Read KO E TOH TAPU KATOA TONGA KO TEUTALŌNOME 21 Bible Online

KO TEUTALŌNOME 21 - KO E TOH TAPU KATOA TONGA bible

KO TEUTALŌNOME 21

¹KA ‘ilo ha taha kuo te‘ia ‘i he kelekele ‘oku foaki ‘e Sihova ko ho ‘Otua kiate koe ke ke ma‘u, ‘oku tekefili ‘i he vao, ‘o ‘ikai mahino pe ko hai na‘a ne te‘ia:

²pea ‘e ‘alu atu ho kau mātu‘a mo ho kau fakamaau, pea te nau fua ki he ngaahi kolo takatakai ki he te‘ia;

³pea ko e kolo ‘oku ofi ki he ‘anga‘anga, ‘io, ko e mātu‘a ‘o e kolo ko ia te nau to‘o ha pulu mui fefine, ha taha kuo te‘eki ngāue‘aki, pea kuo te‘eki ke toho ‘i he ‘ioke;

⁴pea ‘e ‘ohifo ‘a e pulu mui ‘e he kau mātu‘a ‘o e kolo ko ia ki ha tele‘a ‘oku tafe ma‘u ai ha vai, ‘a ia ‘oku ‘ikai ngoue‘i pe tō, pea te nau fesi‘i ‘a e kia ‘o e pulu mui ‘i ai, ‘i he tele‘a.

⁵Pea ‘e ‘unu‘unu mai ‘a e kau Līvai taula‘eiki, ko e hako ‘o Līvai, he ko kinautolu kuo fili ‘e Sihova ko ho ‘Otua ke tauhi ia, mo fai tāpuaki ‘i hono huafa; pea ko ‘enau lea ‘e tu‘u ai ‘a e fakamaau ‘o ha me‘a ‘oku fakakikihi ki ai:

⁶pea ko e kau mātu‘a kotoa ‘o e kolo ko ia, ‘a kinautolu ‘oku ofi ki he pekia, te nau fanofano honau nima ‘i he funga pulu mui na‘e fesi‘i hono kia ‘i he tele‘a:

⁷pea te nau tali ‘o pehē, Ko homau nima ni na‘e ‘ikai lilingi ‘a e toto ko eni, pea ko homau mata na‘e ‘ikai sio ki ai.

⁸Fakamolemole, ‘Eiki, ho kakai ‘Isileli ‘a ia kuo ke huhu‘i, pea ‘oua te ke tuku ‘a e toto ‘o e ta‘ehalaia ‘i he lotolotonga ‘o ho kakai ‘Isileli, pea ‘e fakamolemole kinautolu ‘i he fakapō.

⁹Pehē te ke ‘ave ‘a e toto ‘o e ta‘ehalaia mei ho lotolotonga, ‘oka ke ka fai ‘a e me‘a ‘oku hā totonu kia Sihova.

¹⁰Ka ke ka ‘alu atu ke fai tau mo ho ngaahi fili, pea ‘oku tuku kinautolu ki ho nima ‘e Sihova ko ho ‘Otua, pea ‘oku ke taki pōpula kinautolu,

¹¹pea ‘oku ke vakai ‘i he kau pōpula ha fefine hōihoifua, pea ‘oku ke manako kiate ia, ‘o ke fie ma‘u mo‘o ‘unoho;

¹²pea te ke ‘ave ia ki ho fale, pea te ne fakatekefua,[20] mo ngaohi hono nge‘esi nima;

¹³pea te ne hu‘ihu‘i hono kofu fakapōpula, pea te ne nofo ‘i ho fale, ‘o tēngihia ‘ene tamai mo ‘ene fa‘ē ‘o māhina kātoa: pea hili ia pea te ke toki ‘alu ki ai, ‘o ke hoko ko hono husepāniti, pea te ne hoko ia ko ho uaifi.

¹⁴Pea ka faifai pea ‘ikai ha‘o manako ki ai, pea te ke tukuange ke ne fa‘iteliha: ka ‘e ‘ikai te ke momo‘i fakatau pa‘anga ia; ‘e ‘ikai te ke ngaohi ia hangē ha pōpula, he kuo ke fakamo‘ulaloa‘i ia.

¹⁵Ka ‘oku ma‘u ‘e ha tangata ha uaifi ‘e toko ua, ‘o ‘ofeina ‘a e taha kae fehi‘anekina ‘a e taha, pea kuo fanau kiate ia ‘a e ‘ofeina mo e fehi‘anekina fakatou‘osi, pea ko e ‘uluaki foha ‘oku ‘a e fehi‘anekina;

¹⁶pea ka faifai pea hoko ‘a e ‘aho ‘oku ne tuku ai ki hono ngaahi foha ‘a e me‘a ‘oku ne ma‘u, ‘e ‘ikai ngofua ke ne ngaohi ‘a e tama ‘a e ‘ofeina ko e hoko; ‘osi, ‘oku mo‘ui ‘a e hoko totonu ko e tama ‘a e fehi‘anekina:

¹⁷ka te ne fakamo‘oni ko e hoko ‘a e tama ‘a e fehi‘anekina, he‘ene tuku ki ai ha ‘inasi lōua ‘i he me‘a kotoa pē ‘oku ne ma‘u: he ko e fuatapu ia ‘o hono ivi; ko e tu‘unga ‘o e hoko ‘oku ‘o‘ona.

¹⁸Ka ‘oku ma‘u ‘e ha tangata ha foha ‘oku talangata‘a mo pau‘u, ‘o ‘ikai te ne fakaongo ki he lea ‘a ‘ene tamai, pe ko e lea ‘a ‘ene fa‘ē, pea kuo na tautea ia kae ‘ikai te ne tokanga kiate kinaua:

¹⁹pea ‘e toki puke ki ai ‘e he‘ene tamai mo ‘ene fa‘ē, pea te na ‘ave ia ki tu‘a ki he mātu‘a ‘o hono kolo, ‘io, ki he matanikolo ‘o hono feitu‘u;

²⁰pea te na pehē ki he mātu‘a ‘o hono kolo, Ko ‘ema tama ko eni ‘oku talangata‘a mo pau‘u; ‘e ‘ikai te ne tokanga ki he‘ema lea; ko e mo‘ui fakalusa ia mo fa‘a konā.

²¹Pea ko e kakai kotoa ‘o hono kolo te nau tolomaka‘i ia ke ne pekia: ko ia te ke ‘ave ai ‘a e kovi mei ho lotolotonga: pea ‘e fanongo ki ai ‘a ‘Isileli kotoa, pea te nau manavahē.

²²Pea ka kuo feia ‘e ha tangata ha angahala ko hono tautea ‘i he lao ko e mate, pea ‘oku tāmate‘i ia, pea ke tautau ‘i ha ‘akau;

²³‘e ‘ikai ‘ahoia hono ‘anga‘anga ‘i he ‘akau, ka kuo pau ke ke tanu ia ‘i he ‘aho pē ko ia; he ko ia ‘oku tautau ko e koto mala‘ia ki he ‘Otua; koe‘uhiā ke ‘oua te mou ‘uli‘i ho kelekele ‘oku foaki kiate koe ‘e Sihova ko ho ‘Otua.