Read KO E TOH TAPU KATOA TONGA KO TEUTALŌNOME 23 Bible Online

KO TEUTALŌNOME 23 - KO E TOH TAPU KATOA TONGA bible

KO TEUTALŌNOME 23

¹‘E ‘ikai hū ki he fakataha ‘a e ‘Eiki ‘a e toko taha kuo faito‘o, pe kuo tu‘usi hono potu.

²‘E ‘ikai hū ki he fakataha ‘a e ‘Eiki ha tupu fe‘auaki; na‘a mo e hongofulu‘i to‘utangata ‘o hono hako ‘e ‘ikai hū ki he fakataha ‘a e ‘Eiki.

³‘E ‘ikai hū ki he fakataha ‘a e ‘Eiki ha ‘Āmoni pe ha Moape; na‘a mo e hongofulu‘i to‘utangata ‘o hono hako ‘e ‘ikai hū ha taha ki he fakataha ‘a e ‘Eiki, ‘o ta‘engata:

⁴koe‘uhiā na‘e ‘ikai te nau tali koe ‘i he hala ‘aki ha me‘akai mo e vai, ‘i ho‘omou omi mei ‘Isipite; pea koe‘uhi na‘a nau nō ‘a Pēlami foha ‘o Peoli mei Pētoli ‘i Mesopotēmia, ke ta‘ofi koe mo tukitala‘i.

⁵Ka na‘e ‘ikai finangalo ‘a e ‘Eiki ko ho ‘Otua ke tokanga kia Pēlami; ka ka liliu ‘e Sihova ko ho ‘Otua ‘a e mala ko ha monū, koe‘uhiā na‘e ‘ofa kiate koe ‘e Sihova ko ho ‘Otua.

⁶‘E ‘ikai te ke feinga‘i ha‘anau lelei pe tu‘umālie lolotonga ho‘o mo‘ui, ‘o ta‘engata.

⁷‘E ‘ikai te ke fakalili‘a ki he ‘Ītomi, he ko ho kāinga: ‘e ‘ikai te ke fakalili‘a ki he ‘Isipite, he na‘a ke nofo ko e muli ‘i hono fonua.

⁸Ko hono tolu ‘o e to‘utangata ‘o hono hako te nau hū ki he fakataha ‘a e ‘Eiki.

⁹Ka ke ka ‘alu atu ‘o nofo ‘apitanga tau he fai mo ho ngaahi fili, te ke tauhi koe mei he me‘a kovi fua pē.

¹⁰Ka ‘i ai hao tangata ‘oku ta‘ema‘a, ko e tu‘utāmaki kuo hoko kiate ia ‘i he po‘uli, pea te ne ‘alu atu ki tu‘a ‘apitanga, ‘o ‘ikai te ne hū mai ki he ‘apitanga:

¹¹ka ‘oka faifai pea efiafi hifo, te ne kaukau ‘i ha vai: pea ka tō ‘a e la‘ā te ne toki hū mai ki he ‘apitanga.

¹²Pea ‘e ‘i ai hao potu faka‘ilonga‘i ‘i tu‘a ‘apitanga, pea ‘e fai ai ha‘o ‘alu ki tua‘ā.

¹³Pea ‘i ho‘o ‘ū nāunau ‘e ‘i ai hao ki‘i fohe, pea ka ‘i ai ha‘o tu‘usike ‘i tua‘ā, te ke fai‘aki ha keli, pea te ke foki ‘o ‘ufi‘ufi ‘a e me‘a kuo tō meiate koe.

¹⁴He ‘oku hā‘ele ‘a Sihova ko ho ‘Otua ‘i ho loto ‘apitanga ke fakahaofi koe, pea ke tuku atu ho ngaahi fili ‘i ho ‘ao; ko ia ‘e tāpuhā ho ‘apitanga, ke ‘oua te ne ‘afio‘i ‘i ho lotolotonga ha me‘a ‘oku kau ki ha telefua, na‘a ne sītakafalu kiate koe.

¹⁵‘Ē, ‘ikai te ke tukuange ha pōpula ki he‘ene ‘eiki, ka kuo ne hola mai kiate koe:

¹⁶ka te ne nofo kiate koe ‘i ho lotolotonga, ‘i ha potu te ne fili ki ai ‘i hao kolo ‘e taha, ‘a ia ‘oku ne lata ai: ‘e ‘ikai te ke fakamālohia ia.

¹⁷‘E ‘ikai ha ta‘ahine ‘Isileli ‘e pa‘umutu, pea ‘e ‘ikai ha tama ‘Isileli ‘e nofo ki he fai fakasōtoma.

¹⁸‘E ‘ikai te ke fakahū ki he fale ‘o Sihova ko ho ‘Otua ‘a e to‘ongapō ‘a ha fefine fe‘auaki, pe ko e totongi ‘a ha kulī, neongo pe ko e hā ‘a e tukumo‘ui na‘e fai: he ‘oku fakalielia‘ia ‘a Sihova ko ho ‘Otua ‘i hē mo ē fakatou‘osi.

¹⁹‘E ‘ikai te ke ‘eke toloi ki ho kāinga ‘i ho‘o tali ha nō pa‘anga, ha toloi pa‘anga, pe ha toloi me‘akai, mo e hā fua ha me‘a ‘oku fa‘a ‘eke toloi ai.

²⁰Ka ko ha taha ‘i ha kakai kehe, ‘e ngofua ha‘o ‘eke toloi ki ai, ka ‘e ‘ikai te ke ‘eke toloi ki ho kāinga: kae tāpuaki koe ‘e Sihova ko ho ‘Otua ‘i he me‘a kotoa ‘oku ke ala ki ai ke fai ‘i he fonua ‘oku ke ‘alu ki ai ke ma‘u.

²¹Ka kuo ke fai ha‘o tukumo‘ui kia Sihova ko ho ‘Otua, ‘e ‘ikai te ke fakatotoka ‘i hono fakaai: he kuo pau ke ‘eke ia kiate koe ‘e Sihova ko ho ‘Otua, kae‘uma‘ā te ke hia ai.

²²Ka ‘o kapau te ke faka‘ehi‘ehi mei he fai ‘o ha tukumo‘ui, tala‘ehai te ke angahala ai.

²³Ko e me‘a kuo ‘alu atu mei ho ngutu te ke tokanga ki ai ke fai; pe ko e hā ho‘o tukumo‘ui kuo ke fai kia Sihova ko ho ‘Otua, ‘a e me‘a‘ofa kuo ke lea ki ai ‘aki ho ngutu.

²⁴Ka ke ka hū ki he ngoue vaine ‘a ho kaungā‘api, te ke fa‘iteliha ha‘o kai kālepi ai, ‘o a‘u ki ha‘o mākona, kae ‘ikai te ke ‘ai ha me‘a ki ho‘o kato.

²⁵Ka ke ka hū ki he ngoue uite ‘a ho kaungā‘api kuo motu‘u, ‘e ngofua ha‘o toli ‘a e ngaahi fo‘i uite ‘aki ho nima; ka ‘e ‘ikai te ke apo ha hele ki he uite ‘a ho kaungā‘api.