Read KO E TOH TAPU KATOA TONGA KO TEUTALŌNOME 24 Bible Online

KO TEUTALŌNOME 24 - KO E TOH TAPU KATOA TONGA bible

KO TEUTALŌNOME 24

¹KA mali ha tangata mo ha fefine, ‘o na nonofo, pea ka faifai pea ‘ikai te ne kei matamatalelei‘ia ai, koe‘uhi tokua ko ‘ene ‘ilo ‘i he fefine ha me‘a fakalielia,[22] pea ke ne fai ha tohi vete ‘o ‘ange ki hono nima, ‘o tuku atu ia mei hono ‘api.

²Pea ‘i he‘ene hiki atu mei hono ‘api, ‘e ngofua ‘ene ‘alu ‘o nonofo mo ha tangata kehe.

³Pea kapau ‘e fehi‘a kiate ia ‘e he husepāniti kimui, ‘o ne fai ha‘ane tohi vete, ‘o ‘ange ki hono nima, ‘o tuku atu mei hono ‘api; pe ‘o kapau ‘e pekia ‘a e husepāniti kimui, ‘a ia na‘e mali mo e fefine ‘o na nonofo:

⁴‘e ‘ikai ngofua ke toe mali mo ia ‘e hono husepāniti mu‘a na‘a ne tukuange ia; ‘osi, kuo ‘uli‘i ‘a e fefine; he ko e me‘a fakalielia ia ‘i he ‘ao ‘o e ‘Eiki: ‘o ‘oua te ke fakaangahala‘i ‘a e fonua ‘a ia ‘oku foaki kiate koe ‘e Sihova ko ho ‘Otua mo‘o tofi‘a.

⁵Ka kuo ma‘u ‘e ha tangata ha uaifi fo‘ou, ‘e ‘ikai te ne ‘alu atu ‘i he tau, pea ‘e ‘ikai hilifaki kiate ia ha fatongia: te ne ‘ata‘atā pē ke nofo ‘api, ‘o ta‘u kātoa, pea te ne fakafiemālie ‘a e uaifi kuo ne ma‘u.[23]

⁶‘E ‘ikai to‘o mo‘o talifaki ‘a e me‘a momosi, pe ko e maka ‘olunga; he ko e talifaki ‘aki ‘ene mo‘ui ia.

⁷Ka ‘ilo ha tangata kuo ne kaiha‘asi ha taha ‘o hono kāinga ko ha‘a ‘Isileli, ‘o ne ngaohi hangē ha pōpula, pe kuo ne fakatau ia; pea ‘e mate ‘a e kaiha‘a ko ia: ka ke ‘ave ‘a e kovi mei ho lotolotonga.

⁸Tokanga ‘i he mala ko e kilia ke ke mātu‘aki tauhi mo fai ‘a e me‘a kotoa ‘e ako kiate kimoutolu ‘e he kau Līvai taula‘eiki: hangē ko ‘eku tu‘utu‘uni kiate kinautolu ‘e pehē ho‘omou tokanga ke fai.

⁹Manatu ki he me‘a na‘e fai ‘e Sihova ko ho ‘Otua kia Meliame ‘i he hala, ‘i ho‘omou omi mei ‘Isipite.

¹⁰Ka kuo ke tali ‘a e nō ‘a ho kaungā‘api, neongo pe ko e hā ka ‘e ‘ikai te ke hū ki hono fale ke ‘omi ‘ene me‘a talifaki.

¹¹Te ke tu‘u pē ‘i tu‘a, pea ko e tangata ‘oku ke tali ‘ene nō te ne ‘omi ki tu‘a kiate koe ‘a e me‘a talifaki.

¹²Pea kapau ko e masiva, ‘e ‘ikai te ke mohe mo e me‘a talifaki.

¹³Kuo pau ke ke ‘ange ki ai ‘ene me‘a talifaki ‘i he ‘alu hifo ‘a e la‘ā, ke ne kafu ‘aki mo tāpuaki‘i koe: pea ‘e tu‘u ia ma‘ao mā‘oni‘oni ‘i he ‘ao ‘o Sihova ko ho ‘Otua.

¹⁴‘E ‘ikai te ke fakamālohia ha ngāue unga ‘oku ‘efihia mo masiva, pe ko e taha ‘o ho kāinga, pe ko ha taha ‘o e kakai muli ‘o ho fonua ‘oku ‘i ho kolo:

¹⁵te ke ‘ange ‘ene totongi ‘i hono ‘aho pē; ‘e ‘ikai ‘alu hifo ‘a e la‘ā ‘oku kei ‘iate koe; he ko si‘i ‘efihia, pea ko e me‘a ko ia ‘oku holi ki ai ‘ene mo‘ui: na‘a tangi ia kia Sihova koe‘uhi ko koe, pea ke hia ai.

¹⁶‘E ‘ikai mate ‘a e mātu‘a koe‘uhi ko e fānau, pea ‘e ‘ikai mate ‘a e fānau koe‘uhi ko e mātu‘a: ‘e mate takitaha koe‘uhi ko ‘ene angahala ‘a‘ana.

¹⁷‘E ‘ikai te ke piko‘i ‘a e fakamaau ‘o e muli, ‘a e tamai mate; pea ‘e ‘ikai te ke to‘o mo‘o talifaki ‘a e kofu ‘o e uitou:

¹⁸ka te ke manatu na‘a ke pōpula koe ‘i ‘Isipite, pea na‘e huhu‘i koe mei ai ‘e Sihova ko ho ‘Otua: ko hono ‘uhinga ia ‘oku ou kouna ai koe ke fai ‘a e me‘a ni.

¹⁹‘Oka ke ka utu ‘a e ta‘u ‘i ho‘o ngoue, pea kuo ngalo ha ‘ū uite ‘e taha, ‘e ‘ikai te ke foki ke ‘omai: ‘e tuku ia ki he muli, ki he tamai mate mo e uitou: koe‘uhiā ke tāpuaki‘i koe ‘e Sihova ko ho ‘Otua ‘i he ngāue kotoa pē ‘a ho nima.

²⁰‘Oka ke ka lulu ho fu‘u ‘ōlive, ‘e ‘ikai te ke lulu ‘angaua ‘a e ngaahi va‘a: ‘e tuku ia ki he muli, ki he tamai mate mo e uitou.

²¹‘Oka ke ka toli ho‘o ngoue vaine, ‘e ‘ikai te ke toe tufi: ‘e tuku ia ki he muli, ki he tamai mate mo e uitou.

²²Pea te ke manatu na‘a ke pōpula koe ‘i he fonua ko ‘Isipite: ko hono ‘uhinga ia ‘oku ou kouna ai koe ke fai ‘a e me‘a ni.