Read KO E TOH TAPU KATOA TONGA KO TEUTALŌNOME 19 Bible Online

KO TEUTALŌNOME 19 - KO E TOH TAPU KATOA TONGA bible

KO TEUTALŌNOME 19

¹KA faifai pea tu‘usi ‘e Sihova ko ho ‘Otua ‘a e ngaahi kakai ‘a ia ‘oku ne foaki atu honau fonua kiate koe, pea kuo ke fetongi kinautolu, ‘o nofo ‘i he‘enau ngaahi kolo, mo honau ngaahi fale;

²pea te ke vahe‘i ma‘au ha tolu‘i kolo ‘i ho loto fonua, ‘a e fonua ‘oku ‘atu ‘e Sihova ko ho ‘Otua ke ke ma‘u.

³Te ke hanga ‘o ngaohi ‘a e hala, pea te ke vahetolu ‘a e feitu‘u ‘o e fonua, ‘a ia kuo tuku ‘e Sihova ko ho ‘Otua mo‘o tofi‘a, koe‘uhi ke hola ki ai ‘a e fakapō kotoa pē.

⁴Pea ko e anga eni ‘o e fakapō ‘a ia te ne hola ki ai ‘o mo‘ui: ko ia te ne taa‘i hono kaungā‘api ‘i he fāinoa, ka na‘e ‘ikai te ne fehi‘a ki ai ‘i mu‘a.

⁵‘O pehē, ka ‘alu ha taha mo hono kaungā‘api ki he vao ke fai ta‘anga, pea ‘oku ne ofa‘aki hono toki ke tā ‘a e ‘akau, pea homo ‘a e ukamea mei he ‘esia, ‘o lave ‘i he tangata ‘e taha, ‘o ne pekia; pea ‘e hola ia ki ha taha ‘o e ngaahi kolo ko ena ‘o hao:

⁶na‘a tuli ‘a e fakapō ‘e he koeli tongi-toto ‘oku māfana hono loto, ‘o ne ma‘u ia ko e me‘a ‘i he lōloa ‘a e hala, ‘o ne taa‘i ‘ene mo‘ui: ‘osi, na‘e ‘ikai taau ke ne mate, koe‘uhi na‘e ‘ikai te ne fehi‘a ki ai mu‘a.

⁷Ko ia ‘oku ou kouna atu ai ‘e au, ‘o pehē, Ko e tolu‘i kolo te ke vahe‘i ma‘au.

⁸Pea kapau ‘e toloi ho kau‘ā ‘e Sihova ko ho ‘Otua, ‘o hangē ko ‘ene fuakava ki ho‘o ngaahi kui, ‘o ne ‘atu kiate koe ‘a e fonua kotoa na‘a ne tala‘ofa ke ‘atu ki ho‘o ngaahi kui;

⁹(kapau te ke tauhi mo fai hono kotoa ‘o e fekau ni, ‘a ia ‘oku ou fekau atu he ‘aho ni, ke ‘ofa kia Sihova ko ho ‘Otua, pea ke fou ‘i hono ngaahi hala ma‘u ai pē) pea te ke toki hanga ‘o fakalahi ‘a e tolu‘i kolo ko ē ‘aki ‘a e tolu‘i kolo kehe:

¹⁰ke ‘oua na‘a lilingi ‘a e toto ‘o e ta‘ehalaia ‘i he fonua ‘a ia ‘oku ‘atu ‘e Sihova ko ho ‘Otua mo‘ao tofi‘a, kae ‘iate koe ha toto.

¹¹Ka ‘o kapau ‘oku ‘i ai ha taha ‘oku fehi‘a ki hono kaungā‘api, ‘o ne toka malumu ki ai, ‘o ne tu‘u hake ki ai, ‘o taa‘i ‘ene mo‘ui, ‘o ne pekia; ‘o ne toki hola ki ha taha ‘a e ngaahi kolo ko ia:

¹²pea ‘e fekau ‘e he mātu‘a ‘o hono kolo ke ‘omi ia mei ai, pea te nau tuku ia ki he nima ‘o e koeli tongi-toto ke ne mate.

¹³‘E ‘ikai te ke mata mamae kiate ia, ka te ke ‘ave ‘a e toto ‘o e ta‘ehalaia mei ‘Isileli, ka ke tu‘umālie.

¹⁴‘E ‘ikai te ke hiki ‘a e kau‘ā ‘o ho kaungā‘api, ‘a ia ne ‘ai ‘e he kakai ‘o e kuonga mu‘a, ‘i he tofi‘a te ke ma‘u ‘i he fonua ‘oku foaki kiate koe ‘e Sihova ko ho ‘Otua ke ke ma‘u.

¹⁵‘E ‘ikai tu‘u ha fakamo‘oni ‘e toko taha pē ki ha tangata ‘i ha kovi pe angahala, pe ko e hā ‘a e angahala kuo ne fai: ko e lea ‘a ha fakamo‘oni ‘e toko ua, pe ko e lea ‘a ha fakamo‘oni ‘e toko tolu, ‘e pau ai ha me‘a.

¹⁶Ka tu‘u ha fakamo‘oni kākā ki ha tangata ke fakamatala ki he‘ene ngāue hala;

¹⁷pea ‘e fakatou tutu‘u ‘a e ongo me‘a ‘oku na fakamaau ‘i he ‘ao ‘o Sihova, ‘i he ‘ao ‘o e kau taula‘eiki mo e kau fakamaau ‘o e taimi ko ia;

¹⁸pea ‘e ‘eke ‘e he kau fakamaau ke mahu‘ingamālie: pea ka ‘iloange ko e fakamo‘oni loi ‘a e fakamo‘oni ko ia, pea kuo ne fakamo‘oni ki hono kāinga;

¹⁹te mou toki fai kiate ia, ‘o hangē ko ‘ene fakakaukau ke fai ki hono kāinga: ka ke ‘ave ai ‘a e kovi mei ho lotolotonga.

²⁰Pea ko hono toe te nau fanongo ki ai, pea te nau manavahē, pea ‘e ‘ikai te nau toe feia ha kovi pehē ‘i ho lotolotonga.

²¹Pea ‘e ‘ikai te ke mata mamae ki ai; ko e mo‘ui pē ma‘a ha mo‘ui, ko e mata pē ma‘a ha mata, ko e nifo pē ma‘a ha nifo, ko e nima pē ma‘a ha nima, ko e va‘e ma‘a ha va‘e.