Read KO E TOH TAPU KATOA TONGA KO TEUTALŌNOME 20 Bible Online

KO TEUTALŌNOME 20 - KO E TOH TAPU KATOA TONGA bible

KO TEUTALŌNOME 20

¹KA ke ka ‘alu ke fai tau mo ho ngaahi fili, pea ke vakai ha tau hoosi mo ha tau sāliote, ha kakai tokolahi hake ‘iate koe, ‘oua te ke manavahē kiate kinautolu: he ko Sihova ko ho ‘Otua ‘oku ‘iate koe, ‘a ia na‘a ne ‘ohake koe mei ‘Isipite.

²Pea ko eni, ka mou ka ‘unu‘unu atu ke fai ‘a e tau, ‘e hā‘ele mai ‘a e taula‘eiki ‘o lea ki he kakai,

³pea te ne pehē kiate kinautolu, Fanongo mai, ‘a ‘Isileli, ko ho‘omou ‘unu‘unu atu ē ke fai tau mo homou ngaahi fili: ‘oua na‘a vaivai homou loto; ‘oua te mou manavahē, pea ‘oua te mou tailiili, pea ‘oua te mou teki kiate kinautolu;

⁴he ko Sihova ko homou ‘Otua ia ‘oku hā‘ele mo kimoutolu ke fai tau mo homou ngaahi fili ma‘amoutolu, ke fakahaofi kimoutolu.

⁵Pea ‘e lea ‘a e kau ‘ōfisa ki he kakai, ‘o pehē, Ko hai ha tangata kuo langa hano fale fo‘ou, ka kuo ‘ikai huufi? ke ‘alu ia ‘o foki ki hono ‘api; na‘a ne mate ‘i he tau, pea huufi ia ‘e ha taha kehe.

⁶Pea ko hai ha tangata kuo tō ngoue vaine, ka kuo te‘eki polopolo? ke ‘alu ia ‘o foki ki hono ‘api; na‘a ne mate ‘i he tau, pea polopolo ia ‘e ha taha kehe.

⁷Pea ko hai ha tangata kuo ne polo‘i ha fefine, ka kuo te‘eki fai ha nonofo? ke ‘alu ia, ‘o foki ki hono ‘api; na‘a mate ia ‘i he tau, pea ma‘u ‘a e fefine ‘e ha tangata kehe.

⁸Pea ‘e fai atu ‘a e kau ‘ōfisa ‘enau lea ki he kakai, ‘o pehē, Ko hai ha tangata ‘oku manavahē mo loto vaivai? ke ‘alu ia ‘o foki ki hono ‘api; na‘a vai ‘a e loto ‘o hono kāinga ‘o hangē ko ho‘ona.

⁹Pea ka ‘osi leva ‘a e lea pehē ‘a e kau ‘ōfisa ki he kakai, te nau tu‘utu‘uni ha hou‘eiki tau ke taki ‘a e kakai.

¹⁰Ka ke ka ‘unu‘unu ki ha kolo ke fai tau ki ai, te ke tala melino ki ai.

¹¹Pea ka ‘iloange te nau tali melino mai, ‘o to‘o kiate koe, pea ko e kakai kotoa ‘e ma‘u ‘i ai te nau tali fatongia kiate koe, mo tauhi koe.

¹²Pea kapau ‘e ‘ikai te nau tali melino kiate koe, ka nau fai tau pē mo koe, pea te ke ‘ohofia ia:

¹³pea ka tuku ia ki ho nima ‘e Sihova ko ho ‘Otua, pea te ke taa‘i ‘a e tangata kotoa ‘aki ‘a e mala ‘o e heletā:

¹⁴ka ko e kau fefine, mo e tamaiki, mo e monumanu, mo e me‘a kotoa pē ‘i he kolo, ‘io, ‘a hono vete, te ke ta‘ofi ma‘a u; pea te ke kai ‘a e vete ‘o ho ngaahi fili, ‘a ia kuo foaki ‘e Sihova ko ho ‘Otua kiate koe.

¹⁵Ko e anga eni ‘o ho‘o fai ki he ngaahi kolo ‘oku mama‘o ‘aupito meiate koe, ‘a ia ‘oku ‘ikai ko e ngaahi kolo ‘o e kakai ko ē, hena.

¹⁶Ka ko e ngaahi kolo ‘o e ngaahi kakai ko ē ‘a ia ‘oku foaki kiate koe ‘e Sihova ko ho ‘Otua mo‘ao tofi‘a, ‘e ‘ikai te ke fakamo‘ui ai ha momo‘i me‘a ‘oku mānava:

¹⁷ka te ke mātu‘aki mōifua kinautolu; ‘a e Heti mo e ‘Āmoli, ‘a e Kēnani mo e Pēlisi, ‘a e Hevi mo e Siepusi; ‘o hangē ko e tu‘utu‘uni koe ‘e Sihova ko ho ‘Otua:

¹⁸koe‘uhiā ke ‘oua te nau ako kimoutolu ke fai ‘o hangē ko e ngaahi fakalielia ‘oku nau fai ki honau ngaahi ‘otua, ka mou angahala ai kia Sihova ko homou ‘Otua.

¹⁹Ka mou ka tau‘i ha kolo ‘o fuoloa, pea ‘i ho‘o fai tau ki ai ke hamu, ‘e ‘ikai te ke maumau hono ngaahi ‘akau, ‘i ho‘o apo ha toki ki ai; he te ke kai pē mei ai ka ‘e ‘ikai te ke tā; he ko e tangata ‘a e ‘akau ‘o e vao ke ke nofo‘aki hono tau‘i?

²⁰Ngata pē ‘i he ‘akau ‘oku ke ‘ilo ‘oku ‘ikai ko e ‘akau kai, ‘a ia te ke maumau mo tā ka ke langa taua ‘aki ki he kolo ‘oku fai tau mo koe, kae ‘oua ke tō.