Read KO E TOH TAPU KATOA TONGA KO TEUTALŌNOME 18 Bible Online

KO TEUTALŌNOME 18 - KO E TOH TAPU KATOA TONGA bible

KO TEUTALŌNOME 18

¹‘E ‘ikai ma‘u ‘e he kau Līvai taula‘eiki, ‘io, ‘a e matakali Līvai kotoa, ha ‘inasi pe tofi‘a fakataha mo ha‘a ‘Isileli: te nau kai ‘a e ngaahi feilaulau tutu ‘a Sihova mo hono ‘inasi.

²Ka ‘e ‘ikai hano tofi‘a ‘i he lotolotonga ‘o hono kāinga; ko Sihova pē hono tofi‘a, ‘o hangē ko ‘ene folofola ki ai.

³Pea ko eni ‘a e ‘inasi fakakonisitūtone ‘o e taula‘eiki mei he kakai, meiate kinautolu ‘oku fai feilaulau, pe ko e pulu, pe ko e sipi, te nau ‘ange ki he taula‘eiki ha alanga mu‘a, mo e ongo kou‘ahe, mo e kete.

⁴Ko e polopolo ‘o ho‘o uite, ‘o ho‘o uaine, pea mo ho‘o lolo, mo e polopolo ‘o ho‘o fulufulu‘i sipi te ke ‘ange kiate ia.

⁵He kuo fili ia mei ho ngaahi matakali ‘e Sihova ko ho ‘Otua, ke tu‘u ke fai ngāue ‘i he huafa ‘o Sihova, ‘a ia mo hono hako ‘o lauikuonga.

⁶Pea ka ha‘u ho Līvai mei he kolo ‘oku ne ‘āunofo ai, ha taha pē ‘o ho ngaahi kolo ‘Isileli kātoa, ‘o ne ha‘u mo e feinga kotoa ‘o hono loto ki he potu ‘e fili ‘e Sihova ki ai;

⁷pea te ne fai ngāue ‘i he huafa ‘o Sihova ko hono ‘Otua, ‘o hangē ko e fai ‘a hono kāinga Līvai kotoa ‘oku fakafe‘ao ai kia Sihova.

⁸Te nau ‘inasi tatau pē ‘enau kai, tukukehe ‘a e pa‘anga mei he fakatau ‘o ‘ene me‘a ‘i hono ‘api tukufakaholo.[16]

⁹‘Oka ke ka a‘u ki he fonua ‘oku foaki kiate koe ‘e Sihova ko ho ‘Otua, ‘e ‘ikai te ke ako ke fai hangē ko e ngaahi me‘a fakalielia ‘a e ngaahi kakai ko ena.

¹⁰‘E ‘ikai ‘ilo ‘iate koe ha taha ‘oku tuku hono foha pe ‘ōfefine ke ‘asi ‘i he afi, ha taha ‘oku fai me‘a tongafisi, ha taha ‘oku fai ‘a e talotalo kovi, pe ha fai tuki, pe fiemana,

¹¹pe ha fai sausau, pe ha fakahā‘ele fa‘ahikehe, pe ha maki, pe ha fakahā‘ele mate.

¹²He ko e me‘a fakalielia kia Sihova ‘a ia fua pē ‘oku fai me‘a pehē: pea ko e me‘a ‘i he ngaahi fakalielia pehē, ko ia ‘oku kapusi ai kinautolu mei ho ‘ao ‘e Sihova ko ho ‘Otua.

¹³‘E haohaoa ho‘o fakafeangai kia Sihova ko ho ‘Otua.

¹⁴He koe ngaahi kakai na, ‘a ia te ke ma‘u kinautolu, ‘oku nau fakaongo kiate kinautolu ‘oku fai ‘a e talotalo kovi mo e maki: ka ko koe na‘e ‘ikai tuku ke ke fai pehē ‘e Sihova ko ho ‘Otua.

¹⁵‘E fokotu‘u ‘e Sihova ko ho ‘Otua mei ho lotolotonga, mei ho kāinga, hao palōfita hangē ko au; ko ia pē te mou fanongo ki ai;[17]

¹⁶‘o hangē ko ia kotoa na‘a ke kole meia Sihova ko ho ‘Otua ‘i Hōlepi ‘i he ‘aho ‘o e fakataha, ho‘o pehē, ‘Oua ā na‘a ku toe fanongo ki he le‘o ‘o Sihova ko hoku ‘Otua, pea ‘oua ā na‘a ku toe sio ki he afi lahi ni, na‘a ku mate.

¹⁷Pea na‘e folofola ‘a Sihova kiate au, ‘Oku lelei ‘a e lea kuo nau fai.

¹⁸Te u fokotu‘u ma‘anautolu ha palōfita mei he lotolotonga ‘o honau kāinga hangē ko koe, pea te u ‘ai ‘eku lea ki hono ngutu, pea te ne[18] lea‘aki kiate kinautolu ‘a e me‘a kotoa te u fekau kiate ia.

¹⁹Pea ka ‘iloange ‘e ai ha taha ‘e ‘ikai fie fakaongo ki he‘eku ngaahi lea, ‘a ia te ne lea‘aki ‘i hoku hingoa, te u[19] ‘eke ia kiate ia ‘e au.

²⁰Ka ko e palōfita te ne ‘afungi ke fai ha lea ‘i hoku hingoa; ‘osi, kuo ‘ikai te u fekau ke ne lea‘aki, pe te ne lea ‘i he hingoa ‘o ha ngaahi ‘otua kehe, pea ‘e mate ‘a e palōfita ko ia.

²¹Pea kapau te ke pehē ‘i ho loto, Te tau ‘ilo fēfē ‘a e lea kuo ‘ikai folofola‘aki ‘e Sihova?

²²Ka lea ‘e ha palōfita ‘i he huafa ‘o Sihova, pea ‘oku ‘ikai fakaai ‘a e me‘a, pea ‘oku ‘ikai hoko, ko e me‘a ia ne ‘ikai folofola‘aki ‘e Sihova: ko e ‘afungi ‘a e palōfita ‘ene lea ko ia, ‘oua te ke ilifia kiate ia.