘otua kehe, ‘a ia ‘oku ‘ikai te mou ‘iloa;

¹⁴pea te ke fehu‘i, mo hakule, mo ‘eke ke mahu‘ingamālie; pea ka ‘iloange ko e mo‘oni, pea kuo pau ‘a e me‘a, ‘a e fai ‘a e me‘a fakalielia ko ē ‘i ho lotolotonga;

¹⁵pea te ke mātu‘aki taa‘i ‘a e kakai ‘o e kolo ko ia ‘aki ‘a e mata ‘o e heletā, ‘o ke mōifua ia mo e me‘a kotoa pē ‘oku ‘i ai, mo hono monumanu, ‘aki ‘a e mata ‘o e heletā.

¹⁶Pea ko hono vete kotoa te ke tānaki ki hono mala‘e, pea te ke fakamomofi ‘a e kolo mo e vete kotoa, ‘o mōifua kia Sihova ko ho ‘Otua, pea ‘e hoko ia ko e tanu pē ‘o ta‘engata; ‘e ‘ikai toe langa.

¹⁷Pea ‘e ‘ikai piki ki ho nima ha momo‘i konga ‘o e me‘a kuo mōifua: koe‘uhi kae tafoki ai ‘a Sihova mei he‘ene houhau kakaha, ‘o ne fai ha meesi kiate koe, mo fakatokolahi koe, ‘o hangē ko ‘ene fuakava ki ho‘o ngaahi kui;

¹⁸‘oka ke ka fakaongo ki he le‘o ‘o Sihova ko ho ‘Otua ke tauhi ‘ene ngaahi tu‘utu‘uni kotoa pē, ‘a ia ‘oku ou fokotu‘u atu he ‘aho ni, ke feia ‘a e me‘a ‘oku totonu ‘i he ‘ao ‘o Sihova ko ho ‘Otua.